Yehowa Kesalaka Ntangu Yonso Mambu Yina Kele ya Mbote

“Mfumu Nzambi kele [lunungu, NW] na mambu yonso ya yandi ke salaka.”​—NKUNGA 145:17.

1. Inki mutindu nge kekudiwaka kana muntu mebakila nge ngindu ya mbi, mpi nki dilongi beto lenda baka na dyambu ya mutindu yai?

 KETI muntu mebakilaka nge dezia bangindu ya mbi, mbala yankaka na kutadilaka bisalu to bangindu na nge na mutindu mosi ya mbi, ata yandi vandaka kuzaba ve mambu yonso? Kana yo mekuminaka nge dezia, yo fwete vanda nde nge waka mpasi na ntima, mpi yo kele mbi ve nde dyambu ya mutindu yina kusala nge mpasi. Beto lenda baka dilongi mosi ya mfunu na dyambu yai: Yo kele mayele na kubuya kubakila muntu bangindu ya mbi nswalu kana beto kezaba ve dyambu yango mbotembote.

2, 3. Inki mutindu bantu yankaka ketadilaka masolo ya Biblia ya ketubila ve mambu ya fyoti-fyoti yina mefwana na kupesa bamvutu na konso ngyufula, kansi nki Biblia kezabisa beto na yina metala Yehowa?

² Beto fwete vila ve dilongi yai na ntangu beto kebaka bangindu na mambu yina metala Yehowa Nzambi. Sambu na inki? Sambu Biblia kele ti masolo yankaka yina lenda pusa bantu na kudiyula bangyufula mingi na ntangu bo metanga yo na mbala ya ntete. Masolo yango, ya ketadila mbala yankaka mambu yina bansambidi na yandi yankaka kusalaka to bandola ya Nzambi kupesaka na ntangu ya ntama, lenda vanda yo ketubila ve mambu ya fyoti-fyoti ya mefwana na kupesa bamvutu na bangyufula na beto yonso. Yo kele mawa mingi na kumona nde bantu mingi ketadilaka masolo yango na mutindu mosi ya mbi, to nkutu ketulaka ntembe na lunungu mpi na masonga ya Nzambi. Kansi, Biblia kesonga beto nde “Mfumu Nzambi kele [lunungu, NW] na mambu yonso ya yandi ke salaka.” (Nkunga 145:17) Ndinga na yandi mpi kendimisa beto nde yandi “lenda sala mbi ata fioti ve.” (Yobi 34:12; Nkunga 37:28) Yo yina, yindula mutindu yandi fwete kudiwa na ntangu bantu yankaka kebakila yandi bangindu ya mbi!

³ Bika beto tadila bikuma tanu yina fwete pusa beto na kundima bandola ya Yehowa kepesaka. Na nima, na nsadisa ya bikuma yina, beto tatadila masolo zole ya Biblia yina bantu yankaka lenda mona mpasi na kubakisa.

Sambu na Nki Kundima Bandola Yina Yehowa Kepesaka?

4. Sambu na nki beto fwete monisaka kudikulumusa na ntangu beto ketadila bisalu ya Nzambi? Pesa mbandu.

⁴ Kikuma ya ntete kele nde, sambu Yehowa kezabaka mambu yonso ya metala dikambu mosi buna kansi beto, beto kezabaka yo ve, beto fwete monisaka kudikulumusa na ntangu beto ketadila bisalu ya Nzambi. Beto baka mbandu: Yindula kana zuzi mosi, ya mezabanaka mbote mpenza nde yandi kebakaka balukanu ya masonga, mezengila muntu nkanu. Inki mutindu nge tatadila muntu yina ketula ntembe na nkanu ya zuzi yina kansi yandi kezaba ve mutindu mambu yonso kulutilaka to yandi kebakisa ve mambu yina bansiku ketuba na dyambu yango? Yo tavanda buzoba kibeni kana muntu ketula ntembe na dyambu mosi yina yandi kezabila ve mambu na yo yonso. (Bingana 18:13) Yo tavanda buzoba ya kuluta mingi kibeni nde bantu ya mpamba kutula ntembe ti Muntu yina “ke sambisaka bantu yonso ya nsi-ntoto”!​—Kuyantika 18:25.

