Nsangu ya Mbote Sambu na Bantu ya Makanda Yonso

“Beno tavanda bambangi na mono . . . tii na kisika ya kuluta ntama ya ntoto.”​—BISALU 1:8, NW.

1. Beto balongi ya Biblia, na nki mambu beto ketulaka dikebi, mpi sambu na inki?

 BALONGI ya mbote ketulaka kaka ve dikebi na mambu ya bo kesongaka balongoki na bo, kansi mpi na mutindu bo kesongaka bo yo. Beto balongi ya kyeleka ya Biblia, beto kesalaka mutindu mosi. Beto ketulaka dikebi na nsangu ya beto kelongaka ti na bametode na beto. Nsangu na beto ya mbote ya Kimfumu ya Nzambi kesobaka ve, kansi bantangu yankaka beto kesobaka bametode ya beto kelongilaka bantu. Sambu na nki? Sambu na kusimba ntima ya bantu mingi.

2. Mbandu ya nani beto kelandaka na ntangu beto kesobaka bametode na beto ya kulongila ?

 ² Na ntangu beto kesobaka bametode na beto ya kulongila, beto kelandaka mbandu ya bansadi ya Nzambi ya ntangu ya ntama. Beto baka mbandu ya ntumwa Polo. Yandi tubaka nde: “Ntangu mono ke sala ti Bayuda mono ke vandaka bonso Muyuda . . . Ntangu mono ke sala ti bantu yina kuzaba Bansiku ya Moize ve, mono ke zingaka bonso bo . . . Na bantu yina ke na lukwikilu ya ngolo ve, mono mpi ke vandaka bonso muntu yina ke na lukwikilu ya ngolo ve, sambu na kubenda bo. Ebuna konso bantu yina ya mono ke vandaka ti bo, mono ke vandaka mpi bonso bo, na mpila nde mono kugulusa bantu ya nkaka na kati na bo na banzila ya mutindu na mutindu.” (1 Korinto 9:19-23) Polo kubutaka bambuma ya mbote na ntangu yandi vandaka kusoba bametode na yandi ya kulongila. Beto mpi tabuta bambuma ya mbote kana beto ketadila na zola yonso bampusa ti mawi ya bawi na beto.

Tii na “Bandambu Yonso ya Nsi-Ntoto”

3. (a) Inki dyambu ya mpasi beto kekutana na yo na kisalu na beto ya kusamuna? (b) Inki mutindu bangogo ya Yezaya 45:22 ke na kulungana bubu yai?

³ Dyambu ya mpasi mpenza yina bansamuni ya nsangu ya mbote kekutanaka na yo kele bunene ya teritware yina kebaka “nsi-ntoto ya mvimba.” (Matayo 24:14) Na mvu-nkama ya mekatuka kuluta, bansadi mingi ya Yehowa kusalaka ngolo sambu na kunata nsangu ya mbote na bansi yina nsangu mekumaka ntete ve. Inki mbuma yo butaka? Kisalu kuyelaka mingi na inza ya mvimba. Na luyantiku ya bamvu 1900, kisalu ya kusamuna vandaka kusalama na bansi fyoti mpamba, kansi bubu yai Bambangi ya Yehowa kele na bansi 235! Ya kyeleka, nsangu ya mbote ya Kimfumu ke na kulongama na “bandambu yonso ya nsi-ntoto.”​—Yezaya 45:22.

4, 5. (a) Banani mesadisaka mingi sambu na kumwanga nsangu ya mbote? (b) Inki mambu bafiliale yankaka kutubaka sambu na bampangi ya bansi ya banzenza yina mekwendaka kusala na bateritware na bo?

