Vanda Mayele mpi Tina Nzambi Boma!

“Na kuvanda mayele, ntete nge fweti tina Mfumu Nzambi boma.”​—BINGANA 9:10.

1. Sambu na nki bantu mingi kemonaka mpasi na kubakisa dibanza ya kutina Nzambi boma?

NA NSUNGI mosi buna, kuzabana bonso muntu ya ketinaka Nzambi boma, kuvandaka dyambu mosi ya lukumu. Bubu yai, bantu mingi kemonaka dibanza ya kutina Nzambi boma bonso dyambu ya ntama mpi ya mpasi na kubakisa. Bo lenda yula nde ‘kana Nzambi kele zola, sambu na nki beto fwete tina yandi boma?’ Sambu na bo, boma kele mawi mosi ya mbi, to nkutu mawi yina kelembisaka muntu. Kansi, mutindu beto tamona yo, boma ya mbote ya Nzambi ke na bantendula mingi, yo kele kaka ve mawi ya mpamba.

2, 3. Boma ya mbote ya Nzambi ketendula inki?

² Ntangu Biblia kesadilaka bangogo kutina Nzambi boma, yo ketubilaka kikalulu ya mbote. (Yezaya 11:3) Yo ketendula kuvanda ti luzitu mingi sambu na Nzambi, mpi mpusa ya ngolo ya kubuya kusala mambu yina kesepedisaka yandi ve. (Nkunga 115:11) Yo kelombaka kundima mpi kukangama ngolo na bansiku ya bikalulu ya mbote yina Nzambi kepesaka mpi kuvanda na luzolo ya kuzinga na kuwakana ti mambu yina kele ya mbote to ya mbi na meso na yandi. Mukanda mosi kutubaka nde boma ya mbote ya mutindu yina kemonisaka “mutindu muntu ketadilaka Nzambi, mpi yo kepusaka yandi na kuvanda mayele mpi kubuya mitindu yonso ya mambi.” Yo yina, Ndinga ya Nzambi ketubila beto nde: “Na kuvanda mayele, ntete nge fweti tina Mfumu Nzambi boma.”​—Bingana 9:10.

³ Ya kyeleka, kutina Nzambi boma ketadila mambu mingi na luzingu. Yo kepesaka muntu mayele kaka ve, kansi mpi kyese, ngemba, kimvwama, luzingu ya nda, kivuvu, mpi kutula ntima. (Nkunga 2:11; Bingana 1:7; 10:27; 14:26; 22:4; 23:17, 18; Bisalu 9:31) Yo kekwendaka nzila mosi ti lukwikilu mpi zola. Na kutuba ya mbote, yo ketadilaka mambu yonso yina lenda wakanisa beto ti Yehowa mpi ti bantu yankaka. (Kulonga 10:12; Yobi 6:14; Baebreo 11:7) Kutina Nzambi boma kele mpi kundima mpenza nde Tata na beto ya zulu kekudibanzaka sambu na beto mpi yandi kele pene na kulolula masumu na beto. (Nkunga 130:4) Kaka bantu yina kebalulaka ve ntima ketekitaka na ntwala ya Nzambi. *​—Baebreo 10:26-31.

Longuka na Kutina Nzambi Boma

4. Inki lenda sadisa beto na kulonguka na ‘kutina Yehowa boma’?

⁴ Sambu kutina Nzambi boma kele mfunu sambu na kubaka balukanu ya mayele mpi kubaka balusakumunu ya Nzambi, inki mutindu beto lenda “zaba kutina Mfumu Nzambi boma” mbotembote? (Kulonga 17:19) Bo sonikaka na Masonuku bambandu mingi ya babakala ti ya bankento yina vandaka kutina Nzambi boma “sambu na kulonga beto.” (Roma 15:4) Sambu na kusadisa beto na kubakisa kana kutina Nzambi boma ketendula mpenza inki, bika beto tadila luzingu ya Davidi, Ntotila ya Izraele.