5. Inki beto fwete vila ve na ntangu beto ketanga masolo ya Biblia yina ketubila bandola ya Nzambi kupesaka bantu mosi buna?

⁵ Kikuma ya zole yina fwete pusa beto na kundima bandola yina Nzambi kepesaka kele nde Nzambi ketalaka ntima, kansi beto ketalaka yo ve. (1 Samuele 16:7) Ndinga na yandi ketuba nde: “Mono Mfumu Nzambi ke zabaka bangindu ya bantu, mono ke mekaka ntima na bo. Mono ta pesa matabisi na konso muntu mutindu kele luzingu na yandi ti kisalu na yandi.” (Yeremia 17:10) Yo yina, na ntangu beto ketanga masolo ya Biblia yina ketubila bandola ya Nzambi kupesaka bantu mosi buna, bika beto vila ve nde meso na yandi yina kemonaka mambu yonso kutadilaka bangindu  ya kubumbana ya bantu yango, bikuma ya kupusaka bo na kusala mambu, mpi bangindu yankaka yina Ndinga na yandi ketubila ve.​—1 Bansangu 28:9.

6, 7. (a) Inki mutindu Yehowa memonisaka nde yandi kelandaka mbotembote minsiku na yandi ya masonga mpi ya lunungu ata yo kelombaka nde yandi tambika kima mosi ya kuluta mfunu? (b) Inki beto fwete yibuka kana beto metanga kima mosi na Biblia yina mepusa beto na kudiyula kana Nzambi mesala yo na mutindu mosi ya masonga mpi ya mbote?

⁶ Tala kikuma ya tatu yina fwete pusa beto na kundima bandola yina Yehowa kepesaka: Yandi kelandaka na kwikama yonso minsiku na yandi ya lunungu ata na ntangu yo kelomba nde yandi tambika kima mosi ya kuluta mfunu. Beto tadila mbandu mosi. Ntangu yandi pesaka Mwana na yandi bonso nkudulu sambu na kugulusa bantu ya bulemfu na disumu mpi na lufwa, Yehowa kulungisaka minsiku na yandi ya masonga mpi ya lunungu. (Roma 5:18, 19) Ata mpidina, yo fwete vanda nde Yehowa kuwaka mpasi mingi kibeni na ntangu yandi monaka Mwana na yandi kenyokwama mpi mefwa na nti ya mpasi. Dyambu yai kesonga beto nki na yina metala Nzambi? Sambu na yina metala “nkudulu ya Kristu Yezu kufutaka,” Biblia ketuba nde Nzambi kusalaka mambu yina “sambu na kusonga lunungu na yandi.” (Roma 3:24-26, NW) Mbalula yankaka ketuba mutindu yai na Roma 3:25: “Dyambu yai kusongaka nde Nzambi kesalaka ntangu yonso mambu yina kele ya mbote mpi ya masonga.” (New Century Version) Ya kyeleka, kiteso ya mambu yina Yehowa kundimaka na kusala sambu na kupesa nkudulu kesonga nde “mambu yina kele ya mbote mpi ya masonga” kevandaka na valere mingi kibeni na meso na yandi!

⁷ Yo yina, kana beto metanga kima mosi na Biblia yina kepusaka bantu yankaka na kudiyula kana Nzambi kusalaka yo na mutindu mosi ya masonga mpi ya mbote, beto fwete yibuka dyambu yai: Sambu na kumonisa kwikama na minsiku na yandi ya lunungu mpi ya kyeleka, Yehowa kubuyaka ve nde Mwana na yandi mosi kufwa lufwa ya mpasi. Keti yandi fwete kulula minsiku yango na mambu yankaka? Ya kyeleka, Yehowa kekululaka ve ata fyoti minsiku na yandi ya lunungu mpi ya masonga. Yo yina, beto kele ti kikuma ya mbote ya kundima nde yandi kesalaka ntangu yonso mambu yina kele ya mbote mpi ya masonga.​—Yobi 37:23.

