Bangyufula ya Batangi

Inki mutindu dibundu ya Bukristu ketadilaka kudya mbiki?

Ndinga ya Nzambi kebuyisaka kulauka malafu ti kudya mbiki sambu yo kele bikalulu yina fwete monana ve na kati ya bantu yina kesadilaka Nzambi. Yo yina, dibundu ya Bukristu ketadilaka muntu yina kezolaka ve kuyambula kikalulu ya kudya mbiki kiteso mosi ti muntu yina kevandaka ti kikalulu ya kulauka malafu. Bantu yina kevandaka ti kikalulu ya kulauka malafu mpi ya kudya mbiki lenda vanda ve na kati ya dibundu ya Bukristu.

Bingana 23:20, 21 ketuba nde: “Kuta kinduku ve na bantu yina ke nwaka malafu mingi to ke diaka mbiki. Bantu yina ke laukaka malafu ti bantu yina ke lutisaka  kiteso na kudia bo ta kuma bansukami. Kana kisalu na nge kele kaka kudia ti kulala, kubika fioti nge ta lwata bilele ya kufwa.” Na Kulonga 21:20, Nsiku ya Moize vandaka kulomba nde bo fwete fwa muntu ya “ntu-ngolo ti mubulu.” Verse yai ketubila bikalulu zole yina vandaka kumonana na muntu ya ntu-ngolo yina vandaka kuzola ve kubalula ntima: “kisalu na yandi kunwa malafu ti [kudya mbiki, NW].” Yo kele pwelele nde, na Izraele ya ntama, bo vandaka kundima ve nde bantu yina kuvandaka ti kikalulu ya kudya mbiki kuvanda na kati ya bantu yina vandaka kuzola kusadila Nzambi.

Kansi, kudya mbiki kele inki, mpi nki Masonuku ya Kigreki ya Bukristu ketubaka sambu na yo? Muntu yina kedyaka mbiki kele “muntu yina kevandaka ti kikalulu ya bwimi mpi ya kukonda kufuluka madya mpi malafu.” Ntendula yai kemonisa nde kudya mbiki kele mutindu mosi ya bwimi, mpi Ndinga ya Nzambi kesonga beto nde “bantu ya bwimi” (NW) kele na kati ya bantu yina takota ve na Kimfumu ya Nzambi. (1 Korinto 6:9, 10; Filipi 3:18, 19; 1 Piere 4:3) Dyaka, ntangu ntumwa Polo kukebisaka Bakristu na yina metala kusala bisalu “ya kimuntu,” yandi tangaka mpi ‘kunwa ngolo, kukwenda na bafete yina ya bantu kesalaka mambu ya kisakasaka, mpi kusala mambu yankaka ya mbi.’ (Galatia 5:19-21) Mbala mingi, kulutisa ndilu na kudya kekwendaka kumosi ti kunwa ngolo mpi kusala bafete ya bantu yina kesalaka mambu ya kisakasaka. Dyaka, ntembe kele ve nde kudya mbiki kele na kati ya “mambu ya nkaka” yina Polo kutubilaka. Sambu na yina metala bisalu “ya kimuntu,” Mukristu yina mezabanaka mingi nde yandi kevandaka ti kikalulu ya kudya mbiki, mpi yandi kebuyaka kusoba kikalulu na yandi ya bwimi na nku, bo fwete basisa yandi na dibundu.​—1 Korinto 5:11, 13. *

Ata Ndinga ya Nzambi ketadilaka muntu ya kelaukaka malafu kiteso mosi ti yina kevandaka ti kikalulu ya kudya mbiki, kuzaba muntu yina kelaukaka malafu kele mpasi ve kansi kuzaba muntu yina kele ti kikalulu ya kudya mbiki kele mpasi mingi. Mbala mingi, bidimbu yina kemonisaka nde muntu melauka malafu kemonanaka pwelele. Kansi, yo kele mpasi mingi na kuzaba nde kingandi kele ti kikalulu ya kudya mbiki, sambu yo kemonanaka ve kaka na meso. Yo yina, yo kelombaka nde bankuluntu ya dibundu kukeba mingi mpi kuvanda na luswasukusu ya ngolo mpenza na ntangu bo ketadila mambu ya mutindu yai.

