Beno Zinga Kaka na Zola ya Nzambi!
Beno Zinga Kaka na Zola ya Nzambi!
“Bampangi na mono, . . . beno zinga kaka na kuzola yina ya Nzambi ke zolaka beno ntangu beno ke vingila . . . moyo ya mvula na mvula.”—YUDE 20, 21.
1, 2. Inki mutindu nge lenda zinga kaka na zola ya Nzambi?
YEHOWA kezolaka bantu mingi kibeni yo yina yandi pesaka Mwana na yandi mosi kaka ya kubutukaka, sambu bantu yina kekwikila na yandi kubaka luzingu ya mvula na mvula. (Yoane 3:16) Yo kele mbote kibeni kana Nzambi kezola beto mingi mutindu yina! Kana nge kele nsadi ya Yehowa, ntembe kele ve nde nge kezolaka nde yandi kuzola nge kimakulu.
2 Longoki Yude kutendulaka mutindu nge lenda zinga kaka na zola ya Nzambi. Yandi sonikaka nde: “Beno tula ngolo kaka na kuvanda diaka na lukwikilu mingi ya kinzambi. Beno samba Nzambi na ngolo ya mpeve-santu; beno zinga kaka na kuzola yina ya Nzambi ke zolaka beno ntangu beno ke vingila nde Mfumu na beto Yesu Kristo, sambu na mawa na yandi, yandi kupesa beno moyo ya mvula na mvula.” (Yude 20, 21) Kulonguka Ndinga ya Nzambi mpi kusamuna nsangu ya mbote kesadisaka muntu na kutunga na nsadisa ya “lukwikilu” ya santu, disongidila malongi ya Bukristu. Sambu na kuzinga kaka na zola ya Nzambi, nge fwete sambaka “na ngolo ya mpeve-santu,” to na lutwadisu na yo. Sambu na kubaka luzingu ya mvula na mvula, nge fwete kwikila mpi na kimenga ya nkudulu ya Yezu Kristu.—1 Yoane 4:10.
3. Sambu na nki bantu yankaka kele dyaka ve Bambangi ya Yehowa?
3 Bantu yankaka yina kuvandaka ntete ti lukwikilu kezingaka dyaka ve na zola ya Nzambi. Sambu bo meponaka na kulanda luzingu ya masumu, bo kele dyaka ve Bambangi ya Yehowa. Inki nge lenda sala sambu dyambu ya mutindu yai kukumina nge ve? Kuyindulula bangindu yai ya melanda lenda sadisa nge sambu nge sala ve masumu mpi nge zinga kaka na zola ya Nzambi.
Monisa Zola na Nge Sambu na Nzambi
4. Sambu na nki yo kele mfunu na kulemfukila Nzambi?
4 Lemfukila Nzambi sambu na kumonisa nde nge kezolaka yandi. (Matayo 22:37) Ntumwa Yoane kusonikaka nde: “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” (1 Yoane 5:3) Kuvanda ti kikalulu ya kulemfukila Nzambi lenda pesa nge ngolo ya kunwana ti bampukumuna mpi kusadisa nge na kuvanda na kyese. Muyimbi-bankunga kutubaka nde: “Kiese na muntu yina ke ndimaka ve ngindu ya bantu ya mbi, . . . kansi yandi ke monaka kiese na bansiku ya Mfumu Nzambi.”—Nkunga 1:1, 2.
5. Zola sambu na Yehowa tapusa nge na kusala inki?
5 Zola na nge sambu na Yehowa tapusa nge na kubuya kusala disumu ya nene yina tapesa zina na yandi nsoni. Agure kusambaka nde Nzambi kupesa yandi kimvwama ve, kinsukami mpi ve, ebuna yandi yikaka nde: “Pesa mono kaka madia yina ya mono ke na yo mfunu. Kana mono ke na madia mingi, mbaimbai mono ta tuba nde mono ke na mfunu na nge ve; kana mono kele nsukami mbaimbai mono ta yiba ti kusimbisa nge Nzambi na mono nsoni.” (Bingana 30:1, 8, 9) Baka lukanu ya kupesa ve zina ya ‘Nzambi nsoni,’ mpi konso ntangu sala yonso sambu na kusala mambu ya mbote yina tapesa yandi lukumu.—Nkunga 86:12.
