Inki Tasadisa Nge na Kubakisa Biblia?

“MAMBU yina ya nge me bumbaka na bantu ya mayele ti na bantu yina me longukaka, nge me kwisa kuzabisa yo na bantu yina me longukaka ve.” (Luka 10:21) Bangogo yai ya Yezu kutubaka na Tata na yandi ya zulu kemonisa nde sambu na kubakisa Biblia, beto fwete vanda na mabanza ya mbote. Mayele ya Yehowa memonanaka na mutindu yandi mepesaka bantu mukanda yina kaka bantu ya kudikulumusa mpamba mpi bayina kendimaka nde bo longa bo lenda bakisa yo.

Bantu mingi na kati na beto kemonaka mpasi na kumonisa kikalulu ya kudikulumusa. Beto yonso mebutukaka ti kikalulu ya lulendo. Dyaka, beto kezinga na “bilumbu ya nsuka,” na kati ya “[bantu yina kekudizolaka bo mosi, . . . bantu ya ntu ngolo, NW], mpi ya mefuluka na lulendo.” (2 Timoteo 3:1-4) Bikalulu ya mutindu yai kekangaka beto nzila sambu na kubakisa Ndinga ya Nzambi. Yo kele mawa na kumona nde na kiteso mosi buna, bantu ya mezyunga beto kevandaka na bupusi na luzingu na beto. Ebuna, inki mutindu nge lenda yedisa kikalulu yina kele mfunu sambu na kubakisa Biblia?

Yidika Ntima mpi Mabanza na Nge

Esdrasi, ntwadisi ya ntama ya bantu ya Nzambi, “kuyidikaka ntima na yandi sambu na kutanga nsiku ya Yehowa.” (Esdrasi 7:10, NW) Keti kele ti mitindu yina beto lenda yidika ntima na beto? Ee. Beto lenda yantika na kuvanda na mabanza ya mbote ya kutadila Masonuku. Ntumwa Polo kusonikilaka bampangi-Bakritu nde: “Ntangu beto zabisaka beno nsangu ya Nzambi, beno waka yo, beno ndimaka yo bonso nsangu ya muntu ve kansi bonso nsangu ya Nzambi.” (1 Tesalonika 2:13) Ata Nzambi kusadilaka bantu sambu na kusonika Biblia, mambu ya bo sonikaka kukatukaka na Yehowa. Kuzaba dyambu yai ya mfunu tasadisa beto na kundima mambu ya beto ketanga.​—2 Timoteo 3:16.

Mutindu yankaka ya kuyidika ntima na beto kele kisambu. Sambu Nzambi pesaka bantu mpeve santu sambu yo sadisa bo na kusonika Biblia, yandi lenda sadila mpi mpeve yango sambu na kusadisa beto na kubakisa Biblia. Beto fwete samba sambu na kulomba lusadisu ya mutindu yina. Tala mutindu muyimbi-bankunga vandaka kudibanza na dyambu yai ntangu yandi sonikaka nde: “Pesa mono mayele sambu mono bakisa bansiku na nge, mono landa yo na ntima na mono ya mvimba.” (Nkunga 119:34) Beto fwete samba kaka ve sambu na kubaka mayele ya kubakisa mambu yina bo mesonikaka, kansi mpi sambu na kuvanda na mabanza ya mbote, disongidila mabanza yina tasadisa beto na kundima mambu yina Biblia ketubaka. Sambu na kubakisa Biblia, beto fwete ndima mambu yina kele ya kyeleka.

Na ntangu nge keyindulula sambu na kuvanda ti mabanza ya mbote, tadila mutindu kulonguka ya Biblia lenda sadisa nge. Beto kele na bikuma mingi ya mbote ya kutanga Ndinga ya Nzambi, kansi kikuma ya kuluta mfunu kele nde yo kesadisaka beto na kupusana penepene ti Nzambi.  (Yakobo 4:8) Ntangu beto ketangaka mutindu Yehowa kesalaka na mambu ya kuswaswana, mutindu yandi kebakaka na bantu yina kezolaka yandi valere, mpi mutindu yandi ketadilaka bantu yina kebuyaka yandi, beto kebakisaka mutindu ya muntu yina yandi kele. Kikuma ya ntete ya fwete pusa beto na kutanga Biblia fwete vanda ntangu yonso ya kuzaba Nzambi mbotembote sambu na kukumisa bangwisana na beto ti yandi ngolo.

