Baleke, Beno Kumisa Yehowa!
Baleke, Beno Kumisa Yehowa!
“Beno bana-bankento ti bana-babakala, . . . beno yonso beno kumisa Mfumu Nzambi!”—NKUNGA 148:7, 12.
1, 2. (a) Bandilu ya nki mutindu baleke mingi kezabaka? (b) Sambu na nki baleke fwete buya ve bandilu yina bibuti na bo ketudilaka bo?
MBALA mingi baleke kezabaka mbote mambu yina bo mepesilaka bo ntete ve nswa ya kusala. Mingi na kati na bo lenda tela nge ti kyese yonso mvula ya bo fwete lungisa na ntwala nde bo pesa bo nswa ya kusabuka bo mosi balabala, to ntangu ya bo fwete kwenda kulala ve na nkokila, to ya kutambwisa vwatire. Bantangu yankaka, leke mosi lenda mona nde bima mingi ya yandi kevandaka na yo mfunu mpi ya yandi kelombaka, mvutu kevandaka kaka nde: “Kinga ntangu nge takuma mbuta.”
2 Baleke, beno kezaba mbote nde bibuti na beno ketudilaka beno bandilu ya mutindu yina sambu na kutanina beno. Ntembe kele ve nde beno kezaba mpi nde Yehowa kesepelaka ntangu beno kelemfukilaka bibuti na beno. (Kolosai 3:20) Kansi, keti beno kemonaka bonso nde, sambu na bandilu yina, luzingu na beno ya “kyeleka” meyantikaka ntete ve? Keti bo kebuyisaka beno bima yonso ya mfunu tii kuna beno takuma bambuta? Ata fyoti ve! Bubu yai, ke na kisalu mosi ya ke na kusalama ya meluta mikumba yankaka ya beno ke na kuvingila. Baleke, keti beno kele na nswa ya kusala kisalu yango? Kuluta dyaka, Nzambi ya Kuluta Kuzanguka yandi mosi muntu kebinga beno na kusala kisalu yango!
3. Yehowa kebinga baleke na kusala nki kisalu ya mfunu, mpi nki bangyufula beto tatadila ntangu yai?
3 Inki kisalu beto ke na kutubila? Tala bangogo ya mukapu ya ntu-dyambu ya disolo na beto: “Beno bana-bankento ti bana-babakala, beno bambuta ti baleki, . . . beno yonso beno kumisa Mfumu Nzambi!” (Nkunga 148:7, 12) Mutindu mukapu yai kemonisa yo, beno kele na dibaku mosi ya nene: Beno lenda kumisa Yehowa. Mutindu nge kele leke, keti nge kesepelaka na kusala kisalu yango? Baleke mingi kesepelaka na yo. Sambu na kubakisa kikuma ya kepusaka bo na kusepela mutindu yina, bika beto tadila bangyufula tatu. Ya ntete, sambu na nki beno fwete kumisa Yehowa? Ya zole, inki mutindu beno lenda kumisa yandi mbote-mbote? Ya tatu, inki kele ntangu ya mbote ya kuyantika na kukumisa Yehowa?
Sambu na nki Kukumisa Yehowa?
4, 5. (a) Na kutadila Nkunga ya 148, inki mambu ya kuyituka beto kemona? (b) Inki mutindu bigangwa yina ketubaka ve to yina keyindulaka ve kekumisaka Yehowa?
