“Sambu na Mwana-Bakala Mosi ya Bamvula Uvwa”

WIESŁAWA kezingaka na Sudi ya Pologne. Konso ntangu ya Bambangi ya Yehowa vandaka kukwenda na nzo na yandi, yandi vandaka kubuya na luzitu yonso na kusolula ti bo. Ebuna kilumbu mosi, mwana-bakala mosi ya bamvula uvwa, na zina ya Samuel, kukwendaka ti mama na yandi na nzo ya Wiesława. Na kilumbu yina Wiesława kubakaka lukanu ya kuwidikila nsangu ya Biblia yina Bambangi kelongaka mpi yandi ndimaka zulunalu yina vandaka kutubila paladisu ya ntoto.

Sambu Lusungiminu ya lufwa ya Yezu Kristu kufinamaka, Samuel zolaka kubingisa Wiesława na dibaku yina ya sipesiali. Yo yina, kumosi ti mama na yandi, Samuel kwendaka kutala dyaka Wiesława mpi kunatilaka yandi emvitasio. Ntangu Wiesława kumonaka nde mwana yina kulwataka mbote, yandi lombaka bo na luzitu yonso nde bo vingila fyoti, yandi kekwisa. Yandi kotaka na nzo mpi kulwataka lele ya mbote mpenza. Ntangu yandi kwisaka kuvutuka na kyelo, yandi widikilaka Samuel, yandi ndimaka emvitasio mpi kuyulaka nde: “Keti mu fwete kwisa munu mosi to ti bakala na munu?” Na nima yandi yikaka nde: “Ata bakala na munu kukwisa ve, mu takwisa. Mu tasala yo sambu na nge, Samuel.” Samuel kusepelaka mingi na kumona nde Wiesława kulungisaka mambu ya yandi tubaka.

Ntangu bo vandaka kulanda diskure ya Lusungiminu, Samuel kuvandaka penepene ti Wiesława mpi vandaka kusonga yandi baverse ya bo vandaka kutubila. Yo yitukisaka yandi mingi. Wiesława kusepelaka na Lusungiminu mpi kuvutulaka ntonda na mutindu bo vandaka kutendula bakyeleka ya mudindu na bangogo ya pete. Yandi sepelaka mpi na mutindu dibundu kuyambaka yandi na kyese yonso mpi kumonisaka yandi bumbote. Banda pana, Wiesława memonisaka mpusa ya ngolo sambu na mambu ya kimpeve mpi yandi meyantikaka kuvukana ti Bambangi ya Yehowa mbala na mbala. Ntama mingi ve yandi tubaka nde: “Mu kewa nsoni na mpila mu vandaka kubuya ntete na kuwidikila nsangu na beno ntangu beno vandaka kukwisa na kyelo na munu. Mu fwete ta masonga nde mu widikilaka nsangu na beno kaka sambu na mwana-bakala mosi ya bamvula uvwa, Samuel.”

Bonso Samuel na Pologne, baleke mingi ya Bambangi ya Yehowa kekumisaka Nzambi na nsangu ya bo kelongaka, na mutindu na bo ya mbote ya kulwata, mpi na bikalulu na bo ya mbote. Kana nge kele leke, nge mpi lenda sadisa bantu ya masonga na kumonisa mpusa na mambu ya mbote ya kimpeve.