Yehowa ‘Kepesaka Matabisi na Bayina Kesosaka Yandi na Masonga Yonso’

“Muntu yina ke kwisaka na Nzambi yandi fweti kwikila nde Nzambi kele, mpi nde Nzambi ke pesaka matabisi na bantu yina ke sosaka yandi [na masonga yonso, NW].”​—BAEBREO 11:6.

1, 2. Sambu na nki bansadi yankaka ya Yehowa lenda nwana ti mawi ya mbi?

 BARBARA ketuba nde: “Bamvula kiteso ya 30 melunga banda mu mekumaka Mbangi ya Yehowa, kansi mu mekudiwaka ntete ve nde mu mefwana na kubingama na zina yina. Ata mu mesalaka kisalu ya kimupasudi-nzila mpi mezwaka mikumba yankaka mingi, ata mosi ve na kati na yo mefwana na kundimisa ntima na munu nde mu mefwana na kuvanda Mbangi.” a Keith mpi ketuba dyambu ya mutindu mosi nde: “Bantangu yankaka mu vandaka kudiwa nde mu mefwana ve sambu bansadi ya Yehowa kele ti bikuma mingi ya kuvanda na kyese, kansi munu ve. Mu kumaka kudiwa nde mu mesala mbi. Mawi yango kubebisaka munu dyaka mingi.”

² Bansadi ya Yehowa mingi ya kwikama, ya ntangu ya ntama ti ya ntangu yai, kenwanaka ti mawi ya mutindu mosi. Keti bantangu yankaka nge kekudiwaka mutindu yina? Ziku nge kekutana ti makambu yina kelutila nge kiteso, na ntangu yo kemonana bonso nde Bakristu yankaka kezinga luzingu ya mbote, ya kukonda bampasi mpi ya kyese. Nsukansuka, nge lenda yindula nde Yehowa kendima nge dyaka ve to nde nge mefwana ve nde yandi tudila nge dikebi. Kubaka  ve nswalu dibanza ya mutindu yai. Biblia kendimisa beto nde: “[Yehowa] ke sekaka ve bansukami ti bampasi na bo; yandi ke vilaka bo ve, yandi ke tinaka bo mpi ve, kansi yandi [ke] waka kudila ya bo ke dilaka yandi.” (Nkunga 22:25) Bangogo ya mbikudulu ya ketubila Mesia kemonisa nde Yehowa kesukaka kaka ve na kuwa bansadi na yandi ya kwikama, kansi yandi kepesaka bo mpi matabisi.

3. Sambu na nki bampasi ya ngidika ya bima yai kekuminaka beto mpi?

³ Bampasi ya ngidika ya bima yai kekuminaka bantu yonso, ata nkutu bantu ya Yehowa. Beto kezinga na inza yina kele na nsi ya luyalu ya Satana Dyabulu, mbeni ya nene ya Yehowa. (2 Korinto 4:4; 1 Yoane 5:19) Nkutu, na kisika nde Yehowa kutanina bansadi na yandi na mutindu ya kuyituka, bo kele bantu ya ntete yina Satana kesosaka kukanga. (Yobi 1:7-12; Kusonga 2:10) Yo yina, tii kuna ntangu ya Nzambi metulaka talunga, beto fwete “kanga ntima sambu na mpasi,” mpi ‘kusamba konso ntangu,’ na kutulaka ntima nde Yehowa kekudibanzaka sambu na beto. (Roma 12:12) Beto fwete pesa ve nzila nde bampasi kunata beto na kuyindula nde Nzambi na beto, Yehowa, kezolaka beto ve!

