Bantu Kesosa Ngemba ya Mabanza

ALBERT kuvandaka na makwela mosi ya mbote. Yandi vandaka mpi ti bana zole ya kitoko. Kansi, yandi vandaka kudiwa nde kima mosi vandaka kukonda na luzingu na yandi. Na ntangu mosi buna yina yo lombaka nde yandi nwana sambu na kuzwa kisalu, yandi kudipesaka na mambu ya politiki mpi yandi kumaka kundima bangindu ya sosializme. Yandi kotaka nkutu na parti ya Kominizme ya bwala na yandi.

Kansi, Albert kusukininaka ve na kumona nde Kominizme kunatilaka yandi ve mambote ya kyeleka. Yandi yambulaka mambu ya politiki mpi yandi kumaka kudipesa kaka na mambu ya metala dibuta na yandi. Lukanu na yandi kukumaka kaka ya kusala yonso na mpila nde dibuta na yandi kuvanda na kyese. Ata mpidina, Albert vandaka kudiwa kaka nde kima mosi vandaka kukonda na luzingu na yandi. Kima yango kuvandaka ngemba ya kyeleka ya mabanza.

Albert mpamba ve muntu mekutanaka na dyambu ya mutindu yai. Sambu na kuzwa lukanu ya kyeleka na luzingu, bantu mingi memekaka kusadila bangindu ti bafilozofi ya mutindu na mutindu, mpi bo mekotaka na mabundu ya mutindu na mutindu. Na bansi ya Mputu, muvuma ya ba hippie yina kubasikaka na bamvu 1960 kuvandaka rebelio mosi ya kibuka yina vandaka kubuya kulanda bikalulu ti mutindu ya kuzinga ya bambuta. Sambu na kusosa kyese ti lukanu ya luzingu, baleke ya ntangu yina vandaka kusadila mingimingi bima yina kelausaka mpi bo vandaka kudipesa na bafilozofi ya muvuma ya ba hippie, ya bantu vandaka kubinga nde muvuma ya bamfumu ya mabundu ya hindu ti ya banganga-Nzambi ya nene. Ata mpidina, muvuma yango kunataka ve kyese ya kyeleka. Kansi, yo salaka nde baleke yina vandaka kunwa bima ya kelausaka mpi bayina vandaka kusala pite kukuma mingi. Yo salaka mpi nde bikalulu ya mbote kubeba nswalu mpenza na kati ya bimvuka ya bantu.

Sambu na kusosa kyese, bantu mingi mekudipesaka tuka bamvu-nkama mingi na kusosa kimvwama ti  kimfumu, to na kulonguka mingi. Kansi nsukansuka, bo mezwaka ve kyese yango. Yezu kutubaka nde: “Luzingu ya kieleka ya muntu yo kele ve sambu na bima na yandi, ata na ntangu yina ya yandi kele mvwama.” (Luka 12:15) Kansi, mbala mingi, kuvanda na lukanu ya kusosa kaka kukuma ti kimvwama kenataka mawa. Biblia ketuba nde: “Bantu yina ke zolaka kukuma bamvwama, Satana ke bwisaka bo; nzala mingi ya buzoba ti ya mbi yina ke bebisaka bantu, yina ke fwaka bo, yo ke kangaka bo. Sambu kuzola mbongo mingi ke bendaka mambu ya mbi ya mutindu na mutindu. Bantu ya nkaka vandaka na nzala mingi ya mbongo; yo yina nzala yango . . . pesaka bo mpasi mingi na ntima.”​—1 Timoteo 6:9, 10.

Ebuna, inki mutindu muntu lenda zwa ngemba ya mabanza ti lukanu ya kyeleka na luzingu? Keti yo ketendula nde beto kele ve ti lutwadisu yina lenda sadisa beto na kuzwa yo? Yo kele kyese na kuzaba nde lutwadisu kele. Mutindu beto tamona yo na disolo yina kelanda, muntu kezwaka ngemba ya mabanza na ntangu yandi kelungisaka dyambu mosi ya mfunu kibeni, yina bantu mpamba mefwana na kulungisa.

[Kifwanisu ya kele na lutiti 3]

Keti kusosa kimvwama, kimfumu, to kulonguka mingi tasadisa nge na kuzwa ngemba ya mabanza?