Mutindu ya Kuzaba Lusambu ya Kyeleka

MABUNDU mingi ketubaka nde mambu ya bo kelongaka kekatukaka na Nzambi. Yo yina, beto fwete tula dikebi na bangogo yai ya ntumwa Yoane: “Bampangi na mono ya mono ke zolaka, beno ndima ve bantu yonso ke tubaka nde bo ke na Mpeve ya Nzambi, kansi ntete beno fweti bakisa kana mpeve yina me katuka na Nzambi. Sambu baprofete mingi ya luvunu me panzanaka na bandambu yonso ya nsi-ntoto.” (1 Yoane 4:1) Inki mutindu beto lenda meka kima mosi sambu na kuzaba kana yo mekatuka na Nzambi?

Bima yonso yina kekatukaka na Nzambi kemonisaka kimuntu na yandi, mingimingi kikalulu na yandi ya kuluta nene, zola. Mu mbandu, mbombo na beto yina kesadisaka beto na kuwa bansudi ya mbote ya banti, ya bintuntu, to ya mampa ya bo mekatuka kuyoka, kemonisaka zola ya Nzambi. Mayele na beto ya kutala ntangu kedinda, ya kutala kipekipeki, to ya kumona mwana mosi ya fyoti ya kemweta, kemonisaka zola ya Nzambi. Yo kele mpi mutindu mosi sambu na ngolo yina beto kele na yo ya kuwa miziki ya kitoko, nkunga ya bandeke, to ndinga ya muntu mosi ya beto kezolaka. Ata beto kele bantu ya kukonda kukuka, mutindu beto mesalamaka, kemonisaka zola ya Nzambi. Yo yina, beto kemonaka mbala mingi bukyeleka ya bangogo yai ya Yezu: “Kiese ya kuluta mingi ke vandaka na kupesa, kansi na kubaka kiese ke vandaka fioti.” (Bisalu 20:35) Beto kezolaka kumonisa zola sambu Nzambi mesalaka beto na kifwani na yandi. (Kuyantika 1:27) Ata Yehowa kele ti bikalulu mingi yankaka, zola kele kikalulu ya kuluta mbote ya kimuntu na yandi.

Masonama yina mekatuka na Nzambi fwete monisa zola na yandi. Mabundu ya inza kele ti masonama mingi ya ntama. Keti mikanda yai ke monisaka zola ya Nzambi?

Kyeleka kele nde, mikanda mingi ya ntama ya ketubilaka mambu ya lusambu ketendulaka mpenza ve mutindu Nzambi kezolaka beto to mutindu beto lenda zola Nzambi. Yo yina, bamilio ya bantu kezwaka ve mvutu ntangu bo keyulaka nde, “Sambu na nki kana beto ketala lugangu, beto kemonaka banzikisa ya zola ya Nzambi, kansi bampasi ti mambu ya mbi kele kaka?” Biblia kele mukanda mosi mpamba ya ntama yina ketendulaka mbotembote zola ya Nzambi. Yo kelongaka beto mpi mutindu ya kumonisa zola.

Mukanda ya Ketubilaka Zola

Biblia, Ndinga ya Nzambi, kemonisa nde Yehowa kele ‘Nzambi ya zola.’ (2 Korinto 13:11) Biblia ketendula mutindu zola kupusaka Yehowa na kupesa bantu ya ntete luzingu ya kukonda maladi ti lufwa. Kansi, kukolama na kiyeka ya Nzambi kukotisaka bampasi na luzingu ya bantu. (Kulonga 32:​4, 5; Roma 5:12) Yehowa kusalaka mambu sambu na kuvutula dyaka kima yina bantu kuvidisaka. Ndinga ya Nzambi ketuba nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda  na moyo ya mvula na mvula.” (Yoane 3:16) Biblia kemonisaka pwelele mpenza zola ya Nzambi ntangu yo ketendula mutindu Nzambi mesalaka guvernema mosi ya kukuka ya yandi mepesaka na maboko ya Yezu sambu yandi kuvutula ngemba na bantu ya bulemfu.​—Daniele 7:13, 14; 2 Piere 3:13.

