Daniel ti Makaro na Yandi ya Lukutakanu

YEZU kunganinaka bamfumu ya mabundu yina vandaka kudimona bantu ya lunungu mpi yina kuwaka makasi ntangu bo monaka bana-fyoti kekumisa Nzambi na meso ya bantu mingi. Yezu kuyulaka bo nde: “Keti beno me tangaka ntete ve mambu yai na Mukanda ya Nzambi nde: ‘Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu?’”​—Matayo 21:15, 16.

Daniel ke ti bamvula sambanu, mpi kevukanaka ti dibundu ya ndinga ya Russie na Allemagne. Yandi kele mbandu ya kemonisa nde tii bubu yai kele ti bana-fyoti ya kepesaka Yehowa lukumu. Yandi, mpangi na yandi ya nkento, ti mama na bo kukwendaka na lukutakanu ya distrike ya Bambangi ya Yehowa na Duisburg. Yo vandaka mbala na bo ya ntete ya kukwenda na lukutakanu ya distrike ya mutindu yina. Bima yonso kuvandaka ya mpa sambu na bo: otele, kimvuka ya nene ya bantu, kuvanda bilumbu tatu sambu na kuwa malongi, mbotika, mpi drame. Daniel kuvandaka ti kikalulu ya mbote kibeni.

Ntangu bo vutukaka na nzo, na Kintete Daniel kutelemaka na sukasuka sambu na kukwenda na nzo-nkanda ya bana-fyoti. Inki yandi lwataka na kazaka na yandi? Makaro yina yandi lwataka na lukutakanu! Mama na yandi kusongaka yandi nde: “Lukutakanu memana. Bubu yai nge lenda katula makaro.” Kansi Daniel kuvutulaka nde: “Mu kezola nde konso muntu kumona na wapi mu vandaka mpi kuzaba mambu ya mu longukaka.” Yo yina, yandi lwataka na kyese yonso makaro na yandi kilumbu ya mvimba na nzo-nkanda. Ntangu longi na bo kuyulaka yandi, Daniel tendudilaka yandi programe ya lukutakanu.

Na kusalaka mpidina, Daniel kulandaka mbandu ya bana-babakala ti bana-bankento mingi yina kepesaka Yehowa lukumu na meso ya bantu mingi tuka ntama.