 ⁴ Inki mesalaka nde kisalu kuyela mutindu yai? Mambu mingi. Bamisionere ya Gileade, Nzo-Nkanda ya Biblia ya La Société WatchTower mpi, na bamvula yai, bampangi kuluta 20 000 ya kukotaka Nzo-Nkanda Yina Kelongaka Mutindu ya Kusala Kisalu mesadisaka mingi kibeni. Bambangi mingi yina mesadilaka mbongo na bo mosi sambu na kukwenda na bisika yina mpusa ya bansamuni ya Kimfumu kele mingi mesadisaka mpi nde kuyela kumonana. Bakristu yina mekuditambikaka mutindu yai, (babakala ti bankento, baleke ti bambuta, bayina mekwelaka ti bayina mekwelaka ve) kesala mingi sambu na kusamuna nsangu ya Kimfumu na ntoto ya mvimba. (Nkunga 110:3; Roma 10:18) Beto kebakaka bo mpenza na valere. Beto tadila mambu yina bafiliale yankaka kusonikaka sambu na bampangi ya bansi ya banzenza yina mekwendaka kusala na bateritware ya bafiliale yina mpusa ya bansamuni kele mingi.

⁵ “Bampangi yai ya beto kezolaka mingi ketwadisaka kisalu ya kusamuna na bateritware ya ntama, bo kesadisaka na kubasisa mabundu ya mpa mpi bo kesadisaka bampangi ya babakala ti ya bankento ya mabundu yango na kuyela na kimpeve. (Équateur) “Kana bampangi mingi ya bansi ya banzenza yina kesalaka awa mekwenda ka bo, mabundu tavanda dyaka ve ngolo. Kuvanda ti bo awa kele lusakumunu sambu na beto.” (République dominicaine) “Na mabundu na beto mingi, bampangi-bankento kele mingi mpenza, bantangu yankaka bo kekumaka 70 na kati ya nkama. (Nkunga 68:12) Bamingi na kati na bo kele bantu ya mpa na kyeleka, kansi bampangi-bankento yina ke bapasudi-nzila ya mekwelaka ve mpi ya mekatukaka na bansi yankaka kesadisaka mpenza na kupesa formasio na bampangi yina ya mpa. Bampangi-bankento yai ya bansi ya banzenza kele dikabu ya kyeleka sambu na beto!” (Insi mosi ya Eropa ya Esti) Keti nge metadilaka dezia dyambu ya kwenda kusala na insi yankaka? a​—Bisalu 16:9, 10.

“Banzenza Kumi ya Bandinga Yonso”

6. Inki mutindu Zakaria 8:23 kemonisa dyambu ya mpasi ya metala bandinga yina beto kekutanaka na yo na kisalu na beto ya kusamuna?

⁶ Dyambu yankaka ya mpasi mpenza kele bandinga ya mingi yina bantu ketubaka na ntoto. Ndinga ya Nzambi kutubaka na ntwala nde: “Na bilumbu yina banzenza kumi ya bandinga yonso ya nsi-ntoto ta kwisa kusimba nsongi ya kazaka ya Muyuda mosi ti kutuba nde: ‘Beto ke zola kwenda ti beno sambu beto me wa nde Nzambi kele ti beno.’” (Zakaria 8:23) Kulungana ya mbikudulu yai na ntangu na beto kemonisa nde banzenza kumi ketendula kibuka ya nene yina Kusonga 7:9 kutubilaka. Kansi, simba nde mbikudulu ya Zakaria kemonisa nde, “banzenza kumi” yango takatuka na makanda yonso kaka ve kansi mpi na “bandinga yonso ya nsi-ntoto.” Keti beto kemona kulungana ya dyambu yai ya mfunu ya mbikudulu yango? Ee, beto ke na kumona yo.

7. Inki bantalu kemonisa nde nsangu ya mbote ke na kukumina bantu ya “bandinga yonso”?

⁷ Beto tadila mwa bantalu. Bamvula 50 meluta, mikanda na beto vandaka kubasika na bandinga 90. Kansi, bubu yai yo mekumaka kubasika na bandinga kuluta 400. “Mpika ya kwikama mpi ya mayele” mesalaka mpenza kikesa sambu na kubasisa mikanda ata na bandinga yankaka yina bantu fyoti mpamba ketubaka yo. (Matayo 24:45, NW) Mu mbandu, mikanda na beto ya ketendulaka Biblia kebasika bubu yai na groenlandais (yina bantu 47 000 ketubaka yo), palau (yina bantu 15 000 ketubaka yo), ti Yap (yina bantu ya ketubaka yo kele na nsi ya 7 000).

