Kulanda na Kusosa ‘Diyaka ya Kuluta Ntalu Mingi’ Bubu Yai
Kulanda na Kusosa ‘Diyaka ya Kuluta Ntalu Mingi’ Bubu Yai
“Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu . . . kuwa yo.”—MATAYO 24:14.
1, 2. (a) Inki mutindu Bayuda vandaka kutadila Kimfumu ya Nzambi na bilumbu ya Yezu? (b) Inki Yezu kusalaka sambu na kusadisa balongoki na yandi na kubakisa mbotembote ntendula ya Kimfumu, mpi nki bambuma yo butaka?
KIMFUMU ya Nzambi kuvandaka disolo mosi yina vandaka kubenda mpenza dikebi ya Bayuda ntangu Yezu kukwisaka na ntoto. (Matayo 3:1, 2; 4:23-25; Yoane 1:49) Kansi, na luyantiku, bamingi na kati na bo kubakisaka ve mbotembote bunene na yo ti mutindu yo zolaka kuyala; bo bakisaka mpi ve nde yo tavanda luyalu mosi ya zulu. (Yoane 3:1-5) Ata bantu yankaka yina kukumaka balongoki ya Yezu kubakisaka ve mbotembote ntendula ya Kimfumu ya Nzambi to mambu yina bo fwete sala sambu na kubaka lusakumunu ya kukuma bantotila yina tayala ti Kristu.—Matayo 20:20-22; Luka 19:11; Bisalu 1:6.
2 Na nima ya mwa ntangu, Yezu kumonisaka kikalulu ya kukanga ntima sambu na kulonga balongoki na yandi malongi mingi. Kingana ya diyaka ya kuluta ntalu mingi yina beto tadilaka na disolo ya meluta kuvandaka na kati ya malongi yango. Na kingana yango, yandi monisaka bo mfunu ya kusala kikesa sambu na kulanda kusosa Kimfumu ya zulu. (Matayo 6:33; 13:45, 46; Luka 13:23, 24) Yo fwete vanda nde mambu yai kusimbaka mpenza ntima na bo sambu bo sukininaka ve na kukwenda na bisika ya ntama ya ntoto sambu na kusamuna nsangu ya mbote ya Kimfumu na kikesa yonso, mutindu mukanda ya bisalu kemonisa yo pwelele.—Bisalu 1:8; Kolosai 1:23.
3. Sambu na yina metala ntangu na beto, inki Yezu kutubaka sambu na Kimfumu?
3 Ebuna nki beto tatuba sambu na bilumbu na beto? Balusakumunu yina tamonana ntangu Kimfumu tayala na ntoto yina takituka Paladisu kelongama na bantu mingi. Na mbikudulu na yandi ya nene yina metala “nsuka ya ngidika ya bima,” (NW) Yezu kutubaka pwelele nde: “Bo ta longaka nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:3, 14; Marko 13:10) Yandi tendulaka mpi nde kisalu yai ya nene tasalama ata na kati ya bampasi ya kuluta ngolo to nkutu munyokudi. Ata mpidina, yandi bwisaka bo ntima nde: “Muntu yina ta kanga ntima tii na nsuka, yandi ta guluka.” (Matayo 24:9-13) Sambu na kusala mambu yai yonso, yo kelombaka kuvanda na mpeve ya kuditambika mpi ya kudipesa bonso yina komersa-ntambudi ya kingana ya Yezu kuvandaka na yo. Keti bubu yai beto kele ti bantu yina kemonisaka lukwikilu mpi kikesa ya mutindu yina sambu na kulanda kusosa Kimfumu?
Kyese ya Kusengumuna Kyeleka
4. Inki bupusi kyeleka ya Kimfumu kele na yo bubu yai na bantu?
4 Komersa ya kingana ya Yezu kuvandaka na kyese ya kuluta mingi na ntangu yandi zwaka kima yina yandi monaka nde yo vandaka ‘diyaka ya kuluta ntalu mingi.’ Kyese yango kupusaka yandi na kusala yonso sambu na kusumba diyaka yina. (Baebreo 12:1) Mutindu mosi bubu yai, kyeleka ya Nzambi ti ya Kimfumu na yandi kebendaka bantu mpi kepusaka bo na kubaka lukanu. Dyambu yai keyibusa beto mambu yina Mpangi A. H. Macmillan kusonikaka na mukanda Faith on the March sambu na kumonisa mutindu yandi mosi kusosaka Nzambi ti lukanu ya Yandi kele na yo sambu na bantu. Yandi tubaka nde: “Konso mvula, bantu mingi kelanda na kusengumuna kima yina mu mesengumunaka. Bantu yango kele kaka bantu bonso nge ti mono sambu bo kekatukaka na bansi, na bampusu ya nitu, mpi na luzingu ya mitindu yonso mpi bo kele na bamvula ya mitindu yonso. Kyeleka kekabula-kabulaka ve. Yo kebendaka bantu ya mitindu yonso.”