5. Inki mutindu kukeba mameme kusadisaka Davidi na kulonguka kutina Yehowa boma?

⁵ Yehowa kubuyaka Saule, ntotila ya ntete ya Izraele sambu yandi vandaka kutina bantu boma, kansi Nzambi ve. (1 Samuele 15:24-26) Kansi, luzingu ya Davidi mpi bangwisana na yandi ya ngolo ti Yehowa kemonisa nde yandi vandaka kutina mpenza Nzambi boma. Banda kileke na yandi, Davidi vandaka kukeba mameme ya tata na yandi. (1 Samuele 16:11) Yo fwete vanda nde mutindu yandi vandaka kulutisa bampimpa mingi na kukeba mameme, yo sadisaka yandi na kubakisa kutina Yehowa boma. Ata Davidi lendaka kuzaba kaka mambu fyoti na yina metala luyalanganu, yandi bakisaka mbote nde Nzambi mefwana na kubaka luzitu ti lusambu na beto. Yo yina, yandi sonikaka nde: “Kana mono tala zulu yai ya nge salaka, kana mono tala ngonda ti bambwetete yai ya nge me  tulaka na kisika na yo, mono ke kudiyula nde: Muntu kele nani nge na kuyindulaka yandi? Muntu kele nani nge na kutalaka yandi?”​—Nkunga 8:4, 5.

6. Davidi kudiwaka nki mutindu ntangu yandi bakisaka bunene ya Yehowa?

⁶ Yo yina, Davidi vandaka kuyituka ntangu yandi vandaka kufwanisa zulu ya nene ya kufuluka na bambwetete ti mutindu yandi vandaka fyoti. Na kisika nde yandi tekita na boma, nzayilu yina kupusaka yandi na kukumisa Yehowa mpi na kutuba nde: “Zulu ke songa mbote-mbote lukumu ya Nzambi, bima yonso kele na zulu ke songa nki yandi salaka.” (Nkunga 19:2) Luzitu ya ngolo yina yandi kuvandaka na yo sambu na Nzambi kusadisaka Davidi na kupusana penepene na yandi mpi na kuzola kulonguka ti kulanda banzila na Yandi ya kukuka. Yindula mutindu Davidi vandaka kudiwa ntangu yandi yimbilaka Yehowa nde: “Bo ta kumisa nene na nge sambu nge mpamba muntu kele Nzambi, nge mpamba muntu ke salaka mambu ya kuyituka. Mfumu, songa mono banzila na nge, mpidina mono ta landa yo mbote-mbote; longa mono na kusadila nge na ntima mosi ya mbote.”​—Nkunga 86:10, 11.

7. Inki mutindu kutina Nzambi boma kusadisaka Davidi na kunwana ti Goliati?

⁷ Ntangu bantu ya Filistia kwisaka kunwanisa bantu ya Izraele, Goliati, muntu mosi ya ngolo mingi yina kuvandaka nda kiteso ya bametre tatu, kusaulaka bantu ya Izraele na kutubaka nde: ‘Beno sola muntu mosi, yandi kwisa kunwana ti mono. Kana yandi bedisa mono, beto takuma bampika na beno.’ (1 Samuele 17:4-10) Saule ti basoda na yandi yonso kutekitaka na boma, kansi Davidi ve. Yandi zabaka nde muntu bo fwete tina boma kele Yehowa, kansi muntu ve, ata yandi kele ngolo nki mutindu. Yo yina, Davidi kusongaka Goliati nde: ‘Mono ke kwisa na zina ya Yehowa, Nzambi ya basoda ya Israele. Ebuna konso muntu kele awa ta mona nde Mfumu Nzambi ke na mfunu ve ya mbele to dikonga na kunungisa bantu na yandi; bitumba yai yandi muntu ke nunga yo.’ Na lusadisu ya Yehowa, Davidi kufwaka muntu yina ya nda kaka ti lanse mpi kaditadi mosi mpamba.​—1 Samuele 17:45-47.