Bambandu ya Kukanga Ntima ya Ntangu ya Ntama

4. Pesa bambandu ya bansadi ya kwikama ya Yehowa yina kukangaka ntima na bantangu ya mpasi.

⁴ Bansadi ya Yehowa mingi ya ntangu ya ntama kukangaka ntima na bantangu ya mpasi. Mu mbandu, Ana ‘kuvandaka na mawa mingi’ sambu yandi vandaka ve ti mwana. Yandi vandaka kumona bonso nde Nzambi mevilanaka yandi. (1 Samuele 1:9-11) Ntangu Ntotila-Nkento Yezabele, yina vandaka kufwa bantu, vandaka kulanda Elia, Elia kuwaka boma mpi yandi sambaka Yehowa nde: “Mfumu Nzambi, mpasi me lutila mono. Pardo, baka moyo na mono, sambu mono me luta ve bankaka na mono na mbote.” (1 Bantotila 19:4) Yo fwete vanda nde ntumwa Polo kuwaka susi mingi sambu na kukonda kukuka na yandi na ntangu yandi ndimaka nde: “Ntangu mono ke zola kusala mambu ya mbote, mono ke sala yo ve, mono fweti sala kaka mambu ya mbi.” Yandi yikaka nde: “A, mono kele muntu mosi ya mawa!”​—Roma 7:21-24.

5. (a) Inki mutindu Ana, Elia, ti Polo kubakaka lusakumunu? (b) Inki kikesa beto lenda baka na Ndinga ya Nzambi kana beto kenwana ti mawi ya mbi?

⁵ Ya kyeleka, beto kezaba nde Ana, Elia, ti Polo kukangaka ntima na kisalu ya Yehowa, mpi Yandi sakumunaka bo mingi. (1 Samuele 1:20; 2:21; 1 Bantotila 19:5-18; 2 Timoteo 4:8) Ata mpidina, bo nwanaka ti mawi ya kimuntu ya mitindu mingi, mu mbandu, mawa, kukonda kivuvu, ti boma. Yo yina, beto fwete yituka ve kana mawi ya mbi kekwisila beto na bantangu yankaka. Ebuna, nki nge lenda sala kana basusi ya luzingu kenata nge na kudiyula kana ya kyeleka Yehowa kezolaka nge? Nge lenda baka kikesa na Ndinga ya Nzambi. Mu mbandu, na disolo ya ntete, beto tadilaka nsa ya Yezu yina ketuba nde Yehowa ketangaka “ata nsuki na beno ya ntu.” (Matayo 10:30) Bangogo yina ya kepesa kikesa kemonisa nde Yehowa ketulaka mpenza dikebi na konso nsadi na yandi. Yibuka mpi kingana ya metala bamwano yina Yezu kutaka. Kana Yehowa kekangaka ve meso na ntangu mwano mosi ya fyoti kebwaka na ntoto, sambu na nki yandi takanga meso na bampasi na nge?

6. Inki mutindu Biblia lenda pesa kikesa na bantu yina kenwana ti mawi ya mbi?

⁶ Keti yo lenda salama mpenza nde beto bantu ya kukonda kukuka kuvanda na mfunu na meso ya Yehowa Nzambi, Ngangi ya ngolo yonso? Ee! Nkutu ke ti baverse mingi ya Biblia kendimisa beto dyambu yai. Kana beto keyindula baverse yango, beto lenda tuba bonso muyimbi-bankunga yina kutubaka nde: “Ntangu mono ke vandaka na mpasi mingi, ntima na zulu-zulu, nge ke lembikaka mono ntima, nge ke pesaka mono kiese.” (Nkunga 94:19) Bika beto tadila mwa bansa yango ya kelembika ntima yina kele na Ndinga ya  Nzambi yina tasadisa beto na kubakisa dyaka mbotembote nde beto kele mfunu na meso ya Nzambi mpi nde yandi tapesa beto matabisi kana beto kelanda na kusala luzolo na yandi.

‘Bantu ya Yehowa Mpenza’