Biblia ketubila na bunkufi mambu yina muntu fwete sala: “‘Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.’ Yina kele nsiku me luta mfunu, yo kele mpi nsiku ya ntete. Nsiku ya zole kele mpi mfunu kiteso mosi na yina ya ntete, yo yai: ‘Nge fweti zola mpangi na nge bonso nge mosi.’ Bansiku yonso ya Moize ti malongi yonso ya baprofete yo ke katukaka na Bansiku yina zole.” (Matayo 22: 37-40) Biblia ketubaka nde bo sonikaka yo na ngolo ya Nzambi. Sambu yo kemonisaka pwelele kimuntu ya Nzambi, beto lenda ndima nde yo mekatuka na ‘Nzambi ya zola.’​—2 Timoteo 3:16.

Kana beto sadila nsiku yai mosi, beto lenda zaba nki mikanda ya ntama mekatukaka mpenza na Nzambi. Zola kemonisaka mpi banani kele bansambidi ya kyeleka, sambu bo kelandaka mbandu ya zola ya Nzambi.

Mutindu ya Kuzaba Bantu Yina Kezolaka Nzambi

Bantu fwete mona pwelele bantu yina kezolaka mpenza Nzambi, mingimingi ntangu yai ya beto kezinga na nsungi yina Biblia kebinga nde “bilumbu ya nsuka.” Bubu yai, bantu mingi kibeni ‘kezolaka bantu yankaka ve, bo kezolaka kaka mbongo . . . bo kezolaka kiese ya nsi-ntoto, kansi Nzambi ve.’​—2 Timoteo 3:1-4.

Inki mutindu nge lenda zaba bantu yina kezolaka Nzambi? Biblia ketuba nde: “Kana beto ke zolaka Nzambi, yo ke songa nde beto ke landaka bansiku na yandi.” (1 Yoane 5:3) Zola ya Nzambi kepusaka bantu na kuzitisa minsiku ya bikalulu ya mbote ya Biblia. Ndinga ya Nzambi kele ti bansiku ya ketubilaka kuvukisa nitu mpi makwela. Bantu fwete vukisa nitu kaka na makwela, mpi makwela fwete zinga tii na nsuka. (Matayo 19:9; Baebreo 13:4) Na Espagne, ntangu nkento mosi ya melongukaka teolozi kukwendaka na balukutakanu kisika Bambangi ya Yehowa vandaka kulonguka minsiku ya bikalulu ya mbote ya Biblia, yandi tubaka nde: “Mu vutukaka na nzo ti kikesa kibeni. Yo vandaka ve kaka sambu na badiskure ya mbote yina kusimbamaka na Biblia, kansi mpi sambu na bumosi yina kuvandaka na kati ya bantu yai, sambu na bikalulu na bo ya kuzanguka mpi ya mbote.”

Katula zola na bo sambu na Nzambi, Bakristu ya kyeleka kezabanaka pwelele na mutindu bo kemonisaka zola na bamfinangani na bo. Kisalu na bo ya kuluta mfunu kele kuzabisa bankaka nde Kimfumu ya Nzambi kele kivuvu mosi kaka sambu na bantu. (Matayo 24:14) Ata kima yankaka ve lenda natila bamfinangani na bo mambote ya kimakulu kuluta kusadisa bo na kubaka nzayilu ya Nzambi. (Yoane 17:3) Bakristu ya kyeleka kemonisaka mpi zola na bo na mitindu yankaka. Bo kesadisaka bantu yina kemona mpasi. Mu mbandu, ntangu ntoto kunikanaka na Italie mpi yo natilaka bantu bampasi, zulunalu mosi ya insi yina kutubaka nde Bambangi ya Yehowa “kesala mambu na mutindu ya mefwana, bo kesadisa bantu yina kemona mpasi, kukonda kusosa kuzaba dibundu ya bantu yango.”

