Keti Nge Kele Bonso Nti ya Lagani Auna?

NA BWALA mosi yina vandaka ntama ti Port Moresby, na Papouasie-Nouvelle-Guinée, baministre zole vandaka kuvutuka na nzo na nima ya kisalu na bo ya kusamuna. Ntangu bo vandaka kutambula, bo monaka nti mosi ya kitoko mpenza. Ministre yina kuvandaka mbuta kutubaka nde: “Ah, yai lagani auna!” Yandi balulaka meso na ministre ya leke, mpi landaka na kutuba nde: “Zina yai ketendula nde ‘nti ya mbala mosi na mvula.’ Na kuswaswana ti banti yankaka ya tropique, konso mvula yo kevidisaka matiti na yo mpi yo kemonanaka bonso ya kufwa. Kansi, kana mvula mekwisa, yo kevutukaka na luzingu, kebutaka dyaka bintuntu, mpi kemonisaka dyaka kitoko na yo.”

Beto lenda baka dilongi na lagani auna, to poinciane royal, mutindu bo kebingaka yo na bantu mingi. Bantu ya mezabaka mambu ya banti ketangaka nti yai na kati ya banti tanu yina kelutaka kubuta bintuntu ya kitoko na inza. Ata yo kevidisaka bintuntu ti matiti na yo na ntangu ya kisiwu, nti yango kebumbaka masa yankaka. Bansimbulu na yo kevandaka ngolo mpi yo lenda yela na kati ya matadi yina kele na nsi ya ntoto. Mpidina, yo kekangamaka ngolo ata na ntwala ya mupepe ya ngolo. Na bunkufi, yo kelandaka kuzinga mpi kesalaka yonso na kuyikana ti bantangu ya mpasi.

Beto lenda kutana ti mambu yina lenda meka lukwikilu na beto. Inki tasadisa beto na kukanga ntima? Bonso lagani auna, beto lenda nwa mpi kubumba masa ya luzingu ya Ndinga ya Nzambi. Beto fwete kangama mpi ngolo na ‘ditadi na beto,’ Yehowa, mpi na organizasio na yandi. (2 Samuele 22:3) Ya kyeleka, lagani auna kele ngibusa mosi ya kitoko yina kemonisa nde ata na ntangu ya mpasi, beto lenda bikala ngolo mpi kitoko na kimpeve kana beto kebaka mambote ya bisadilu yina Yehowa kepesaka beto. Kana beto sala mutindu yina, beto ‘tabaka mambu yina ya Nzambi silaka,’ ti lusilu ya luzingu ya mvula na mvula.​—Baebreo 6:12; Kusonga 21:4.