4 Kikuma ya nene ya kukumisa Yehowa kele nde yandi kele Ngangi. Nkunga ya 148 kesadisa beto na kutula dikebi na kyeleka yai. Yindula fyoti: Inki mutindu nge takudiwa kana nge mekutana ti kimvuka mosi ya nene ya bantu ya ke na kuyimba na bumosi nkunga mosi ya kitoko mpi ya kyese? Inki nge keyindula kana nge mezaba nde bangogo ya nkunga yango kele ya kyeleka, mpi nde yo ketubila bangindu ya mfunu, ya kyese, mpi ya kelonga malongi ya mfunu? Keti nge tawa ve nzala ya kulonguka bangogo ya nkunga yango mpi kuyimba kumosi ti kimvuka yina? Ntembe kele ve nde bantu mingi na kati na beto tasala yo. Nkunga ya 148 kemonisa nde nge mekutana ti dyambu mosi ya mefwanana kansi ya meluta kyese. Nkunga yango ketubila kibuka mosi ya nene ya bantu, mpi bo yonso kekumisa Yehowa na bumosi. Kansi, ntangu nge ketanga nkunga yina, nge lenda mona kima mosi ya kuyituka. Inki kima yango?
5 Mingi na kati ya bima yango ya kekumisa Yehowa ya bo ketubila na Nkunga ya 148 ketubaka ve to keyindulaka ve. Mu mbandu, beto ketanga nde ntangu, ngonda, bambwetete, mvula ya neze, mupepe, bangumba ya fyoti ti ya nene ke na kukumisa Yehowa. Inki mutindu bigangwa yai ya kukonda luzingu lenda sala dyambu ya mutindu yai? (Baverse 3, 8, 9) Kaka mutindu banti, bigangwa yina kezingaka na masa, mpi bambisi kesalaka. (Baverse 7, 9, 10) Keti nge metalaka dezia mutindu ntangu kedinda to mutindu ngonda ya mvimba ketambula na kati ya bambwetete mingi na zulu, to dyaka kuseka na kyese sambu nge memona bambisi kesakana to kuyituka ngolo sambu na kisika mosi ya kitoko mingi? Kana mpidina, nge “mewaka” nkunga ya lukumu yina lugangu keyimbaka. Bima yonso ya Yehowa mesalaka keyibusaka beto nde yandi kele Ngangi nkwa-ngolo yonso, nde ata muntu mosi ve na luyalanganu ya mvimba meluta Yehowa na ngolo, na mayele, to na zola.—Roma 1:20; Kusonga 4:11.
6, 7. (a) Nkunga ya 148 ketubila nki bigangwa ya mayele ya kekumisa Yehowa? (b) Inki lenda pusa beto na kukumisa Yehowa? Pesa mbandu.
6 Nkunga ya 148 ketubila mpi bigangwa ya mayele yina kekumisaka Yehowa. Na verse 2, beto kemona nde “basoda” ya Yehowa ya zulu, disongidila bawanzyo, kekumisa Nzambi. Na verse 11, bo kelomba na bantu ya ke na kiyeka mpi na bupusi ya ngolo, mu mbandu bantotila mpi bazuzi, na kukumisa mpi Nzambi. Kana bawanzyo ya kele ngolo kesepelaka na kukumisa Yehowa, ata muntu mosi ve ke na nswa ya kutuba nde yandi meluta mfunu mingi sambu na kukumisa Yehowa. Ebuna, na verse 12 mpi 13, bo kebinga beno baleke na kukumisa mpi Yehowa. Keti beno ke na mpusa mpi luzolo ya kusala yo?
7 Beto tadila mbandu mosi. Kana nge ke na nduku mosi ya ngolo ya kele ti mayele ya kusala kima mosi, bonso bansaka, kusala bifwanisu, to kubula miziki, keti nge tatubila ve bantu ya dibuta na beno mpi banduku yankaka masolo na yandi? Ntembe kele ve nde nge tasala yo. Kulonguka mambu yonso yina Yehowa mesalaka lenda vanda na bupusi ya mutindu mosi na beto. Mu mbandu, Nkunga 19:2, 3 ketuba nde zulu ya mefuluka ti bambwetete ‘kepusaka beto na kuzabisa mambu yango.’ Sambu na yina metala beto bantu, ntangu beto keyindula mambu ya kuyituka yina Yehowa mesalaka, beto lenda yambula ve na kutubila bantu yankaka mambu ya metala Nzambi na beto.