5. Inki bambuma ya mbote kemonana na lapolo ya mvula ya kisalu 2004?
5 Beto kemonaka bukyeleka ya mambu yina Mpangi Macmillan kutubaka na ntangu beto kemonaka mutindu nsangu ya mbote ya Kimfumu ya Nzambi kesimbaka ntima ya bantu mingi ya masonga konso mvula, mpi kepusaka bo na kupesa luzingu na bo na Yehowa sambu na kusala luzolo na yandi. Mambu yai kusalamaka mpi na mvula ya kisalu 2004, yina kuyantikaka na Septembri 2003 tii na Augusti 2004. Na nsungi yina ya bangonda 12, bantu 262 416 kubakaka mbotika na masa sambu na kumonisa kidimbu ya kudipesa na bo na Yehowa na meso ya bantu yonso. Dyambu yai kusalamaka na bansi 235, bisika Bambangi ya Yehowa ke na kulonguka Biblia konso mposo ti bantu 6 085 387 sambu na kusadisa bantu yina kesalaka bisalu ya mitindu yonso ti bayina mekatukaka na bansi, na bikanda, mpi na bandinga mingi na kulonguka kyeleka ya Ndinga ya Nzambi yina kepesaka luzingu.—Kusonga 7:9.
6. Inki mesalaka nde kisalu ya kusamuna kulanda na kuyela na nima ya bamvula mingi?
6 Inki kusalaka nde kisalu yai yonso kusalama? Ntembe kele ve nde Yehowa kebendaka bantu yina kevandaka na ntima ya kuyilama sambu bo kwenda na yandi. (Yoane 6:65; Bisalu 13:48) Kansi, mpeve ya kukonda bwimi mpi kikesa ya ngolo yina bampangi kumonisaka na kudipesa mingi na kulanda kusosa Kimfumu kusalaka mpi nde kisalu yango kuyela. Mpangi Macmillan kusonikaka mutindu yai ntangu yandi vandaka ti bamvula 79: “Banda na ntangu mu waka na mbala ya ntete balusilu yina Nzambi kepesa sambu na bambefo ti bafwa, mono kevandaka kaka na kivuvu ya ngolo na mambu yina nsangu ya Biblia kepesaka. Banda na ntangu yina, mono mebakaka lukanu ya kusosa kuzaba mambu mingi ya Biblia kelongaka na mpila nde mu kuka kusadisa mpi bantu yankaka yina ke na kusosa kuzaba Yehowa, Nzambi Nkwa-Ngolo Yonso, ti balukanu ya mbote yina yandi kele na yo sambu na bantu mutindu mono mpi vandaka kusosa.”