7. Inki mbikudulu ya kepesa kikesa Yehowa kupesaka na nzila ya Malashi sambu na dikanda yina ya mbi?

⁷ Dyambu mosi ya mawa kusalamaka na kati ya Bayuda na mvu-nkama ya tanu ya N.T.B. Banganga-Nzambi vandaka kundima bambisi yina kufwanaka ve mpi bo vandaka kutambika yo na mesa-kimenga ya Yehowa. Bazuzi vandaka kuzenga makambu na mutindu mosi ya kukonda lunungu. Kindoki, luvunu, muyibi, ti pite kukumaka mingi. (Malashi 1:8; 2:9; 3:5) Malashi kutubaka mbikudulu mosi ya keyitukisa sambu na dikanda yai ya kuluta mbi. Ntama mingi ve, Yehowa zolaka kundima dyaka bantu na yandi. Beto ketanga nde: “Mfumu Nzambi, Nzambi [ya minkangu, NW], ke tuba nde: ‘Bantu yai ta vandaka bantu na mono. Na kilumbu ya mono ta sala mambu ya mono kanaka, bo ta vanda bantu na mono mpenza. Mono ta wila bo mawa mutindu tata ke wilaka mawa mwana yina ke sadilaka yandi.’”​—Malashi 3:17.

8. Sambu na nki Malashi 3:17 lenda tadila mpi kibuka ya nene?

⁸ Mbikudulu ya Malashi kelungana mpi na ntangu na beto na Bakristu ya kupakulama na mpeve, yina kesala dikanda ya kimpeve ya bantu 144 000. Ya kyeleka, dikanda yango kele ‘bantu ya Yehowa mpenza,’ to ‘dikanda mosi yina fwete vanda kima na yandi mpenza.’ (1 Piere 2:9, NW) Mbikudulu ya Malashi lenda pesa mpi kikesa na “kibuka ya nene,” (NW) yina “me telama na ntwala ya kiti ya kimfumu ti na ntwala ya Mwana-dimeme. Bo me lwata bamvwela ya mpembe.” (Kusonga 7:4, 9) Bantu yai kekumaka kibuka mosi ti bapakulami, mpi na nsi ya lutwadisu ya Ngungudi mosi, Yezu Kristu.​—Yoane 10:16.

9. Sambu na nki bantu ya Yehowa kele ‘bantu na yandi mpenza’?

⁹ Inki mutindu Yehowa ketadilaka bantu yina kendimaka na kusadila yandi? Mutindu beto kemona yo na Malashi 3:17, yandi kemonaka bo mutindu tata mosi ya zola kemonaka mwana na yandi. Mpi, tala bangogo ya kusikisa ya yandi kesadila sambu na kubinga bantu na yandi: “bantu na mono mpenza.” Bambalula yankaka ketubaka nde “ya mono mpenza,” “kima na mono ya kuluta mfunu,” mpi “kimvwama na mono.” Sambu na nki Yehowa ketadilaka bantu yina kesadilaka yandi nde bo kele mfunu mingi? Mosi na kati ya bikuma kele nde, yandi kele Nzambi mosi ya kemonisaka ntonda. (Baebreo 6:10) Yandi kepusanaka penepene na bantu yina kesadilaka yandi na masonga mpi yandi kemonaka bo mfunu mpenza.

10. Inki mutindu Yehowa ketaninaka bantu na yandi?

¹⁰ Keti nge ke ti kima mosi ya nge kemonaka nde yo kele kima na nge mpenza? Keti nge kesalaka ve yonso sambu na kutanina yo? Yehowa kesalaka mutindu mosi sambu na ‘bantu na yandi mpenza.’ Yo kele ya kyeleka nde yandi ketaninaka ve bantu na yandi na bampasi ya luzingu to na bisumbula. (Longi 9:11) Kansi, Yehowa lenda tanina bansadi na yandi ya kwikama na kimpeve mpi yandi tatanina bo. Yandi kepesaka bo ngolo yina bo kevandaka na yo mfunu sambu na kukanga ntima na konso bampasi yina. (1 Korinto 10:13) Yo yina Moize kusongaka bantu ya Nzambi ya ntangu ya ntama, bantu ya Izraele, nde: “Beno vanda ngolo ti kikesa. . . . Mfumu Nzambi, Nzambi na beno, yandi mosi ta vanda ti beno, yandi ta bikisa beno ve ata fioti.” (Kulonga 31:6) Yehowa kesakumunaka bantu na yandi. Bo kele ‘bantu na yandi mpenza.’

Yehowa ‘Kepesaka Matabisi’

11, 12. Inki mutindu kundima nde Yehowa kele Mupesi-matabisi kesadisaka beto na kunwana ti mawi ya badute?

