Kuzaba Kutendula Bidimbu Kele Dyambu Mosi ya Mfunu!

“Na luyantiku mu yindulaka nde mwana na beto Andreas vandaka kuwa ntu mpasi mpamba. Kansi nzala ya kudya kumanaka yandi mpi fievre kukumaka ngolo. Yandi kumaka kuwa ntu mpasi mingi kibeni, mpi mu kumaka kudiyangisa. Ntangu bakala na munu kukwisaka na nzo, beto nataka Andreas na doktere. Doktere kutalaka bidimbu mpi yandi kotisaka mbala mosi Andreas na lupitalu. Maladi kuvandaka ya ngolo kibeni, yo vandaka ve ntu mpasi ya mpamba. Andreas kuvandaka ti méningite. Bo sansaka yandi mpi yandi belukaka nswalu.”​—Gertrud, mama mosi na Allemagne.

ZIKU bibuti mingi mekutanaka ti mambu yai ya Gertrud kukutanaka na yo. Bo ketalaka bidimbu yina kesongaka bo nde mwana na bo lenda vanda ya kubela. Ata bamaladi yonso ve kevandaka ngolo, bibuti kekuditaninaka na malanda ya mpasi kana bo ketula dikebi na bidimbu ya kesonga nde bana na bo kebela. Kutala bidimbu mpi kusala yonso sambu na kusansa mwana lenda sala mpenza nde bo kuditanina na mpasi. Yo kele dyambu mosi ya mfunu mpenza.

Yo kevandaka mpi mfunu na kusala mutindu yai na mambu yankaka. Mbandu mosi ya mefwana kele ya kisumbula ya tsunami yina kusalamaka na Desembri 2004 na bisika yina kele penepene ti Osea ya Inde. Ba organizme ya leta ya bisika bonso Australie ti Hawaii kumonaka nde kunikana ya ntoto ya ngolo vandaka kusalama na nordi ya Sumatra mpi bo monaka na ntwala kigonsa yina lendaka kusalama na nima. Kansi, bo bakaka ve ata ngidika mosi sambu na kukebisa to kutinisa bantu yina kuvandaka na bisika yina ya kigonsa. Yo yina, bantu kuluta 220 000 kufwaka.

Bidimbu ya Kuluta Mfunu

Ntangu Yezu Kristu kuvandaka na ntoto, yandi pesaka bawi na yandi dilongi mosi ya metala kutala bidimbu mpi kusala mambu yina kewakana ti yo. Yandi vandaka kutubila dyambu mosi ya mfunu mingi kibeni. Biblia ketuba nde: “Bafarize ti Basaduse kwisaka na Yesu. Bo zolaka kumeka yandi, ebuna bo tubilaka yandi nde: ‘Songa kidimbu mosi yina ta songa nde kiyeka na nge me katuka na Nzambi.’ Kansi Yesu tubilaka bo nde: ‘Ntangu ntangu ke dinda, beno ke tubaka nde: “Mbasi ta vanda kilumbu ya mbote, sambu zulu me kuma mbwaki.” Ebuna na suka-suka, beno ke tubaka nde: “Mvula ta noka bubu sambu zulu me kuma mbwaki ti ndombe.” Kana beno ke tala zulu, beno lenda zaba na  ntwala kana nki mutindu kilumbu yina ta vanda; kansi beno zaba ve kutendula bidimbu yina ke tadilaka bilumbu yai!’”​—Matayo 16:1-3.

Ntangu yandi tubilaka “bidimbu yina ke tadilaka bilumbu yai,” Yezu kumonisaka nde yo lombaka nde Bayuda yina vandaka kulanda malongi na yandi na mvu-nkama ya ntete kubakisa nde bilumbu yina bo vandaka kuzinga kubikalaka dyaka mingi ve. Yo bikaka fyoti nde ngidika ya bima ya Bayuda kumona mpasi yina zolaka kubwila bo yonso. Bilumbu fyoti na ntwala ya lufwa na yandi, Yezu kutubilaka balongoki na yandi dyambu ya metala kidimbu yankaka: kidimbu ya kuvanda na yandi. Mambu yina yandi tubaka kilumbu yango kele mfunu mingi sambu na konso muntu bubu yai.