8. Inki dilongi beto lenda baka na bambandu ya bantu yina vandaka kutina Nzambi boma?

⁸ Beto lenda kutana ti bampasi to bambeni ya ngolo mingi bonso bayina kunwanisaka Davidi. Inki beto lenda sala? Beto lenda sala mutindu Davidi ti bansadi yankaka ya kwikama ya ntama kusalaka, disongidila, kutina Nzambi boma. Kutina Nzambi boma lenda katula boma ya bantu. Ntangu bambeni vandaka kumonisa bantu ya Izraele mpasi, Nehemia yina kuvandaka nsadi ya kwikama ya Nzambi kulongisilaka bo nde: “Beno tina bambeni na beto boma ve. Beno yindula mutindu Mfumu Nzambi kele nene ti mutindu yandi ke pesaka boma.” (Nehemia 4:8) Na lusadisu ya Yehowa, Davidi ti Nehemia, mpi bansadi yankaka ya kwikama ya Nzambi kunungaka na kulungisa mikumba yina Nzambi kupesaka bo. Kana beto ketina Nzambi boma, beto mpi lenda nunga na kulungisa mikumba na beto.

Kutina Nzambi Boma Ntangu Beto Kenwana ti Dyambu ya Mpasi

9. Na nki bantangu ya mpasi Davidi kumonisaka nde yandi ketinaka Nzambi boma?

⁹ Na nima ya kufwa Goliati, Yehowa kunungisaka Davidi bambala mingi. Kansi, Saule kuwaka kimpala mpi kusosaka kufwa Davidi. Ntete yandi zolaka kufwa yandi mbala mosi kukonda kuyindula, na nima yandi sadilaka mayele ya mbi, mpi nsukanusaka yandi kwendaka ti basoda sambu na kufwa yandi. Ata Yehowa kundimisaka Davidi nde yandi tavanda ntotila, yo lombaka nde na nsungi ya bamvula mingi Davidi kutina, kunwana, mpi kuvingila ntangu yina Yehowa kutulaka sambu na kukumisa yandi ntotila. Na mambu yai yonso, Davidi kumonisaka nde yandi vandaka kutina mpenza Nzambi boma.​—1 Samuele 18:9, 11, 17; 24:3.

10. Inki mutindu Davidi kumonisaka na ntwala ya kigonsa nde yandi vandaka kutina Nzambi boma?

¹⁰ Kilumbu mosi, Davidi vandaka kutina Saule mpi kwendaka na Akishi, mfumu ya bwala Gadi na Filistia, bwala ya Goliati. (1 Samuele 21:11-16) Bansadi ya mfumu yina kufundaka Davidi nde yandi kele mbeni na bo. Davidi kusalaka nki na ntangu yina ya mpasi ti ya kigonsa? Yandi sambaka Yehowa na masonga yonso. (Nkunga 56:1-5, 11-13) Ata yo lombaka nde Davidi kukusa maladi ya kilau sambu bo fwa yandi ve, yandi zabaka nde muntu kugulusaka yandi mpenza kuvandaka Yehowa sambu yandi sakumunaka bikesa na yandi. Kutula ntima ya mvimba yina Davidi vandaka kutula na Yehowa kumonisaka nde yandi vandaka kutina mpenza Nzambi boma.​—Nkunga 34:5-7, 10-12.