Mu mbandu, nene ya kuluta kiteso lenda vanda kidimbu ya kemonisa nde muntu kele ti kikalulu ya kudya mbiki, kansi yo kevandaka ve mutindu yina sambu na bantu yonso. Nene ya kuluta kiteso lenda vanda maladi. Nene ya fami lenda kumisa mpi muntu nene ya kuluta kiteso. Beto fwete vila mpi ve nde nene ya kuluta kiteso kevandaka na nitu, kansi kikalulu ya kudya mbiki kevandaka na mabanza ya muntu. Nene ya kuluta kiteso kemonanaka na mutindu nitu kevimbaka na kiteso mosi ya kuluta ndilu, kansi kikalulu ya kudya mbiki kele bwimi to kusosa kufuluka na kiteso ya kuluta ndilu. Yo yina, sambu na kuzaba muntu yina kele ti kikalulu ya kudya mbiki, yo kelombaka ve kutala nene na yandi, kansi kikalulu ya yandi kevandaka ti yo na ntwala ya madya. Muntu lenda vanda ti kikalulu ya kudya mbiki kansi yandi kemonana nene ya kufwana to nkutu nitu fyoti kibeni. Dyaka, bantu ya konso insi kevandaka ti mutindu na bo ya kutadila bakilo to nene yina mefwana na muntu.

Inki bidimbu kesongaka nde muntu kele ti kikalulu ya kudya mbiki? Muntu ya mutindu yai kemonisaka ntangu yonso kukonda kudiyala, to nkutu kedyaka na bwimi yonso tii kuna yandi tafuluka na kiteso ya kuluta ndilu yina lenda sala nde yandi kudiwa dyaka mbote ve to nkutu yandi bela. Kukonda kudiyala na yandi kemonisaka mpenza nde yandi kekudibanzaka ve na kukonda kufingisa Yehowa ti na kutanina lukumu ya mbote ya bantu na Yandi. (1 Korinto 10:31) Dyaka, kana muntu kedya mbala mosi-mosi na kiteso ya kuluta ndilu, yo fwete nata ve bampangi na kutuba nswalu nde yandi kele “muntu ya bwimi.” (Efezo 5:5, NW) Ata mpidina, na kutadila Galatia 6:1, Mukristu ya mutindu yina lenda vanda na mfunu ya lusadisu. Polo ketuba nde: “Bampangi, kana bo me kanga muntu mosi ke sala konso mambu ya mbi, beno bantu yina ke na Mpeve ya Nzambi, beno vutula yandi na nzila ya mbote, na malembe yonso.”

Sambu na nki bandongisila ya Biblia ya metala kubuya kulutisa ndilu na kudya kele mfunu mingimingi na bilumbu na beto? Sambu, Yezu kukebisaka mutindu yai, mingimingi sambu na bilumbu na beto: “Beno keba! Beno lenda yindula ve na kusala bafete konso ntangu to na kulauka malafu, beno lenda yindula bampasi ya luzingu yai ve; kana ve, kilumbu yina ta kwisila beno na kintulumukina, . . . bonso mutambu.” (Luka 21:34, 35) Kuyambula kikalulu ya kulutisa ndilu na kudya kele mutindu mosi ya mfunu ya kubuya luzingu mosi yina lenda bebisa kimpeve na beto.

Bukatikati kele kikalulu mosi ya mbote ya Bukristu. (1 Timoteo 3:2, 11) Yo yina, ntembe kele ve nde Yehowa tasadisa bantu yonso yina kesosaka kusadila na masonga yonso bandongisila ya Biblia yina metala kumonisa bukatikati na kudya ti kunwa.​—Baebreo 4:16.

[Noti na nsi ya lutiti]