“Ata Bandinga Kukabulaka Beto, Zola Kuvukisaka Beto”

Luguluku. Tuka bamvu-nkama mingi, bantu kevingilaka nde bampasi ti basusi na bo kumana. Inki mutindu beto lenda nwana ti bampasi ya luzingu? Keti kilumbu kele beto taguluka na bampasi yai? Kana yo kele mpidina, inki mutindu yo tasalama?

LUGULUKU kuvandaka ntu-dyambu ya balukutakanu ya distrike ya bilumbu tatu yina Bambangi ya Yehowa kusalaka banda na Mayi 2006. Ntu-dyambu yango kuvandaka “Luguluku Mefinama!”

Bantu ya bansi ya kuswaswana kukwendaka na balukutakanu uvwa na kati ya balukutakanu yai. Balukutakanu uvwa yango kusalamaka na Yuli ti Augusti 2006, na Prague, ntu-mbanza ya République tchèque; na Bratislava, ntu-mbanza ya Slovaquie; na Chorzów ti na Poznań, na Pologne; * mpi na bambanza tanu ya Allemagne​—Dortmund, Francfort, Hambourg, Leipzig, mpi Munich. Ntalu ya bantu yonso yina kuvandaka na balukutakanu yai kulutaka 313 000.

Bantu kudiwaka nki mutindu na balukutakanu yina? Inki mambu bantu yankaka kutubaka? Mpi nki mutindu bantu yina kuvandaka na balukutakanu yango kudiwaka na nima?

Kudibongisa

Bampangi yina kukatukaka na bansi yankaka mpi Bambangi ya bansi yina balukutakanu yango kusalamaka vandaka kuvingila na kyese yonso balukutakanu yina, sambu bo zabaka nde yo tavanda mabaku ya kimpeve yina bo tavila ve. Kuyidika bisika ya kulala sambu na banzenza kuvandaka kisalu mosi ya nene kibeni. Mu mbandu, sambu na lukutakanu yina kusalamaka na Chorzów, Bambangi ya Pologne kundimaka na kuyamba bampangi ya Eropa ya Esti kiteso ya 13 000 na banzo na bo. Bampangi yina kukwendaka na lukutakanu yango kukatukaka na Arménie, Bélarus, Estonie, États-Unis, Géorgie, Kazakhstan, Kirghizistan, Lettonie, Lituanie, Moldavie, Ouzbékistan, Russie, Tadjikistan, Turkménistan, ti Ukraine.

Bantu mingi yina kuvandaka na balukutakanu yina yantikaka kubongisa nzyetelo na bo bangonda mingi na ntwala. Tatiana, mupasudi-nzila mosi ya ntangu yonso na Kamchatka, péninsule mosi ya Russie ya kele na nordi esti ya Japon, yantikaka kubumba mbongo sambu na nzyetelo mvula mosi na ntwala. Yo lombaka nde yandi sala nzyetelo na kitamina ya bakilometre 10 500. Sambu na kukuma na Chorzów, yandi salaka bangunga 5 na avio; na nima yandi salaka kiteso ya bilumbu tatu na tre; mpi nsukansuka yandi salaka bangunga 30 na bisi.

Bampangi mingi kudipesaka sambu na kuyidika ba stade ti banzyunga na yo sambu yo kuma bisika ya mefwana  sambu na lusambu. (Kulonga 23:14) Mu mbandu, Bambangi ya Leipzig kusalaka kisalu ya kutula bunkete na stade mbote kibeni, mpi bo silaka nde bo tasala yo dyaka na nima ya lukutakanu. Yo pusaka bamfumu ya stade na kukatula kitini ya kontra yina vandaka kulomba nde bampangi kufuta mbongo mingi sambu na kufika mbongo yina bo tabasisa sambu na kutula bunkete.

Baemvitasio

Mabundu ya ntoto ya mvimba kutubilaka mingi kibeni Balukutakanu ya Distrike “Luguluku Mefinama!” Bampangi yina zolaka kukwenda na balukutakanu yina ya sipesiali kusalaka kampanye yai na kyese kibeni. Bo landaka na kukabula baemvitasio tii na Kiya na nkokila. Keti kikesa na bo kubutaka bambuma ya mbote?