8, 9. Sambu na nki bikuma Yehowa kezolaka nde beto kumisa yandi?
8 Kikuma yankaka ya nene ya kukumisa Yehowa kele nde yandi kezolaka nde beto sala yo. Sambu na inki? Keti yo kele sambu yandi kezolaka nde bantu kukumisa yandi? Ve. Beto bantu kevandaka na mfunu ya lukumu bantangu yankaka, kansi Yehowa meluta beto ntama kibeni. (Yezaya 55:8) Yandi kevandaka ve na badute sambu na yina metala kimuntu to bikalulu na yandi. (Yezaya 45:5) Ata mpidina, yandi kezolaka nde beto kumisa yandi mpi kesepelaka ntangu beto kesalaka yo. Sambu na inki? Beto tadila bikuma zole. Kikuma ya ntete kele nde, yandi kezabaka nde beto kevandaka na nzala ya kukumisa yandi. Yandi gangaka beto ti mpusa ya kimpeve, disongidila, mpusa ya kusambila yandi. (Matayo 5:3) Yehowa kesepelaka ntangu yandi kemonaka beto kelungisa mpusa yina, kaka mutindu bibuti na beno kesepelaka na kumona beno kedya madya ya bo kezaba nde yo kele mbote sambu na beno.—Yoane 4:34.
9 Kikuma ya zole kele nde, Yehowa kezaba nde bantu yankaka kekingaka na kuwa beto kekumisa yandi. Ntumwa Polo kusonikilaka leke Timoteo na bangogo yai: “Keba nge mosi, keba na malongi na nge. Vanda ngolo na mambu yina yonso. Sambu, kana nge sala mpidina, nge ta gulusa moyo na nge mosi, nge ta gulusa mpi moyo ya bantu yina ke waka malongi na nge.” (1 Timoteo 4:16) Ya kyeleka, ntangu nge kelonga bantu yankaka mambu ya metala Yehowa Nzambi, ntangu nge kekumisa yandi, yo lenda sadisa bo mpi na kuzaba Yehowa. Nzayilu ya mutindu yai lenda nata bo na luguluku ya mvula na mvula!—Yoane 17:3.
10. Sambu na nki beto kevandaka na mpusa ya kukumisa Nzambi na beto?
10 Kansi beto kele na kikuma yankaka ya kukumisa Yehowa. Yibuka mbandu ya beto tubilaka ya nduku na nge ya kele na mayele ya kusala kima mosi. Kana nge mewa bantu yankaka kekusila yandi mambu, kevweza zina na yandi ya mbote, keti yo tapusa nge ve na kukumisa yandi dyaka mingi kuluta? Bantu kekusilaka Yehowa mambu mingi na inza yai. (Yoane 8:44; Kusonga 12:9) Yo yina, bantu yina kezolaka yandi kevandaka na mpusa ya kutubila kyeleka ya metala yandi sambu na kuyidika mambu yina ya luvunu. Keti nge mpi tazola kumonisa zola mpi ntonda na Yehowa, mpi kumonisa nde nge kezolaka nde yandi vanda Mfumu na nge na kisika ya Satana, mbeni na yandi ya ntetentete? Nge lenda sala mambu yai yonso kana nge kekumisa Yehowa. Yo yina, ngyufula ya kelanda kele nde, inki mutindu nge lenda kumisa yandi?