“Kyelo Mosi ya Nene” Yina Kenata na Mabaku ya Mpa

8, 9. Inki dyambu ya beto kekutana ti yo mekangudila beto “kyelo mosi ya nene,” mpi inki mutindu Bambangi mingi kekudipesa na yo?

⁸ Kansi bubu yai, yo lenda vanda mfunu ve nde beto kwenda na bansi ya banzenza sambu na kuzabisa nsangu ya mbote na bantu ya bandinga yonso. Na bamvula ya mekatuka kuluta, barefizie ti bamilio ya bantu yina mekwendaka kuzinga na bansi ya metomaka mesalaka nde bimvuka ya bantu yina ketubaka bandinga yankaka kukuma mingi. Mu mbandu, na Paris, na France, bantu ketubaka bandinga kiteso ya 100. Na Toronto, na  Canada, bo ketubaka bandinga 125; mpi na Londres, na Angleterre, bo ketubaka bandinga ya banzenza kuluta 300! Bantu yai ya bansi yankaka yina kekuma kaka mingi na bateritware ya mabundu mingi mekangula “kyelo mosi ya nene” yina kenata na mabaku ya mpa ya kuzabisa nsangu ya mbote na bantu ya makanda yonso.​—1 Korinto 16:9, NW.

⁹ Bambangi mingi kelonguka ndinga yankaka sambu na kununga dyambu yai ya mpasi. Sambu na bamingi na kati na bo, yo kele pete ve; kansi, kyese ya bo kebakaka na kusadisa banzenza ti barefizie na kulonguka kyeleka yina kele na Ndinga ya Nzambi kesadisaka bo na kuvilana mpasi yango. Na mvula mosi ya mekatuka kuluta, na insi mosi ya Eropa ya Westi, kiteso ya bantu 40 na kati ya nkama yina kubakaka mbotika na balukutakanu ya distrike kukatukaka na bansi ya banzenza.

10. Inki mutindu nge mesadilaka kamukanda Une bonne nouvelle pour des gens de toutes nations ? (Tala lupangu “Mambu ya Mfunu Yina Ke na Kamukanda Une bonne nouvelle pour des gens de toutes nations, “ na lutiti 32.)

¹⁰ Ya kyeleka, beto yonso ve lenda kuka kulonguka ndinga ya banzenza. Ata mpidina, beto lenda sadisa banzenza kana beto kesadila mbote kamukanda ya mpa Une bonne nouvelle pour des gens de toutes nations b (Nsangu ya Mbote Sambu na Bantu ya Makanda Yonso) yina kele ti nsangu mosi ya kitoko ya Biblia na bandinga mingi. (Yoane 4:37) Keti nge ke na kusadila kamukanda yai na kisalu ya kusamuna?

Ntangu Bantu Fyoti Mpamba Kendimaka

11. Inki dyambu yankaka ya mpasi beto kekutanaka na yo na bateritware yankaka?

¹¹ Mutindu bupusi ya Satana keyela na inza, beto kekutanaka mbala mingi ti dyambu yankaka ya mpasi: bantu fyoti mpamba kendimaka nsangu na bateritware yankaka. Ya kyeleka, dyambu yai keyitukisa beto ve, sambu Yezu kutubaka na ntwala nde beto takutana ti bantu ya mutindu yina. Sambu na bilumbu na beto, yandi tubaka nde: “Kuzolana na kati ya bantu mingi ta yantika kumana.” (Matayo 24:12) Lukwikilu ya bantu mingi na Nzambi mpi luzitu na bo na Biblia mekitaka. (2 Piere 3:3, 4) Yo yina, na bansi yankaka, bantu fyoti mpamba kekumaka balongoki ya mpa ya Kristu. Kansi, yo ketendula ve nde bikesa ya bampangi na beto ya luzolo ya babakala ti ya bankento yina kesamunaka na kwikama yonso na bateritware yina bantu fyoti kendimaka kevandaka ya mpamba. (Baebreo 6:10) Sambu na nki? Beto tadila dyambu yai.