7. Inki eksperiansi kemonisa kyese ti kikesa ya bantu yina kesengumunaka kyeleka ya Biblia?
7 Kikesa yina kemonana mpi bubu yai na kati ya bansadi ya Yehowa. Beto baka mbandu ya Daniela, muntu ya mbanza ya Vienne, na Autriche. Yandi tubaka nde: “Banda na bumwana na mono, Nzambi kevandaka nduku na mono ya ngolo mpenza. Mono vandaka kuzola ntangu yonso kuzaba zina na yandi sambu mono vandaka kumona bonso nde zina na yandi kuvandaka ve ‘Nzambi.’ Kansi, sambu na kuzaba yo, yo lombaka nde mu kinga tii kuna ya mu lungisaka bamvula 17, ntangu Bambangi ya Yehowa kwisaka na kyelo na mono. Bo tendudilaka mono mambu yonso yina mono zolaka kuzaba na yina metala Nzambi. Nsukansuka, mu zabaka kyeleka mpi mu sepelaka mingi! Mu waka kyese mingi yina kusalaka nde mu yantika kusamuna na bantu mingi.” Kikesa ya yandi vandaka kulongila kusalaka nde banduku na yandi ya nzo-nkanda kusukinina ve na kuseka yandi. Daniela kelanda na kutuba nde: “Kansi, munu, mu vandaka kumona nde mbikudulu ya Biblia vandaka kulungana. Sambu mu longukaka nde Yezu kutubaka nde bantu tayina balongoki na yandi mpi bo tanyokula bo sambu na zina na yandi. Mu vandaka na kyese mingi mpi mu vandaka kuyituka.” Daniela kusukininaka ve na kupesa luzingu na yandi na Yehowa, yandi bakaka mbotika, mpi yandi yantikaka kusala yonso sambu na kulungisa lukanu ya kukuma misionere. Na nima ya makwela na yandi, Daniela, ti bakala na yandi Helmut, kuyantikaka kusala kisalu ya kusamuna na bantu ya Afrika, ya Chine, ya Philippine, ti ya Inde yina kezingaka na Vienne. Daniela ti Helmut kele ntangu yai bamisionere na sudi-westi ya Afrika.
Bo Keyambulaka Ve
8. Tanga mutindu mosi ya kenataka balusakumunu yina bamingi mesadilaka sambu na kumonisa zola na bo na Nzambi ti kwikama na Kimfumu na yandi.
8 Ya kyeleka, kisalu ya kimisionere kele mosi na kati ya mitindu yina bantu ya Yehowa kesadilaka bubu yai sambu na kumonisa zola na bo na Nzambi ti kwikama na Kimfumu na yandi. Bonso komersa ya kingana ya Yezu, bantu yina kesalaka kisalu yai kendimaka kukwenda na bisika ya ntama sambu na Kimfumu. Na kutuba ya mbote, bamisionere yai kekwendaka ve kusosa nsangu ya mbote ya Kimfumu; bo kenataka nsangu yango na bantu yina kezingaka na bisika ya ntama ya ntoto sambu na kulonga bo mpi kusadisa bo na kukuma balongoki ya Yezu Kristu. (Matayo 28:19, 20) Na bansi mingi, yo kelombaka nde bo kanga ntima na bampasi ya kuluta ngolo. Kansi, bo kebakaka balusakumunu mingi sambu na kukanga ntima na bo.
9, 10. Inki baeksperiansi ya kyese bamisionere kekutanaka na yo na bisika bonso République centrafricaine?
9 Beto baka mbandu mosi ya République centrafricaine, kisika bantu 16 184 kuvandaka na Lusungiminu ya lufwa ya Kristu na mvula meluta. Ntalu yai meluta ntalu ya bansamuni ya Kimfumu ya insi yina mbala nsambwadi. Sambu bisika mingi ya insi yai kele ve ti kura, bantu kevandaka ti kikalulu ya kusala bisalu na bo na nganda, na kivudi ya nti. Yo yina bamisionere kesalaka kisalu na bo kaka bonso bantu ya insi yina. Bo kelongukaka Biblia ti bantu na kivudi, na nsi ya nti. Kulonguka na nganda kesadisaka bo kaka ve na kuvanda na nsemo mpi na madidi kansi yo kenatilaka bo mpi mambote yankaka. Bantu yango kesepelaka na Biblia, mpi bo kevandaka ti kikalulu ya kutubila masolo ya Biblia. Mbala mingi, bantu yina kelutaka kemonaka mambu yina bo kesalaka mpi bo kekwisaka kukuta bo sambu bo mpi kulonguka.
10 Yo yina, ntangu misionere mosi vandaka kulonguka Biblia ti muntu mosi na nganda, leke mosi ya bakala yina kezingaka na simu yankaka ya balabala yango kwisaka kulomba nde misionere yina kukwenda kulonguka Biblia ti yandi sambu Bambangi melutaka ntete ve na kutala yandi. Ya kyeleka, misionere kusepelaka na kulonguka ti yandi, mpi leke yango ke na kuyela nswalu na kimpeve. Na insi yina, bapolise ketedimisaka mbala mingi Bambangi na nzila, sambu na kukanga bo ve to kulomba bo amande, kansi sambu na kulomba bo banimero ya mpa ya Nzozulu ya Nkengi ti Réveillez-vous ! to sambu na kupesa bo mersi sambu na disolo mosi yina kusepedisaka bo mingi.