Katula kuzola Nzambi ti bamfinangani, Bakristu ya kyeleka kezolanaka. Yezu kutubaka nde: “Nsiku mosi ya mpa ya mono ke pesa beno yo yai: Beno zolana beno na beno. Mutindu mono ke zolaka beno, beno mpi beno zolana beno na beno. Kana beno ke zolana beno na beno, bantu yonso ta zaba nde beno kele balonguki na mono.”​—Yoane 13:34, 35.

Keti zola yina Bakristu ya kyeleka kevandaka na yo bo na bo kemonanaka pwelele? Ema, nkento mosi ya kesalaka kisalu ya kiboyi vandaka kuyindula mutindu yina. Yandi kesalaka na La Paz, na Bolivie, kisika kuswaswana ya bikanda kekabulaka bamvwama ti bansukami. Yandi tubaka nde: “Mbala ya ntete ya mu kwendaka na lukutakanu ya Bambangi ya Yehowa, mu monaka bakala mosi ya kulwataka mbote, mevanda mpi kesolula ti mwana-nkento mosi ya Inde. Yo vandaka mbala na munu ya ntete ya kumona dyambu yina. Na ntangu yina, mu bakisaka nde bantu yai fwete vanda bansadi ya Nzambi.” Mutindu mosi, mwana-nkento mosi ya Brésil na zina ya Miriam kutubaka mpidiyai: “Mu vandaka kuzaba ve mutindu ya kuvanda na kyese, ata na kati ya dibuta na munu. Mbala ya ntete  ya mu monaka bantu ya kemonisa zola, yo vandaka Bambangi ya Yehowa.” Na États-Unis, direktere ya shene mosi ya televizio kusonikaka nde: “Kana bantu mingi vandaka kuzinga mutindu dibundu na beno kelombaka, insi yai zolaka kuvanda ve mutindu yo kele. Mu kele muntu yina mezaba nde organizasio na beno mesimbama na zola mpi na lukwikilu ya ngolo na Ngangi.”

Sosa Lusambu ya Kyeleka

Zola kele kidimbu ya ntetentete ya kuzabila lusambu ya kyeleka. Yezu kufwanisaka kuzwa lusambu ya kyeleka ti kuzwa nzila ya mbote mpi kubaka lukanu ya kutambula na nzila yango. Yo kele nzila mosi kaka yina kenataka na luzingu ya mvula na mvula. Yezu kutubaka nde: “Beno kota na kielo yina kele ya fioti. Sambu kele ti kielo ya nene ti nzila ya nene yina ke nataka bantu na [lufwa], bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.” (Matayo 7:13, 14) Kimvuka mosi mpamba ya Bakristu ya kyeleka ketambulaka na bumosi ti Nzambi na nzila yina, lusambu ya kyeleka. Yo yina, dibundu ya nge kepona kele mpenza mfunu. Kana nge mona nzila yina mpi nge baka lukanu ya kutambula na nzila yango, nge tavanda nge mezwa nzila ya kuluta mbote, sambu yo kele nzila ya zola.​—Efezo 4:1-4.

Yindula kyese yina nge lenda vanda na yo na kutambula na nzila ya lusambu ya kyeleka! Yo kele bonso kutambula ti Nzambi. Nzambi lenda sadisa nge na kulonguka mayele mpi zola sambu nge vanda ti bangwisana ya mbote ti bankaka. Na nzila na yandi, nge lenda longuka mpi lukanu ya luzingu, mpi nge lenda bakisa balusilu ya Nzambi mpi kuvanda ti kivuvu sambu na bilumbu kekwisa. Nge tabika kuwa ve mawa ata fyoti sambu nge sosaka lusambu ya kyeleka.

[Kifwanisu ya kele na lutiti 3]

Na kati ya masonama ya ntama yina ketubilaka mambu ya lusambu, Biblia mpamba kemonisaka zola ya Nzambi

[Bifwanisu ya kele na lutiti 5]

Bakristu ya kyeleka kezabanaka sambu bo kemonisaka zola