Landa Mbandu Yina Yezu Kusongaka
Landa Mbandu Yina Yezu Kusongaka
“Mono me songa beno mbandu, sambu beno kusala mutindu mono me sala beno.”—YOANE 13:15.
1. Inki kesala nde Yezu kuvanda mbandu yina Bakristu fwete landa?
NA KATI ya bantu yonso yina mezingaka na zulu ya ntoto, muntu mosi mpamba mezingaka luzingu na yandi ya mvimba kukonda kusala masumu. Muntu yango kele Yezu. Katula Yezu, ‘kele ve ata ti muntu mekondaka kusala masumu.’ (1 Bantotila 8:46; Roma 3:23) Yo yina, Bakristu ya kyeleka ketadilaka Yezu nde yandi kele mbandu ya kukuka ya bo fwete landa. Ya kyeleka, na Nisani 14 ya mvu 33 ya T.B., ntangu fyoti na ntwala ya lufwa na yandi, Yezu yandi mosi kusongaka balongoki na yandi na kulanda mbandu na yandi. Yandi tubaka nde: “Mono me songa beno mbandu, sambu beno kusala mutindu mono me sala beno.” (Yoane 13:15) Na mpimpa yina ya nsuka, Yezu kutangaka mambu mingi yina Bakristu fwete sala kikesa na kulungisa sambu na kuvanda bonso yandi. Na disolo yai, beto tatadila mwa mambu yango.
Mfunu ya Kudikulumusa
2, 3. Na nki mambu Yezu kuvandaka mbandu mosi ya kukuka ya kudikulumusa?
2 Ntangu Yezu kulongisilaka balongoki na yandi na kulanda mbandu yina yandi songaka bo, yandi vandaka kutubila mingimingi kikalulu ya kudikulumusa. Mbala mingi, yandi longisilaka balongoki na yandi na kuvanda bantu ya kudikulumusa, mpi na mpimpa ya Nisani 14, yandi monisaka kudikulumusa na yandi mosi ntangu yandi yobisaka makulu ya bantumwa na yandi. Yezu kutubaka nde: “Kana mono muntu kele Mfumu ti Longi, mono me yobisa beno makulu, beno na kati na beno, beno mpi fweti yobisa makulu beno na beno.” (Yoane 13:14) Na nima, yandi lombaka bantumwa na yandi na kulanda mbandu yina yandi songaka bo. Yo vandaka mpenza mbandu mosi ya mbote ya kudikulumusa!
3 Ntumwa Polo ketubila beto nde na ntwala ya kukwisa na ntoto, Yezu vandaka “na lukumu ya Nzambi.” Ata mpidina, yandi buyaka mambu yina yonso mpi yandi kumaka muntu ya kukonda mfunu. Nkutu, “yandi kudikulumusaka mpenza, yandi mpi lemfukaka na Nzambi tii kuna ya yandi fwaka na zulu ya [nti ya mpasi, NW].” (Filipi 2:6-8) Yindula fyoti. Yezu, yina kele muntu ya zole ya kuluta nene na luyalanganu, kundimaka na kukuma na nsi ya bawanzyo, na kubutuka bonso bebe mosi ya kukonda ngolo, na kuyela mpi na kulemfukila bibuti ya kukonda kukuka, mpi nsukansuka na kufwa bonso muntu mosi ya mbi yina bantu vandaka kuvweza. (Kolosai 1:15, 16; Baebreo 2:6, 7) Ya kyeleka, yai kele kudikulumusa mosi ya nene! Keti mpila kele ya kulanda mbandu ya “mabanza” yina mpi kuyedisa “kudikulumusa” ya mutindu yina? (Filipi 2:3-5) Ee, kansi yo kele ve pete.