6. Inki lenda salama kana nge sala masumu na luzolo yonso?
6 Sambaka Tata na nge ya zola ya kele na zulu mbala na mbala sambu yandi sadisa nge na kunwana ti bampukumuna ya kusala masumu. (Matayo 6:13; Roma 12:12) Konso ntangu landaka bandongisila ya Nzambi sambu yandi buya ve bisambu na nge. (1 Piere 3:7) Kana nge sala masumu na luzolo yonso, malanda na yo lenda vanda mbi kibeni, sambu na mutindu ya kifwani, yo kele bonso nde Yehowa kesadilaka matuti sambu na kukanga bisambu ya bankolami na mpila nde yo kuma ve na kisika na yandi. (Mawa 3:42-44) Yo yina, vanda na kikalulu ya kudikulumusa, mpi samba sambu nge sala ve ata kima mosi yina lenda kangisa nge nzila ya kusamba Nzambi.—2 Korinto 13:7.
Monisa Zola Sambu na Mwana ya Nzambi
7, 8. Inki mutindu kulanda ndongisila ya Yezu lenda sadisa muntu na kukuma ve na kikalulu ya kusala masumu?
7 Lemfuka na bansiku ya Yezu Kristu sambu na kumonisa nde nge kezolaka yandi. Kusala mutindu yai tasadisa nge na kukuma ve ti kikalulu ya kusala masumu. Yezu kutubaka nde: “Kana beno landa bansiku na mono, beno ta zinga na kuzola na mono, mutindu mono me landaka bansiku ya Tata na mono ti ke zingaka na kuzola na yandi.” (Yoane 15:10) Inki mutindu kusadila bangogo ya Yezu lenda sadisa nge na kuzinga kaka na zola ya Nzambi?
8 Kutula dikebi na bangogo ya Yezu lenda sadisa nge na kuzitisa minsiku ya bikalulu ya mbote. Nsiku ya Nzambi kupesaka bantu ya Izraele vandaka kutuba nde: “Nge bakala, kulala na nkento ya nkaka ve; nge nkento, kulala na bakala ya nkaka ve.” (Kubasika 20:14) Kansi Yezu kumonisaka munsiku yina kebasika na nsiku yai ntangu yandi tubaka nde, konso muntu yina kelanda na kutala “nkento ya ngani ti nzala ya kuladisa yandi, yandi me sala pite ti yandi na ntima na yandi na ntangu yina.” (Matayo 5:27, 28) Ntumwa Piere kutubaka nde bantu yankaka ya dibundu ya mvu-nkama ya ntete “lutaka kusosa bankento ya ndumba sambu na kusala pite ti bo” mpi bo vandaka kukusa “bantu yina ke na ngolo ve sambu na kubenda bo na kusala masumu.” (2 Piere 2:14) Kansi, na kuswaswana ti bantu yina, nge lenda buya kusala pite to bizumba kana nge kezola mpi kelemfukila Nzambi ti Kristu, mpi kana nge baka lukanu ya kutanina bangwisana na nge ti bo.
