“Beno Kangula Meso”​—Ntangu ya Kusambisa Bantu Melunga!

Mambu yina kele na disolo yai ya kulonguka bo mebaka yo na kamukanda Kangula Meso! yina kubasikaka na balukutakanu ya distrike yina kusalamaka na inza ya mvimba na mvu 2004/05.

“Beno kangula meso, sambu beno kuzaba ve nki kilumbu Mfumu na beno ta kwisa.”​—MATAYO 24:42.

1, 2. Yezu kufwanisaka kukwisa na yandi na nki dyambu?

 INKI nge tasala kana nge mewa nde muyibi mosi ketambula na kartie kukonda kusala makelele sambu na kukotila bantu na banzo na ngolo mpi kuyiba bo? Sambu na kutanina bantu ya nzo na nge yina nge kezolaka ti bima na nge ya valere, nge takangula meso. Nge tasala buna sambu nge mezaba nde muyibi ketindilaka ve bantu mikanda sambu na kuzabisa bo ntangu yina yandi takwisa. Kansi, yandi kekwisaka kukonda kusala makelele mpi na kintulumukina

² Mbala mingi, Yezu kusadilaka bametode yina muyibi kesadilaka bonso kingana. (Luka 10:30; Yoane 10:10) Sambu na yina metala mambu ya tasalama na ntangu ya nsuka mpi na ntwala nde yandi kufwa bantu, Yezu kupesaka lukebisu yai: ‘Beno kangula meso, sambu beno kuzaba ve nki kilumbu Mfumu na beno ta kwisa. Beno fweti zaba mbote nde kana mfumu ya nzo kuzaba nki ntangu na mpimpa muyibi ta kwisa, yandi ta kangula meso, yandi ta bikisa yandi ve na kukota na nzo na yandi.’ (Matayo 24:42, 43) Ee, Yezu kutubaka nde kukwisa na yandi tavanda bonso ya muyibi, na kintulumukina.

3, 4. (a) Kulemfukila lukebisu ya Yezu yina metala kukwisa na yandi kelombaka kusala inki? (b) Inki bangyufula kebasika?

³ Kingana yai kufwanaka mpenza, sambu dati ya sikisiki ya kukwisa ya Yezu kuzabanaka ve. Na ntwala, kaka na mbikudulu yai mosi, Yezu kutubaka nde: “Ata muntu mosi kuzaba ve kana nki kilumbu to nki ntangu mambu yina ta bwa, ata bawanzio ya zulu ata Mwana mpi kuzaba yo ve, kansi kaka Tata mpamba muntu kuzaba yo.” (Matayo 24:36) Yo yina, Yezu kulongisilaka bawi na yandi nde: “Beno yilama.” (Matayo 24:44) Bayina talemfukila lukebisu ya Yezu tavanda ya kuyilama, mpi ti bikalulu ya mbote, ata Yezu kukwisa konso nki ntangu yina sambu na kupesa bantu ndola.

⁴ Mambu yai kebasisa mwa bangyufula ya mfunu: Keti lukebisu ya Yezu ketadila kaka bantu ya inza, to Bakristu ya kyeleka mpi fwete “kangula meso”? Sambu na nki beto fwete “kangula meso” kukonda kusukinina, mpi yo kelomba kusala inki?

Lukebisu Sambu na Nani?

