Bangyufula ya Batangi

Inki Yezu zolaka kutuba ntangu yandi zabisaka Nikodemo nde: “Ata muntu mosi ve me tombukaka na zulu, kaka Mwana-muntu yina katukaka na zulu, yandi muntu me tombukaka kuna”?​—Yoane 3:13.

Na ntangu yina, Yezu kuvandaka na ntoto, mpi yandi vandaka metombuka to mevutuka ntete ve na zulu. Kansi, mambu ya beto mezaba sambu na Yezu mpi baverse ya kele na ntwala ya verse yai kesadisa beto na kubakisa nki yandi zolaka kutuba.

Yezu “katukaka na zulu” sambu na ntwala ya kukwisa na ntoto yandi vandaka kuzinga na zulu ti Tata na yandi, kansi na ntangu yina kutulamaka, Nzambi kukotisaka luzingu na yandi na divumu ya Maria, ebuna yandi butukaka bonso muntu. (Luka 1:30-35; Galatia 4:4; Baebreo 2:9, 14, 17) Na nima ya lufwa na yandi, Yezu zolaka kufutumuka bonso mpeve mpi kuvutuka na zulu sambu na kuzinga ti Yehowa. Yo yina, ntangu fyoti na ntwala ya kufwa, Yezu kusambaka nde: “Tata, ntangu yai pesa mono lukumu bonso yina ya mono vandaka na yo ntete ntangu mono vandaka ti nge, pana ntoto vandaka me salama ntete ve.”​—Yoane 17:5; Roma 6:4, 9; Baebreo 9:24; 1 Piere 3:18.

Ntangu Yezu kusolulaka ti Nikodemo, yina vandaka Mufarize mpi longi na Izraele, yandi vandaka na ntoto. Ya kyeleka, ata muntu mosi ve mefwaka mpi mekwendaka na zulu. Yezu yandi mosi kutubaka nde Yoane Mbotiki kulutaka baprofete yonso na lukumu, “kansi muntu yina ke na mfunu mingi ve na kati ya bantu yonso na Kimfumu ya Nzambi yandi me luta Yoane-Batiste na mfunu.” (Matayo 11:11) Ebuna, ntumwa Piere kutendulaka nde ata Davidi, Ntotila ya kwikama mefwaka mpi yandi vandaka kaka na mazyamu. Yandi tombukaka ve na zulu. (Bisalu 2:29, 34) Kele ti kikuma mosi ya kusalaka nde bantu yina kufwaka na ntwala ya Yezu, bonso Davidi, Yoane Mbotiki, mpi bantu yankaka ya lukwikilu kukwenda ve na zulu. Bo fwaka na ntwala nde Yezu kukangula nzila to kupesa bantu dibaku ya kufutumuka sambu na kuzinga na zulu. Ntumwa Polo kusonikaka nde Yezu, yina kele bonso muntu ya mekota na ntwala, ‘kukangulaka . . . nzila ya mpa ya moyo’ ya kukwenda na zulu.​—Baebreo 6:19, 20; 9:24; 10:19, 20.

Sambu na ntangu yina, Yezu kuvandaka mefwa ntete ve mpi mefutumuka ntete ve, yandi zolaka kutuba nki ntangu yandi songaka Nikodemo nde: “Ata muntu mosi ve me tombukaka na zulu, kaka Mwana-muntu yina katukaka na zulu, yandi muntu me tombukaka kuna”? (Yoane 3:13) Beto tadila mambu yina yandi vandaka kusolula ti Nikodemo.

Ntangu mfumu yina ya Bayuda kwisaka kukutana ti Yezu na mpimpa, Yezu kusongaka yandi nde: “Mono ke tubila nge mambu ya kieleka: Ata muntu mosi ve lenda mona Kimfumu ya Nzambi kana yandi me butuka diaka mbala ya zole ve.” (Yoane 3:3) Na nima na yo, Nikodemo kuyulaka nde: ‘Inki mutindu yo lenda salama? Inki mutindu muntu lenda butuka dyaka mbala zole?’ Yandi bakisaka ve dilongi yai ya ketadila kuvanda na Kimfumu ya Nzambi. Keti yandi lendaka kulonguka dyambu yai? Ee, kansi yandi lendaka kulonguka yo ve na nsadisa ya mambu yina bantu mezaba na dyambu yina, sambu ata muntu mosi ve mekwendaka na zulu mpi mefwana na kupesa ntendula ya kuvanda na Kimfumu ya Nzambi. Yezu mpamba muntu lendaka kulonga yandi yo. Yezu lendaka kulonga Nikodemo ti bantu yankaka sambu yandi katukaka na zulu mpi yandi fwanaka sambu na kulonga bantu mambu ya mutindu yina.

Yo yina, mambu ya bo ketubila na verse yai kepesa dilongi mosi ya mfunu na yina metala kulonguka Ndinga ya Nzambi. Yo kele ve mbote nde muntu kubula dibaku na verse mosi kaka sambu yo kemonana bonso nde yo kele mpasi na kubakisa. Beto fwete tadila mambu yina Biblia ketuba na verse mosi buna na nsadisa ya baverse yankaka mpi yo fwete wakana ti mambu ya bo ketubila. Dyaka, mbala mingi baverse ya kele na ntwala to na nima to disolo ya bo ketubila, kesadisaka na kuzaba ntendula ya mbote mpi ya mefwana ya verse mosi ya mpasi.