8. Sambu na nki beto lenda tuba nde kana bantu kuyindula nde Yehowa mekonda masonga ti lunungu na dyambu mosi buna yo kesonga nde bo meyindula mbote ve?

⁸ Tala kikuma ya iya yina fwete pusa beto na kundima bandola yina Yehowa kepesaka: Yehowa kusalaka muntu na kifwani na Yandi. (Kuyantika 1:27) Yo yina, Nzambi mepesaka bantu bikalulu bonso yina ya yandi. Mabanza ya masonga mpi ya lunungu kele na kati ya bikalulu yango. Kana mabanza ya masonga mpi ya lunungu yina Nzambi mepesaka beto mepusa beto na kuyindula nde Yehowa mekonda kumonisa bikalulu yango na dyambu mosi buna, tuba nde beto meyindula mbote ve. Kana disolo mosi ya Biblia mekumisa mabanza na beto kisakasaka, beto fwete yibuka nde kimuntu na beto ya masumu kesalaka nde mabanza na beto ya kutadila mambu ya masonga ti ya mbote kuvanda ya kukonda kukuka. Yehowa Nzambi, yina kugangaka beto na kifwani na yandi, kele na masonga mpi lunungu ya kukuka. (Kulonga 32:4) Yo tavanda kukonda mayele mpenza na kuyindula nde bantu lenda vanda na masonga mpi lunungu mingi kuluta Nzambi!​—Roma 3:4, 5; 9:14.

9, 10. Sambu na nki ata kima mosi ve fwete pusa Yehowa na kutendula to kusonga kikuma ya bisalu yina yandi kesalaka sambu na bantu?

⁹ Kikuma ya tanu ya fwete pusa beto na kundima bandola yina Yehowa kepesaka kele nde yandi kele “Muntu ya Kuluta Kuzanguka na zulu ya ntoto ya mvimba.” (Nkunga 83:18, NW) Ata kima mosi ve fwete pusa Nzambi ya mutindu yai na kutendula to kusonga bikuma ya mambu yina yandi kesalaka sambu na bantu. Yandi kele Muntu ya Nene yina kesalaka banzungu ya ntoto, mpi beto kele bonso ntoto ya bo meyidikila nzungu ya ntoto, mpi yandi kele na kimpwanza ya kusala beto mambu yina yandi mezola. (Roma 9:19-21) Beto kele banani (beto banzungu ya ntoto yina yandi mesalaka na maboko na yandi) sambu na kuyula yandi kikuma ya yandi mebakila balukanu na yandi to ya yandi mesadila mambu na mutindu mosi buna? Ntangu mfumu ya kikanda Yobi kubakisaka ve mbote mambu yina Yehowa kusalaka sambu na bantu, Yehowa kusungikaka yandi na kuyulaka yandi nde: “Keti nge ke zola kutuba nde mono kele zuzi ya mbi, nge ke zola kubedisa mono ebuna nge, nge nunga?” Yobi kubalulaka ntima ntangu yandi monaka nde yandi tubaka mambu yina yandi bakisaka ve. (Yobi 40:8; 42:6) Bika beto meka ve ata fyoti kubwa na mutambu ya kukanga Nzambi kifu!

¹⁰ Yo kele pwelele nde beto kele na bikuma ya mbote ya kundima nde Yehowa kesalaka ntangu yonso mambu yina kele ya mbote. Na nsadisa ya bikuma yai ya fwete pusa beto na kubakisa mambu ya Yehowa kesalaka, bika beto tadila masolo zole ya Biblia yina lenda pusa bantu na kudiyula bangyufula mingi. Disolo ya ntete ketadila mambu yina nsambidi mosi ya Nzambi kusalaka, yankaka ketadila ndola mosi ya Nzambi yandi mosi kupesaka.

 Sambu na Nki Loti Kupesaka Bana na Yandi ya Bankento na Bantu Yina Kuvandaka na Makasi?

11, 12. (a) Ta mambu yina kulutaka ntangu Nzambi kutindaka bawanzyo zole na Sodome na nitu ya kinsuni. (b) Inki bangyufula disolo yai mebasisaka na mabanza ya bantu mingi?