11. Ata na kati ya bampasi, inki mutindu bamisionere yina mesala bamvula mingi ketadilaka kisalu na bo?
11 Bampangi mingi yina meyantikaka kisalu ya kimisionere tuka bamvula 40 to 50 kelanda na kusala kisalu na bo na kwikama yonso na bilanga. Bampangi yai kepesa beto yonso mbandu mosi ya mbote mpenza ya lukwikilu mpi ya kukwamina! Bankwelani zole mesala bamvula kuluta 42 na kisalu ya kimisionere na bansi tatu. Bakala ketuba nde: “Beto vandaka kukutana ti bampasi. Mu mbandu, beto nwanaka ti malaria na nsungi ya bamvula 35. Kansi, beto mebikaka kuvanda ntete ve na mawa sambu na lukanu ya beto bakaka ya kukuma bamisionere.” Nkento na yandi keyika nde: “Mambu ya kupesila mersi kevandaka mingi kibeni. Kisalu ya bilanga kepesaka kyese mingi, mpi yo kevandaka ve mpasi na kuyantika kulonguka Biblia ti bantu. Na ntangu beto kemonaka balongoki ya Biblia kekwisa na balukutakanu mpi kezabana ti bampangi yankaka, yo kevandaka bonso nde dibuta mosi kevukanaka konso mbala.”
Bo ‘Kemonaka Mambu Yonso Mfunu Ve’
12. Inki mutindu muntu kemonisaka nde yandi kebakisa mpenza ntalu ya Kimfumu?
12 Ntangu komersa-ntambudi kuzwaka diyaka ya kuluta ntalu mingi, yandi ‘kwendaka kuteka [mbala mosi, NW] bima na yandi yonso, ebuna yandi kwisaka kusumba diyaka yina.’ (Matayo 13:46) Luzolo yai ya kuyambula bima yina lenda monana ya ntalu mingi kemonanaka na bantu yina kebakisaka mpenza ntalu ya Kimfumu. Ntumwa Polo, yina kuvandaka ti kivuvu ya kuyala na nkembo ya Kimfumu ti Kristu, kutubaka nde: “Mambu yonso mpi; mono ke monaka yo mfunu ve sambu na mambu yai ya kuluta mfunu mpenza: kuzaba Mfumu na beto Yesu Kristo. Mono me bikisaka mambu yonso sambu na yandi. Mono ke monaka mambu yina yonso bonso mvindu sambu na kuvanda na Kristo.” —Filipi 3:8.
13. Inki mutindu muntu mosi ya République tchèque kumonisaka zola na yandi sambu na Kimfumu?
13 Mutindu mosi bubu yai, bamingi kendima na kusala bansoba na luzingu na bo sambu na kubaka balusakumunu ya Kimfumu. Mu mbandu, na Oktobri ya mvu 2003, direktere ya ekole mosi na République tchèque yina kuvandaka na bamvula 60, kuzwaka mukanda Nzayilu ya Kenataka na Luzingu ya Mvula na Mvula yina beto kelongukilaka Biblia. Na nima ya kutanga yo, yandi sosaka mbala mosi Bambangi ya Yehowa ya kartie na yandi sambu yandi kulonguka Biblia. Yandi yelaka mbote na kimpeve mpi ntama mingi ve yandi yantikaka kukwenda na balukutakanu yonso. Kansi, inki beto tatuba sambu na balukanu yina yandi vandaka na yo ya kukuma mfumu ya mbanza na bo mpi kusosa nde bo vote yandi sambu yandi kukuma senatere? Yandi bakaka lukanu ya kusala kisalu yankaka: kisalu ya kusamuna Kimfumu. Yandi tubaka nde: “Mu kabulaka mikanda mingi ya ketendulaka Biblia na bana ya ekole na mono.” Yandi kudipesaka na Yehowa mpi yandi bakaka mbotika na masa na lukutakanu mosi ya distrike na Yuli ya mvu 2004.
14. (a) Nsangu ya mbote ya Kimfumu mepusaka bantu mingi na kusala inki? (b) Inki bangyufula ya mfunu konso muntu na kati na beto lenda kudiyula?