5. Inki mutindu beto kezaba nde lukebisu yina Yezu kupesaka nde “beno kangula meso” ketadila Bakristu ya kyeleka?

⁵ Yo kele kyeleka mpenza nde kukwisa ya Mfumu tavanda bonso ya muyibi sambu na bantu ya inza yina kebuya kuwa lukebisu ya mpasi ya nene yina tabwila bantu. (2 Piere 3:3-7) Kansi, keti kukwisa yango tavanda bonso ya muyibi sambu na Bakristu ya kyeleka? Ntumwa Polo kusonikilaka bampangi Bakristu nde: “Beno zaba mbote-mbote beno mosi nde kilumbu ya [Yehowa, NW] ta kwisa yo ta vanda bonso kilumbu ya muyibi ke kwisa na kati ya mpimpa.” (1 Tesalonika 5:2) Ntembe kele ve ata fyoti na mabanza na beto nde ‘kilumbu ya Yehowa kekwisa.’ Kansi, keti dyambu yai fwete pusa beto na kumona nde kukangula meso kele mfunu mingi ve? Simba nde Yezu vandaka kutubila balongoki na yandi ntangu yandi tubaka nde: “Mwana-muntu ta  kwisa na ntangu yina ya beno ta zaba ve nde yandi ke kwisa.” (Matayo 24:44) Ntangu fyoti na ntwala, ntangu yandi longisilaka balongoki na yandi na kulanda kusosa Kimfumu, Yezu kukebisaka bo nde: “Beno yilama; sambu Mwana-muntu ta kwisa na ntangu yina ya beno ta zaba ve nde yandi ke kwisa.” (Luka 12:31, 40) Keti mambu yai kemonisa ve pwelele nde Yezu vandaka kuyindula balongoki na yandi ntangu yandi pesaka lukebisu nde “Beno kangula meso”?

6. Sambu na nki yo kele mfunu nde beto “kangula meso”?

⁶ Sambu na nki beto fwete “kangula meso” mpi ‘kuyilama’? Yezu kutendulaka nde: “Babakala zole ta vanda ke sala na bilanga: bawanzio ta baka mosi, ebuna bo ta bikisa mpi mosi. Bankento zole ta vanda ke tuta fufu kisika mosi: bawanzio ta baka mosi, ebuna bo ta bikisa mpi mosi.” (Matayo 24:40, 41) Bantu yina bo “ta baka,” to tagulusa, ntangu Nzambi tafwa inza yai ya mbi kele bayina tavanda ya kuyilama. Nzambi ta “bikisa” bantu yankaka na lufwa sambu bo vandaka kusosa kaka mambote na bo mosi. Ziku bantu yina kuzabaka ntete kyeleka kansi ya kukangulaka ve meso tavanda mpi na kati na bo.

7. Kukonda kuzaba ntangu nsuka takwisa kesadisaka beto na kusala inki?

⁷ Kukonda kuzaba kilumbu ya sikisiki ya nsuka ya ngidika yai ya ntama kepesa beto dibaku ya kumonisa nde beto kesadilaka Nzambi ti bikuma ya masonga. Inki mutindu? Yo lenda monana bonso nde nsuka kekwisa nswalu ve. Yo kele mawa mingi na kumona nde Bakristu yankaka yina keyindulaka mutindu yai kevandaka dyaka ve kikesa na kisalu ya Yehowa. Kansi, beto mezaba nde ntangu beto kudipesaka na Yehowa, beto kudipesaka ya mvimba sambu na kusadila yandi na luzolo yonso. Bantu yina mezaba Yehowa kebakisaka nde kumonisa kikesa na minuta ya nsuka tayitukisa yandi ve. Yandi kemonaka mambu yina kele na ntima.​—1 Samuele 16:7.

8. Inki mutindu zola sambu na Yehowa kepusaka beto na kukangula meso?

⁸ Sambu beto kezolaka mpenza Yehowa, beto kemonaka kyese mingi na kusala luzolo na yandi. (Nkunga 40:9; Matayo 26:39) Mpi beto kezola kusadila Yehowa kimakulu. Yo ketendula ve nde kivuvu yai kele mfunu mingi ve kaka sambu yo kelomba nde beto vingila mwa ntangu mingi kuluta yina ya beto lendaka kuyindula. Kikuma ya kuluta mfunu ya beto kekangudilaka meso kele kivuvu ya ngolo yina beto kele na yo na mambu yina kilumbu ya Yehowa tatendula sambu na kulungana ya lukanu na yandi. Mpusa na beto ya masonga ya kusepedisa Nzambi kepusaka beto na kusadila bandongisila yina kele na Ndinga na yandi mpi na kutula Kimfumu na yandi na kisika ya ntete na luzingu na beto. (Matayo 6:33; 1 Yoane 5:3) Bika beto tadila nki mutindu kukangula meso fwete vanda ti bupusi na badesizio ya beto kebakaka mpi na mutindu ya beto kezinga luzingu na beto konso kilumbu.