Mbangi mosi ya Pologne na zina ya Bogdan kukutanaka ti bakala mosi ya mununu yina vandaka ti mpusa ya kukwenda na lukutakanu, kansi bakala yango kutubaka nde kamwa mbongo na yandi tasadisa yandi ve na kusala nzyetelo ya bakilometre 120 tii na Chorzów. Yo monanaka nde kisika mosi ya mpamba kubikalaka na bisi yina bampangi ya dibundu kufutaka mbongo. Bogdan kutubaka nde: “Beto songaka bakala yango nde yandi lenda kwenda ti beto kukonda kufuta kana yandi kuma na 5:30 ya suka na kisika ya beto tabaka bisi.” Bakala yango kundimaka mpi yandi kwendaka na lukutakanu. Na nima yandi sonikilaka bampangi nde: “Na nima ya kuvukana na lukutakanu yai, mu mebaka lukanu ya kuvanda muntu ya mbote kibeni.”

Na Prague, bakala mosi ya vandaka kuzinga na hotele mosi ti bampangi yina kukatukaka na Angleterre kuzabisaka bampangi na nkokila mosi nde yandi mpi kuvandaka na lukutakanu ya distrike kilumbu yina. Inki kupusaka yandi na kukwenda kuna? Bakala yango kutubaka nde na nima ya kubaka baemvitasio ya bansamuni kumi, yandi yindulaka nde yandi fwete kwenda kaka! Yandi yitukaka kibeni mpi yandi vandaka na mpusa ya ngolo ya kulonguka mambu mingi.​—1 Timoteo 2:3, 4.

Programe ya Mbote ya Malongi ya Kimpeve

Badiskure vandaka kutubila mutindu ya kuyidika makambu. Bandongisila ya pwelele ya Biblia kutendulaka mutindu ya kuyidika to kukanga ntima na makambu yango.

Bantu yina kemona mpasi sambu na kimununu, mavimpi ya mbi, lufwa ya muntu mosi ya bo vandaka kuzola, to bayina kele ti makambu yankaka, bo yonso kubakaka kikesa na nzila ya Biblia sambu na kusadisa bo na kutadila luzingu na mutindu ya mbote. (Nkunga 72:12-14) Bankwelani ti bibuti kuwaka bandongisila ya Biblia yina kumonisaka mutindu ya kuvanda ti makwela ya kyese mpi ya kununga na kusansa bana na bo. (Longi 4:12; Efezo 5:22, 25; Kolosai 3:21) Baleke-Bakristu, yina kekutanaka ti bupusi ya banduku ya mbi na nzo-nkanda kansi ya bo kelongaka bandongisila ya mayele ya Ndinga ya Nzambi na nzo mpi na dibundu, kubakaka bandongisila ya mbote ya kemonisa mutindu ya kutina ‘nzala ya kileki yina kebenda bo.’​—2 Timoteo 2:22.

Dibuta ya Kyeleka ya Bampangi ya Kele na Ntoto ya Mvimba

Bambangi ya Yehowa kebakaka ntangu yonso lutwadisu ya mbote ya kimpeve na balukutakanu na bo. (2 Timoteo 3:16) Kansi, kima kusalaka nde balukutakanu yai kuswaswana mpenza kele mutindu bantu ya bansi mingi kuvandaka pana. Balukutakanu yina yonso ya sipesiali kuvandaka ti programe kaka mosi ya kimpeve na bandinga mingi. Konso  kilumbu, bamambre ya Nto-Kimvuka ya Bambangi ya Yehowa vandaka kusala badiskure, mpi barapore ya bansi yankaka vandaka kuyika kyese kibeni. Bo vandaka kubalula badiskure ti barapore yina na bandinga ya bantu yonso yina kuvandaka na balukutakanu yango.

Bampangi yina kukwisaka na balukutakanu kuvandaka na mpusa ya kukutana ti bampangi na bo ya bansi yankaka. Mpangi-bakala mosi kutubaka nde: “Luswaswanu ya bandinga vandaka kupesa beto mpasi mpenza ve. Nkutu, yo vandaka kuyika kyese na lukutakanu yina. Bampangi kukatukaka na bisika ya kuswaswana, kansi beto yonso kuvandaka na bumosi ti lukwikilu.” Bampangi yina kukwendaka na lukutakanu ya Munich kutubaka nde: “Ata bandinga kukabulaka beto, zola kuvukisaka beto.” Ata konso insi bo katukaka mpi konso ndinga yina bo vandaka kutuba, bantu yina kuvandaka na lukutakanu vandaka kudiwa mpenza nde bo vandaka na kati ya banduku ya kyeleka, ya bampangi na bo Bakristu.​—Zakaria 8:23.