Mambu Yina Lenda Kanga Beto Nzila na Kuvanda ti Mabanza ya Mbote

Inki lenda kanga beto nzila na kubakisa Ndinga ya Nzambi? Mosi na kati ya mambu yango kele kukangama ngolo na bangindu ya bantu yankaka yina beto kemonaka bonso bantu ya kutudila ntima. Mu mbandu, nge lenda ndima malongi mpi bangindu ya bantu yankaka ya lukumu. Kansi, inki nge tasala kana bantu yango kebakaka ve bakyeleka ya Ndinga ya Nzambi na valere? Kundima bantu ya mutindu yina lenda kumisa mpasi kubakisa mambu yina Biblia kelongaka mpenza. Yo yina, Biblia kesyamisa beto na kutadila mbotembote mambu yina bo longaka beto.​—1 Tesalonika 5:21.

Maria, mama ya Yezu, kukutanaka na dyambu ya mpasi ya mutindu yina. Bo longaka yandi na kuzitisa bansiku ya Bayuda. Yandi vandaka kuzitisa mbote Nsiku ya Moize mpi ziku yandi vandaka kukwenda na sinagogi. Na nima, yandi bakisaka nde Nzambi vandaka kundima dyaka ve mutindu ya lusambu yina bibuti na yandi kulongaka yandi. Yo yina, Maria kundimaka malongi ya Yezu mpi yandi vandaka na kati ya bantu ya ntete ya dibundu ya Bukristu. (Bisalu 1:13, 14) Kusala mutindu yina kutendulaka ve nde yandi kondaka luzitu na bibuti na yandi to na bansiku na bo; kansi, yo vandaka mutindu ya kumonisa zola na yandi na Nzambi. Kana beto kezola kubaka mambote yina kekatuka na Biblia, beto fwete sala mutindu Maria kusalaka na kumonisaka kwikama na beto na Nzambi kansi na bantu ve.

Yo kele mawa na kumona nde, bantu mingi kebakaka ve bakyeleka ya Biblia na valere. Bantu yankaka kesepelaka na kulanda bansiku ya dibundu yina kele ve ya kyeleka. Bankaka kemonisaka ve luzitu na kyeleka na mutindu na bo ya kutuba mpi ya kuzinga. Yo yina, kundima kyeleka ya Biblia kelombaka kuditambika: Yo lenda tula nge na kimbeni ti banduku na nge, bantu ya nge kezingaka ti bo, banduku ya kisalu, mpi nkutu bantu ya dibuta na nge. (Yoane 17:14) Kansi, Salomo, muntu ya mayele, kusonikaka nde: ‘Sumba kyeleka, kansi kuteka yo ve.’ (Bingana 23:23) Kana nge kebaka kyeleka na valere, Yehowa tasadisa nge na kubakisa Biblia.

Kikuma yankaka yina lenda kanga beto nzila na kubakisa nsangu ya Biblia kele kukonda luzolo ya kusadila mambu yina yo ketuba. Yezu kutubilaka balongoki na yandi nde: “Nzambi me pesaka beno nzila ya kuzaba mambu ya kinsweki ya Kimfumu na yandi, kansi yandi me pesaka yo ve na bantu yina ya nkaka. Sambu mabanza ya bantu yai me kwisaka ngolo-ngolo; bo ke waka mbote ve na makutu na bo.” (Matayo 13:11, 15) Bantu mingi na kati ya bantu yina Yezu longaka kundimaka ve nsangu na yandi, mpi bo vandaka ve ti luzolo ya kusoba. Komersa-ntambudi yina Yezu kutubilaka na kingana na yandi kuvandaka ya kuswaswana mpenza! Ntangu yandi monaka diyaka ya kuluta ntalu mingi, mbala mosi yandi tekaka bima na yandi yonso sambu na kusumba diyaka yina. Kubakisa kyeleka ya Biblia fwete vanda mpi kima mosi ya valere sambu na beto.​—Matayo 13:45, 46.

