Nge Kele ti Dibaku ya Kyese ya Kubakisa Biblia

BIBLIA kele na bakyeleka mingi ya mfunu yina mekatukaka na Nzambi. Yo kesongaka beto lukanu ya luzingu, kikuma ya bampasi ya bantu, mpi mutindu luzingu ya bantu tavanda na bilumbu kekwisa. Yo kelongaka beto mutindu ya kuzwa kyese, mutindu ya kusala kinduku ti bantu, mpi mutindu ya kuyidika mbote mambu ya mpasi. Dyambu ya kuluta mfunu kele nde, beto kelongukaka mambu ya metala Yehowa, Ngangi mpi Tata na beto ya zulu. Nzayilu ya mutindu yai kenatilaka beto kyese mpi kesalaka nde luzingu na beto kuvanda na mfunu.

Biblia kefwanisaka kubaka nzayilu ya Nzambi ti madya. Yezu kutubaka nde: “Muntu ke zingaka kaka ve sambu na mampa ya yandi ke diaka, kansi yandi ke zingaka mpi sambu na mambu yina yonso ya Nzambi ke tubaka.” (Matayo 4:4; Baebreo 5:12-14) Kaka mutindu kudya konso kilumbu kevandaka mfunu sambu beto landa na kuzinga, mutindu mosi mpi kutanga Ndinga ya Nzambi mbala na mbala kele mfunu sambu na kubaka mambote ya lusilu ya Nzambi yina metala luzingu ya mvula na mvula.

Beto kevandaka na kyese ya kudya sambu Yehowa mesalaka beto na mpila nde beto sepela ti madya mpi sambu yo kelungisaka mpusa na beto ya mfunu. Kansi, beto kele ti mpusa yankaka ya mfunu yina beto fwete lungisa kana beto kezola kuvanda na kyese. Yezu kutubaka nde: “Kyese na bantu yina [kekudibanzaka sambu na mpusa na bo ya kimpeve, NW].” (Matayo 5:3) Beto lenda vanda na kyese sambu beto lenda lungisa ‘mpusa na beto ya kimpeve’ ntangu beto kebakisa Ndinga ya Nzambi.

Ya kyeleka, bantu yankaka keyindulaka nde yo kele mpasi na kubakisa Biblia. Mu mbandu, nge lenda vanda na mfunu ya lusadisu sambu na kubakisa baverse yina ketubila bikalulu yina nge meyikanaka ve ti yo to yina kesadila bangogo ya kifwani. Dyaka, kele ti bambikudulu ya bo sonikaka na bangogo ya kifwani yina nge  lenda bakisa kaka kana nge tadila baverse yankaka ya Biblia yina ketubila disolo yina mosi. (Daniele 7:1-7; Kusonga 13:1, 2) Ata mpidina, nge lenda bakisa mpenza Biblia. Keti nge kendima nde muntu lenda bakisa Biblia?

Bantu Yonso Kele ti Dibaku Yina ya Kyese

Biblia kele Ndinga ya Nzambi. Nzambi mesongaka beto lukanu na yandi na nzila ya Biblia. Keti Nzambi lenda pesa mukanda mosi yina kele mpasi na kubakisa to yina kaka bantu ya kulonguka mingi bantu fwete bakisa? Ve, Yehowa lenda sala ve mbi ya mutindu yina. Yezu Kristu kutubaka nde: “Na kati na beno, kana nge kele tata, ebuna mwana na nge kulomba nge mbisi ya masa, keti nge ta pesa yandi musobi? to kana yandi kulomba nge diaki keti nge ta pesa yandi nkutu? Ebuna beno bantu ya mbi, kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza mpeve na yandi na bantu yina ke lombaka yandi mpeve!” (Luka 11:11-13) Yo yina, nge lenda ndima nde nge lenda bakisa Biblia mpi nde kana nge lomba Nzambi na masonga yonso, yandi tapesa nge lusadisu yina kele mfunu sambu nge bakisa Ndinga na yandi. Ya kyeleka, ata baleke lenda bakisa malongi ya mfunu ya Biblia!​—2 Timoteo 3:15.

Ata yo kelombaka kusala kikesa sambu na kubakisa Biblia, kusala mutindu yina lenda vanda ti bupusi ya ngolo mpi ya mbote na luzingu na beto. Na nima ya lufutumuku na yandi, Yezu kumonanaka na balongoki zole na kati ya balongoki na yandi mpi yandi tubilaka bo mambu metala bambikudulu ya Biblia. Disolo ya Luka ketuba nde: “Ebuna Yesu tendulaka bo mambu yina ya bo sonikaka sambu na yandi na mikanda yonso yina kele na Mukanda ya Nzambi, yantika na mikanda ya Moize ti na mikanda yonso ya baprofete.” Inki kusalamaka? Na nkokila yina, ntangu bo yindulaka mambu yina bo waka, balongoki kutubaka bo na bo nde: “Si ntima na beto vandaka kubula sambu na kiese, ntangu yandi vandaka kwenda kusolula ti beto na nzila, ti ntangu yandi vandaka kutendula beto mambu yina kele na Mukanda ya Nzambi.” (Luka 24:13-32) Kubakisa Ndinga ya Nzambi kupesaka bo kyese sambu yo kumisaka lukwikilu na bo ngolo na balusilu ya Nzambi mpi yo pesaka bo mabanza ya mbote sambu na luzingu ya bilumbu kekwisa.

Ndinga ya Nzambi kele kilo ve, kubakisa yo kele mbote mpenza mpi kenataka mambote ti kyese, bonso kudya madya ya kitoko yina kepesaka mavimpi. Inki nge fwete sala sambu na kubaka nzayilu ya mutindu yai? Disolo yina kelanda tamonisa mutindu nge lenda baka kyese na “nzayilu ya Nzambi.”​—Bingana 2:1-5, NW.

[Kifwanisu ya kele na lutiti 4]

Bonso tata ya zola, Yehowa kepesaka beto mpeve santu na yandi sambu yo sadisa beto na kubakisa Biblia