Bansosa ya Bantu Kesala Sambu na Kuzinga Mvula na Mvula

BANDA ntama, bantu kevandaka ti kivuvu ya ngolo ya kuzinga mvula na mvula. Kansi, kivuvu yango kelunganaka ve sambu ata muntu mosi ve mezwaka mwaye ya kununga lufwa. Kansi, ntama mingi ve, bansosa ya minganga kupesaka dyaka bantu kivuvu nde ya kyeleka mpila kele ya kukumisa luzingu ya muntu nda. Beto tadila mambu ya kuswaswana na yina metala bansosa ya bantu ya siansi kelanda na kusala.

Bantu ya mayele ya Biolozi kelanda na kusosa mpila ya kusala nde baselile kulanda na kuyingana kukonda nsuka. Bo kezabaka nde mbala na mbala baselile ya mpa keyingaka baselile ya kununa, ti ya kubeba. Mambu yonso kemonisa nde binama mingi ya nitu ya muntu kevutukilaka ngolo na yo mbala na mbala na luzingu na yandi. Bantu ya siansi keyindulaka nde kana mutindu yai ya baselile keyinganaka kelanda na kusalama, “nitu ya muntu lenda yo mosi kuvutukila ngolo na yo bamvula mingi, ata nkutu mvula na mvula.”

Bantu ya siansi kesalaka bansosa mingi ya kuswaswana kansi bo kewakanaka ve. Bo keyindulaka nde mutindu ya lusansu yina kelombaka kuyingisa muntu selile yina kubebaka ti selile yankaka ya kufwanana yina bo yedisaka na laboratware na kubakaka kitini mosi ya selile ya nitu na yandi, lenda yingisa na nitu ya bantu ya maladi binama ya mbote bonso ba-foie, bapiku, to bantima yina bo meyedisa na laboratware. Baselile ya bo kesadilaka sambu na kuyedisa binama yina kekatukaka na muntu yandi mosi.

Bantu yina kesalaka bansosa ya kutala bima ya fyoti-fyoti yina kemonanaka kaka na mikroskope keyindula nde, kele ti kilumbu yina badoktere takotisaka na menga ya muntu tumwa baselile ya bo mesala na masini, sambu na kumona mpi kufwa baselile ya kansere ti bamikrobe yonso ya mbi. Bantu yankaka keyindulaka nde bansosa ya siansi yai, kumosi ti lusansu yina kesadilaka bagene, tasadisa nitu ya muntu na kulanda na kuzinga yo mosi kimakulu.

Bantu yina kendimaka nde mpila kele ya kusansa dyaka bantu yina mefwaka, bo kebumbaka bamvumbi ya bantu na bo na madidi ya ngolo mpenza. Bangindu na bo kevandaka ya kubumba yo tii kilumbu badoktere tazwa nkisi ya kusansa maladi yina kufwaka bo, ya kukatula kimununu, mpi kuvutula bo na luzingu mpi na mavimpi ya mbote. Zulunalu mosi kebinga dibanza yina nde “mutindu mosi ya mefwanana ti mutindu yina bantu ya Ezipte ya ntama vandaka kubumba bamvumbi na bo (momification).”

Bikesa ya bantu kesalaka kukonda kulemba sambu na kulanda na kuzinga kemonisa pwelele nde yo kevandaka mpasi na kundima dibanza ya kufwa. Keti mpila kele ya kuzinga mvula na mvula? Biblia ketuba nki sambu na dyambu yai? Disolo yina kelanda tapesa bamvutu na bangyufula yai.