Bangogo ya Kemonisa Ntonda

Mvula ya ngolo yina kunokaka bangunga mingi na balukutakanu yina kusalamaka na Pologne mpi madidi ya ngolo (kiteso ya 14°C), kutulaka mpenza kyese mpi kukanga ntima ya bampangi na kumekama. Mpangi mosi ya États-Unis kutubaka nde: “Yo vandaka mbala ya ntete ya mu monaka mvula ti madidi ya ngolo ya mutindu yina na lukutakanu mosi ya distrike, mpi mu bakisaka mpenza ve mambu mingi. Kansi, kumona bampangi ya bansi mingi, nkadilu ya mbote mpi mutindu bampangi ya insi yina kuyambaka beto kupesaka munu kyese mingi. Mu lenda vila ve lukutakanu yai ata fyoti!”

Kima yina bampangi ya ketubaka Polonais tavila ve kuvandaka kubasika ya mukanda Étude pérspicace, na Polonais. Yo vandaka dikabu mosi ya kitoko mpenza na mutindu bo kangaka ntima na madidi mpi na mvula. Bantu kusepelaka mpi mingi na kubasika ya mukanda Vivez en gardant à l’esprit le jour de Jéhovah na Balukutakanu yonso ya Distrike “Luguluku Mefinama!”

Bantu mingi yina kuvandaka na lukutakanu tayibukaka yo mpi sambu na bikuma yankaka. Kristina, mpangi-nkento mosi ya Tchèque, yina kundimaka na kukwenda kubika bampangi yina kukatukaka na bansi yankaka ntangu bo vandaka kuvutuka, keyibuka nde: “Na ntangu beto vandaka kuzodila bo kukwenda ya mbote, mpangi-nkento mosi kubingaka munu na lweka, yandi yambaka munu mpi kutubaka nde: ‘Beno lungisaka mpenza bampusa na munu! Beno natilaka beto madya na bisika yina beto vandaka mpi nkutu beno kupesaka beto masa ya kunwa. Matondo mingi sambu na zola na beno ya kuditambika.’ ” Mpangi-nkento yango vandaka kutubila madya yina bo vandaka kupesa bampangi yina kukatukaka na bansi yankaka. Mpangi-bakala mosi kutendulaka nde: “Yo vandaka kisalu mosi ya beto mesalaka ntete ve. Yo vandaka kulomba kupesa madya na kiteso ya bantu 6500 konso kilumbu. Yo vandaka kusimba mpenza ntima na kumona mutindu bampangi mingi, ti bana, kundimaka na kusadisa.”

Mpangi-nkento mosi ya katukaka na Ukraine mpi ya kukwendaka na Chorzów sambu na lukutakanu kutubaka nde: “Zola, kudibanza, mpi kikalulu ya kukaba yina bampangi na beto kumonisaka mesimba mpenza ntima na beto. Beto kele ve ti bangogo sambu na kumonisa ntonda na beto.” Annika, leke mosi ya nkento ya bamvula nana ya kukatukaka na Finlande, kusonikilaka biro ya filiale ya Bambangi ya Yehowa ya Pologne nde: “Lukutakanu kuvandaka kitoko kibeni kuluta yina mu vandaka kuyindula. Yo kele mbote kibeni na kuvanda na organizasio ya Yehowa, sambu beto kele ti banduku na ntoto ya mvimba!”​—Nkunga 133:1.

Mambu Yina Bantu Yankaka Kutubaka

Na ntwala ya balukutakanu, bo bakaka bangidika sambu bampangi yina kukwisaka na balukutakanu yango kutambula na mbanza sambu na kutala bisika ya mbote. Bampangi yina kwendaka kutala provense ya Bavière vandaka kutelama na  Banzo ya Kimfumu, kisika Bambangi ya provense yina vandaka kuyamba bo. Nkento mosi ya vandaka kusadisa bo viziti, kansi ya kuvandaka ve Mbangi, kuyitukaka mingi kibeni na kumona zola yai ya kimpangi. Mpangi mosi ketuba nde: “Na ntangu beto vandaka kuvutuka na hotele na bisi, nkento yina kusadisaka beto viziti kutubaka nde beto vandaka mpenza ya kuswaswana ti bantu yankaka yina yandi mesadisaka baviziti. Beto lwataka mbote, mpi beto yonso vandaka kuwakana mbote ti bantu yina vandaka kutwadisa beto na viziti. Mafingu mpi mavwanga kuvandaka ve. Yandi yitukaka na kumona mutindu banzenza kukumaka banduku ya mbote na mbala mosi.”