¹¹ Na Kuyantika kapu ya 19, beto kekuta disolo ya mambu yina kusalamaka ntangu Nzambi kutindaka bawanzyo zole na Sodome na nitu ya kinsuni. Loti kuzolaka kaka nde banzenza yina kuvanda na nzo na yandi. Kansi, na mpimpa yina, kibuka mosi ya babakala ya mbanza yango kuzyungaka nzo mpi bo lombaka yandi na kubasisa banzenza sambu bo sala mansoni ti bo. Loti kumekaka na kuyindula ti bantu yango, kansi bo buyaka. Sambu na kutanina banzenza na yandi, Loti kutubaka nde: “Bampangi pardo, beno sala ve mambu ya mbi mutindu yai. Mono ke na bana-bankento zole, bo me zabaka ntete babakala ve. Mbote mono natila beno bo, ebuna beno lenda sala bo konso kima ya beno zola. Kansi beno sala ata kima mosi ve na bantu yai. Bo kele banzenza na nzo na mono, mono fweti keba bo mbote.” Bantu yango kuwilaka yandi ve mpi bo zolaka kufwa kyelo. Nsukansuka, bawanzyo yango kufwaka bantu yina meso. ​—Kuyantika 19:1-11.

¹² Mpila ya kuyituka kele ve na kumona nde disolo yai mebasisaka bangyufula na mabanza ya bantu mingi. Bo kekudiyulaka nde: ‘Inki mutindu Loti lendaka kupesa bana na yandi ya bankento na bantu ya pite sambu na kusosa kutanina banzenza na yandi? Keti dyambu yina yandi salaka kuvandaka ve ya mbi, to nkutu yo monisaka ve nde yandi vandaka muntu ya boma?’ Kana beto tadila disolo yai, sambu na nki Nzambi kupesaka Piere mpeve na yandi sambu yandi kubinga Loti nde “muntu ya lunungu” (NW)? Keti Nzambi kundimaka mambu yina Loti kusalaka? (2 Piere 2:7, 8) Bika beto tadila dyambu yai sambu na kubuya kubaka bangindu ya mbi.

13, 14. (a) Inki beto fwete simba na disolo ya Biblia yina ketubila mambu ya Loti kusalaka? (b) Inki kesonga nde Loti kusalaka ve mambu na boma?

¹³ Ntetentete, beto fwete simba nde na kisika ya kutuba nde Loti kusalaka mbote to mbi, Biblia ketuba kaka mutindu mambu kusalamaka. Biblia ketubila beto mpi ve mambu yina Loti kuyindulaka to kima yina kutindaka yandi na kusala mpidina. Ziku yandi tatela beto mambu yankaka na ntangu yandi tavutuka na luzingu na “lufutumuku ya bantu ya lunungu.”​—Bisalu 24:15, NW.

¹⁴ Loti kuvandaka ve muntu ya boma. Yandi vandaka na ntwala ya dyambu mosi ya mpasi. Na ntangu yandi tubaka nde bantu yina kuvandaka “banzenza na nzo” na yandi, Loti kumonisaka nde yo lombaka nde yandi tanina bo sambu bo kwisaka kubumbana na nzo na yandi. Kansi yo vandaka ve pete. Josèphe, Muyuda mosi ya kelongukaka luzingu ya bantu ya ntangu ya ntama ketuba nde bantu ya Sodome vandaka “kusadila bantu mambu na kukonda masonga, mpi bo vandaka kuzitisa ve Nzambi . . . Bo vandaka kuyina banzenza, mpi bo vandaka kudibebisa bo na bo na kikalulu ya mansoni yina bo kebingaka nde Kisodomi.” Ata mpidina, Loti kutinaka ve kibuka ya bantu yina ya ntima ya mbi. Kansi, yandi basikaka na nganda sambu na kuyindula ti babakala yina kuvandaka na makasi. Nkutu, “yandi kangaka kielo” na ntangu yandi basikaka na nganda.​—Kuyantika 19:6.