14 Bantu mingi yankaka na inza ya mvimba mendimaka mpi nsangu ya mbote ya Kimfumu na mutindu mosi. Bo mebasikaka na inza ya mbi, bo mekatulaka kimuntu na bo ya ntama, bo mebuyaka banduku na bo ya ntama, mpi bo meyambulaka balukanu ya inza yina bo vandaka na yo. (Yoane 15:19; Efezo 4:22-24; Yakobo 4:4; 1 Yoane 2:15-17) Sambu na nki bo kesalaka mambu yina yonso? Sambu bo kepesaka valere mingi na balusakumunu ya Kimfumu ya Nzambi kuluta konso kima yina ngidika ya bima ya ntangu yai lenda pesa. Keti nge mpi ketadilaka nsangu ya mbote ya Kimfumu na mutindu yina? Keti yo kepusa nge na kusala bansoba yina kele mfunu sambu na kuwakanisa mutindu na nge ya kuzinga, minsiku ya ketwadisaka nge, mpi balukanu na nge ti mambu yina Yehowa kelombaka? Kana nge sala yo, nge tabaka balusakumunu mingi ntangu yai mpi na bilumbu kekwisa.
Nsungi ya Kukatula Bambuma Ke na Kukuma na Nsuka
15. Biblia kutubaka nde bantu ya Nzambi tasala nki na bilumbu ya nsuka?
15 Muyimbi-bankunga kusonikaka nde: “Bantu na nge ta kwisa kunwana na luzolo na bo mosi ti kikesa.” ‘[Kibuka ya baleke, NW] yina kekwisa mutindu malulu kevandaka na suka-suka’ ti ‘bankento mingi ya kepanzaka nsangu’ kele na kati ya bantu yina mekudipesaka na luzolo na bo mosi. (Nkunga 68:12; 110:3) Inki bambuma kikesa ti mpeve ya kuditambika yina bantu ya Yehowa (babakala, bankento, baleke ti bambuta) mesalaka mebutaka na bilumbu yai ya nsuka?
16. Pesa mbandu mosi yina kemonisa mutindu bansadi ya Nzambi kesala ngolo sambu na kusadisa bantu yankaka na kulonguka mambu yina metala Kimfumu.
16 Na Inde, mupasudi-nzila mosi ya nkento, to nsamuni ya Kimfumu ya ntangu yonso, vandaka kudiyula nde nki mutindu bamilio kuluta zole ya bifwa-makutu yina kevandaka na insi yango lendaka kubaka lusadisu sambu na kulonguka mambu yina metala Kimfumu. (Yezaya 35:5) Mpangi-nkento yango kubakaka lukanu ya kusonikisa zina na ekole mosi ya Bangalore yina kelongaka ndinga ya bidimbu. Kuna yandi zabisaka kivuvu ya Kimfumu na bifwa-makutu mingi, mpi bimvuka ya kulonguka Biblia kukangukaka. Na nima ya bamposo fyoti, bantu kuluta kumi na zole yantikaka kukwisa na balukutakanu na Nzo ya Kimfumu. Na nima, na feti mosi ya makwela, mupasudi-nzila yango kukutanaka ti leke mosi ya bakala ya kifwa-makutu yina kukatukaka na Calcutta. Leke yango kuvandaka na bangyufula mingi mpi yandi monisaka mpusa ya ngolo ya kuzaba mambu mingi yina metala Yehowa. Yo vandaka mpasi sambu yo lombaka nde leke yango kuvutuka na Calcutta, na kitamina ya bakilometre 1 600, sambu na kuyantika nzo-nkanda ya nene, kansi Bambangi ya mezaba ndinga ya bidimbu kuvandaka ve na mbanza yango. Leke yango kusalaka ngolo sambu na kundimisa tata na yandi nde yandi kupesa yandi nswa ya kukwenda kukota nzo-nkanda na Bangalore na mpila nde yandi kwenda kulanda na kulonguka Biblia kuna. Leke yina kuyelaka mbote na kimpeve, mpi kiteso ya mvula mosi na nima, yandi pesaka luzingu na yandi na Yehowa. Na nima, yandi mpi kulongukaka Biblia ti bifwa-makutu mingi. Nduku na yandi mosi ya bumwana kuvandaka na kati ya bifwa-makutu yango. Ntangu yai, biro ya filiale ya Inde ke na kubaka bangidika sambu bapasudi-nzila kulonguka ndinga ya bidimbu na mpila nde bo kwenda kusadisa na kilanga yina.