¹¹ Nzikisa yankaka ya kemonisa nde Yehowa kebakaka bansadi na yandi na valere kele nde yandi kepesaka bo matabisi. Yandi tubilaka bantu ya Izraele nde: “Beno meka mono Mfumu Nzambi, Nzambi [ya mikangu, NW], sambu na mambu yai, ebuna beno ta mona nde mono ta basisa bimvwama yina kele na zulu, mono ta nokisila beno mambote mingi-mingi bonso mvula.” (Malashi 3:10) Ntembe kele ve nde nsukansuka, Yehowa tapesa bansadi na yandi matabisi ya luzingu ya mvula na mvula. (Yoane 5:24; Kusonga 21:4) Matabisi yai ya valere mingi kibeni kemonisa bunene ya zola ya Yehowa ti ya kikalulu na yandi ya kukaba. Yo kemonisa mpi nde yandi kebakaka mpenza  na valere bantu yina kendimaka kusadila yandi. Kulonguka na kumona nde Yehowa kele Mupesi-matabisi yina kekabaka lenda sadisa beto na kunwana ti konso mawi yina lenda nata beto na kutula badute nde Nzambi kendimaka beto. Nkutu, Yehowa kelongisila beto na kumona yandi nde yandi kele Mupesi-matabisi! Polo kusonikaka nde: “Muntu yina ke kwisaka na Nzambi yandi fweti kwikila nde Nzambi kele, mpi nde Nzambi ke pesaka matabisi na bantu yina ke sosaka yandi [na masonga yonso, NW].”​—Baebreo 11:6.

¹² Ya kyeleka, beto kesadilaka ve Yehowa kaka sambu yandi mesilaka beto matabisi, kansi sambu beto kezolaka yandi. Ata mpidina, yo kele mbi ve to bwimi ve na kundima kuvanda ti kivuvu ya kubaka matabisi. (Kolosai 3:23, 24) Zola ya Yehowa kele na yo sambu na bayina kesosaka yandi na masonga yonso mpi valere ya mingi ya yandi kepesaka bo kepusaka yandi na kuvanda muntu ya ntete yina kezolaka bo mpi kepesaka bo matabisi.

13. Sambu na nki ngidika ya nkudulu kele nzikisa ya kuluta nene ya kemonisa nde Nzambi kezolaka beto?

¹³ Kima ya kuluta nene ya kemonisa valere ya nene yina Yehowa kemonisaka bantu kele ngidika ya nkudulu. Ntumwa Yoane kusonikaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Ngidika ya nkudulu ya kimenga ya Yezu Kristu kewakana ve ata fyoti ti ngindu ya kutuba nde Yehowa kebakaka beto ve na valere to nde yandi kezolaka beto ve. Nkutu, kana beto tala ntalu ya nene mpenza yina Yehowa mefutaka sambu na kusumba beto, na mpila yandi pesaka Mwana na yandi mosi kaka ya kubutuka, beto kemona nde yandi kezolaka beto mpenza.

14. Inki kemonisa mutindu Polo vandaka kubaka nkudulu?

¹⁴ Yo yina, kana mawi ya mbi mekwisila nge, yindulula nkudulu. Ee, baka dikabu yai bonso ngidika mosi ya Yehowa mebakaka sambu na nge. Ntumwa Polo kusalaka mpidina. Yibuka nde yandi tubaka nde: “A, mono kele muntu mosi ya mawa!” Kansi na nima yandi landaka na kutuba nde: “Mersi na Nzambi, na zina ya Mfumu na beto Yesu Kristo,” yina “me zolaka mono, yina me fwaka sambu na mono.” (Roma 7:24, 25; Galatia 2:20) Ntangu yandi tubaka mambu yai, Polo vandaka kumonisa ve kikalulu ya bwimi. Yandi vandaka kundima kaka na ntima mosi nde Yehowa vandaka kubaka yandi na valere. Bonso Polo, nge mpi, nge fwete longuka na kubaka nkudulu bonso dikabu yina Nzambi mepesaka kaka nge. Yehowa kele kaka ve Ngulusi mosi ya ngolo, kansi yandi kele mpi Mupesi-matabisi ya zola.