15. Sambu na nki beto lenda tuba nde yo lenda vanda lukwikilu kupusaka Loti na kusala mambu yina yandi salaka?

¹⁵ Kansi, bantu yankaka lenda yula nde, ‘sambu na nki Loti kupesaka bana na yandi ya bankento na bantu yina?’ Na kisika ya kuyindula nde bangindu na yandi kuvandaka ya mbi, sambu na nki beto tadila ve mambu na mutindu yankaka? Ntetentete, yo lenda vanda nde lukwikilu kupusaka Loti na kusala mambu yina yandi salaka. Na nki mutindu? Ntembe kele ve nde Loti kuzabaka mbote mutindu Yehowa kutaninaka Sara, nkento ya ngwasi na yandi, Abrahami. Yibuka nde sambu Sara kuvandaka kitoko mingi, Abrahami kulombaka yandi na kusonga bantu nde yandi vandaka mpangi na yandi, sambu yandi vandaka na boma nde bantu tafwa yandi sambu bo baka Sara. a Yo yina nkutu kusalaka nde bantu kubaka Sara mpi bo nata yandi na nzo ya Farao. Kansi, Yehowa kukotaka na mambu yina. Yandi salaka yonso sambu Farao kusimba ve Sara. (Kuyantika 12:11-20) Ziku Loti vandaka kukwikila nde Nzambi tatanina mpi bana na yandi ya bankento na mutindu mosi. Nkutu, na nzila ya bawanzyo, Yehowa kukotaka mpenza na dikambu yango mpi kigonsa kukuminaka ve bana-bankento yina.

16, 17. (a) Na nki mutindu yo fwete vanda nde Loti kusosaka kubangisa to kuvalangasa mabanza ya bantu ya Sodomi? (b) Ata bangindu ya Loti kuvandaka nki mutindu, inki kima beto lenda ndima?

¹⁶ Beto tadila ngindu yankaka. Yo lenda vanda nde Loti vandaka kusosa kubangisa to kuvalangasa mabanza ya bantu yina. Ziku yandi vandaka kukwikila nde bantu yango tazola ve bana na yandi ya bankento sambu  kikalulu ya bantu ya Sodome kuvandaka ya kusala mansoni babakala bo na bo. (Yude 7) Dyaka, bana-bankento yango kuvandaka ti bafianse na mbanza yina. Ziku bampangi ya kinsuni ya bana-bakala yina, banduku na bo, to banduku na bo ya mumbongo kuvandaka na kati ya kibuka yina. (Kuyantika 19:14) Ziku Loti kuvandaka ti kivuvu nde bantu yankaka na kati ya kibuka yango, yina kuzabanaka ti bafianse ya bana na yandi, zolaka kukotila bana na yandi ya bankento. Ebuna mavwanga yina zolaka kukota na kati ya bantu yango zolaka kusala nde kigonsa kukumina ve bana na yandi. b

¹⁷ Ata bangindu to mabanza ya Loti kuvandaka nki mutindu, beto lenda ndima dyambu yai: Sambu Yehowa kesalaka ntangu yonso mambu yina kele ya mbote, yo fwete vanda nde yandi vandaka ti kikuma ya mbote ya kumona Loti nde yandi kele “muntu ya lunungu.” Nkutu kana beto tadila mambu yina bantu ya mubulu ya Sodome kusalaka, keti dute lenda vanda na kundima nde Yehowa kuvandaka mpenza ti kikuma ya kupesa ndola na bantu ya mbi ya mbanza yina?​—Kuyantika 19:23-25.

Sambu na Nki Yehowa Kufwaka Uza

18. (a) Inki kusalamaka ntangu Davidi kumekaka na kunata Sanduku na Yeruzalemi? (b) Inki ngyufula disolo yai kebasisa?