Mutindu Baleke Yankaka Kukumisaka Yehowa
11. Inki bambandu ya kele na Biblia kemonisa nde baleke lenda nunga mpenza na kukumisa Yehowa?
11 Biblia kemonisa nde mbala mingi baleke kenungaka mpenza na kukumisa Yehowa. Beto kele na mbandu ya mwana-nkento mosi ya Izraele yina bantu ya Siria kunataka na kimpika. Yandi taka kimbangi ti kikesa yonso na mfumu na yandi ya nkento sambu na yina metala Elisa, profete ya Yehowa. Mambu yandi tubaka kunataka na dyambu mosi ya kuyituka, mpi yo pesaka kimbangi mosi ya ngolo. (2 Bantotila 5:1-17) Yezu mpi kutaka kimbangi ti kikesa yonso ntangu yandi vandaka mwana ya fyoti. Na kati ya mambu yonso ya Yezu kusalaka na kileke na yandi mpi ya bo mesonikaka na Masonuku, Yehowa kuponaka dyambu mosi: dyambu yango kusalamaka ntangu Yezu vandaka na bamvula 12. Yandi yulaka ti kikesa yonso balongi ya bansiku bangyufula na tempelo na Yeruzalemi mpi bo yitukaka mingi na mutindu yandi vandaka kubakisa banzila ya Yehowa.—Luka 2:46-49.
12, 13. (a) Inki Yezu kusalaka na tempelo ntangu fyoti na ntwala ya lufwa na yandi, mpi yo vandaka ti nki bupusi na bantu yina kuvandaka pana? (b) Inki Yezu kutubaka sambu na lukumu yina bana ya fyoti kupesaka?
12 Ntangu yandi kumaka mbuta, Yezu kusadisaka mpi bana ya fyoti na kukumisa Yehowa. Mu mbandu, kaka bilumbu fyoti na ntwala ya lufwa na yandi, Yezu kulutisaka ntangu na tempelo na Yeruzalemi. Biblia ketuba nde yandi salaka “mambu ya kuyituka” kuna. Yandi kulaka bantu yina vandaka kukumisa kisika yina ya santu nzo ya bamiyibi. Yandi belulaka mpi bifwa-meso ti bantu ya kufwa makulu. Yo lombaka nde bantu yonso yina kuvandaka na kisika yina, mingimingi bamfumu ya mabundu, kukumisa Yehowa mpi Mwana na yandi, Mesia sambu na dyambu yina. Kansi, yo kele mawa na kumona nde bantu mingi yina vandaka kuzinga na bilumbu yina kusalaka yo ve. Bo zabaka nde Nzambi muntu kutindaka Yezu, kansi bo vandaka kubanga bamfumu ya mabundu. Ata mpidina, kimvuka mosi ya bantu kutubaka na kikesa yonso. Keti beno kezaba bantu yango? Biblia ketuba nde: “Bambuta ya banganga-Nzambi ti balongi ya Bansiku waka makasi ntangu bo monaka Yesu ke sala mambu ya kuyituka, bana mpi ke tuba na ndinga ya ngolo na Nzo-Nzambi nde: ‘Lukumu kuvanda na Mwana ya Davidi!’ Ebuna bo yulaka Yesu nde: ‘Nge ke wa mambu ya bo ke tuba?’”—Matayo 21:15, 16; Yoane 12:42.
13 Banganga-Nzambi yina kuyindulaka nde Yezu tanganina bana yina vandaka kukumisa yandi na kuvanda mpima. Keti yandi salaka yo? Ata fyoti ve! Yezu kuvutudilaka banganga-Nzambi nde: “Mbote-mbote. Keti beno me tangaka ntete ve mambu yai na Mukanda ya Nzambi nde: ‘Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu’?” Yo ke pwelele nde, Yezu ti Tata na yandi kusepelaka na lukumu yina bana ya fyoti kupesaka yandi. Bana yina kusalaka mambu yina bambuta yonso yina kuvandaka pana zolaka kusala. Ata bo vandaka bana ya fyoti, yo kemonana nde bo bakisaka mbote mambu yonso. Bo monaka muntu yai kesala mambu ya kuyituka, ketuba ti kikesa mpi lukwikilu, mpi kemonisa zola mingi na Nzambi mpi na bantu na yandi. Yandi vandaka Mesia, “Mwana ya Davidi,” muntu yina bo silaka mutindu yandi mosi vandaka kutuba. Bana yina kubakaka lusakumunu sambu na lukwikilu na bo, bo bakaka nkutu dibaku ya kulungisa mbikudulu mosi.—Nkunga 8:3.