Bika Mpeve ya Yehowa Kutwadisa Nge
9. Sambu na yina metala mpeve santu, inki lenda salama kana muntu mosi kukuma ti kikalulu ya kusala masumu?
9 Samba sambu Nzambi kupesa nge mpeve santu, mpi pesa yo nzila ya kutwadisa nge. (Luka 11:13; Galatia 5:19-25) Kana nge kuma ti kikalulu ya kusala masumu, Nzambi lenda katula mpeve na yandi na nge. Na nima ya kusala disumu ti Batsheba, Davidi kubondilaka Nzambi nde: “Kukula mono ve na meso na nge, kukatula mono ve mpeve na nge.” (Nkunga 51:13) Sambu Ntotila Saule kusalaka masumu mpi kubalulaka ve ntima, yandi vandaka dyaka ve ti mpeve ya Nzambi. Saule kusumukaka sambu yandi pesaka makabu ya kuyoka, yandi fwaka ve mameme ti bangombe yonso, mpi yandi bikaka ntotila ya Amaleki na luzingu. Na nima, Yehowa kukatulaka mpeve santu na yandi na Saule.—1 Samuele 13:1-14; 15:1-35; 16:14-23.
10. Sambu na nki nge fwete vanda ve ata fyoti ti dibanza ya kusala masumu na luzolo yonso?
10 Kuvanda ve nkutu ata ti dibanza ya kudipesa na kusala masumu. Ntumwa Polo kusonikaka nde: “Kana beto me zaba ntete mambu ya kieleka, kansi beto ke sala kaka masumu na luzolo na beto, makabu yina lenda katula masumu na beto yo kele diaka ve.” (Baebreo 10:26-31) Yo tavanda mpasi mingi kibeni kana nge kuma kusala masumu na luzolo yonso!
Monisa Zola ya Kyeleka Sambu na Bankaka
11, 12. Na nki mitindu zola ti luzitu tabuyisa muntu na kusala pite to bizumba?
11 Zola sambu na bankaka tabuyisa nge na kusala pite to bizumba. (Matayo 22:39) Zola yina tapusa nge na kutanina ntima na nge sambu yo benda nge ve na kuyiba zola ya nkwelani ya ngani. Kusala mutindu yina lenda nata nge na kusala bizumba. (Bingana 4:23; Yeremia 4:14; 17:9, 10) Vanda bonso Yobi yina vandaka muntu ya mbote mpi yina kubikaka ve nde yandi tala konso nkento yina ti ngindu ya kuladisa yandi.—Yobi 31:1.
12 Kuzitisa busantu ya makwela lenda sadisa nge na kubuya kusala disumu ya nene. Lukanu ya Nzambi kuvandaka nde makwela kuvanda ya lukumu mpi nde kuvukisa nitu kusadisa bantu na kubuta bana. (Kuyantika 1:26-28) Kuvila ve nde luzingu kele santu mpi lukanu ya binama ya kuvukisa nitu kele ya kusadisa na kupesa luzingu. Bantu ya kesalaka pite ti bizumba kelemfukilaka ve Nzambi, bo kezitisaka ve dyambu ya metala kuvukisa nitu ti busantu ya makwela, mpi bo kesalaka masumu na nitu na bo mosi. (1 Korinto 6:18) Kansi zola ya Nzambi ti ya bampangi na beto mpi bulemfu na Nzambi tabuyisa muntu na kusala mambu yina lenda sala nde bo basisa yandi na dibundu.
13. Na nki mutindu muntu ya kesalaka bizumba ‘kebebisaka mbongo na yandi mpamba’?
13 Beto fwete yala mabanza ya mbi sambu beto pesa ve bantu ya beto kezolaka mpasi. Bingana 29:3 ketuba nde: “Muntu yina ke landa bankento ya bandumba, yandi ke bebisa mbongo na yandi mpamba.” Muntu ya mesala bizumba mpi ya mebuya kubalula ntima kefwaka bangwisana na yandi ti Nzambi mpi kebebisaka bumosi ya dibuta. Nkento ya muntu yina mesala bizumba kele ti bikuma ya mbote ya kufwa makwela. (Matayo 19:9) Yo vanda nsumuki yango kele bakala to nkento, kufwa ya makwela lenda pesa mpasi mingi na nkwelani yina mesala kima ve, na bana, mpi na bantu yankaka. Keti nge kendima ve nde kuzaba bampasi ya ngolo yina bizumba kenataka fwete pusa beto na kubuya kubwa na mpukumuna ya kusala yo?
