Keti Nge Kenwana ti Mawi na Nge?
Keti Nge Kenwana ti Mawi na Nge?
NA LUZINGU na yandi, Lena menwanaka bamvula mingi ti bangindu ya mbi ya metala yandi mosi. Yandi tubaka nde: “Bamvula mingi yina babakala kuvukisaka nitu ti munu na ngolo na bumwana kusalaka nde mu kumaka kudiwa nde mu vandaka dyaka ve na valere. Mu kumaka kudimona dyaka ve mfunu ata fyoti.” Simone mpi keyindula luzingu na yandi ya kileki mpi yandi ketuba nde: “Na kati ya ntima na munu mu vandaka kuzanga kima mosi mpi mu vandaka kudiwa nde mu vandaka na mfunu mingi ve.” Mawa ya ngolo ya kekatukaka na mawi ya mutindu yina kemonana na bantu mingi bubu yai. Biro mosi ya baleke kebingaka na telefone sambu na kulomba bandongisila ketuba nde kiteso ya katikati ya baleke yina kebingaka bo kemonisaka nde “bo kekudiwaka ntangu yonso nde bo kele na mfunu ve.”
Bantu mingi ya mayele yina kelongukaka bamaladi ya ntu ketubaka nde, mawi ya kudiwa mfunu ve kekwisaka mingi na bantu yina bantu yankaka kemonisaka bo mbala mingi nde bo kele na mfunu ve. Mabanza ya mutindu yina lenda yela mingi na bantu yina bo kenganina-nganinaka, na bayina bo kemonisaka bo mbala mingi nde bo
kele bantu ya mbi, to na bayina bo kesadisaka bisalu bonso bampika. Ata mawi yango mekwisila muntu sambu na konso nki kikuma yina, malanda na yo lenda sala nde ngolo ya muntu yango kumana to nkutu yandi kufwa. Kulonguka mosi ya minganga yina mekatuka kusalama ntama mingi ve memonisa nde bantu yina kekudiwaka mfunu ve kekuditudilaka ve ntima mpi bo ketudilaka ve bantu yankaka ntima, mpi kukonda kuzaba, bo kebebisaka bangwisana ti binduku ya ngolo. Rapore ya kulonguka yango ketuba nde: “Na mutindu mosi buna, bo ‘kebutaka’ mambu yina ya bo kebangaka mingi kuluta.”Bantu yina kekudiwaka mutindu yina kevandaka mbala mingi ti mawi yina Biblia kebinga nde “bangindu ya keyangisaka” bo. (Nkunga 94:19, NW) Bo kekudiwaka nde bo kevandaka ve mbote ata fyoti. Kana kima mosi kekwendila ve, bo kemonaka mbala mosi nde mbi kele ya bo. Ata bantu yankaka kesikisa bo sambu na mambu ya bo kesala, na kati ya ntima, bo kekudiwaka bonso nde bantu yango keta luvunu yina tazabana kaka nsukansuka. Sambu bo kekwikilaka nde bo mefwana ve na kuvanda na kyese, bamingi kekumaka ti bikalulu yina lenda nata bo na lufwa mpi bo keyindulaka nde bo lenda kuka ve na kuyambula bikalulu yango. Lena, yina beto tubilaka na luyantiku, kuyedisaka kikalulu ya kudya kisakasaka sambu yandi vandaka kudiwa nde yandi vandaka ve na valere, mpi yandi kendima nde: “Mu vandaka kudiwa nde mu tatoma ve ata fyoti.”
Keti bantu yina kenwanaka ti ‘bangindu ya mutindu yina ya keyangisaka’ bo takudiwaka kaka buna luzingu na bo ya mvimba? Keti ke ti kima bo lenda sala sambu na kukatula mawi ya mutindu yina? Biblia kepesa minsiku ti bandongisila ya mesadisaka bantu mingi na kununga kumanisa mawi yina. Inki mwa minsiku yango, mpi nki mutindu yo mesadisaka bantu yina kuvandaka ti mawi yango na kuzwa kyese na luzingu? Disolo yina kelanda tapesa ntendula.