Keba na “Mayele” ya Satana

15-17. (a) Inki mutindu Dyabulu kesadilaka mawi ya mbi yina bantu kevandaka na yo? (b) Inki kikesa beto lenda baka na mambu yina kukuminaka Yobi?

¹⁵ Ata mpidina, yo lenda vandila nge mpasi na kukwikila nde bangogo ya kupemama ya kelembikaka yina kele na Ndinga ya Nzambi ketadila nge mpenza. Nge lenda yindula nde matabisi ya kuzinga kimakulu na inza ya mpa ya Nzambi kele kima mosi ya bantu yankaka lenda baka, kansi nge, nge mefwana ve na kubaka yo. Kana nge kekudiwaka mutindu yai, inki nge lenda sala?

¹⁶ Ntembe kele ve nde nge mezaba mbotembote ndongisila yai ya Polo na bantu ya Efezo: “Beno lwata binwaninu yonso ya Nzambi ke pesaka beno; mpidina mayele ya Satana ta zaba kubedisa beno ve.” (Efezo 6:11) Kana beto yindula mitambu ya Satana kesadilaka, mpila ya kuyituka kele ve na kumona nde mambu bonso zola ya bima ya kinsuni ti mansoni lenda kwisila beto mbala mosi na mabanza. Bampukumuna yai mebwisaka bantu ya Nzambi mingi na ntangu ya ntama ti na ntangu na beto. Kansi, beto fwete vila ve mayele yai yankaka ya Satana kesadilaka: yandi kesalaka kikesa sambu na kundimisa bantu nde Yehowa Nzambi kezolaka bo ve.

¹⁷ Dyabulu kele ti mayele mpenza ya kusadila mawi ya mutindu yina sambu na kupusa bantu na kubuya Nzambi. Yibuka mambu yai ya Bildadi kusongaka Yobi: “Nani muntu lenda monika muntu ya mbote na meso ya Nzambi? Nani muntu kele ntima-mpembe? Nzambi ke monaka nde ata ngonda ata bambwetete ke pelaka mbote-mbote ve, ebuna nki beto lenda tuba sambu na muntu, niama yai? Nki mfunu ya muntu na meso ya Nzambi?” (Yobi 25:4-6; Yoane 8:44) Keti nge keyindula ve nde bangogo yai kusalaka Yobi mpasi na ntima? Kupesa ve nzila nde Satana kulembisa nge. Kansi, nge fwete zaba mayele na yandi mpi  kuvanda ti kikesa mpi ti ngolo ya kunwana ngolo mpenza sambu na kusala mambu ya mbote. (2 Korinto 2:11) Ata yo lombaka nde Yandi sungika Yobi, Yehowa kupesaka yandi matabisi sambu na ntima ya yandi kangaka. Yehowa kuvutudilaka yandi mbala zole bima yonso yina yandi vidisaka.​—Yobi 42:10.

Yehowa ‘Meluta Ntima na Beto na Nene’

18, 19. Inki mutindu Nzambi ‘meluta ntima na beto na nene,’ mpi na nki mutindu yandi ‘mezaba mambu yonso’?

¹⁸ Ya kyeleka, kana mawi ya kulemba nitu mekotila nge mingi kibeni, yo lenda vanda mpasi na kukatula yo. Ata mpidina, mpeve ya Yehowa lenda sadisa nge na kununga malembemalembe na kukatula “bima yina mekangamaka ngolo . . . yina ketelamaninaka nzayilu ya Nzambi.” (2 Korinto 10:4, 5, NW) Kana mabanza ya mbi kezola kubebisa nge, yindulula bangogo yai ya ntumwa Yoane: “Mpidina beto ta zaba nde beto kele bantu ke na mambu ya kieleka; mpidina mpi beto ta vanda na kikesa na ntima na meso ya Nzambi. Kana ntima na beto ke funda beto, beto zaba nde Nzambi kuluta ntima na beto na nene, yandi mpi zaba mambu yonso.”​—1 Yoane 3:19, 20.