12. Tanga balukanu zole ya kisalu na beto ya kusamuna.

¹² Evanzile ya Matayo kemonisa balukanu zole ya nene yina bisalu na beto ya kusamuna kelungisaka. Ya ntete kele nde beto ‘kekumisaka bantu [ya makanda, NW] yonso balongoki.’ (Matayo 28:19) Ya zole kele nde nsangu ya Kimfumu ketaka “kimbangi.” (Matayo 24:14, NW) Balukanu yai yonso zole kele mfunu, kansi lukanu ya zole kele ti ntendula ya nene. Sambu na inki?

13, 14. (a) Tanga dyambu mosi ya mfunu ya kidimbu ya kuvanda ya Kristu. (b) Inki beto fwete vila ve, mingimingi na ntangu beto kesamuna na bateritware yina bantu fyoti mpamba kendimaka?

¹³ Matayo, nsoniki ya Biblia, kusonikaka nde bantumwa kuyulaka Yezu nde: “Nki tavanda kidimbu ya kuvanda na nge ti ya nsuka ya ngidika ya bima?” (Matayo 24:3, NW) Na mvutu na yandi, Yezu kutubaka nde kisalu ya kusamuna na inza ya mvimba tavanda mosi na kati ya mambu ya mfunu ya kidimbu yango. Keti yandi vandaka kutubila kisalu ya kukumisa bantu balongoki? Ve. Yandi tubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba [bonso kimbangi na makanda yonso, NW].” (Matayo 24:14) Mpidina, Yezu kumonisaka nde kisalu ya kusamuna Kimfumu yo mosi tavanda mosi na kati ya dyambu ya mfunu ya kidimbu.

¹⁴ Yo yina, na ntangu beto kesamunaka nsangu ya mbote ya Kimfumu, beto keyibukaka nde ata beto kenungaka ve ntangu yonso na kukumisa bantu balongoki, beto kenungaka na kuta “kimbangi.” Ata bantu kundima to ve, bo mezaba mambu ya beto kesala, mpi beto kelungisa mbikudulu ya Yezu. (Yezaya 52:7; Kusonga 14:6, 7) Jordy, Mbangi mosi ya leke na Eropa ya Westi, kutubaka nde: “Yo kepesaka munu kyese kibeni na kuzaba nde Yehowa ke na kusadila munu sambu na kulungisa Matayo 24:14.” (2 Korinto 2:15-17) Ntembe kele ve nde nge mpi kekudiwaka mutindu yina.

 Ntangu Bantu Ketelaminaka Nsangu na Beto

15. (a) Na nki dyambu Yezu kukebisilaka balongoki na yandi? (b) Inki kesadisaka beto na kusamuna ata na kati ya kimbeni?

¹⁵ Kimbeni kele dyambu yankaka ya mpasi ya beto kekutanaka na yo na kisalu na beto ya kusamuna nsangu ya mbote ya Kimfumu. Yezu kukebisaka balongoki na yandi nde: “Bantu ya bansi yonso ta menga beno sambu na mono.” (Matayo 24:9) Bubu yai, bantu keyinaka, kemengaka, mpi kenyokulaka balongoki ya Yezu, mutindu bo salaka Bakristu ya ntete. (Bisalu 5:17, 18, 40; 2 Timoteo 3:12; Kusonga 12:12, 17) Bubu yai, na bansi yankaka, baguvernema mekangisaka kisalu ya Bakristu. Ata mpidina, Bakristu ya kyeleka ya bansi yango kelanda na kusamuna nsangu ya mbote ya Kimfumu sambu na kulemfukila Nzambi. (Amosi 3:8; Bisalu 5:29; 1 Piere 2:21) Inki kesadisaka bo, ti Bambangi yankaka yonso ya inza ya mvimba, na kusala mpidina? Yehowa kepesaka bo ngolo na nsadisa ya mpeve santu na yandi.​—Zakaria 4:6; Efezo 3:16; 2 Timoteo 4:17.