¹⁸ Disolo yankaka yina lenda pusa bantu yankaka na kudiyula bangyufula mingi ketadila mambu yina kusalamaka ntangu Davidi kumekaka na kunata sanduku ya kuwakana na Yeruzalemi. Bo tulaka Sanduku na zulu ya pusupusu mosi yina Uza ti mpangi na yandi vandaka kutwadisa. Biblia ketuba nde: “Ntangu bo kwisaka na kisika yina ya Nakoni ke tutilaka ble na yandi, Uza tandulaka diboko na yandi, yandi simbaka Sanduku ya Kuwakana sambu bangombe vandaka kwenda kunikisa yo na kunata yo. Mfumu Nzambi wilaka Uza makasi sambu yandi songaka ve luzitu na Sanduku ya Nzambi; Uza kufwaka na mbala mosi po pana penepene na Sanduku ya Kuwakana.” Bangonda mingi na nima, Davidi kunungaka na kunata Sanduku yango na ntangu yandi mekaka kunata yo na mbala ya zole na mutindu yina Nzambi kupesaka nsiku nde bantu ya Kehati ya kikanda ya Levi bantu fwete nata yo na mapeka. (2 Samuele 6:6, 7; Kutanga 4:15; 7:9; 1 Bansangu 15:1-14) Bantu mingi lenda yula nde: ‘Sambu na nki Yehowa kusalaka dyambu ya ngolo ya mutindu yina? Uza kusosaka kaka na kutanina Sanduku.’ Sambu beto baka ve ngindu mosi ya mbi, bika beto tadila mwa mambu yina lenda sadisa beto.

19. Sambu na nki Yehowa lenda sala ve dyambu mosi ya kukonda lunungu?

¹⁹ Beto fwete yibuka nde Yehowa lenda sala ve dyambu ya kukonda lunungu. (Yobi 34:10) Sambu na yandi, kusala dyambu ya kukonda lunungu tavanda kukonda kumonisa zola, mpi kulonguka na beto ya Biblia ya mvimba mesadisaka beto na kuzaba nde “Nzambi kele zola.” (1 Yoane 4:8, NW) Dyaka, Masonuku ketubila beto nde “lunungu ti kusambisa kele ngolo ya kiti ya kimfumu” ya Nzambi. (Nkunga 89:14, NW) Ebuna, inki mutindu Yehowa lenda sala dyambu ya kukonda lunungu? Kana yandi sala  dyambu ya mutindu yina, yo tatendula nde yandi mekitisa ngolo ya fondasio yina mesimbaka mpenza kimfumu na yandi.

20. Inki bikuma kesonga nde yo fwete vanda nde Uza kuzabaka bansiku yina vandaka kutadila Sanduku?

²⁰ Beto vila ve nde yo fwete vanda nde Uza kuzabaka nsiku mbotembote. Sanduku vandaka kusonga nde Yehowa kuvandaka na kati na bo. Nsiku vandaka kutuba pwelele nde bantu yina Nzambi kupesaka ve nswa lendaka kusimba yo ve, mpi yo vandaka kukebisa pwelele nde bantu yina takulula nsiku yango tafwa. (Kutanga 4:18-20; 7:89) Yo yina, kukatula sanduku yina ya santu sambu na kunata yo na kisika yankaka kuvandaka ve mukumba mosi ya kusakana na yo. Ata Uza kuvandaka ve nganga-Nzambi, sambu yandi lendaka kuvanda Mulevi, yo fwete vanda nde yandi zabaka Nsiku mbotembote. Dyaka, bamvula mingi na ntwala, sambu na kutanina Sanduku, bo nataka yo na nzo ya tata na yandi. (1 Samuele 6:20–7:1) Yo salaka bamvula 70 na nzo na bo, tii kuna Davidi kubakaka lukanu ya kunata yo na kisika yankaka. Yo yina, yo kemonana nde banda na bumwana na yandi, Uza vandaka kuzaba bansiku yina vandaka kutadila Sanduku.

21. Na dyambu yina metala Uza, sambu na nki yo kele mfunu na kuyibuka nde Yehowa kemonaka bangindu yina kevandaka na kati ya ntima?