14. Inki dilongi ya metala masumu beto lenda baka na Bingana 6:30-35?
14 Kuzaba nde kele ve ata ti kima mosi ya muntu lenda sala sambu na kufika disumu ya bizumba fwete buyisa yandi na kusala dyambu yai ya bwimi kibeni. Bingana 6:30-35 kemonisa nde ata bantu lenda wila muntu yina meyiba sambu na nzala mawa, bo kemengaka muntu ya mesala bizumba sambu yandi kevandaka ti lukanu ya mbi. ‘Yandi kekudifwaka yandi mosi.’ Na ntangu ya Nsiku ya Moize, bo zolaka kufwa yandi. (Levi 20:10) Muntu yina mesala bizumba kepesaka bankaka mpasi kaka sambu na kulungisa mpusa na yandi ya kuvukisa nitu. Dyaka, muntu ya mesala bizumba mpi ya mebalula ve ntima kezingaka ve na zola ya Nzambi kansi bo kebasisaka yandi na dibundu ya Bukristu.
Vanda na Kansansa ya Mbote
15. Kansansa yina kele “bonso nde bo me zikisaka yo na kibende ya tiya” kesalaka mambu nki mutindu?
15 Sambu na kuzinga kaka na zola ya Nzambi, beto lenda bika ve nde kansansa na beto kuyantika kundima masumu. Yo ke pwelele nde, beto fwete ndima ve minsiku ya kubeba ya bikalulu ya mbote ya inza, mpi beto fwete keba ntangu beto kepona banduku, mikanda ya beto fwete tanga, mpi bansaka ya beto kesala. Polo kukebisaka beto mutindu yai: “Na bilumbu ya nsuka, bantu ya nkaka ta katula lukwikilu na bo; bo ta lemfuka na bampeve ya luvunu ti na malongi ya bampeve ya mbi. Bo ta vila nzila sambu na bantu ya luvunu. Bantu yina, mabanza na bo na ntima kele ya kufwa bonso nde bo me zikisaka yo na kibende ya tiya.” (1 Timoteo 4:1, 2) Kansansa yina “kele ya kufwa bonso nde bo me zikisaka yo na kibende ya tiya” kewaka kima ve. Kansansa ya mutindu yai takebisaka beto dyaka ve na kutina baaposta mpi mambu yina lenda sala nde beto vidisa lukwikilu na beto.
16. Sambu na nki yo kele mfunu na kuvanda ti kansansa ya mbote?
16 Sambu na kuguluka, beto fwete vanda ti kansansa ya mbote. (1 Piere 3:21) Na nsadisa ya lukwikilu na beto na menga ya Yezu yina kutyamukaka, bo mekatulaka bisalu ya kufwa na kansansa na beto mpi yo mekumaka ya mbote sambu “beto mona mpila ya kusadila Nzambi ya moyo” kisalu ya santu. (Baebreo 9:13, 14) Kana beto sala masumu na luzolo yonso, kansansa na beto tabeba mpi beto tavanda dyaka ve bantu ya bunkete yina mefwana sambu na kisalu ya Nzambi. (Tito 1:15) Kansi, na lusadisu ya Yehowa, beto lenda vanda ti kansansa ya mbote.