4. Inki mambu kekumisaka bantu lulendo, kansi sambu na nki lulendo kele kigonsa?
4 Kana muntu kele ve ya kudikulumusa, yandi kele lulendo. (Bingana 6:16-19) Lulendo kunataka Satana na kubwa. (1 Timoteo 3:6) Yo keyelaka kukonda mpasi na ntima ya bantu, mpi kana yo mebaka kisika, yo kevandaka mpasi na kukatula yo. Bantu kevandaka lulendo sambu na insi na bo, mpusu ya nitu na bo, bima na bo, nzo-nkanda ya bo mesalaka, mambu ya bo kesalaka na kisalu ya kinsuni, kisika yina bo kele na yo na kimvuka ya bantu, kimuntu na bo ya nganda, mayele na bo ya kusala bansaka, mpi sambu na mambu yankaka. Kansi, na kati ya bima yina yonso, ata kima mosi ve kele mfunu na meso ya Yehowa. (1 Korinto 4:7) Mpi kana yo kepusa beto na kukuma lulendo, beto fwete zaba nde yo kebebisa bangwisana na beto ti yandi. “Mfumu Nzambi kele ntama kuna na zulu, yandi ke talaka bantu yina ke kudikulumusaka; bantu ya lulendo mpi yandi ke zabaka bo [na ntama, NW].”—Nkunga 138:6; Bingana 8:13.
Kudikulumusa na Kati ya Bampangi
5. Sambu na nki yo kele mfunu nde bankuluntu kuvanda bantu ya kudikulumusa?
5 Ata beto kepesa konso nki lusadisu yina mpi beto kesala konso nki mambu na kisalu ya Yehowa, yo fwete kumisa beto ve lulendo. Mikumba yina beto kele na yo na dibundu fwete kumisa beto mpi ve lulendo. (1 Bansangu 29:14; 1 Timoteo 6:17, 18) Nkutu, na ntangu beto kebaka mikumba ya kuluta nene, kudikulumusa na beto mpi fwete kumaka mingi. Ntumwa Piere kulongisilaka bankuluntu na kukonda kuvanda ‘na mabanza ya kuyala bantu yina ya Nzambi pesaka bo na kutala, kansi na kuvanda bantu yina kesongaka mbandu ya mbote na kati ya mameme.’ (1 Piere 5:3) Bo keponaka bankuluntu sambu na kuvanda bansadi mpi bantu yina kepesa mbandu, kansi bamfumu ve.—Luka 22:24-26; 2 Korinto 1:24.
6. Bakristu kele na mfunu ya kudikulumusa na nki mambu ya luzingu?
6 Bankuluntu mpamba ve bantu kele na mfunu ya kumonisa kudikulumusa. Piere kusonikaka mutindu yai sambu na bana-babakala yina lenda vanda lulendo sambu na mayele na bo ya kuyindula nswalu mpi na ngolo yina bo kele na yo na nitu kuluta bambuta: “Beno fweti sadisana beno na beno kukonda lulendo, sambu Mukanda ya Nzambi ke tuba nde: ‘Nzambi kele mbeni ya bantu ya lulendo, kansi yandi ke songaka mambote na yandi na bantu yina ke na lulendo ve.’” (1 Piere 5:5) Ya kyeleka, beto yonso kele na mfunu ya kikalulu ya kudikulumusa bonso yina ya Kristu. Yo kelombaka kudikulumusa sambu na kusamuna nsangu ya mbote, mingimingi na ntangu beto kekutana ti bantu yina kezola ve kuwa nsangu yango to kemenga beto. Yo kelombaka mpi kudikulumusa sambu na kundima bandongisila mpi kukumisa luzingu na beto petepete sambu na kudipesa mingi na kisalu ya kusamuna. Dyaka, beto kele na mfunu ya kudikulumusa, kikesa, mpi lukwikilu na ntangu beto kekanga ntima na bansangu yina bantu kepanzaka sambu na kuvweza beto, na kunwanisa yina leta kenwanisaka beto, to na mpasi ya nku yina bantu kemonisaka beto.—1 Piere 5:6.