Luzingu na Nge Kekwenda na Wapi?

9. Sambu na nki yo kele mfunu nde bantu ya inza kusosa kubakisa nswalu ntendula ya bantangu na beto?

⁹ Bantu mingi bubu yai kezaba nde mambu ya mpasi mingi mpi ya mbi mekumaka kusalama konso kilumbu, mpi mbala yankaka bo kesepela ve ti mutindu bo ketwadisaka luzingu na bo mosi. Kansi, keti bo kezaba ntendula ya kyeleka ya mambu yina keluta na inza? Keti bo kebakisa nde beto ke na kuzinga na “nsuka ya ngidika ya bima”? (Matayo 24:3, NW) Keti bo kezaba nde bwimi, nku, ti bikalulu ya mbi yina mekuma mingi kemonisa nde bantangu yai kele “bilumbu ya nsuka”? (2 Timoteo 3:1-5) Yo kele mfunu nde bo sosa kubakisa nswalu ntendula ya mambu yai yonso mpi kutadila mutindu luzingu na bo ke na kukwendila.

10. Inki beto fwete sala sambu na kuzaba mpenza nde beto kekangula meso?

¹⁰ Ebuna beto? Konso kilumbu beto kebakaka badesizio ya ketadila kisalu, mavimpi, dibuta, mpi lusambu na beto. Beto mezaba mambu yina Biblia ketubaka, mpi beto kesalaka kikesa na kusadila yo. Yo yina, beto fwete kudiyula bangyufula yai: ‘Keti mono mebikaka nde basusi ya luzingu kukatula mono na nzila ya mbote? Keti mono ke na kubika nde bafilozofi ya inza mpi mutindu na yo ya kuyindula kutwadisa mono na badesizio ya mono kebaka?’ (Luka 21:34-36; Kolosai 2:8) Beto fwete landa na kumonisa nde beto ketulaka ntima na beto yonso na Yehowa, kansi na mambu ya beto mosi ve ya beto keyindulaka nde beto zaba. (Bingana 3:5) Kana beto sala mutindu yina, beto “tasimba ngolo luzingu ya kyeleka,” to ya mvula na mvula, na inza ya mpa ya Nzambi.​—1 Timoteo 6:12, 19, NW.

11-13. Inki dilongi beto lenda baka na bambandu ya mambu yina kusalamaka (a) na ntangu ya Noa? (b) na ntangu ya Loti?

 ¹¹ Biblia kele ti bambandu mingi ya kukebisa yina lenda sadisa beto na kukangula meso. Beto tadila mambu yina kusalamaka na ntangu ya Noa. Bamvula mingi na ntwala, Nzambi kusalaka yonso na mpila nde lukebisu kupesama. Kansi, katula Noa ti dibuta na yandi, bantu kutulaka ve dikebi. (2 Piere 2:5) Yezu kutubaka mutindu yai sambu na dyambu yango: “Mambu yina bwaka na ntangu ya Noa, yo ta bwa mpi mutindu mosi ntangu Mwana-muntu ta kwisa. Na bilumbu yina, ntangu masa vandaka me fuluka mingi ntete ve na ntoto, bantu vandaka kudia, kunwa, kukwelana tii na kilumbu yina ya Noa kotaka na maswa. Bo [tulaka ve dikebi, NW] tii kuna masa fulukaka mingi na ntoto yonso; masa yina nataka bo yonso na lufwa. Ntangu Mwana-muntu ta kwisa, yo ta vanda mutindu mosi.” (Matayo 24:37-39) Inki dilongi beto lenda baka na mambu yai? Kana muntu mosi na kati na beto kebika nde bima ya inza, ata nkutu bisalu ya bantu yonso lenda sala, kubaka kisika ya bisalu ya kimpeve yina Nzambi kelongisila beto na kutula na kisika ya ntete, yandi fwete tadila luzingu na yandi mbotembote.​—Roma 14:17.