11. Bonso Davidi, inki mutindu beto lenda monisa na ntangu ya mpasi nde beto ketinaka Nzambi boma?

¹¹ Bonso Davidi, beto lenda tina Nzambi boma  na kutulaka ntima na balusilu na yandi ya kusadisa beto na kunwana ti mambu ya mpasi ya beto kekutanaka na yo. Davidi kutubaka nde: “Kudipesa na Mfumu Nzambi, tula yandi ntima, ebuna yandi ta sadisa nge.” (Nkunga 37:5) Yo ketendula ve nde beto tabikila Yehowa bampasi na beto kukonda kusala ata kima mosi mpi kuvingila nde yandi kusadisa beto. Davidi kusambaka kaka ve Yehowa na kusadisa yandi mpi na nima yandi kanga maboko. Yandi sadilaka ngolo ya nitu mpi mayele yina Yehowa kupesaka yandi sambu na kumanisa dyambu yina. Kansi Davidi kuzabaka nde sambu na kununga, yandi lenda tula ntima na bikesa na yandi mosi kaka ve. Beto mpi fwete sala kiteso mosi. Kana beto mesala yonso yina beto lenda na kiteso ya ngolo na beto, beto fwete yambula mambu yonso na maboko ya Yehowa. Na kutuba ya mbote, mbala mingi beto kevandaka na kima yankaka ve ya kusala, kaka kutula ntima na Yehowa. Na ntangu yango, beto kemonisaka nde beto ketinaka mpenza Nzambi boma. Beto lenda baka kikesa na mambu yina Davidi kutubaka na masonga yonso nde: “Mfumu Nzambi ke songaka kinsweki na yandi na bantu yina ke lemfukaka na yandi.”​—Nkunga 25:14.

12. Sambu na nki beto fwete tadila bisambu na beto bonso mambu ya mfunu mingi, mpi nki nkadilu beto fwete vanda ti yo ve ata fyoti?

¹² Yo yina, beto fwete tadila bisambu na beto mpi bangwisana na beto ti Nzambi bonso mambu ya mfunu mingi. Ntangu beto kesamba Nzambi, beto fwete “kwikila nde Nzambi kele, mpi nde Nzambi ke pesaka matabisi na bantu yina ke sosaka yandi” na masonga yonso. (Baebreo 11:6; Yakobo 1:5-8) Ebuna, na ntangu yandi kesadisaka beto, beto fwete “pesa Nzambi mersi,” mutindu Polo kulongisilaka beto. (Kolosai 3:15, 17) Beto fwete vanda ve ata fyoti bonso bantu yina mupakulami mosi ya ke na eksperiansi mingi kutubilaka nde: “Bo keyindulaka nde Nzambi kele bonso muntu mosi ya kesalaka na restora yina kekinga na zulu. Kana bo kele na mfunu ya kima, bo kesalaka kaka kindimbu na misapi sambu na kubinga yandi. Ebuna kana bo mebaka kima ya bo ke na yo mfunu imene, bo kezolaka nde yandi kukatuka na kisika yina.” Nkadilu ya mutindu yina kemonisaka kukonda kutina Nzambi boma.

Kana Boma ya Nzambi Kele Dyaka Ve

13. Na nki dibaku Davidi kuzitisaka ve Nsiku ya Nzambi?

¹³ Sambu Davidi kumonaka mutindu Nzambi kusadisaka yandi na bantangu ya mpasi, yandi kumaka na boma ya ngolo ya Nzambi mpi kutula ntima na yandi na Nzambi kukumaka ngolo. (Nkunga 31:22-24) Kansi, na bambala tatu, Davidi kutinaka ve Nzambi boma, mpi yo nataka malanda ya mbi mpenza. Dyambu ya ntete ketadila bangidika ya yandi sadisaka sambu na kunata  Sanduku ya kuwakana ya Yehowa na Yeruzalemi na zulu ya pusupusu, na kisika nde Balevi kunata yo na mapeka mutindu Nsiku ya Nzambi vandaka kutuba. Ntangu Uza, yina vandaka kutwadisa pusupusu, kutandulaka diboko sambu na kusimba Sanduku na mpila nde yo nikana ve, yandi fwaka na mbala mosi sambu “yandi songaka ve luzitu na Sanduku ya Nzambi.” Ya kyeleka, Uza kusalaka disumu ya nene, kansi kima kunataka mpasi yina kuvandaka kifu ya Davidi sambu yandi zitisaka ve Nsiku ya Nzambi. Kutina Nzambi boma ketendula kusala mambu na mutindu yandi kezolaka.​—2 Samuele 6:2-9; Kutanga 4:15; 7:9.

