Bamambre ya Mpa ya Nto-Kimvuka

NA Kitatu, Augusti 24, 2005, na suka, mabuta ya Betele ya États-Unis mpi ya Canada, yina vandaka kulanda Lusambu ya Suka na video, kuwaka luzayisu mosi ya kyese kibeni. Banda na Septembri 1, 2005, bo tayika bamambre zole ya mpa, Geoffrey W. Jackson ti Anthony Morris III, na Nto-Kimvuka ya Bambangi ya Yehowa.

Mpangi Jackson kuyantikaka kisalu ya kimupasudi-nzila na Februari 1971 na Tasmanie, kisanga mosi ya Australie. Na Yuni 1974, yandi kwelaka Jeanette (Jenny). Ntangu fyoti na nima, bo ponaka bo na kusala bonso bapasudi-nzila ya nene. Banda na 1979 tii na 2003, bo salaka bonso bamisionere na Tuvalu, na Samoa, mpi na Fiji​—bisanga ya Pacifique ya Sudi. Na ntangu bo vandaka na bisanga yango, Mpangi Jackson ti Jenny kusadisaka mpi mingi na kubalula mikanda ya ketendulaka Biblia. Banda na 1992, Mpangi Jackson kusalaka na Komite ya Filiale ya Samoa, mpi banda na 1996, na Komite ya Filiale ya Fiji. Na Aprili 2003, bo kumaka bamambre ya dibuta ya Betele ya États-Unis mpi bo yantikaka kusala na Departema ya ketalaka mambu ya kubalula mikanda (Service pour la traduction). Ntangu fyoti na nima, Mpangi Jackson kukumaka nsadisi na Komite ya Kulonga ya Nto-Kimvuka.

Mpangi Morris kuyantikaka kisalu ya kimupasudi-nzila na 1971 na États-Unis. Na Desembri ya mvula yina, yandi kwelaka Susan, mpi bo landaka kusala kisalu ya kimupasudi-nzila kiteso ya bamvula iya tii kuna bo butaka mwana na bo ya ntete ya bakala, Jesse. Kiteso ya bangonda 20 na nima, bo butaka mwana yankaka ya bakala, Paul. Mpangi Morris kuyantikaka dyaka kisalu ya ntangu yonso na 1979 bonso mupasudi-nzila ya ntangu yonso. Ntangu bana na bo kukotaka nzo-nkanda, nkento na yandi mpi kuvutukilaka kisalu ya kimupasudi-nzila. Dibuta na bo kwendaka kusala na Rhode Island mpi na Nordi ya Caroline, na États-Unis, bisika yina bo vandaka na mfunu ya bansamuni mingi. Na Nordi ya Caroline, Mpangi Morris kusalaka bonso muyingi ya nkengi ya nzyunga, mpi bana na bo kuyantikaka kusala kisalu ya kimupasudi-nzila ya ntangu yonso. Ntangu Jesse ti Paul kulungisaka bamvula 19, bo bingaka bo na filiale ya États-Unis. Na ntangu yina, Mpangi Morris kukumaka nkengi ya nzyunga. Na nima, na 2002 bo bingaka yandi ti Susan na Betele, mpi bo yantikaka kisalu na bo ya mpa na Augusti 1. Mpangi Morris kusalaka na Biro ya Kisalu (Bureau du service) na Patterson mpi na nima yandi salaka bonso nsadisi na Komite ya Kisalu ya Nto-Kimvuka.

Katula bamambre zole yai ya mpa, bamambre ya Nto-Kimvuka kele C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; mpi D. Sydlik. Bamambre ya Nto-Kimvuka yonso kele Bakristu ya kupakulama.