7, 8. Inki mambu lenda sadisa beto na kuyedisa kikalulu ya kudikulumusa?
7 Inki mutindu muntu lenda yambula lulendo sambu na kukuma na “mabanza” ya “kudikulumusa, . . . [mpi] kubaka bantu ya nkaka nde bo me luta yandi”? (Filipi 2:3) Muntu yango fwete kuditadila mutindu Yehowa ketadilaka yandi. Yezu kutendulaka mutindu ya mbote ya muntu fwete kuditadila na ntangu yandi tubaka nde: “Yo kele mutindu mosi mpi na beno. Kana beno me sala mambu yina yonso ya Nzambi me songaka beno na kusala, beno tuba kaka nde: ‘Beto kele ka beto bampika. Beto me sala kaka mambu yina ya mfumu na beto songaka beto na kusala.’” (Luka 17:10) Kuvila ve nde, ata kima mosi ve ya beto lenda sala lenda tesana ti yina ya Yezu kusalaka. Kansi, Yezu kuvandaka muntu ya kudikulumusa.
8 Dyaka, beto lenda lomba Yehowa na kusadisa beto na kuyedisa mutindu ya mbote ya beto fwete kuditadilaka. Bonso muyimbi-bankunga, beto lenda samba nde: “Longa mono mambote, mayele ti nzayilu, sambu mono ketulaka lukwikilu na bansiku na nge.” (Nkunga 119:66, NW) Yehowa tasadisa beto na kuyedisa mutindu ya mayele mpi ya bukatikati ya kuditadila, mpi yandi tasakumuna beto sambu na mabanza na beto ya kudikulumusa. (Bingana 18:12) Yezu kutubaka nde: “Nzambi ta kulumusa bantu yina yonso ke kudinangulaka, ebuna yandi ta nangula bayina yonso ke kudikulumusaka.”—Matayo 23:12.
Mutindu ya Mbote ya Kutadila Mambu ya Mbote ti ya Mbi
9. Inki mutindu Yezu vandaka kutadila mambu ya mbote ti ya mbi?
9 Ata Yezu kuzingaka bamvula 33 na kati ya bantu ya kukonda kukuka, yandi “salaka masumu ve.” (Baebreo 4:15) Nkutu, ntangu muyimbi-bankunga kutubilaka mambu yina metala Mesia, yandi tubaka nde: “Nge kezolaka lunungu, nge keyinaka mambu ya mbi.” (Nkunga 45:7, NW; Baebreo 1:9) Na mambu yai mpi, Bakristu kesalaka ngolo sambu na kulanda mbandu ya Yezu. Bo kesukaka kaka ve na kuzaba mambu ya mbote ti ya mbi; kansi bo keyinaka mambu ya mbi mpi bo kezolaka mambu ya mbote. (Amosi 5:15) Kusala mutindu yai kesadisaka bo na kunwana ti bampusa ya kubutukila yina bo kevandaka na yo ya kusala masumu. —Kuyantika 8:21; Roma 7:21-25.
10. Kana beto kesala “mambu ya mbi” mpi beto kebalula ve ntima, yo tasonga nde beto kesala inki?
10 Yezu kutubilaka Mufarize mosi na zina ya Nikodemo nde: “Konso muntu yina ke salaka mambu ya mbi, yandi ke buyaka [“keyinaka,” NW] mwini; yandi ke kwisaka penepene na mwini ve, mbaimbai mambu na yandi ya mbi ta monana. Kansi muntu yina ke salaka mambu ya kieleka, yandi ke kwisaka penepene na mwini, sambu bo mona nde yandi ke lemfukilaka Nzambi na mambu yina ya yandi ke salaka.” (Yoane 3:20, 21) Yibuka dyambu yai: Yoane kubingaka Yezu nde ‘nsemo ya kieleka, yina ketemusaka bantu yonso.’ (Yoane 1:9, 10) Kansi, Yezu kutubaka nde kana beto kesala “mambu ya mbi” disongidila, mambu yina kele ve ya mbote, yina Nzambi kendimaka ve, yo ketendula nde beto keyinaka nsemo. Keti nge meyindulaka ntete nde nge lenda yina Yezu ti bansiku na yandi? Kansi, bantu mingi yina kesalaka masumu mpi kebalulaka ve ntima kesalaka buna. Ziku bo keyindulaka ve nde bo keyinaka Yezu ti bansiku na yandi, yo ke pwelele nde Yezu kemonaka bo nde bo keyinaka yandi ti bansiku na yandi.