¹² Yindula mpi mambu yina kusalamaka na ntangu ya Loti. Mbanza ya Sodome, kisika Loti ti dibuta na yandi vandaka kuzinga, kuvandaka ti kimvwama mingi, kansi mansoni mpi kuvandaka mingi kibeni. Yehowa kutindaka bawanzyo na yandi na kufwa mbanza yango. Bawanzyo yango kulombaka Loti ti dibuta na yandi na kukatuka na Sodome mpi na kutala ve na nima. Bawanzyo kusyamisaka bo, ebuna bo basikaka na mbanza yango. Kansi, ntembe kele ve nde nkento ya Loti landaka na kuyindula nzo na yandi ya Sodome. Na kukonda bulemfu yonso, yandi talaka na nima. Yo yina, yandi vidisaka luzingu na yandi. (Kuyantika 19:15-26) Yezu kukebisaka beto sambu na bilumbu kekwisa nde: ‘Beno yindula nkento ya Loti.’ Keti mambu ya beto kesalaka kemonisaka nde beto ketula dikebi na lukebisu yina?​—Luka 17:32.

¹³ Bayina kulemfukaka na balukebisu ya Nzambi kugulukaka. Yo salamaka mpidina sambu na Noa ti dibuta na yandi, mpi Loti ti bana na yandi ya bankento. (2 Piere 2:9) Kana beto yindulula bambandu yai ya kekebisa, beto kebaka mpi kikesa na kubakisa nsangu ya mbote yina bambandu yai kepesa sambu na bantu yina kezolaka lunungu. Dyambu yai kesadisa beto na kutula mpenza kivuvu nde Nzambi talungisa lusilu na yandi ya kutula “zulu ya mpa ti ntoto ya mpa,” kisika “[lunungu tazingaka, NW].”​—2 Piere 3:13.

‘Ntangu ya Kusambisa Bantu Melunga’!

14, 15. (a) “Ntangu” ya kusambisa ketendula inki? (b) ‘Kuwa Nzambi boma mpi kupesa yandi lukumu’ ketendula inki?

¹⁴ Kana beto kekangula meso, beto lenda tula kivuvu ya kumona nki mambu? Mukanda ya Kusonga kemonisa mutindu mambu talandana sambu na kulungisa lukanu ya Nzambi. Kana beto kezola kuvanda ya kuyilama, yo kele mfunu nde beto sadila mambu yina mukanda yango ketuba. Mbikudulu yango kemonisa pwelele mambu yina tasalama na “kilumbu ya Mfumu,” yina kuyantikaka ntangu Nzambi kutulaka Kristu na kiti ya Kimfumu ya zulu na mvu 1914. (Kusonga 1:10) Mukanda ya Kusonga kebenda dikebi na beto na wanzyo mosi yina bo pesaka ‘Nsangu ya Mbote ya mvula na mvula sambu na kuzabisa bantu.’ Yandi ketuba na ndinga ya ngolo nde: “Beno wa Nzambi boma, beno pesa yandi lukumu! Sambu ntangu yina ya yandi ta sambisa bantu yo me lunga.” (Kusonga 14:6, 7) “Ntangu” yango ya kusambisa kele nsungi mosi ya nkufi ya kusamuna mpi kulungisa bandola yina mbikudulu yango ketubila. Ntangu yai, beto ke na kuzinga na nsungi yango.