14. Inki mutindu makabu ya baleke kele na yo kesadisaka bo na kukumisa Nzambi?
14 Inki dilongi beto lenda baka na bambandu ya mutindu yai? Nde baleke lenda nunga mpenza na kukumisa Yehowa. Mbala mingi bo kevandaka na dikabu ya kubakisa kyeleka mbote mpi kukonda mpasi, mpi kumonisa lukwikilu na bo na masonga mpi kikesa yonso. Bo kevandaka mpi ti dikabu ya bo ketubila na Bingana 20:29, NW: “Kitoko ya baleki kele ngolo na bo.” Ya kyeleka, beno baleke, beno kele ti kikesa mpi ngolo, disongidila bisadilu ya kyeleka ya kukumisila Yehowa. Inki kele mutindu ya mbote ya beno lenda sadila makabu yai?
Inki Mutindu Nge Lenda Kumisa Yehowa?
15. Inki fwete pusa beto sambu na kununga na kukumisa Yehowa?
15 Kununga na kukumisa Nzambi keyantikaka na ntima. Nge lenda nunga ve na kukumisa Yehowa kana nge kesala yo kaka sambu bantu yankaka kepusa nge. Kuvila ve nde, nsiku ya kuluta nene na kati ya bansiku yonso kele yai: “Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.” (Matayo 22:37) Keti nge mezabaka Yehowa mbotembote na nsadisa ya kulonguka na nge mosi ya Ndinga na yandi? Mbuma ya mbote ya kebutukaka na kulonguka ya mutindu yina kele nde nge takuma kuzola Yehowa mingi. Mutindu ya mbote ya kumonisa zola yango kele ya kukumisa yandi. Kana nge mebakisa mbote mpusa na nge mpi kana yo kele ngolo, pana nge meyilama sambu na kukumisa Yehowa ti kikesa yonso.
16, 17. Inki bupusi bikalulu ya mbote kevandaka na yo sambu na kukumisa Yehowa? Pesa mbandu.
16 Na ntwala ya kuyindula mambu ya nge tatuba, yindula ntete mutindu nge tasala yo. Kana mwana-nkento ya Izraele yina kuzingaka na ntangu ya Elisa kuvandaka na bikalulu ya mbi, luzitu ve, to masonga ve, keti nge keyindula nde bantu ya Siria yina kunataka yandi na kimpika zolaka kuwa mambu yina yandi tubaka sambu na profete ya Yehowa? Ziku ve. Kiteso mosi, bantu lenda vanda ti nzala ya kuwa nge kana bo kemona nde nge kele luzitu, masonga, mpi na bikalulu ya mbote. (Roma 2:21) Beto tadila mbandu mosi.
17 Mwana-nkento mosi ya bamvula 11 na Portugal kunwanaka ti bupusi ya kuta na nzo-nkanda bankinsi yina vandaka kuwakana ve ti kansansa na yandi ya melongamaka na Biblia. Yandi tendudilaka longi na yandi na luzitu yonso sambu na nki yandi vandaka kubuya, kansi longi kusekaka sambu na kuvweza yandi. Na nima, longi yina kumekaka mbala mingi na kupesa yandi nsoni, mpi kuvweza dibundu na yandi. Kansi, leke yina ya nkento kuvandaka kaka luzitu. Na nima ya bamvula, mpangi-nkento yina ya leke kusalaka kisalu ya kimupasudi nzila ya ntangu yonso. Na lukutakanu mosi ya distrike, yandi vandaka kutala bantu yina vandaka kubaka mbotika mpi yandi zabaka muntu mosi na kati na bo. Muntu yango vandaka longi na yandi yina ya ntama! Na nima ya kuyambana ti mansanga na meso, nkento yina ya kukumaka ti mwa bamvula mingi kusongaka mwana-nkento yina nde yandi mevilaka ve ata fyoti luzitu yina mwana mosi ya nzo-nkanda na yandi kuvandaka na yo. Yo yina kusalaka nde, ntangu Mbangi mosi ya nkento kulutaka na nzo na yandi, longi yina kutubilaka bikalulu ya mbote ya mwana ya nzo-nkanda na yandi ya ntama. Yo yina, bo yantikaka kulonguka Biblia, mpi nkento yai kundimaka kyeleka ya Biblia. Mutindu nge memona yo, bikalulu na nge ya mbote lenda vanda mwaye mosi ya ngolo ya kukumisa Yehowa!