16. Inki mutindu Yezu kumonisaka kuwakana yina kele na kati ya kisalu ya kusamuna ti mpeve ya Nzambi?

¹⁶ Yezu kumonisaka kuwakana yina kele na kati ya mpeve ya Nzambi ti kisalu ya kusamuna na ntangu yandi songaka balongoki na yandi nde: “Beno tabaka ngolo ntangu mpeve santu takwisa na zulu na beno, mpi beno tavanda bambangi na mono . . . tii na kisika ya kuluta ntama na ntoto.” (Bisalu 1:8, NW; Kusonga 22:17) Kulandana ya mambu yina ke na verse yai kele mfunu. Ntete, balongoki kubakaka mpeve santu, na nima, bo yantikaka kisalu ya kuta kimbangi na inza ya mvimba. Mpeve ya Nzambi mpamba kupesaka bo ngolo ya kulanda na kuta “kimbangi na makanda yonso.” (Matayo 24:13, 14, NW; Yezaya 61:1, 2) Yo yina, yo fwanaka mpenza nde Yezu kubinga mpeve santu nde “nsadisi.” (Yoane 15:26, NW) Yandi tubaka nde mpeve ya Nzambi talonga balongoki na yandi mpi tatwadisa bo.​—Yoane 14:16, 26; 16:13.

17. Inki mutindu mpeve santu kesadisaka beto na ntangu ya kimbeni ya ngolo?

¹⁷ Na nki mitindu mpeve ya Nzambi kesadisaka beto bubu yai na ntangu bantu kemengaka ngolo kisalu na beto ya kusamuna nsangu ya mbote? Mpeve ya Nzambi kepesaka beto ngolo, mpi yo ketelamaninaka bayina kenyokulaka beto. Sambu na kumonisa kyeleka ya dyambu yai, beto tadila mbandu ya dyambu mosi yina kusalamaka na luzingu ya Ntotila Saule.

Kumengama na Mpeve ya Nzambi

18. (a) Inki mutindu Saule kukumaka muntu ya mbi kibeni? (b) Inki mambu Saule kusalaka sambu na kunyokula Davidi?

¹⁸ Na luyantiku, Saule, ntotila ya ntete ya Izraele, kuvandaka ntotila mosi ya mbote, kansi na nima yandi vandaka kulemfukila dyaka ve Yehowa. (1 Samuele 10:1, 24; 11:14, 15; 15:17-23) Nsukansuka, mpeve ya Nzambi vandaka kusadisa yandi dyaka ve. Na makasi yonso, Saule kumaka kunwanisa Davidi, ntotila ya kupakulama yina zolaka kuyinga yandi mpi yina mpeve ya Nzambi kumaka kusadisa. (1 Samuele 16:1, 13, 14) Yo vandaka kumonana bonso nde Davidi kuvandaka ve ti lutaninu. Nkutu, yandi vandaka kaka ti gitare, kansi Saule kuvandaka ti dikonga. Yo yina, kilumbu mosi ya Davidi vandaka kubula gitare, “[Saule] tubaka yandi mosi na nsi ya ntima nde: ‘Mono ta bula yandi dikonga tii na kibaka.’ Yandi losaka yandi dikonga mbala zole kansi Davidi tinaka yo.” (1 Samuele 18:10, 11) Nsukansuka, Saule kuwilaka mwana na yandi Yonatani, nduku ya Davidi, mpi “yandi zengaka Nzambi nde Yandi ta fwa Davidi diaka ve.” Kansi, na nima, Saule kulosilaka yandi dyaka “dikonga na kubula yandi tii na kibaka.” Ata mpidina, Davidi “tinaka ebuna dikonga simbaka na kibaka.” Davidi kutinaka, kansi Saule kulandaka yandi. Na ntangu yina ya mpasi, mpeve ya Nzambi kukumaka mbeni ya Saule. Na nki mutindu?​—1 Samuele 19:6, 10.

