Bo Vandaka Kunyokula Bo Ntete, na Nima Bo Kumaka Kuzola Bo

BAMVULA fyoti meluta, Santiago ti nkento na yandi Lourdes, kwendaka kuzinga na mbanza ya kitoko ya Huillcapata, na Pérou, sambu na kuzabisa bantu ya mbanza yango nsangu ya Biblia yina kepesaka kivuvu. Kansi, ntama mingi ve, nganga-Nzambi mosi, yina katukaka na Cuzco, kubingaka bantu yonso ya mbanza yango. Yandi kebisaka bo nde Bambangi ya Yehowa tanatila bo maladi ya kefwaka bantu ti baneze ya ngolo yina tafwa bambisi na bo mpi tabebisa bimeninu na bo.

Bantu mingi kulandaka “mbikudulu” yai, mpi na kiteso ya bangonda kuluta sambanu, ata muntu mosi ve na mbanza yango kundimaka emvitasio ya Santiago ti Lourdes ya kulonguka Biblia. Mfumu mosi ya leta ya mbanza yina, na zina ya Miguel, vandaka kulanda Santiago ti Lourdes na balabala, mpi yandi vandaka kulosila bo matadi. Kansi, Santiago ti Lourdes vandaka kusala ntangu yonso mambu na ngemba mpi na mutindu ya Bukristu.

Na nima, bantu yankaka ya mbanza yango kundimaka na kulonguka Biblia. Ata Miguel kusobaka nkadilu na yandi. Yandi yantikaka kulonguka ti Santiago, yandi vandaka kulutisa dyaka ve ndilu na kunwa malafu, mpi yandi kumaka muntu ya ngemba. Nsukansuka, Miguel, nkento na yandi, ti bana na yandi zole ya bankento kundimaka kyeleka ya Biblia.

Bubu yai, mbanza yai kele ti dibundu mosi ya Bambangi ya Yehowa ya keyela mbote. Miguel ke na kyese sambu matadi mingi ya yandi vandaka kulosila Santiago ti Lourdes kusimbaka bo ve, mpi yandi kepesa mersi na bankwelani yina sambu na mbandu na bo ya mbote ya ngemba.

[Bifwanisu ya kele na lutiti 32]

Nkadilu ya ngemba ya Santiago ti Lourdes (na zulu) kusalaka nde Miguel (na diboko ya kitata) kusoba nkadilu na yandi