Mitindu Yankaka ya Kutina Masumu
17. Inki beto tabaka kana beto ‘tula ntima mpi beto lemfuka’ na Yehowa?
17 ‘Tula ntima mpi lemfuka’ na Yehowa mutindu Kalebi kusalaka. (Kulonga 1:34-36) Sala mambu yina Nzambi kelomba nge, mpi kumeka ve ata fyoti kudya na “mesa ya bampeve ya mbi.” (1 Korinto 10:21) Buya apostazi. Dya na ntonda yonso madya ya kimpeve yina kele na mesa ya Yehowa, ebuna balongi ya luvunu to bampeve ya mbi takusa nge ve. (Efezo 6:12; Yude 3, 4) Tula dikebi mingi na mambu ya kimpeve, bonso kulonguka Biblia, kukwenda na balukutakanu, mpi kisalu ya kusamuna. Nge tavanda mpenza na kyese kana nge tula ntima mpi nge lemfuka na Yehowa mpi kana nge kele ti mambu mingi ya kusala na kisalu ya Mfumu.—1 Korinto 15:58.
18. Inki bupusi boma ya Yehowa tavanda ti yo na mambu ya nge kesala?
18 Baka lukanu ya kusadila Nzambi kisalu ya santu “na luzitu ti na boma.” (Baebreo 12:28) Boma ya mbote ya Yehowa tapusa nge na kubuya kusala mambu ya mbi. Yo tasadisa nge na kusala mambu na kuwakana ti ndongisila yai ya Piere kupesaka Bakristu ya kupakulama: “Nzambi ke sambisaka bantu yonso mutindu mosi, konso muntu na mambu ya yandi me salaka, ebuna beno ke bingaka Nzambi yina nde: ‘Tata’ ntangu beno ke sambaka yandi. Yo yina, mwa-ntangu yai me bikala na beno na kuzinga awa na nsi-ntoto, beno fweti songa luzitu na Nzambi na bikalulu na beno.”—1 Piere 1:17.
19. Sambu na nki nge fwete sadilaka ntangu yonso mambu ya nge kelonguka na Ndinga ya Nzambi?
19 Sadilaka konso ntangu mambu ya nge kelonguka na Ndinga ya Nzambi. Kusala mpidina tasadisa nge na kutina masumu ya nene, sambu nge tavanda na kati ya bantu yina kesadilaka mayele na bo ya kuyindula sambu “na kuswasisa mambu ya mbote ti mambu ya mbi.” (Baebreo 5:14) Na kisika ya kukonda kutula dikebi na mambu ya nge ketuba mpi na bikalulu na nge, tudila yo dikebi na mpila nde nge tambula bonso muntu ya mayele na kusumbaka “ntangu ya mbote” na bilumbu yai ya mbi. Konso ntangu sosa “na kuzaba” kana luzolo ya Yehowa kele nki mpi landa na kusala yo.—Efezo 5:15-17; 2 Piere 3:17.
20. Sambu na nki beto fwete buya bilula-lula?
20 Kuvanda ve ata fyoti bilula-lula, disongidila kuyuma ve ntima sambu na bima ya ngani. Nsiku mosi na kati ya Bansiku Kumi vandaka kutuba nde: “Kuyuma ntima ve na nzo ya ngani. Kuyuma ntima ve na nkento ya ngani to bampika to bangombe to bampunda to konso kima ya ngani.” (Kubasika 20:17) Nsiku yai vandaka kutanina nzo, nkento, bampika, bambisi, mpi konso kima yina muntu kuvandaka ti yo. Kansi kima ya kuluta mfunu kele mambu yina Yezu kutubaka nde bilula-lula kebebisaka muntu.—Marko 7:20-23.
21, 22. Inki bangidika Mukristu lenda baka sambu na kubuya kusala disumu?
21 Kudibongisa na ntwala sambu mpusa to nzala ya nge kele na yo kunata nge ve na kusala disumu. Longoki Yakobo kusonikaka nde: “Kana bo me benda muntu na kusala mbi, tuba nde nzala na yandi mosi ya mbi me benda yandi ti me kanga yandi. Na nima, nzala na yandi yina ya mbi ke buta masumu, kaka mutindu nkento ke buta mwana, ebuna kana masumu me kwisa mingi yo ke nata lufwa.” (Yakobo 1:14, 15) Mu mbandu, kana muntu mosi vandaka kunwa malafu mingi na bilumbu meluta, yandi lenda baka lukanu ya kuvanda ve ti malafu na nzo na yandi. Sambu na kutina mpukumuna ya kusala bizumba to pite, yo lenda lomba nde Mukristu kusoba kisika ya yandi kesalaka to kusoba kisalu na yandi.—Bingana 6:23-28.
