Keti Beto Kele ti Mfunu ya Mesia?

NGE lenda yula ngyufula yai, “Keti beto kele ti mfunu ya Mesia?” Ya kyeleka, yo tavanda mbote na kuyula kana Mesia tavanda mpenza ti bupusi na luzingu na nge.

Bantu yankaka yina nge lenda ndima bangindu na bo tandimisa nge nde mvutu kele pwelele: Nge kele mpenza ti mfunu ya Mesia kaka mutindu bantu yonso yankaka kele ti mfunu na yandi. Muntu mosi ya mvu-nkama ya ntete yina kuzabaka mbote nsiku ya Bayuda kusonikaka mutindu yai sambu na Mesia: “Na yandi, Nzambi kulungisaka mambu yonso ya yandi silaka.” Na mutindu yina, yandi monisaka kisalu ya nene ya Mesia kele na yo na lukanu ya Ngangi na beto ya kusakumuna makanda yonso ya ntoto. (2 Korinto 1:20) Kisalu ya Mesia kele mfunu mingi kibeni na mpila nde kukwisa mpi luzingu na yandi na ntoto kele dyambu ya ntetentete ya bambikudulu ya Biblia ketubilaka. Na mukanda mosi ya kepesaka bandongisila yina bamilio ya bantu mesadilaka na bamvula kuluta 70 ya mekatuka kuluta, Henry H. Halley kutubaka nde: “Bo sonikaka Kuwakana ya Ntama sambu na kukinga, mpi kuyidika nzila sambu na, Kukwisa ya [Mesia].” Kansi, keti kukwisa na yandi kele mfunu? Sambu na nki nge fwete tudila yo dikebi?

Ngogo “Mesia” ketendula “Mupakulami” mpi yo mefwanana ti ngogo “Kristu,” yina mezabanaka mingi. Yo lombaka nde Muntu yai, yina Encyclopædia Britannica, Mbasisi ya 1970, kubingaka nde “ngulusi ya kuluta nene,” kukwisa sambu na mambu ya kukonda luzitu yina bankwelani ya ntete, Adami ti Eva, kusalaka. Nzambi kugangaka bo ya kukuka, ti kivuvu ya kyese kibeni ya kuzinga kukonda nsuka na Paladisu, kansi bo vidisaka kivuvu yina. Wanzyo mosi ya kukolamaka, yina kuzabanaka na nima na zina ya Satana Dyabulu, kusongaka bo nde Ngangi na bo kutudilaka bo bansiku mingi kibeni mpi nde bo zolaka kuvanda mbote kuluta kana bo vandaka kupona bo mosi mambu yina kuvandaka mbote mpi mbi.​—Kuyantika 3:1-5.

Satana kukusaka Eva mpi yandi ndimaka luvunu yango. Yo kemonana nde Adami, yina kupesaka valere mingi na bangwisana na yandi ti nkento na yandi kuluta na kwikama na Nzambi, kusadisaka Dyabulu na kukolama yina yandi yantikisaka. (Kuyantika 3:6; 1 Timoteo 2:14) Na mambu ya bo salaka, bo vidisaka ve kaka kivuvu na bo mosi ya kuzinga kukonda nsuka na Paladisu, kansi bo bikilaka mpi bana na bo masumu mpi lufwa yina yo menataka.​—Roma 5:12.

Kukonda kusukinina, Ngangi na beto, Yehowa, kuponaka mwaye yina yandi tasadila sambu na kukatula malanda ya mbi ya mambu mingi yina kukolama yango kubasisaka. Yandi zolaka kusala kuwakana mosi na nsadisa ya dyambu yina zolaka kukuma munsiku na Nsiku ya Moize​—kima mosi na kima ya mefwanana na yo. (Kulonga 19:21; 1 Yoane 3:8) Sambu konso mwana yina ya Adami ti Eva kubaka luzingu ya kukonda nsuka na paladisu na ntoto mutindu Ngangi kukanaka yo sambu na bantu yonso, yo lombaka nde bo sadila munsiku yai. Dyambu yai kenata beto na Mesia.

Ntangu Yehowa Nzambi kuzengilaka Dyabulu nkanu, yandi tubaka mutindu yai na mbikudulu ya ntete ya Biblia: “Mono tatula kimbeni na kati na nge ti nkento mpi na kati ya nkuna na nge ti nkuna na yandi. Yandi tanyata nge na ntu, ebuna nge tatatika yandi na kisingini.” (Kuyantika 3:15, NW) Nganga-mayele mosi ya Biblia kutubaka nde “disolo ya balusilu ya metala Mesia mutindu Masonuku kemonisaka yo kuyantikaka ti nsa [yai].” Nganga-mayele yankaka kutubaka nde Nzambi tasadila Mesia sambu na “kukatula mambi yonso yina masumu ya bantu ya ntete mebasisaka” mpi kunatila bantu balusakumunu.​—Baebreo 2:14, 15.

Ata mpidina, mbala yankaka nge mezaba nde bubu yai Nzambi ke na kusakumuna mpenza ve bantu. Bantu kele mpenza ve ti kivuvu. Yo yina, The World Book Encyclopedia ketuba nde “Bayuda mingi kelanda na kukinga kukwisa ya Mesia” mpi nde yandi “takatula mambu ya mbi mpi tabedisa bambeni ya bantu.” Kansi, Biblia ketuba nde Mesia mekwisaka dezia.