¹⁹ Nsa yai “Nzambi kuluta ntima na beto na nene” ketendula inki? Bantangu yankaka, ntima na beto lenda songa beto nde beto mesala dyambu mosi ya mbi, mingimingi kana beto kewa mpasi na ntima sambu beto mebakisa mambi ti bifu na beto. To yo lenda vanda nde mutindu ya beto meyedilaka mekunaka beto kikalulu ya mbi ya kuyindula kaka mambu ya mbi ya metala beto mosi, bonso nde Yehowa kendimaka ve ata kima mosi ya beto kesalaka. Bangogo ya ntumwa Yoane kendimisa beto nde Yehowa kele nene mingi, yandi keyindulaka mpidina ve! Yandi kemonaka kaka ve bifu na beto, kansi yandi kemonaka mambu yina beto mefwana mpenza na kusala. Yandi kezabaka mpi mabanza ti bangindu ya kepusaka beto na kusala mambu. Davidi kusonikaka nde: “Yandi zaba na nki yandi salaka beto, yandi zaba mbote nde beto kele kaka putulu.” (Nkunga 103:14) Ee, Yehowa mezaba beto mbote kuluta beto mosi!

“Mpu Mosi ya Kitoko” mpi ‘Mpu Mosi ya Kimfumu’

20. Mbikudulu ya Yezaya ya metala kuvutuka ya bantu ya Yehowa na nsi na bo kesonga inki na yina metala mutindu Yehowa ketadilaka bansadi na yandi?

²⁰ Na nzila ya profete Yezaya, Yehowa kupesaka bantu na yandi ya ntama kivuvu nde bo tavutuka na bwala na bo. Bantu yai ya vandaka kumona mpasi na kimpika na Babilone kuvandaka mpenza ti mfunu ya bangogo ya kepesa kikesa mpi ya kebwisa ntima! Yehowa kutubaka mutindu yai sambu na yina metala ntangu ya bo tavutuka na bwala na bo: “Nge ta vanda bonso mpu ya kimfumu, mpu mosi ya kitoko yina ke pesaka lukumu na Nzambi na nge.” (Yezaya 62:3) Na nsadisa ya bangogo yai, Yehowa kupesaka bantu na yandi lukumu mpi yandi kumisaka bo bantu ya nene. Bubu yai, Yandi mesalaka mpi mutindu mosi sambu na dikanda na yandi ya Izraele ya kimpeve. Yo kele bonso nde yandi metombulaka bo na zulu na mpila nde bantu yonso kusikisa bo.

21. Inki mutindu nge lenda tula ntima nde Yehowa tapesa nge matabisi sambu na ntima ya nge kekangaka na kwikama yonso?

²¹ Ata mbikudulu yai kelungana ntetentete na bapakulami, yo kemonisa lukumu yina Yehowa kepesaka bantu yonso ya kesadilaka yandi. Yo yina, kana mawi ya badute keyangisa nge, yibuka nde ata nge kele muntu ya kukonda kukuka, na meso ya Yehowa nge kele na valere bonso “mpu mosi ya kitoko” mpi ‘mpu mosi ya kimfumu.’ Yo yina, landa na kusepedisa ntima na yandi na kusosaka kusala luzolo na yandi na masonga yonso. (Bingana 27:11) Kana nge kesala mutindu yina, nge lenda tula ntima nde Yehowa tapesa nge matabisi sambu na ntima ya nge kekangaka na kwikama yonso!

[Noti na nsi ya lutiti]

Keti Nge Keyibuka?

• Inki mutindu beto kele ‘bantu ya Yehowa mpenza’?

• Sambu na nki yo kele mfunu na kubaka Yehowa nde yandi kele Mupesi-Matabisi?

• Inki “mayele” ya Satana beto fwete keba na yo?

• Na nki mutindu Nzambi ‘meluta ntima na beto na nene’?

[Bangyufula ya disolo ya kulonguka]

[Kifwanisu ya kele na lutiti 23]

Polo

[Kifwanisu ya kele na lutiti 23]

Elia

[Kifwanisu ya kele na lutiti 23]

Ana

[Kifwanisu ya kele na lutiti 24]

Ndinga ya Nzambi kele ti mabanza mingi yina kelembikaka ntima