Yo Kevandaka Mpasi na Kundima nde Bo Longa Beto

Dyambu ya mpasi mpenza sambu na kubakisa Biblia kele kuvanda ya kuyilama sambu nde bo longa beto. Muntu yankaka lenda mona mpasi na kundima mabanza ya mpa na muntu yina kemonana bonso nde yandi kele muntu ya kukonda mfunu. Kansi, bantumwa ya Yezu kuvandaka ‘bantu ya mfunu mingi ve mpi bo longukaka ve.’ (Bisalu 4:13) Polo kutendulaka kikuma yina ntangu yandi sonikaka nde: “Bampangi na mono, beno yindula fioti kana beno vandaka banani ntangu Nzambi solaka beno. Kaka bantu fioti mpamba na kati na beno vandaka bantu ya mayele, to bantu ya ngolo, to bantu ya nene na luzingu ya kimuntu. Kansi Nzambi solaka kaka mambu yina ya bantu ke monaka nde yo kele buzoba sambu na kumonisa bantu ya mayele nsoni.” (1 Korinto 1:26, 27) Kana nge kemona nde yo kele mpasi na kudikulumusa ntangu muntu mosi ya kukonda mfunu kelonga nge, yibuka nde yandi kele kaka mwaye yina Nzambi kesadila sambu na kulonga nge. Yo kele dibaku mosi ya nene mpenza nde Yehowa, ‘Longi na beto ya Nene’ kulonga beto.​—Yezaya 30:20, NW; 54:13.

 Namani, mfumu ya basoda ya Siria, kumonaka nde yo vandaka mpasi na kundima malongi ya muntu mosi ya kukonda mfunu. Ntangu yandi vandaka kusosa kubeluka na maladi na yandi ya wazi, yandi kwendaka kumona Elisa, profete ya Yehowa. Kansi, Nzambi kusadilaka nsadi mosi sambu na kuzabisa Namani mambu yina yandi fwete sala na mpila nde yandi beluka. Nsangu yango mpi mutindu ya bo pesilaka yo kukuminaka Namani mpasi na kudikulumusa sambu na kundima ntuma yina, na mpila nde yandi buyaka na mbala ya ntete na kulemfuka na ndinga ya profete ya Nzambi. Na nima, Namani sobaka mabanza na yandi mpi yandi belukaka. (2 Bantotila 5:9-14) Beto kekutanaka mpi na dyambu ya mpasi ya mutindu mosi ntangu beto kelongukaka Biblia. Beto lenda bakisa nde sambu na kubeluka na kimpeve mpi na mabanza, beto fwete landa mutindu ya mpa ya luzingu. Keti beto takudikulumusa na kundima nde muntu mosi kulonga beto mambu yina beto fwete sala? Kaka bantu yina kezolaka nde bo longa bo bantu lenda bakisa Biblia.

Ministre ya Kandake, ntotila-nkento ya Etiopia, kumonisaka mabanza ya mbote. Ntangu yandi vandaka kuvutuka na Afrika na zulu ya pusupusu na yandi, longoki Filipi kwendaka ntinu sambu na kukutana ti yandi. Filipi kuyulaka yandi kana yandi vandaka kubakisa mambu yina yandi vandaka kutanga. Mfumu yango kudikulumusaka mpenza mpi kuvutulaka nde: “Nki mutindu mono lenda bakisa yo kana muntu ya kutendula mono yo kele ve?” Kaka na ntangu yandi bakisaka Ndinga ya Nzambi, muntu yango kubakaka mbotika. Na nima, yandi “landaka kaka nzila na yandi na kiese yonso.”​—Bisalu 8:27-39.

Bambangi ya Yehowa mingi kele bantu ya kukonda mfunu. Konso mposo bo ketwadisaka kulonguka ya Biblia na banzo ya bantu kuluta bamilio sambanu. Sambu Biblia kelongaka mutindu ya kuvanda ti luzingu ya kuluta mbote, ketendulaka kivuvu mosi kaka sambu na bantu, mpi yo kezabisaka beto mutindu ya kuzaba Nzambi mbote, bamilio ya bantu memonaka nde kulonguka Biblia mpi kubakisa mambu yina yo ketubaka kenataka kyese mosi ya kuluta nene. Nge mpi lenda zwa kyese yina.

[Kifwanisu ya kele na lutiti 7]

Namani kumonaka mpasi na kundima malongi ya nsadi mosi ya kukonda mfunu

[Kifwanisu ya kele na lutiti 7]

Kubakisa Biblia kepesaka beto kyese na ntima