19. Inki mutindu mpeve ya Nzambi kutaninaka Davidi?

 ¹⁹ Davidi kutinaka na profete Samuele, kansi Saule kutindaka bantu na yandi na kukanga yandi. Ebuna, ntangu bo kumaka kisika yina Davidi kubumbanaka, “Mpeve ya Nzambi simbaka bantu ya Saule, bo mpi yantikaka kukina ti kutuba mambu ya Nzambi na ndinga ya ngolo.” Mpeve ya Nzambi kukotilaka bo mpi bo vilanaka mpenza kima ya bo tindaka bo na kusala. Saule kutindaka dyaka bantu mbala zole na kukanga Davidi, kansi bo mpi kusalaka kaka mutindu mosi. Nsukansuka, Ntotila Saule yandi mosi kwendaka kusosa Davidi, kansi yandi mpi kukukaka ve kunwanisa mpeve ya Nzambi. Nkutu, mpeve santu kusalaka nde yandi kangama “kilumbu ya mvimba mpimpa ti mwini.” Ebuna yo pesaka Davidi ntangu ya kufwana ya kutina.​—1 Samuele 19:20-24.

20. Inki dilongi beto lenda longuka na disolo ya bampasi yina Saule kumonisaka Davidi?

²⁰ Disolo yai ya Saule ti Davidi kele ti dilongi mosi ya kesyamisa: Bambeni ya bansadi ya Nzambi lenda nunga ve kana mpeve ya Nzambi memenga bo. (Nkunga 46:12; 125:2) Lukanu ya Yehowa kuvandaka nde Davidi kuyala Izraele. Ata muntu mosi ve lendaka kusoba lukanu yango. Na bilumbu na beto, Yehowa mebakaka lukanu nde ‘bo ta longaka Nsangu ya Mbote ya Kimfumu.’ Ata muntu mosi ve lenda kanga nzila nde yo salama.​—Bisalu 5:40, 42.

21. (a) Inki mambu bambeni mingi kesalaka bubu yai? (b) Beto ketulaka ntima na nki?

²¹ Bamfumu mingi ya mabundu ti ya politiki kesadilaka luvunu to nkutu nku sambu na kukangisa kisalu na beto. Kansi, kaka mutindu Yehowa kutaninaka Davidi na kimpeve, Yandi tatanina mpi bantu na Yandi bubu yai. (Malashi 3:6) Yo yina, bonso Davidi, beto ketuba na kutula ntima yonso nde: “Mono ke tula Mfumu Nzambi ntima, mono ke na boma ve . . . Bantu ya mpamba, nki bo lenda sala mono?” (Nkunga 56:11-12; 121:1-8; Roma 8:31) Ee, na lusadisu ya Yehowa, bika beto landa na kununga bampasi yonso ya beto kekutana ti yo na kisalu ya Nzambi mepesaka beto ya kusamuna nsangu ya mbote ya Kimfumu na bantu ya makanda yonso.

[Banoti na nsi ya lutiti]

Keti Nge Lenda Yibuka?

• Sambu na nki beto kesobaka bametode na beto ya kulongila?

• “Kyelo mosi ya nene” ya mekanguka kenataka na nki mabaku ya mpa?

• Inki dyambu kisalu na beto ya kusamuna kelungisaka ata na bateritware yina bantu fyoti mpamba kendimaka?

• Sambu na nki ata mbeni mosi ve lenda kanga nzila na kisalu ya kusamuna nsangu ya mbote ya Kimfumu?

[Bangyufula ya disolo ya kulonguka]

[Lupangu/Kifwanisu ya kele na lutiti 28]

Kyese Mingi ya Kusala Kisalu

Dibuta mosi ya Espagne yina kukwendaka na Bolivie kuvandaka “na kyese mpi na bumosi na kusadila Yehowa.” Mwana-bakala mosi ya dibuta yango kukwendaka kuna sambu na kusadisa kibuka mosi ya teritware izole. Kyese ya mingi yina yandi vandaka na yo kuyitukisaka bibuti na yandi ngolo kibeni mpi yo salaka nde dibuta ya mvimba, kumosi ti bana na bo iya ya babakala yina kuvandaka ti bamvula banda na 14 tii na 25, kusukinina ve na kukwenda kuna sambu na kusala kisalu ya kusamuna. Bana na bo tatu ya babakala mekuma ntangu yai bapasudi-nzila, ebuna yina ya kukwendaka kuna ntete mekatuka kukota ntama mingi ve Nzo-Nkanda Yina Kelongaka Mutindu ya Kusala Kisalu.