¹⁵ Bubu yai, na ntwala nde ntangu ya kusambisa kumana, bo kelongisila beto nde: “Beno wa Nzambi boma, beno pesa yandi lukumu.” Yo ketendula inki? Boma ya kyeleka ya Nzambi fwete pusa beto na kuyambula mambi. (Bingana 8:13) Kana beto kepesa Nzambi lukumu, beto tawidikilaka yandi ti luzitu mingi kibeni. Beto talutisa ve ntangu mingi na bisalu yankaka na kisika ya kutanga Ndinga na yandi, Biblia, mbala na mbala. Beto tamona ve ndongisila yina yandi kepesa beto na kukwenda na balukutakanu ya Bukristu bonso kima mosi ya mpamba. (Baebreo 10:24, 25) Beto tasepela ti dibaku ya kuzabisa nsangu ya mbote ya Kimfumu ya Mesia ya Nzambi, mpi beto tasalaka yo na kikesa yonso. Beto tatulaka ntangu yonso ntima na Yehowa, mpi na ntima na beto ya mvimba. (Nkunga 62:9) Sambu beto kendimaka nde Yehowa kele Mfumu  ya Bima ya Inza ya Mvimba, beto kepesaka yandi lukumu mpi beto kelemfukilaka yandi na luzolo yonso bonso Mfumu ya luzingu na beto. Keti nge kewaka mpenza Nzambi boma mpi kepesaka yandi lukumu na mitindu yina yonso?

16. Sambu na nki beto lenda tuba nde kusambisama ya Babilone ya Nene yina Kusonga 14:8 kutubilaka mesalamaka dezia?

¹⁶ Kusonga kapu ya 14 kelanda na kutendula mambu yankaka yina kesalama na kilumbu ya kusambisa. Ntetentete, yo ketubila Babilone ya Nene, kintinu ya inza ya mabundu ya luvunu, nde: “Wanzyo ya zole, kulandaka, na kutubaka nde: ‘Yandi mebwa! Babilone ya Nene mebwa!’” (Kusonga 14:8, NW) Na Meso ya Nzambi, Babilone ya Nene mebwaka dezia. Na mvu 1919, bansadi ya Yehowa ya kupakulama kukatukaka na kimpika ya malongi ya Babilone ti bikalulu na yo, yina meyalaka bantu ti makanda tuka bamvula mingi. (Kusonga 17:1, 15) Yantika na ntangu yina, bo kumaka kudipesa mpenza na kisalu sambu lusambu ya kyeleka kukwenda na ntwala mpi kulongama nsangu ya mbote ya Kimfumu ya Nzambi na inza ya mvimba mekumaka kusalama.​—Matayo 24:14.

17. Inki beto fwete sala sambu na kubasika na Babilone ya Nene?

¹⁷ Kele ti mambu yankaka yina Nzambi tasala sambu na kupesa Babilone ya Nene ndola. Kubika fyoti lufwa na yandi ya nsuka kukwisa. (Kusonga 18:21) Yo yina, Biblia kele ti kikuma ya mbote ya kulongisila bantu bisika yonso nde: ‘Beno basika na yandi [Babilone ya Nene] kana beto kezola ve kubaka ndambu ya bampasi na yandi.’ (Kusonga 18:4, 5, NW) Inki mutindu beto lenda basika na Babilone ya Nene? Yo kelombaka kaka ve kuzenga bansinga ti mabundu ya luvunu. Bupusi ya Babilone kemonanaka na bankinsi ti bikalulu yina bantu mingi kendimaka, na inza yai ya kendimaka mansoni, na bansaka mingi yina kesadilaka bampeve ya mbi, mpi na mambu yankaka dyaka. Sambu na kukangula meso, yo kele mfunu nde beto monisa na bisalu na beto mpi na bampusa ya ntima na beto nde beto mekabwanaka mpenza ti Babilone ya Nene na mambu yonso.