Mutindu ya Kuyedisa Mabanza Yina Yezu Kuvandaka na Yo na Yina Metala Mambu ya Mbote ti ya Mbi
11. Inki beto fwete sala kana beto kezola kuyedisa mabanza yina Yezu kuvandaka ti yo na yina metala mambu ya mbote ti ya mbi?
11 Beto kele na mfunu ya kubakisa pwelele mambu yina kele ya mbote ti yina kele ya mbi na meso ya Yehowa. Beto kebakisaka yo kaka na ntangu beto kelongukaka Ndinga ya Nzambi, Biblia. Na ntangu beto kelanda na kulonguka mutindu yina, beto fwete sambaka bonso muyimbi-bankunga nde: “Mfumu, songa mono nzila ya nge zola nde mono landa, longa mono na kuzinga mutindu nge zola.” (Nkunga 25:4) Kansi, kuvila ve nde, Satana kekusaka bantu. (2 Korinto 11:14) Yandi lenda sala nde mambu ya mbi kumonana bonso nde yo kele ya mbote na meso ya Mukristu yina kele na eksperiansi mingi ve. Yo yina, beto fwete yindululaka na mudindu mambu yina beto kelonguka mpi kulanda mbotembote bandongisila ya “mpika ya kwikama mpi ya mayele.” (Matayo 24:45-47, NW) Kulonguka, kusamba, mpi kuyindulula mambu ya beto kelonguka tasadisa beto na kuyela mpi na kuvanda na kati ya bantu yina “me yikanaka konso ntangu na kuswasisa mambu ya mbote ti mambu ya mbi.” (Baebreo 5:14) Mpidina, beto takuma na kikalulu ya kuyina mambu ya mbi mpi ya kuzola mambu ya mbote.
12. Inki ndongisila ya Biblia kesadisa beto na kukonda kukulula bansiku?
12 Kana beto keyina mambu ya mbi, beto tapesa ve nzila nde mpusa mosi ya mambu ya mbi kuyela na ntima na beto. Bamvula mingi na nima ya lufwa ya Yezu, ntumwa Yoane kusonikaka nde: “Beno zola ve luzingu ya nsi-ntoto ti bima yonso kele awa na nsi-ntoto. Kana muntu ke zolaka luzingu ya nsi-ntoto, yandi ke zolaka Tata Nzambi ve. Sambu bima yai yonso kele awa na nsi-ntoto: bima yina ya nitu na beto ti meso na beto ke monaka nzala na yo ti bima yina ya beto ke tulaka lulendo sambu na yo, bima yai yonso ke katukaka na Tata Nzambi ve kansi yo ke katukaka awa na nsi-ntoto.”—1 Yoane 2:15, 16.
13, 14. (a) Sambu na nki kuzola bima ya inza kele kigonsa sambu na Bakristu? (b) Inki mutindu beto lenda buya kuyedisa zola ya bima yina kele na inza?