Angelica, mpangi-nkento mosi ya Canada yina kele ti bamvula 30 mpi yina ke na kusala na Eropa ya Esti, ketuba nde: “Mu kekutanaka ti bampasi mingi, kansi mu kevandaka na kyese ya kusadisa bantu na kisalu ya kusamuna. Mu kewaka dyaka kyese na kumona ntonda yina Bampangi ya insi yango kemonisaka munu mbala mingi sambu na lusadisu ya mu kwisaka kupesa bo.”

Bampangi-bankento zole ya kinsuni yina kezola kulungisa bamvula 30, yina mekatukaka na États-Unis mpi ya ke na kusala na République dominicaine, ketuba nde: “Yo lombaka nde beto yikana ti bikalulu mingi ya bantu ya teritware yango. Kansi, beto kwaminaka na kisalu na beto, ebuna ntangu yai balongoki nsambwadi na kati ya balongoki na beto ya Biblia mekumaka kukwenda na Balukutakanu.” Bampangi-bankento yai zole kusalaka kikesa na kuyidika kibuka ya bansamuni ya Kimfumu na mbanza mosi yina dibundu kuvandaka ve.

Laura, mpangi-nkento mosi ya kezola kulungisa bamvula 30, mesala bamvula kuluta iya na insi ya banzenza. Yandi ketuba nde: “Mu mendimaka na luzolo yonso kuzinga luzingu ya kukonda mindondo. Yo kesadisaka bansamuni na kubakisa nde luzingu ya kukonda mindondo kele dyambu ya muntu yandi mosi lenda pona na dibanza ya mbote, kansi sambu na kinsukami ve. Kusadisa bankaka, mingimingi baleke, mepesaka munu kyese mingi mpi yo kesalaka nde mu vilana bampasi ya kusala na insi ya banzenza. Ata kima mosi ve lenda baka kisika ya kisalu yina mu kesalaka awa, mpi mu talanda na kusala yo ntangu yonso ya Yehowa tabikisa munu na kisalu yango.”

[Lupangu/Kifwanisu ya kele na lutiti 32]

Mambu ya Mfunu Yina Ke na Kamukanda Une bonne nouvelle pour des gens de toutes nations

Kamukanda Une bonne nouvelle pour des gens de toutes nations kele ti nsangu ya lutiti mosi ya bo mebasisaka na bandinga 92. Bo mesonikaka yo na mutindu mosi ya kemonisa nde muntu ya ketanga yo muntu ke na kutuba. Yo yina kana muwi ketanga nsangu yango, yo kewakanaka bonso nde nge muntu ketubila yandi.

Kana nge balula lutiti ya zulu, nge tamona karte mosi ya inza ya mvimba. Sadila karte yai sambu na kusala kinduku ti muwi na nge. Ziku nge lenda songa yandi insi ya beno kezinga mpi kumonisa yandi nde nge kezola kuzaba insi ya yandi katukaka. Mpidina, nge lenda pusa yandi na kupesa mabanza na yandi mpi na kusolula na kyese bonso banduku.

Bangogo ya luyantiku ya kamukanda yai kepesa bitambi mingi ya beto fwete landa sambu na kupesa lusadisu ya kufwana na bantu yina ketubaka ndinga yina beto kebakisaka ve. Beto kelomba nge na kutanga bitambi yango na dikebi yonso, mpi na kusadila yo mbote.

Tansi ya Malongi kepesa ve kaka bandinga, kansi yo kepesa mpi bidimbu ya konso ndinga. Dyambu yai ya mfunu tasadisa nge na kuzaba bidimbu ya ndinga yina kele na batrakiti ti na mikanda na beto yina kele na bandinga yankaka.

[Kifwanisu]

Keti nge ke na kusadila kamukanda yai na kisalu ya kusamuna?