18. Kusonga 14:9, 10 kemonisa nde Bakristu yina kekangulaka meso fwete keba na nki mambu?

¹⁸ Kusonga 14:9, 10 ketubila dyambu yankaka ya metala ‘kilumbu ya kusambisa.’ Wanzyo yankaka ketuba nde: “Kana muntu kusamba mbisi yina ti kiteki na yandi, kana yandi baka kidimbu yina na ilungi na yandi to na diboko na yandi, yandi mosi ta nwa vinu ya makasi ya Nzambi.” Sambu na inki? Sambu “mbisi yina ti kiteki na yandi” kele kifwani ya luyalu ya bantu yina kendimaka ve kimfumu ya Yehowa. Bakristu yina kekangulaka meso kekebaka na mpila nde bo baka ve kidimbu, yo vanda na bikalulu to na bisalu, yina tamonisa nde bo kele bampika ya bantu yina kendimaka ve kimfumu ya kuluta nene ya Yehowa, Nzambi ya kyeleka. Bakristu mezaba nde Nzambi metulaka dezia Kimfumu na yandi na zulu, nde yo tafwa baluyalu yonso ya bantu, mpi nde yo tayalaka tii kuna.​—Daniele 2:44.

Kuvila Ve nde Nsuka Mekuma Penepene!

19, 20. (a) Sambu beto mepusana mpenza ntama na bilumbu ya nsuka, beto lenda ndima mpenza nde Satana tasosa kusala inki? (b) Beto fwete vanda ti lukanu ya kusala inki?

¹⁹ Sambu beto mepusana mpenza ntama na bilumbu ya nsuka, bampasi ti bampukumuna takuma kaka ngolo. Ntangu yonso ya beto kezinga na ngidika yai ya ntama mpi kemona mpasi sambu na kukonda kukuka na beto, beto talanda na kunyokwama na mambu bonso maladi, kimununu, kuvidisa bantu ya beto kezolaka, kulwala na mawi, kulemba nitu na ntangu bantu kebuya bikesa ya beto kesala sambu  na kulonga Ndinga ya Nzambi ti mambu mingi yankaka. Beto vila ve nde Satana kezolaka kaka kusadila bampasi ya beto kekutanaka ti yo sambu na kulembisa beto nitu. Yandi kezolaka nde beto yambula kulonga nsangu ya mbote to nde beto sadila dyaka ve bansiku ya Nzambi. (Efezo 6:11-13) Yai kele dyaka ve ntangu ya kuvila nde na nsungi yai ya beto kezinga, nsuka mekuma mpenza penepene!

²⁰ Yezu kuzabaka nde beto takutana ti mambu mingi ya mpasi yina talembisa beto nitu, yo yina yandi longisilaka beto nde: “Beno kangula meso, sambu beno kuzaba ve nki kilumbu Mfumu na beno ta kwisa.” (Matayo 24:42) Yo yina, bika beto keba na nsungi ya ntangu yai ya beto kele. Bika beto keba na mitambu ya Satana yina lenda lembisa beto to kubasisa beto na kyeleka. Bika beto vanda ti lukanu ya kulonga nsangu ya mbote ya Kimfumu ya Nzambi ti kikesa mpi lukanu ya kuluta ngolo. Ee, bika beto vila ve nde nsuka mekuma penepene na ntangu beto kelemfuka na lukebisu yai ya Yezu: “Beno kangula meso.” Kana beto kesala mpidina, beto tapesa Yehowa lukumu mpi beto tavanda na kati ya bantu yina tabaka balusakumunu na yandi ya mvula na mvula.

Inki Mvutu Nge Tapesa?

• Inki mutindu beto mezaba nde lukebisu ya ‘kukangula meso’ yina Yezu kupesaka ketadila Bakristu ya kyeleka?

• Tanga bambandu ya Biblia ya kekebisa yina lenda sadisa beto na ‘kukangula meso’?

• Ntangu ya kusambisa ketendula inki, mpi nki bo kelongisila beto na kusala na ntwala nde yo suka?

[Bangyufula ya disolo ya kulonguka]

[Kifwanisu ya kele na lutiti 26]

Lufwa ya Babilone ya Nene mekuma penepene