14. Inki kusalamaka na mutindu Davidi kutangaka bantu ya Izraele?

¹⁴ Ya zole, Satana kukusaka Davidi na kutanga bantu ya Izraele yina vandaka kukwenda na bitumba. (1 Bansangu 21:1) Sambu Davidi kusalaka mpidina, yandi monisaka ve boma ya Nzambi, mpi bantu 70 000 ya Izraele kufwaka sambu na dyambu yina. Ata Davidi kubalulaka ntima na ntwala ya Yehowa, yandi ti bantu na yandi kumonaka mpasi mingi mpenza.​—2 Samuele 24:1-16.

15. Inki kunataka Davidi na kusala mansoni?

¹⁵ Ntangu yankaka yina Davidi kukondaka boma ya Nzambi kunataka yandi na kusala mansoni ti Batsheba, nkento ya Uria. Davidi kuzabaka nde bizumba to nkutu kuzola nkento ya ngani kuvandaka mbi. (Kubasika 20:14, 17) Dyambu yango kuyantikaka ntangu Davidi kumonaka Batsheba keyobila. Yo lombaka nde boma ya mbote ya Nzambi kupusa Davidi na kukatula nswalu meso na yandi mpi kutula mabanza na yandi na kima yankaka. Kansi, yo kemonana nde Davidi kulandaka na ‘kutala’ yandi tii ntangu mawi na yandi kukumaka ngolo kuluta boma ya Nzambi. (Matayo 5:28; 2 Samuele 11:1-4) Davidi kuvilaka nde bangwisana na yandi ti Yehowa vandaka kutadila mambu yonso ya luzingu na yandi.​—Nkunga 139:1-7.

16. Inki mpasi Davidi kumonaka sambu na mambu ya mbi yina yandi salaka?

¹⁶ Na mansoni yina ya Davidi kusalaka ti Batsheba, bo butaka mwana. Ntangu fyoti na nima, Yehowa kutindaka profete Natani sambu na kumonisa Davidi pwelele disumu na yandi. Ntangu Davidi kuvutukilaka mabanza ya mbote, yandi kumaka dyaka kutina Nzambi boma mpi  kubalulaka ntima. Yandi bondilaka Yehowa na kufwa yandi ve mpi na kukatula yandi ve mpeve santu na Yandi. (Nkunga 51:9, 13) Yehowa kulolulaka Davidi mpi kufyotunaka ndola na yandi, kansi yandi taninaka ve Davidi na malanda yonso ya mbi ya mambu yina yandi salaka. Mwana ya Davidi kufwaka, mpi mpasi kukotaka na dibuta na yandi banda ntangu yina tii kuna. Davidi kubakaka ndola ya nene mpenza na mutindu yandi kondaka kutina Nzambi boma sambu na ntangu fyoti!​—2 Samuele 12:10-14; 13:10-14; 15:14.

17. Pesa mbandu ya kemonisa mpasi yina masumu kenataka.

¹⁷ Bubu yai, kukonda kutina Nzambi boma na mambu ya metala bikalulu ya mbote lenda vanda na malanda ya mbi mpi ya kimakulu. Yindula mpasi yina mwana-nkento mosi kuwaka na ntima ntangu yandi waka nde bakala na yandi, yina kuvandaka Mukristu, kuvandaka ve ya kwikama ntangu yandi vandaka kusala na nsi ya nzenza. Sambu na mpasi yina, yandi tulaka maboko na ntu mpi kudilaka ngolo. Yo talomba bamvula ikwa sambu nkento yina kutudila dyaka bakala na yandi ntima mpi kuzitisa yandi dyaka? Kana beto ketina mpenza Nzambi boma, beto lenda tina malanda ya mbi ya mutindu yai.​—1 Korinto 6:18.

