Yehowa Kebakaka Bulemfu na Nge na Valere

“Mwana na mono, vanda mayele, ebuna mono ta mona kiese.”​—BINGANA 27:11.

1. Inki mpeve mefuluka na ntoto bubu yai?

MPEVE ya dipanda mpi ya kukonda bulemfu mefuluka na ntoto bubu yai. Na mukanda ya yandi sonikilaka Bakristu ya Efezo, ntumwa Polo ketendula sambu na nki yo kele mutindu yina. Yandi ketuba nde: “Na ntangu yina beno vandaka kulanda luzingu ya mbi ya nsi-ntoto yai; beno vandaka kulemfuka na mfumu yina ke yalaka bampeve kele na mupepe, mfumu yina kele mpeve ke yalaka ntangu yai bantu yina ke lemfukaka na Nzambi ve.” (Efezo 2:1 2) Ya kyeleka, beto lenda tuba nde Satana, “mfumu yina ke yalaka bampeve kele na mupepe,” mebebisa mpenza nsi-ntoto ya mvimba ti mpeve ya kukonda kulemfuka. Yandi salaka yo na mvu-nkama ya ntete, mpi yandi kesala yo mingi dyaka tuka bo kulaka yandi na zulu na nsungi ya Mvita ya Ntete ya Ntoto ya Mvimba.​—Kusonga 12:9.

2, 3. Inki bikuma beto kele na yo ya kulemfuka na Yehowa?

² Kansi, beto Bakristu beto kezaba nde Yehowa Nzambi mefwana nde beto lemfukila yandi na ntima na beto ya mvimba sambu yandi kele Ngangi, Ntanini ya luzingu na beto, Mfumu ya zola, mpi Ngulusi na beto. (Nkunga 148:5, 6; Bisalu 4:24; Kolosai 1:13; Kusonga 4:11) Bantu ya Izraele ya bilumbu ya Moize kuzabaka nde Yehowa kuvandaka Muntu ya kupesaka bo luzingu mpi yina kugulusaka bo. Yo yina, Moize kusongaka bo nde: “Beno fweti sala mambu yonso ya Mfumu Nzambi, Nzambi na beno, songaka beno.” (Kulonga 5:32) Ee, yo fwanaka nde bo lemfukila Yehowa. Kansi, bo sukininaka ve na kukolama na Mfumu na bo.

³ Sambu na nki yo kele mfunu nde beto lemfuka na Ngangi ya luyalanganu? Nzambi kusongaka profete Samuele na kutuba na Ntotila Saule nde: “Kulemfuka na Nzambi kuluta kupesa yandi makabu.” (1 Samuele 15:22, 23) Sambu na nki?

Inki Mutindu Kulemfuka na Nzambi ‘Meluta Kupesa Yandi Makabu’

4. Na nki mutindu beto lenda pesa Yehowa kima mosi?

⁴ Sambu yandi kele Ngangi, bima yonso ya kele na ntoto kele ya Yehowa. Kana yo kele mpidina,  keti kele ti kima yina beto lenda pesa yandi? Ee, beto lenda pesa yandi kima mosi ya valere mingi. Inki kima yango? Beto lenda baka mvutu na ndongisila yai: “Mwana na mono, vanda mayele, ebuna mono ta mona kiese; mpidina konso muntu yina ta tonga mono, mono ta zaba kupesa yandi mvutu.” (Bingana 27:11) Beto lenda pesa Nzambi bulemfu na beto. Ata luzingu na beto kele ya kuswaswana mpi beto yonso keyelaka ve kisika mosi, na bulemfu na beto beto lenda pesa mvutu na mambu ya mbi yina Satana Dyabulu kutubaka nde bantu lenda bikala ve ya kwikama na Nzambi kana bo kutana ti bampasi. Yai dibaku ya nene mpenza beto kele na yo!

5. Na nki mutindu kukonda bulemfu kepesaka Ngangi mpasi? Pesa mbandu.

⁵ Nzambi ketulaka dikebi na badesizio ya beto kebakaka. Kana beto kekolama, yo kesalaka yandi mpasi. