Yehowa Kegulusaka Bantu ya Kemona Mpasi

“Mbala mingi muntu ya mbote ke monaka mpasi, kansi Mfumu Nzambi ke gulusaka yandi na bampasi yango yonso.”​—NKUNGA 34:20.

1, 2. Inki dikambu Mukristu mosi ya kwikama kukutanaka ti yo, mpi sambu na nki mawi ya mutindu yina lenda kumina mpi beto?

KEIKO * kele Mbangi ya Yehowa tuka bamvula kuluta 20. Na nsungi mosi buna, yandi vandaka mupasudi-nzila ya ntangu yonso. Yandi vandaka kuzola mpenza kisalu yina. Kansi, na nima ya mwa ntangu, Keiko kumaka kudiwa mpenza kukonda kivuvu, mpi bonso nde yandi kele yandi mosi. Yandi ketuba nde: “Mu vandaka kudila ntangu yonso.” Sambu na kununga mabanza yina ya mbi, Keiko kumaka kulutisa ntangu mingi na kulonguka Biblia. Kansi yandi ketuba nde: “Ata mpidina, mu vandaka kukuka ve na kusoba mabanza na munu. Yo lutilaka munu kibeni na mpila nde mu kumaka na mpusa ya kufwa.”

² Keti nge menwanaka dezia ti mawi ya kulemba nitu ya mutindu yina? Kana nge kele Mbangi ya Yehowa, nge kele ti bikuma mingi ya fwete pesa nge kyese, sambu kukangama na Nzambi ‘kepesaka lusilu ya moyo ya bubu ti ya moyo ya ke kwisa na ntwala.’ (1 Timoteo 4:8) Ntangu yai, nge kezinga na Paladisu ya kimpeve! Kansi, keti yo ketendula nde bampasi tabwila nge ve? Ata fyoti ve! Biblia ketuba nde: “Mbala mingi muntu ya mbote ke monaka mpasi.” (Nkunga 34:20) Yo kele ve dyambu ya kuyituka, sambu “nsi-ntoto kele na maboko ya Muntu ya Mbi,” Satana Dyabulu. (1 Yoane 5:19) Ya kyeleka, sambu Satana keyala inza yai, beto yonso kekutanaka ti bampasi yina luyalu ya Satana kenataka.​—Efezo 6:12.

Malanda ya Bampasi

3. Pesa bambandu ya bansadi ya Nzambi yina Biblia ketubila ya kukutanaka ti bampasi ya ngolo.

³ Bampasi yina kezingaka mingi lenda bebisa mutindu na beto ya kutadila luzingu. (Bingana 15:15) Beto baka mbandu ya Yobi, yina kuvandaka muntu ya mbote ya Nzambi. Ntangu yandi kutanaka ti bampasi ya ngolo kibeni, Yobi kutubaka nde: “Muntu yonso me butuka na ntoto yai ke na luzingu mosi ya nkufi ti ya mpasi.” (Yobi 14:1) Yobi kuvandaka dyaka ve na kyese. Na nsungi mosi buna, yandi yindulaka nkutu nde Yehowa kuyambulaka yandi. (Yobi 29:1-5) Na bansadi yonso ya Nzambi, Yobi mpamba ve muntu kukutanaka ti bampasi ya ngolo. Biblia ketela beto nde Ana “vandaka na mawa mingi na ntima” sambu yandi vandaka kubuta ve. (1 Samuele 1:9-11) Ntangu Rebeka kukutanaka ti mambu ya mpasi na dibuta na yandi, yandi tubaka nde: “Mono mfunu ya kuzinga kele ve.” (Kuyantika 27:46) Ntangu Davidi kuyindululaka bifu ya yandi salaka, yandi tubaka nde: “Kilumbu ya mvimba mono kele kaka na kudila.” (Nkunga 38:7) Mwa bambandu yai kemonisa pwelele nde babakala ti bankento yina vandaka  kuwa Nzambi boma na ntwala ya ntangu ya Bukristu kukutanaka mpi ti bampasi ya ngolo.

4. Sambu na nki yo kele ve dyambu ya kuyituka na kumona nde Bakristu yankaka kelembaka nitu bubu yai?

⁴ Ebuna beto Bakristu? Ntumwa Polo kubakisaka nde yo vandaka mfunu na kusonga bampangi ya Tesalonika na ‘kupesa kikesa’ na bantu yina melemba. (1 Tesalonika 5:14) Mukanda mosi ketuba nde ngogo ya Kigreki ya bo balulaka nde ‘bantu ya kulemba’ lenda tendula bantu yina “basusi ya luzingu kelutilaka bo na mwa ntangu mosi buna.” Bangogo ya Polo kemonisa nde Bakristu yankaka ya kupakulama yina kuvandaka na dibundu ya Tesalonika kulembaka nitu. Bubu yai mpi, Bakristu yankaka kelembaka nitu. Sambu na nki? Beto tadila bikuma tatu ya kesalaka nde Bakristu kulemba nitu.

Kukonda Kukuka Lenda Lembisa Beto Nitu

5, 6. Inki kikesa beto lenda baka na Roma 7:22-25?

⁵ Bantu ya mbi “ke kudipesaka na kusala pite.” Kansi, Bakristu ya kyeleka kesalaka ve mpidina sambu bo kewaka mpasi sambu na kimuntu na bo ya kukonda kukuka. (Efezo 4:19) Bo kekudiwaka bantangu yankaka bonso Polo yina kusonikaka nde: “Na ntima na mono, mono ke zolaka kulanda Bansiku ya Nzambi. Kansi na nitu na mono, mono ke wa nzala ya kusala mambu ya nkaka; nzala yina ke nwana ti bansiku yina ya mono me ndimaka na mabanza na mono. Nzala yina ke pesaka nzila na masumu na kusimba nitu na mono.” Na nima, yandi tubaka nde: “A, mono kele muntu mosi ya mawa!”​—Roma 7:22-24.

⁶ Keti nge mekudiwaka dezia bonso Polo? Yo kele mbi ve na kuzaba bifu na nge mbote mpenza, sambu yo lenda sadisa nge na kubakisa nde kusala disumu kele mbi kibeni mpi yo lenda kumisa ngolo lukanu na nge ya kubuya kusala mambu ya mbi. Kansi, nge fwete kudiyangisaka ve ntangu yonso sambu na bifu na nge. Na nima ya kutuba mambu yina beto metanga na paragrafe ya meluta, Polo kuyikaka nde: “Mersi na Nzambi, na zina ya Mfumu na beto Yesu Kristo!” (Roma 7:25) Ya kyeleka, Polo vandaka kutula ntima nde menga ya Yezu yina kutyamukaka takatula yandi na masumu ya beto mebakaka na Adami.​—Roma 5:18.

7. Inki lenda sadisa muntu na kulemba ve nitu sambu na mpusa ya kusala masumu yina beto kebutukaka na yo?

⁷ Kana nge kemona nde kimuntu na nge ya kukonda kukuka kezola kulembisa nge nitu, baka kikesa na mambu yai ya ntumwa Yoane kusonikaka: “Kana muntu me sala masumu, beto ke na muntu mosi ta bondila Tata Nzambi sambu na yandi. Muntu yango, zina na yandi Yesu Kristo; yandi kele muntu ya mbote na meso ya Nzambi. Yandi muntu me fwaka sambu na kukatula masumu na beto. Yo kele sambu na masumu na beto kaka ve, kansi sambu na masumu ya bantu yonso.” (1 Yoane 2:1, 2) Kana mpusa ya beto kebutukaka na yo ya kusala masumu kelembisa nge nitu, yibukaka ntangu yonso nde Yezu kufwaka sambu na bantu ya masumu, kansi sambu na bantu ya kukuka ve. Ya kyeleka, ‘bantu yonso mesalaka masumu, bo ke na lukumu ya Nzambi ve.’​—Roma 3:23.

8, 9. Sambu na nki beto fwete buya kudibedisa?

⁸ Kansi, yindula nde nge salaka disumu mosi ya nene na bilumbu meluta. Ziku nge sambaka Yehowa mbala mingi sambu na dyambu yango. Bankuluntu mepesaka nge lusadisu ya kimpeve. (Yakobo 5:14, 15) Nge balulaka mpenza ntima ebuna yo salaka nde bo basisa nge ve na dibundu. To ziku, nge basikaka na dibundu sambu na mwa ntangu fyoti, kansi na nima nge balulaka ntima mpi nge vutukaka na dibundu. Kansi, bantangu yankaka nge lenda yibuka disumu ya nge salaka mpi dyambu yina lenda lembisa nge nitu. Kana yo kumina nge, yibuka nde Yehowa “ke lembaka ve na kulolula” bantu yina kebalulaka mpenza ntima. (Yezaya 55:7) Dyaka, Yehowa kezola ve nde nge yindula nde yandi lenda lolula nge ve. Satana muntu kezola nde nge yindula mpidina. (2 Korinto 2:7, 10, 11) Nzambi tafwa Dyabulu sambu yo mefwana nde yandi fwa. Kansi, Dyabulu kezola nde nge mpi kuyindula nde Nzambi tafwa nge bonso yandi. (Kusonga 20:10) Kubika ve nde Satana kununga na kufwa lukwikilu na nge. (Efezo 6:11) Kansi, ‘vanda mbeni ya Satana’ na dyambu yai, kaka mutindu nge kesalaka yo na mitindu yankaka.​—1 Piere 5:9.

⁹Kusonga 12:10 kebinga Satana nde ‘muntu yina kefundaka bampangi na beto,’ Bakristu ya kupakulama. Yandi kefundaka bo na meso ya Nzambi “mpimpa ti mwini.” Kana nge yindulula verse yai, yo lenda sadisa nge na kubakisa nde Satana (muntu ya luvunu yina kefundaka beto) tavanda na kyese kana nge ke kudibedisa mpi nge bika nde ntima na nge kufunda nge, na ntangu yina Yehowa ketadila nge ve mutindu yina.  (1 Yoane 3:19-22) Sambu na nki kulanda na kudiyangisa sambu na bifu na nge tii na kiteso yina tapusa nge na kumona bonso nde nge kekuka dyaka ve? Kubika ve nde Satana kufwa kinduku na nge ti Nzambi. Kubika ve ata fyoti nde Dyabulu kufwa nge meso sambu nge konda kubakisa nde Yehowa kele ‘Nzambi mosi ya ke zolaka bantu ti kuwila bo mawa; ya ke waka makasi nswalu ve kansi ya ke songaka kaka mambote na yandi.’​—Kubasika 34:6.

Nitu na Beto Lenda Lembisa Beto

10. Na nki mitindu nitu na beto lenda lembisa beto?

¹⁰ Bakristu yankaka kelembaka sambu nitu na bo kepesaka bo ve nzila ya kusala mbotembote kisalu ya Nzambi. Keti yo kele mutindu yina sambu na nge? Maladi mosi ya ngolo, kimununu, to mambu yankaka lenda pesa nge ve nzila ya kulutisa ntangu mingi na kisalu ya kusamuna mutindu nge vandaka kusala yo na bilumbu meluta. Ya kyeleka, Biblia kelongisila Bakristu na kusumba ntangu sambu na kusala kisalu ya Nzambi. (Efezo 5:15, 16) Kansi, inki beto lenda sala kana nitu na beto kepesa beto mpenza ve nzila ya kusala mingi na kisalu ya kusamuna ebuna yo kelembisa beto?

11. Inki mutindu beto lenda baka mambote ya ndongisila ya Polo yina kele na Galatia 6:4?

¹¹ Biblia kelongisila beto na kuvanda ve bamolo, kansi na ‘kulanda mbandu ya bantu yina ke na lukwikilu, yina ke kangaka ntima, ebuna bo ke bakaka mambu yina ya Nzambi silaka.’ (Baebreo 6:12) Beto lenda sala yo kana beto ketadila mbandu na bo ya mbote mpi kelanda yo. Kansi, beto tabakila ve mbandu na bo mambote kana beto kekudifwanisa ti bampangi yankaka mpi keyindula nde mambu yonso ya beto kesala kele mbote ve. Yo yina, yo tavanda mbote nde beto sadila ndongisila yai ya Polo: “Konso muntu kutala mbote-mbote bikalulu na yandi mosi. Ebuna, kana yandi mona nde yandi lenda kudikumisa yandi mosi nde bikalulu na yandi kele ya mbote, yo ta tadila yandi mosi kansi bantu ya nkaka ve.”​—Galatia 6:4.

12. Sambu na nki beto lenda vanda na kyese na kisalu ya beto kesadila Yehowa?

¹² Bakristu kele ti bikuma ya mbote ya kuvanda na kyese, ata ntangu bo kebela maladi mosi ya ngolo. Biblia kebwisa beto ntima nde: “Nzambi ke salaka bantu mbi ve, kansi yandi ke salaka bo mbote. Yandi ta vila ve kuzola ya ntima yina ya beno ke songaka yandi na bisalu ya beno salaka.” (Baebreo 6:10) Yo lenda vanda nde mambu yina nge lenda yala ve kesala nde nge kuka ve kusadila Yehowa, ebuna dikambu yango kepesa nge dyaka ve nzila ya kusala kisalu ya Yehowa mutindu nge vandaka kusala ntete. Kansi, na lusadisu ya Yehowa, nge lenda kuka mpenza kusadila mitindu yankaka ya kusamuna, bonso kuta kimbangi na nsadisa ya telefone mpi ya mikanda. Nge lenda tula mpenza ntima nde Yehowa Nzambi tasakumuna nge sambu na kisalu ya nge kesadila yandi na ntima ya mvimba mpi sambu na zola ya nge kemonisila yandi ti bantu yankaka.​—Matayo 22:36-40.

Bantangu ya “Mpasi Mingi” Lenda Lembisa Beto

13, 14. (a) Na nki mitindu bantangu yai ya “mpasi mingi” lenda pesa beto mpasi? (b) Inki mutindu nku kemonana bubu yai na mabuta?

¹³ Ata beto kekinga kuzinga na inza ya mpa ya lunungu ya Nzambi, ntangu yai beto ke na kuzinga na bantangu ya “mpasi mingi.” (2 Timoteo 3:1) Beto kebaka kikesa na kuzaba nde mambu ya mpasi ya beto kemona kemonisa nde luguluku na beto mefinama. Ata mpidina, mambu ya kesalama na nzyunga na beto kepesaka beto mpasi. Mu mbandu, inki mutindu nge lenda kudiwa kana nge kele ve ti kisalu? Ziku nge kesosa kisalu, kansi nge kezwa yo ve, ebuna mutindu bangonda keluta, nge lenda yantika kudiyula kana Yehowa kemona mpasi na nge to kewa bisambu na nge. To ziku, bo kemenga nge sambu na kikuma mosi buna to bo kesadila nge mambu ya mbote ve. Ata kutanga bazulunalu lenda pusa nge na kudiwa bonso muntu ya lunungu Loti, yina “vandaka me kuma kisakasaka” sambu na bikalulu ya mbi ya bantu yina vandaka na nzyunga na yandi.​—2 Piere 2:7.

¹⁴ Kele mpi ti kidimbu mosi ya mfunu ya bilumbu ya nsuka ya beto fwete vila ve. Biblia kutubaka nde bantu mingi takuma “nku mingi.” (2 Timoteo 3:3) Zola kekonda mpenza na mabuta mingi. Mukanda mosi (Family Violence) ketuba nde: “Na kutadila mambu ya kesalama, yo kemonana nde bantu kele na kigonsa mingi ya kufwa, ya kunyokwama na nitu to na mawi, to ya kuladisama na kingolongolo na bampangi na bo mosi, kuluta na bantu yankaka. Sambu na bambuta ti  bana yankaka, kisika yina bo lendaka kuzola bo mingi mpi kudiwa na lutaninu kele kisika ya kuluta kigonsa.” Na nima ya bamvula, bantu yina meyelaka na bisika ya mbi ya mutindu yina lenda kuma boma-boma mpi kulemba nitu. Inki nge lenda sala kana nge muntu kekutana ti mambu ya mutindu yai?

15. Inki mutindu zola ya Yehowa meluta zola ya konso muntu yina?

¹⁵ Davidi kuyimbaka nde: “Tata na mono ti mama na mono bo lenda buya mono, kansi nge Mfumu Nzambi, nge ta baka mono.” (Nkunga 27:10) Yo kepesa kikesa mpenza na kuzaba nde zola ya Yehowa meluta zola yina konso kibuti lenda vanda na yo sambu na mwana na yandi! Kana bibuti na nge melosa nge, kenyokula nge to meyambula nge, yo lenda pesa nge mpasi mingi. Kansi, yo kekulumusa ve zola ya Yehowa kevandaka na yo sambu na nge. (Roma 8:38, 39) Kuvila ve nde Nzambi kebendaka bantu yina yandi kezolaka. (Yoane 3:16; 6:44) Ata bantu mesadilaka nge mambu ya konso mutindu yina, Tata na nge ya zulu kezolaka nge kaka!

Mambu ya Kusala Sambu na Kufyotuna Kulemba

16, 17. Kana muntu kekudiwa ya kulemba, inki yandi lenda sala sambu na kuvanda kaka ngolo na kimpeve?

¹⁶ Kele ti mambu ya nge lenda sala sambu na kunwanisa mawi ya kulemba. Mu mbandu, sala manaka ya mbote sambu na kusala mingi bisalu ya Bukristu. Yindululaka Ndinga ya Nzambi, mingimingi kana nge kewa mawi ya kulemba nitu kelutila nge. Muyimbi-bankunga kuyimbaka nde: “Mono tubaka nde: ‘Mono ke bwa,’ kansi Mfumu, nge simbaka mono sambu nge ke zolaka mono. Ntangu mono ke vandaka na mpasi mingi, ntima na zulu-zulu, nge ke lembikaka mono ntima, nge ke pesaka mono kiese.” (Nkunga 94:18, 19) Kutanga Biblia mbala na mbala tasadisa nge na kufulusa mabanza na nge ti mambu ya kepesa kikesa mpi bangindu ya mbote to ya ketungaka.

¹⁷ Yo kele mpi mfunu na kusala kisambu. Ata nge lenda tuba mpenza ve mambu yonso ya nge keyindula na ntima, Yehowa mezaba mambu ya nge kezola kutuba. (Roma 8:26, 27) Muyimbi-bankunga kutubaka mambu yai ya kebwisa ntima nde: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.”​—Nkunga 55:23.