18. Inki kima leke mosi lenda sala kana yandi kemonaka mpasi na kuyantika masolo ya ketadila Biblia mpi Yehowa Nzambi?
18 Keti bantangu yankaka nge kemonaka mpasi na kuyantika kutubila lukwikilu na nge na nzo-nkanda? Nge kele nge mosi ve, baleke yankaka mpi kekudiwaka mutindu mosi. Kansi, nge lenda yidika mambu na mpila nde bankaka kuyula nge bangyufula ya metala lukwikilu na nge. Mu mbandu, kana nsiku kebuyisa yo ve mpi kana nge ke na nswa ya kusala yo, sambu na nki ve kunata mikanda yina ketendulaka Biblia mpi kutanga yo na ntangu ya kupema to na balere yankaka yina bo mepesaka nzila ya kusala yo? Bana ya nzo-nkanda na beno lenda yula nge mambu ya nge ke na kutanga. Ebuna, ntangu nge kepesa bo mvutu mpi ketela bo mambu yina mesepedisa nge na disolo to na mukanda ya nge ketanga, nge lenda mona nde nge meyantika dezia disolo mosi ya mbote kukonda kuzaba. Kuvila ve na kuyufula bangyufula yina tasadisa nge na kuzaba malongi yina bana yina ya nzo-nkanda kekwikilaka. Ntangu nge kezabisa bo mambu ya nge melongukaka na Biblia, widikilaka bo ti luzitu yonso. Mutindu baeksperiansi ya lutiti 29 kemonisa yo, baleke mingi ke na kukumisa Nzambi na nzo-nkanda. Yo kepesaka bo kyese mingi mpi kesadisaka bantu mingi na kuzaba Yehowa.
19. Inki mutindu baleke lenda kuma ngolo na kisalu ya kusamuna nzo na nzo?
19 Kisalu ya kusamuna nzo na nzo kele mutindu mosi ya mbote mpenza ya kukumisa Yehowa. Kana nge meyantika ntete ve kusala yo, sambu na nki ve kubaka lukanu ya kusala yo? Kana nge kesalaka yo dezia, keti ke ti balukanu yankaka ya nge lenda kuditudila? Mu mbandu, na kisika ya kutubila kaka dyambu mosi na konso nzo, sosa mpila ya kutomisa, lomba bandongisila na bibuti na nge mpi na bantu yankaka yina kele na eksperiansi mingi. Longuka mutindu ya kusadila Biblia mingi, ya kusala bamvutukila ya mbote, mpi ya kuyantika kulonguka Biblia ti muntu. (1 Timoteo 4:15) Kana nge kekumisa Yehowa na mitindu yai mbala na mbala, nge takuma ngolo mpenza na kisalu ya kusamuna nzo na nzo, mpi nge takuma kusepela mingi ti kisalu na nge.
Inki Ntangu Nge Fwete Yantika na Kukumisa Yehowa?