Kutina Nzambi Boma Kekangaka Beto Nzila ya Kusala Masumu

18. Lukanu ya Satana kele inki, mpi nki metode yandi kesadilaka?

¹⁸ Satana kebebisaka nswalu kibeni bikalulu ya inza, mpi yandi kezolaka kubebisa mingimingi Bakristu ya kyeleka. Sambu na kusala yo, yandi kesadilaka na mbala mosi mpenza bima yina kenataka bansangu na ntima ti na mabanza na beto, mingimingi meso ti makutu na beto. (Efezo 4:17-19) Inki nge tasala kana nge mona na kintulumukina bifwanisu ya mansoni, kuwa bangogo ya mbi, to kukutana ti bantu ya kesala mansoni?

19. Inki mutindu kutina Nzambi boma kusadisaka Mukristu mosi na kununga mpukumuna?

¹⁹ Beto tadila mbandu ya André, * yina kele nkuluntu, tata ya dibuta, mpi munganga na Eropa. Ntangu André vandaka kusala na lupitalu na mpimpa, bankento yina vandaka kusala ti yandi vandaka kusonikila yandi banoti, kusala bifwanisu ya ntima mpi kutula yo na kuse na yandi sambu na kulomba yandi na kusala mansoni ti bo. André vandaka kubuya mpenza. Dyaka, sambu na kudikatula na bupusi yina ya mbi, yandi sosaka kisalu na kisika yankaka. Kutina Nzambi boma kuvandaka dyambu ya mayele mpenza mpi yo natilaka yandi balusakumunu, sambu bubu yai André kesalaka ntangu fyoti na biro ya filiale ya Bambangi ya Yehowa na nsi na bo.

20, 21. (a) Inki mutindu kutina Nzambi boma lenda sadisa beto na kubuya kusala masumu? (b) Inki beto tatadila na disolo yina kelanda?

²⁰ Kuyindula ntangu mingi na mambu yina kele ya mbi lenda nata muntu na kuzola kubebisa bangwisana na yandi ya mfunu ti Yehowa sambu na kima mosi ya yandi kele ve na nswa ya kusala. (Yakobo 1:14, 15) Kansi, kana beto ketina Yehowa boma, beto takwenda ve to nkutu takatuka na bisika, tabuya bantu, mambu, mpi bansaka yina lenda katula dikebi na beto na yina metala bikalulu ya mbote. (Bingana 22:3) Ata nsoni to bibansa yina yo lenda lomba nde beto sala kele nki mutindu, yo kele fyoti kana beto kufwanisa yo ti kuvidisa kundimama na Nzambi. (Matayo 5:29, 30) Kutina Nzambi boma kelombaka nde beto kudikatula na mambu yonso yina lenda pusa beto na kusala mansoni, yika mpi kutala bifwanisu ya kemonisa kikonga, kansi beto fwete sala na mpila nde beto ‘katula meso na beto na bima ya mpamba-mpamba.’ Kana beto kesala mutindu yina, beto lenda tula ntima na Yehowa nde yandi ‘tapesa beto moyo’ mpi konso kima ya beto kele na yo mpenza mfunu.​—Nkunga 119:37; 84:12.

²¹ Ya kyeleka, kusala mambu ti boma ya mbote ya Nzambi kevandaka ntangu yonso nzila ya mayele. Yo kenataka mpi kyese ya kyeleka. (Nkunga 34:10) Bo tamonisa pwelele dibanza yina na disolo yina kelanda.

[Banoti na nsi ya lutiti]

Keti Nge Lenda Tendula?

• Kikalulu ya Bukristu ya kutina Nzambi boma ketendula inki?

• Inki mutindu kutina Nzambi boma kesadisaka na kukatula boma ya bantu?

• Inki mutindu beto lenda monisa nde beto ketadilaka bisambu na beto bonso mambu ya mfunu mingi?

• Inki mutindu kutina Nzambi boma lenda kanga beto nzila ya kusala masumu?

[Bangyufula ya disolo ya kulonguka]

[Kifwanisu ya kele na lutiti 25]

Davidi kulongukaka boma ya Nzambi ntangu yandi vandaka kutala bima yina Yehowa kusalaka

[Bifwanisu ya kele na lutiti 26]

Inki nge tasala kana nge kutana na kintulumukina ti dyambu mosi yina kemeka kwikama na nge?