13 Bantu yankaka lenda tuba nde bima yonso ve yina kele na inza kele mbi. Ata mpidina, inza ti bima na yo yina kebendaka bantu lenda katula dikebi na beto na kisalu ya Yehowa. Mpi inza kepesaka ve ata kima mosi yina lenda sadisa beto na kukwenda penepene na Nzambi. Yo yina, kana beto keyedisa zola sambu na bima yina kele na inza, ata na bima yina lenda monana nde yo kele kwa yo ya mbi ve, beto kekuditula na kigonsa. (1 Timoteo 6:9, 10) Dyaka, bima mingi yina kele na inza kele ya mbi mpenza mpi yo lenda bebisa beto. Kana beto ketala bafilme to baprograme ya televizio yina kesongaka mubulu, nzala ya kuvanda ti bima mingi, to mansoni, beto lenda yantika na kundima bima yango mpi yo lenda pukumuna beto. Kana beto kesala kinduku ti bantu yina lukanu na bo ya ntetentete kevandaka ya kutomisa luzingu na bo ya kinsuni to ya kuyedisa mumbongo na bo, beto mpi lenda yantika kutula bima ya mutindu yina na kisika ya ntete.—Matayo 6:24; 1 Korinto 15:33.
14 Kansi, kana beto kemona kyese na Ndinga ya Yehowa, “bima yina ya nitu na beto ti meso na beto ke monaka nzala na yo ti bima yina ya beto ke tulaka lulendo sambu na yo,” tabendaka beto ve. Dyaka, kana beto kesala kinduku ti bantu yina ketulaka mambote ya Kimfumu ya Nzambi na kisika ya ntete, beto takuma bonso bo, beto tazolaka bima yina ya bo kezolaka mpi tabuyaka bima yina ya bo kebuyaka.—Nkunga 15:4; Bingana 13:20.
15. Inki mutindu kuzola lunungu mpi kuyina mambu ya mbi, bonso Yezu, kepesa beto kikesa?
15 Sambu Yezu kuyinaka mambu ya mbi mpi yandi zolaka lunungu, yo sadisaka yandi na kutula meso na yandi kaka na “kiese yina vandaka kuvingila yandi.” (Baebreo 12:2) Beto mpi lenda sala mutindu mosi. Beto mezaba nde “nsi-ntoto ti bima yonso kele na yo ya bantu ke zolaka, yo ke [luta, NW].” Konso kyese yina inza yai lenda pesa kele kaka ya ntangu fyoti. Kansi, “muntu yina ke salaka mambu yina ya Nzambi ke zolaka, yandi ke zingaka mvula na mvula.” (1 Yoane 2:17) Sambu Yezu kusalaka luzolo ya Nzambi, yandi kangudilaka bantu nzila ya kubaka luzingu ya mvula na mvula. (1 Yoane 5:13) Bika nde beto yonso kulanda mbandu na yandi mpi kubaka mambote ya kwikama na yandi.
Kukanga Ntima na Bampasi
16. Sambu na nki Yezu kulongisilaka balongoki na yandi na kuzolana bo na bo?
16 Yezu kutubilaka dyambu yankaka yina balongoki na yandi fwete sala sambu na kulanda mbandu na yandi, ntangu yandi tubaka nde: “Nsiku na mono yo yai: Beno zolana beno na beno, mutindu mono ke zolaka beno.” (Yoane 15:12, 13, 17) Bikuma kele mingi yina fwete pusa Bakristu na kuzola bampangi na bo. Kansi na ntangu Yezu kutubilaka zola yai, yandi vandaka kuyindula ntetentete kimbeni yina balongoki na yandi takutana na yo na inza. Yandi tubaka nde: “Kana bantu ya nsi-ntoto yai kumenga beno, beno fweti zaba nde bo mengaka mono ntete. . . . ‘Ata mpika mosi ve me luta mfumu na yandi.’ Kana bo vandaka kumonisa mono mpasi, bo ta monisaka beno mpasi mpi.” (Yoane 15:18, 20) Ya kyeleka, ata na ntangu ya mpasi, Bakristu kevandaka bonso Yezu. Bo fwete yedisa bangwisana ya ngolo mpi ya zola yina tasadisa bo na kukanga ntima na kimbeni yango.