20. Sambu na nki baleke fwete kudiwa ve nde bo melunga ntete ve na kukumisa Yehowa?
20 Na bangyufula tatu ya beto metadila na disolo yai, mvutu na ngyufula yai ya nsuka kele ve mpasi ata fyoti. Tala mvutu ya pwelele yina Biblia kepesa: “Yo yina beno yindula Muntu yina salaka beno ntangu [yai ya] beno kele kaka baleki.” (Longi 12:1) Ya kyeleka, ntangu ya kuyantika na kukumisa Yehowa kele ntangu yai. Nge lenda tuba nde: “Mu ke leke mpenza sambu na kukumisa Yehowa. Mu kele ve na eksperiansi. Mu fwete vingila tii ntangu mu takuma mbuta.” Nge kele ve muntu ya ntete na kuyindula mutindu yai. Mu mbandu, leke Yeremia kusongaka Yehowa nde: “A Mfumu, mono zaba kutuba ve, mono kele ka mono mwana.” Yehowa kupesaka yandi kikesa nde yandi vandaka ve na kikuma ya kuwa boma. (Yeremia 1:6, 7) Beto mpi kele ve na kikuma ya kuwa boma ntangu beto kekumisa Yehowa. Ata dyambu mosi ve ya mbi lenda bwila beto yina Yehowa lenda kuka ve na kukatula.—Nkunga 118:6.
21, 22. Sambu na nki bo kefwanisa baleke yina kekumisaka Yehowa na malulu, mpi sambu na nki kufwanisa yina kepesa mpenza kikesa?
21 Yo yina, beto kesyamisa beno baleke nde: Beno wa ve boma ata fyoti na kukumisa Yehowa! Ntangu yai ya beno kele baleke kele ntangu ya kuluta mbote ya kusala kisalu mosi ya kuluta mfunu ya ke na kusalama na ntoto bubu yai. Kana beno sala yo, beno takota na kati ya kimvuka mosi ya kitoko, disongidila na kati ya dibuta ya ntoto ya mvimba ya bantu yina ke na kukumisa Yehowa. Yehowa kele na kyese nde beno vanda na kati ya dibuta yango. Beno simba bangogo yai ya kupemama yina muyimbi-bankunga kusongaka Yehowa: “Bantu na nge takudipesa na luzolo na bo mosi na kilumbu ya nge tasonga ngolo ya basoda na nge. Na nsemo ya busantu na nge, banda na luyantiku ya kilumbu, nge kele na kibuka ya baleke kaka mutindu malulu kevandaka.”—Nkunga 110:3, NW.
22 Ntangu malulu kesemaka na nsemo ya ntangu na suka, yo kevandaka kifwanisu mosi ya kitoko na kutala, mpidina ve? Yo kepesaka madidi ya kitoko, kesemaka, mpi mpila ya kutanga yo kevandaka ve sambu yo kevandaka mingi. Yehowa kemonaka beno baleke yina kekumisaka yandi na kwikama yonso mpidina na bilumbu yai ya mpasi. Yo ke pwelele nde, mutindu beno meponaka na kukumisa Yehowa kesepedisaka ntima na yandi. (Bingana 27:11) Yo yina, baleke, beno sala yonso sambu na kukumisa Yehowa!
Inki Mvutu Nge Tapesa?
• Tanga mwa bikuma ya mfunu ya kukumisa Yehowa.
• Inki bambandu ya kele na Biblia kemonisa nde baleke lenda nunga mpenza na kukumisa Yehowa?
• Inki mutindu baleke lenda kumisa Yehowa bubu yai?
• Inki ntangu baleke fwete yantika na kukumisa Yehowa, mpi sambu na inki?
[Bangyufula ya disolo ya kulonguka]
[Bifwanisu ya kele na lutiti 18]
Kana nduku na nge ke na mayele ya kusala kima mosi, keti nge tatubila yo ve na bantu yankaka?
[Kifwanisu ya kele na lutiti 21]
Kana nge kezola kutomisa kisalu na nge ya kusamuna, lomba bandongisila na Bambangi yina kele na eksperiansi mingi