Mpangi-bakala mosi ya kusalaka na Departema ya Bansangu na lukutakanu ya Prague ketuba nde: “Na Lumingu na suka, mfumu ya bapolise yina bo pesaka mukumba ya kukengila kisika ya lukutakanu kwisaka kutala beto. Yandi monaka ngemba yina kuvandaka na kati ya bampangi, mpi yandi tubaka nde yandi vandaka ve ti kisalu ya kusala pana. Yandi tubaka mpi nde bantu yankaka yina kezingaka na nzyunga ya stade vandaka kuyula sambu na kuzaba inki mambu vandaka kusalama na stade. Ntangu yandi vandaka kuvutula nde yo vandaka Bambangi ya Yehowa, mbala mingi bantu yango vandaka kubebisa ilungi, ebuna mfumu yina vandaka kuzabisa bo nde: ‘Kana bantu vandaka kusala mambu ata fyoti bonso Bambangi ya Yehowa, beto zolaka kuvanda dyaka ve ti mfunu ya polise.’”

Bantu Mingi Meguluka Dezia!

Biblia, Ndinga ya Nzambi, kevandaka bonso pont na kati ya binkulu ya kuswaswana, sambu yo kevukisaka Bakristu kumosi na ngemba. (Roma 14:19; Efezo 4:22-24; Filipi 4:7) Balukutakanu ya Distrike ya sipesiali “Luguluku Mefinama!” kumonisaka yo. Bambangi ya Yehowa megulukaka dezia na mambu mingi ya mbi yina kenyokula bantu ya nsi-ntoto. Kana beto baka kaka mwa bambandu yai, kukonda kundima bantu ya bikanda yankaka, kunyokula bo, mpi kumenga bantu sambu na mpusu na bo ya nitu, Bambangi ya Yehowa mekatulaka mambu yai yonso na kati na bo, mpi bo kekinga ntangu yina mambu yai yonso tavanda dyaka ve na ntoto ya mvimba.

Bantu yina kukwendaka na balukutakanu yina kumonaka bo mosi bumosi yina kevandaka na kati ya Bambangi ya bansi mpi binkulu ya kuswaswana. Yo monanaka mpenza pwelele na kilumbu ya nsuka ya balukutakanu ya distrike. Bantu yonso vandaka kubula maboko, kuyambana ti banduku ya mpa, mpi kubaka bafoto ya nsuka. (1 Korinto 1:10; 1 Piere 2:17) Sambu bo vandaka na kyese mpi vandaka kundima nde luguluku na bampasi ti basusi mefinama, bampangi yina kuvandaka na balukutakanu kuvutukaka na banzo mpi na mabundu na bo ti lukanu ya mpa ya kulanda na kukangama mpenza na “nsangu ya moyo” ya Ndinga ya Nzambi.​—Filipi 2:15, 16.

[Noti na nsi ya lutiti]

[Lupangu/​Kifwanisu ya kele na lutiti 10]

Bo Vandaka Kutuba Bandinga Makumi Zole na Tanu Bonso Ndinga Mosi

Na balukutakanu yonso uvwa, programe kusalamaka na ndinga ya bansi yina. Na balukutakanu yina kusalamaka na Allemagne, bo salaka mpi badiskure na bandinga 18 yankaka. Na Dortmund, bo salaka badiskure na Farsi, Kiarabi, Kiespaniole, Kiportugais, mpi na Russe; na Francfort yo salamaka na Kifalansa, Kingelesi, ti na Serbe/Croate; na Hambourg yo salamaka na Danois, Néerlandais, Suedois, ti Tamoul; na Leipzig yo salamaka na Kishinwa, Polonais, ti Turque; mpi na Munich yo salamaka na Italien, Kigreki, mpi na Ndinga ya Bidimbu ya Allemagne. Bo salaka badiskure yonso ya lukutakanu ya Prague na Kingelesi, na Russe mpi na Tchèque. Na Bratislava, programe kusalamaka na Hongrois, na Kingelesi, na Ndinga ya Bidimbu ya Slovaquie, mpi na Slovaque. Na Chorzów, programe kusalamaka na Ndinga ya Bidimbu ya Pologne, Polonais, Russe, mpi Ukrainien. Ebuna na Poznań, yo salakamaka na Finnois ti na Polonais.

Na kimvuka, bandinga makumi zole na tanu! Ya kyeleka, ndinga vandaka kukabula bantu yina kuvandaka na balukutakanu yina, kansi zola vandaka kuvukisa bo.

[Kifwanisu ya kele na lutiti 9]

Bampangi ya Croatie yina kuvandaka na lukutakanu na Francfort kuvandaka na kyese ya kuzwa “Traduction du monde nouveau” na ndinga na bo