22 Kumeka ve ata fyoti na kusala mambu yina lenda pusa nge na kusala disumu. Kusala flirt mpi kuvanda ti bangindu ya kuvukisa nitu lenda nata muntu na kusala pite to bizumba. Kukusa na mambu ya kukonda mfunu lenda pusa muntu na kukusa na mambu ya nene mpi yo lenda nata yandi na kukuma ti kifu ya kutubaka luvunu, dyambu yina kele disumu. Kuyiba tubima ya fyoti-fyoti lenda fwa kansansa ya muntu na mpila nde yandi yantika kuyiba bima ya nene. Ata kundima fyoti bangindu ya baaposta lenda nata muntu nsukansuka na kukuma aposta.—Bingana 11:9; Kusonga 21:8.
Ebuna Kana Nge Mesala Disumu?
23, 24. Inki kikesa beto lenda baka na 2 Bansangu 6:29, 30 mpi Bingana 28:13?
23 Bantu yonso kele bantu ya kukonda kukuka. (Longi 7:20) Kansi kana nge mesala disumu ya nene, nge lenda baka kikesa na kisambu yina Ntotila Salomo kusalaka ntangu bo kangulaka tempelo ya Yehowa. Salomo kusambaka Nzambi na bangogo yai: “Kana bantu na nge bantu ya Israele mutindu bo ke na mawa na ntima, bo samba nge ti kubondila nge, bo kwisa na nzo yai ti kutedimisa maboko na bo sambu na kusamba nge, pana nge Mfumu Nzambi kuna na zulu ya nge kele, wa bo, wila bo mawa nge sadisa bo. Nge mpamba muntu kuzaba ntima ya bantu yonso; sala na konso muntu mutindu kele kisalu na yandi.”—2 Bansangu 6:29, 30.
24 Ya kyeleka, Nzambi mezaba mambu ya kele na ntima na beto mpi yandi kelolulaka. Bingana 28:13 ketuba nde: “Luzingu na nge ta bonga ve kana nge meka kubumba masumu na nge; ndima yo, balula ntima na nge, ebuna Nzambi ta wila nge mawa.” Kana muntu kufunguna masumu na yandi, yandi yambula yo, mpi yandi balula ntima, Nzambi lenda lolula yandi. Kansi, kana nge kele ya kulemba na kimpeve, inki dyaka lenda sadisa nge na kuzinga kaka na zola ya Nzambi?
Inki Mvutu Nge Tapesa?
• Inki mutindu beto lenda zinga kaka na zola ya Nzambi?
• Inki mutindu zola sambu na Nzambi mpi Kristu kesadisaka beto na kuvanda ve ti luzingu ya masumu?
• Sambu na nki zola ya kyeleka sambu na bantu yankaka kebuyisaka beto na kusala pite to bizumba?
• Tanga mwa mitindu ya kutina masumu.
[Bangyufula ya disolo ya kulonguka]
[Kifwanisu ya kele na lutiti 8]
Yude kesonga beto mutindu ya kuzinga kaka na zola ya Nzambi
[Kifwanisu ya kele na lutiti 9]
Kufwa ya makwela lenda pesa mpasi mingi na nkwelani yina mesala ve mbi ti na bana
[Kifwanisu ya kele na lutiti 10]
Bonso Kalebi, keti nge kele ti lukanu ya ‘kutula ntima mpi kulemfuka’ na Yehowa?
[Kifwanisu ya kele na lutiti 11]
Sambaka mbala na mbala sambu na kulomba lusadisu ya kunwana ti bampukumuna