Keti Kele ti Kilumbu Beto Tavanda na Lutaninu ya Kyeleka?

NANI kevandaka ve na kyese na kumona bana kesakana na kyese ti bibuti na bo ya zola? Bana kekudiwaka mpenza na lutaninu ntangu bo kevandaka ti bibuti yina ketudilaka bo dikebi. Kansi, bana mingi kezwaka ve bantangu ya kyese ya mutindu yina. Nkutu, bana yankaka kevandaka konso kilumbu na susi ya kuzaba kisika ya bo takwenda kulala. Keti kivuvu kele sambu na bana ya mutindu yina ya kekondaka kisika ya kulala mpi bantu yankaka yina kezingaka kukonda lutaninu?

Ata yo lenda monana nde kivuvu kele ve sambu na bilumbu kekwisa, Ndinga ya Nzambi kepesa kivuvu. Profete Yezaya kutubaka na ntwala nde kele ti kilumbu bantu yonso tazinga na lutaninu mpenza. Yandi sonikaka nde: “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve.”​—Yezaya 65:21, 22.

Kansi, keti kivuvu yai kele mpenza ya kyeleka? Nkutu, ngogo “kivuvu” ketendulaka ve ntangu yonso nde dyambu kele ya kyeleka. Mu mbandu, na Brésil, bantu ketubaka mingi nde: “A esperança é a última que morre.” Yo ketendula nde, “Kivuvu kevandaka kima ya nsuka ya kefwaka.” Dyambu yai kemonisa nde bantu mingi kelandaka na kutula kivuvu ata na ntangu kima ya kyeleka ya kutudila kivuvu kevandaka ve. Kansi, kivuvu yina Nzambi ya moyo kepesa beto kele ya kuswaswana. Ntumwa Polo kusonikaka nde: “Konso muntu yina ke tulaka ntima na Mfumu Nzambi, Mfumu Nzambi ta monisa yandi nsoni ve.” (Roma 10:11) Bambikudulu ya Biblia yina melunganaka dezia kendimisa beto nde balusilu yonso yankaka ya Yehowa Nzambi mesilaka talungana. Ntangu balusilu yina talungana, mambu yina kesalaka nde bana kuzinga na babalabala tavanda dyaka ve.

Ata bubu yai, kusadila bandongisila ya Biblia lenda sadisa bantu ya kukonda kivuvu na kutomisa luzingu na bo mpi na kuzwa lutaninu ya kyeleka. Inki mutindu yo tasalama? Bambangi ya Yehowa ya kisika yina nge kezingaka tavanda na kyese na kusadisa nge na kuzwa mvutu na ngyufula yai.