17. Sambu na nki inza kemengaka Bakristu ya kyeleka?
17 Sambu na nki yo lombaka nde inza kumenga Bakristu? Sambu, bonso Yezu, bo kele “bantu ya nsi-ntoto yai ve.” (Yoane 17:14, 16) Bo kekotaka ve na mambu ya metala basoda ti na mambu ya politiki, bo kezitisaka minsiku ya Biblia ya metala busantu ya luzingu, mpi bo kelandaka minsiku ya kuzanguka ya bikalulu ya mbote. (Bisalu 15:28, 29; 1 Korinto 6:9-11) Balukanu na bo ya ntete kevandaka ya kimpeve, kansi ya kinsuni ve. Bo kezingaka na ntoto, kansi mutindu Polo kusonikaka, bo ‘kesadilaka yo ve na mambu yonso.’ (1 Korinto 7:31, NW) Ya kyeleka, bantu mingi mesikisaka Bambangi ya Yehowa sambu na minsiku ya kuzanguka yina bo kelandaka. Kansi, Bambangi ya Yehowa kekululaka ve bansiku sambu bantu kusepela na bo to kundima bo. Yo yina, bantu mingi ya inza kebakisaka bo ve mpi bamingi kemengaka bo.
18, 19. Na kulandaka mbandu ya Yezu, inki nkadilu Bakristu kevandaka na yo na ntangu bo kemengaka bo mpi kenyokulaka bo?
18 Bantumwa ya Yezu kumonaka kimbeni ya ngolo ya inza na ntangu bambeni kukangaka Yezu mpi kufwaka yandi, mpi bo monaka nkadilu ya Yezu kuvandaka na yo na ntwala ya bambeni yango. Na kilanga ya Getsemane, bambeni yina vandaka kumenga lusambu ya Yezu kwisaka kukanga yandi. Piere mekaka na kusadila mbele sambu na kutanina yandi, kansi Yezu kusongaka Piere nde: “Vutula mbele na nge na kisika na yo, sambu bantu yina yonso ke sadilaka mbele bo ta fwa mpi na mbele.” (Matayo 26:52; Luka 22:50, 51) Na ntangu ya ntama, bantu ya Izraele vandaka kunwanisa bambeni na bo na mbele. Kansi, na ntangu ya Yezu, mambu kusobaka. Kimfumu ya Nzambi kuvandaka ya “nsi-ntoto yai ve” mpi yo vandaka ve ti bandilu ya insi yina bantu fwete tanina. (Yoane 18:36) Ntama mingi ve, Piere zolaka kukuma muntu ya dikanda ya kimpeve, yina basitwaye na yo tazinga na zulu. (Galatia 6:16; Filipi 3:20, 21) Yo yina, banda na ntangu yina, kana balongoki ya Yezu mekutana ti kimbeni mpi munyokudi, yo kelombaka nde bo landa nkadilu ya kukonda boma mpi ya ngemba yina Yezu kuvandaka na yo. Na kutula ntima yonso, yo kelombaka nde bo bika mambu na maboko ya Yehowa mpi bo tudila yandi ntima nde yandi tapesa bo ngolo ya kukanga ntima.—Luka 22:42.
19 Bamvula mingi na nima, Piere kusonikaka nde: “Kristo yandi mosi monaka mpasi sambu na beno, ebuna yandi bikilaka beno mbandu sambu beno landa yo. . . . Ntangu bo fingaka yandi, yandi vutulaka mafingu yina ve; ntangu bantu ya nkaka pesaka yandi mpasi, yandi bangikaka bo ve, kansi yandi tulaka ntima na Nzambi yina ke sambisaka bantu mbote-mbote.” (1 Piere 2:21-23) Kaka mutindu Yezu kutubaka, banda ntama, bantu kemonisaka Bakristu mpasi mingi mpenza. Yo vanda na mvu-nkama ya ntete, to na ntangu na beto, Bakristu melandaka mbandu ya Yezu mpi bo mekwendaka nsangu kibeni nde bo kekangaka ntima na lukwikilu yonso, mpi bo kemonisaka nde bo ketaninaka kwikama na bo na ngemba yonso. (Kusonga 2:9, 10) Bika nde beto yonso kusala mutindu mosi kana beto mekutana ti mambu ya mutindu yina.—2 Timoteo 3:12.