17. Tubila mambu yina mepesa nge mpenza kikesa na lapolo ya mvula ya kisalu 2004 yina kebanda na lutiti ya 21 tii ya 24.
17 Banda na lutiti ya 21 tii ya 24 ya zulunalu yai, nge takuta lapolo ya kisalu ya bilanga ya Bambangi ya Yehowa ya mvula ya kisalu 2004. Baka mwa ntangu ya kutadila yo, sambu nge mosi kumona mambu yina kesonga nde bansadi ya Yehowa ya ntoto ya mvimba ke na kutula mpenza dikebi na bo na kulanda kusosa ‘diyaka ya kuluta ntalu mingi’ bubu yai.
Landa na “Kusosa Ntete Kimfumu”
18. Inki dyambu Yezu kukotisaka ve na kingana na yandi ya komersa-ntambudi mpi sambu na inki?
18 Kana beto tadila dyaka kingana ya Yezu ya komersa-ntambudi, beto tamona nde Yezu kutubaka ve ata kima mosi ya metala mambu yina komersa yango tasala sambu na kuzwa mbongo ya kuzingila na nima ya kuteka bima yonso ya yandi vandaka na yo. Muntu lenda vanda na kikuma ya mbote ya kuyula nde: ‘Inki mutindu komersa yango zolaka kuzwa madya, bilele, ti kisika ya kulala na nima ya kubikala dyaka ve ata ti kima mosi? Inki mambote diyaka yina ya ntalu zolaka kunatila yandi?’ Yai kele bangyufula ya mbi ve ya muntu lenda yula kana yandi tadila mambu na kimuntu. Kansi, keti Yezu kulongisilaka ve balongoki na yandi nde: “Kansi beno landa kaka na kusosa [ntete, NW] Kimfumu na yandi ti mambu yina ya yandi ke zolaka, ebuna yandi ta yika beno bima yina yonso”? (Matayo 6:31-33) Ngindu ya mfunu ya kebasika na kingana yina kele nde yo kele mfunu na kumonisa kudipesa ya masonga na Nzambi mpi kikesa sambu na Kimfumu. Keti kele ti dilongi ya beto lenda baka na kingana yai?
19. Inki dilongi ya mfunu beto lenda longuka na kingana ya Yezu ya diyaka ya kuluta ntalu mingi?
19 Ata beto melonguka nsangu ya mbote ya kitoko ntama mingi ve to beto meyantikaka ntama na kulanda kusosa Kimfumu mpi kuzabisa balusakumunu na yo na bantu yankaka, beto fwete landa na kutula dikebi na beto yonso na Kimfumu. Beto kezinga na bantangu ya mpasi, kansi beto kele ti bikuma ya mbote ya kukwikila nde mambu yina beto kelanda na kusosa kele ya kyeleka mpi beto lenda tesa yo ve ata ti kima mosi. Beto kemonaka yo bonso diyaka yina komersa kuzwaka. Mambu yina keluta na inza ti bambikudulu ya Biblia yina melunganaka kendimisa beto nde beto kezinga na “nsuka ya ngidika ya bima.” (Matayo 24:3, NW) Bonso komersa-ntambudi, bika beto monisa kikesa ya masonga sambu na Kimfumu ya Nzambi mpi beto sepela na dibaku ya kusamuna nsangu ya mbote.—Nkunga 9:2, 3, NW.
Keti Nge Keyibuka?
• Na nima ya bamvula, inki mesalaka nde kuyela kumonana na kati ya bansambidi ya kyeleka?
• Inki mpeve kemonanaka na kati ya bampangi yina kesalaka kisalu ya kimisionere?
• Inki bansoba bantu mesalaka sambu na nsangu ya mbote ya Kimfumu?
• Inki dilongi ya mfunu beto lenda longuka na kingana ya Yezu ya diyaka ya kuluta ntalu mingi?
[Bangyufula ya disolo ya kulonguka]
[Tablo ya kele na lutiti 21-24]
LAPOLO YA BAMBANGI YA YEHOWA YA INZA YA MVIMBA YA MVULA YA KISALU 2004
(Tala na Nzozulu ya Nkengi ya papie)
[Kifwanisu ya kele na lutiti 26]
Bonso komersa-ntambudi, bubu yai, bamisionere ke na kubaka balusakumunu mingi
[Kifwanisu ya kele na lutiti 27]
“Bantu na nge ta kwisa . . . na luzolo na bo mosi”