Nzyetelo Mosi ya Nda ya Lusakumunu

RAPORE mosi ya kukatukaka na République démocratique du Congo kemonisa nde bampangi-bankento zole ya fami mosi kubakaka lukanu ya kusala nzyetelo mosi ya nda na teritware mosi ya bamvita kesalamaka mingi sambu na kukwenda na Lisala na Lukutakanu ya Distrike “Beno Pesa Nzambi Lukumu.” Katula kivuvu ya bo vandaka na yo ya kulanda malongi ya kimpeve mpi ya kukutana ti Bakristu yankaka, bo vandaka kutula dyaka ntima nde bo takutana ti bampangi yina biro ya filiale ya Bambangi ya Yehowa ya Kinshasa kutindaka na lukutakanu yango. Mvita yina vandaka kusalama na insi yango kusalaka nde bo vandaka kukutana dyaka ve ata ti mpangi mosi ya biro tuka bamvula mingi, yo yina bo kwendaka na lukutakanu yai sambu na kukutana ti bo.

Bampangi-bankento yina zole kusalaka nzyetelo na bo na bwatu, banda na bwala na bo na Basankusu tii na Lisala. Bo salaka nzyetelo na bo ya bakilometre 300 na mfinda mpi na bamasa zole. Bo salaka bamposo tatu na nzila. Sambu bo yonso zole kele bapasudi-nzila, (mosi mesala bamvula 3 na kisalu ya kimupasudi-nzila, yankaka mesala bamvula 19) bo sadilaka nzyetelo na bo sambu na kumwanga nsangu ya mbote ya Kimfumu. Bo salaka bangunga 110 na kusamuna na bantu yina bo vandaka kukutana na bo na nzila, mpi bo kabulaka batrakiti 200 ti bazulunalu 30.

Na ntangu bo vandaka kusala nzyetelo na bo na masa, yo vandaka kulomba nde bwatu na bo kuluta na katikati ya bisika yina biboko ti bangandu kevandaka mingi. Bo lendaka kusala ve nzyetelo na masa na mpimpa sambu kutambula na masa na mpimpa kuvandaka kigonsa mpenza! Bo vandaka kuluta mpi na babariere mingi ya basoda.

Ata nzyetelo yango kuvandaka ya nda mpenza mpi yo lembisaka bo mingi, bampangi-bankento yina kuvandaka na kyese na kusala kikesa ya mutindu yina. Bo yonso zole kumonisaka ntonda mingi mpenza ti kyese ya kuvanda na lukutakanu ya distrike na Lisala. Bantima na bo kukumaka mpenza tiyatiya sambu na malongi ya kyeleka yina bo landaka, mpi bo bakaka kikesa na kuvanda kumosi ti bampangi ya babakala ti ya bankento 7 000 yina kuvandaka pana. Na nima ya lukutakanu, bo kutanaka ti bampasi ya mutindu mosi na nzila na ntangu bo vutukaka na bwala na bo, kisika bo kutaka mabuta na bo na lutaninu mpi na mavimpi ya mbote.