“Beno Lwata Mfumu Yezu Kristu”
20-22. Na nki mutindu Bakristu ‘kelwataka Mfumu Yezu Kristu’?
20 Polo kusonikilaka dibundu ya Roma nde: “Beno lwata Mfumu Yezu Kristu, mpi beno sala ve balukanu sambu na bampusa ya kinsuni.” (Roma 13:14, NW) Na mutindu mosi ya kifwani, Bakristu kelwataka Yezu bonso lele. Ata bo kele bantu ya kukonda kukuka, bo kesalaka ngolo na kulanda mbandu ya bikalulu mpi ya bisalu ya Mfumu na bo, na kiteso yina kesalaka nde bo sala mambu bonso yandi.—1 Tesalonika 1:6.
21 Beto lenda nunga na ‘kulwata Mfumu Yezu Kristu’ kana beto kebakisa mbotembote luzingu ya Yezu mpi beto kesala ngolo na kuzinga mutindu yandi vandaka kuzinga. Beto kelandaka mbandu ya kudikulumusa na yandi, zola na yandi ya lunungu, kuyina ya yandi yinaka mambu ya mbi, zola yina yandi monisaka na bampangi na yandi, kikalulu na yandi ya kukonda kukota na mambu ya inza, mpi ntima ya nda yina yandi monisaka na kukanga ntima na ntangu ya mpasi. Beto ‘kesalaka ve na ntwala balukanu sambu na bampusa ya kinsuni,’ disongidila, lukanu na beto ya ntete kevandaka ve ya kulungisa balukanu ya kinsuni to ya kusepedisa bampusa ya kinsuni. Kansi, na ntangu ya kubaka desizio mosi to ya kuyidika dikambu mosi, beto kekudiyulaka nde: ‘Inki Yezu zolaka kusala na dyambu yai kana yandi vandaka na kisika na munu? Ngindu na yandi zolaka kuvanda nde mu sala inki?’
22 Sambu na kumanisa, beto kelandaka mbandu ya Yezu na mutindu beto kekudipesaka mingi na ‘kuzabisa nsangu ya mbote.’ (Matayo 4:23; 1 Korinto 15:58) Na mutindu yai mpi, Bakristu kelandaka mbandu ya Yezu kusongaka, mpi disolo yina kelanda tamonisa mutindu bo kelandaka mbandu yango.
Keti Nge Lenda Tendula?
• Sambu na nki yo kele mfunu nde Mukristu kuvanda muntu ya kudikulumusa?
• Inki mutindu beto lenda yedisa mutindu ya mbote ya kutadila mambu ya mbote ti ya mbi?
• Na nki mutindu Bakristu kelandaka mbandu ya nkadilu yina Yezu kuvandaka na yo na ntangu bantu kemengaka bo mpi kenyokulaka bo?
• Inki mutindu beto lenda “lwata Mfumu Yezu Kristu”?
[Bangyufula ya disolo ya kulonguka]
[Kifwanisu ya kele na lutiti 19]
Yezu kusongaka mbandu ya kukuka ya kudikulumusa
[Kifwanisu ya kele na lutiti 20]
Na mambu yonso ya luzingu ya Mukristu, mpi na kisalu ya kusamuna, yo kelombaka kuvanda ti kudikulumusa
[Kifwanisu ya kele na lutiti 21]
Satana lenda sala nde bansaka ya mbi kumonana bonso ya mbote na meso ya Mukristu