18. Inki mambu muntu yina melemba lenda sala sambu na kununga kulemba na yandi?

¹⁸ Bankaka kelembaka nitu sambu bo kenyokwamaka ngolo na mabanza. * Kana nge kenyokwama mutindu yai, sala kikesa na kutula dikebi mingi na inza ya mpa ya Nzambi mesilaka mpi na ntangu yina ‘ata muntu mosi ve tatuba diaka nde: “Mono ke bela.”’ (Yezaya 33:24) Kana yo kemonana nde mawi na nge ya kulemba kezinga mingi kibeni, yo lenda vanda mbote nde nge kwenda na lupitalu. (Matayo 9:12) Yo kele mpi mfunu na kukeba nitu na nge mbote. Kudya mbote mpi kusala mwa bangalasisi lenda sadisa nge. Salaka yonso sambu na kupema mbote. Kutalaka ve televizio tii na mpimpa kibeni, mpi kusala ve bansaka yina kelembisaka nitu ti mabanza. Kuluta mambu yonso, landa na kusala bisalu yina kesepedisaka Nzambi! Ata beto mekuma ntete ve na ntangu yina Yehowa ‘takusula mansanga yonso na meso na beto,’ yandi tasadisa nge na kukanga ntima.​—Kusonga 21:4; 1 Korinto 10:13.

Beto Zinga “na Nsi ya Diboko ya Ngolo ya Nzambi”

19. Inki lusilu Yehowa kepesa bantu yina kemona mpasi?

¹⁹ Biblia kebwisa beto ntima nde ata muntu  ya mbote kemona mpasi mingi, Yehowa “ke gulusaka yandi na bampasi yango yonso.” (Nkunga 34:20) Inki mutindu Nzambi kesalaka yo? Ntangu ntumwa Polo vandaka kusamba Yehowa mbala na mbala sambu yandi katula yandi maladi yina yandi vandaka na yo na nitu, Yehowa kusongaka yandi nde: “Ngolo na mono ke lutaka kumonika na ntangu yina ya nge ke na kikesa ve.” (2 Korinto 12:7-9) Inki lusilu Yehowa kupesaka Polo, mpi nki lusilu yandi kepesa nge? Yandi kesila ve na kubelula nge ntangu yai. Kansi yandi kesila na kupesa nge ngolo ya kukanga ntima.

20. Ata beto kekutana ti bampasi, 1 Piere 5:6, 7 kepesa beto nki kivuvu?

²⁰ Ntumwa Piere kusonikaka nde: “Beno kudikulumusa na nsi ya diboko ya ngolo ya Nzambi, na mpila nde yandi ta tedimisa beno na kilumbu yina ya yandi me tulaka. Beno katula mabanza na beno yina yonso ke yangisaka beno, ebuna beno pesa yo na Nzambi” sambu yandi kekebaka beno. (1 Piere 5:6, 7) Sambu Yehowa kekebaka nge, yandi tayambula nge ve. Yandi tasadisa nge ata nge kekutana ti bampasi. Kuvila ve nde Bakristu ya kwikama kele “na nsi ya diboko ya ngolo ya Nzambi.” Sambu beto kesadilaka Yehowa, yandi tapesa beto ngolo ya kukanga ntima. Kana beto kele ya kwikama na yandi, ata kima mosi ve lenda nyokula beto na kimpeve tii kuna. Yo yina, bika beto vanda kaka ya kwikama na Yehowa na mpila nde beto baka luzingu ya mvula na mvula na inza ya mpa yina yandi mesilaka beto mpi beto mona ntangu yandi tagulusa mpenza bantu ya kemona mpasi kimakulu!

[Banoti na nsi ya lutiti]

Keti Nge Keyibuka?

• Sambu na nki ata bansadi ya Yehowa kekutanaka ti bampasi?

• Tanga mwa mambu ya lenda sala nde bansadi yankaka ya Nzambi kulemba nitu.

• Inki mutindu Yehowa kesadisaka beto na kunwana basusi?

• Na nki mutindu beto kele “na nsi ya diboko ya ngolo ya Nzambi”?

[Bangyufula ya disolo ya kulonguka]

[Bifwanisu ya kele na lutiti 18]

Ata bo kekutana ti bampasi, bansadi ya Yehowa kele ti bikuma ya kuvanda na kyese