²¹ Mutindu beto monaka yo na luyantiku, Yehowa kemonaka na kati ya ntima. Sambu Ndinga na yandi kemonisa nde Uza kusalaka dyambu mosi ya kukonda “luzitu,” yo fwete vanda nde Yehowa kumonaka mwa ngindu ya bwimi ya Uza kuvandaka na yo yina disolo yango ketubila ve na sikisiki. Keti yo lendaka kuvanda ve nde Uza kuvandaka muntu mosi ya lulendo, yina vandaka ti kikalulu ya kukonda kuzitisa bansiku? (Bingana 11:2) Keti yandi kumaka kudimona nde yandi mekuma muntu mosi ya nene na mpila yandi vandaka kutwadisa Sanduku yina dibuta na bo vandaka kutanina na kingenga? (Bingana 8:13) Keti Uza kukondaka kibeni lukwikilu yo yina yandi monaka nde Yehowa kuvandaka ve ti ngolo ya kutanina sanduku ya santu yina vandaka kusonga nde Yandi vandaka na kati ya bantu na yandi? Ata yo vandaka sambu na nki kikuma, beto lenda ndima nde Yehowa kusalaka dyambu yina kuvandaka ya mbote. Ziku Yehowa kumonaka kima mosi na ntima ya Uza yina kupusaka Yandi na kufwa Uza na mbala mosi.​—Bingana 21:2.

Kikuma ya Mbote ya Kutudila Ntima

22. Inki mutindu mayele ya Yehowa kemonanaka na mutindu Ndinga na yandi kekondaka kutubila bantangu yankaka mambu yankaka ya fyoti-fyoti?

²² Mayele ya Yehowa yina beto lenda fwanisa ve na kima mosi kemonanaka na mpila yandi kekondaka kutubila bantangu yankaka mambu yankaka ya fyoti-fyoti na Ndinga na yandi. Mpidina, Yehowa kepesaka beto dibaku ya kumonisa nde beto ketudilaka yandi ntima. Keti mambu ya beto metadila kemonisa ve pwelele nde beto kele ti bikuma ya mbote ya kundima bandola yina Yehowa kepesaka? Ee, na ntangu beto kelongukaka Ndinga ya Nzambi na ntima ya masonga mpi na mabanza ya kukanguka, beto kebakisaka mambu mingi ya metala Yehowa yina kendimisaka beto nde yandi kesalaka ntangu yonso mambu yina kele ya masonga mpi ya mbote. Yo yina, kana masolo yankaka ya Biblia kebasisa bangyufula yina beto kekuka ve kuzwa bamvutu na yo ya sikisiki mbala mosi, bika beto tula mpenza ntima nde Yehowa kusalaka mambu yina kuvandaka ya mbote.

23. Beto lenda tula ntima nde nki sambu na mambu ya Yehowa tasala na bilumbu kekwisa?

²³ Beto lenda vanda na kikalulu ya kutula ntima ya mutindu mosi na mambu yina Yehowa tasala na bilumbu kekwisa. Mpidina, beto lenda ndima nde na ntangu yandi tapesa bantu ndola na mpasi ya nene yina mekuma penepene, yandi tafwa ve “bantu ya mbote nzila mosi na bantu ya mbi.” (Kuyantika 18:23) Zola ya lunungu ti ya masonga yina yandi kele na yo tapusa yandi ve ata fyoti na kusala dyambu ya mutindu yina. Beto lenda tula mpenza ntima nde na inza ya mpa yina kekwisa, yandi talungisa bampusa na beto yonso na mutindu mosi ya kuluta mbote. ​—Nkunga 145:16.

[Banoti na nsi ya lutiti]

Keti Nge Keyibuka?

• Inki bikuma fwete pusa beto na kundima bandola yina Yehowa kepesaka?

• Inki lenda sadisa beto na kubuya kubakila Loti ngindu ya mbi na dyambu ya yandi salaka ntangu yandi pesaka bana na yandi ya bankento na bantu yina kuvandaka na makasi?

• Inki mambu lenda sadisa beto na kubakisa kikuma yina Yehowa kufwilaka Uza?

• Beto lenda tula ntima nde nki sambu na yina metala mambu ya Yehowa tasala na bilumbu kekwisa?

[Bangyufula ya disolo ya kulonguka]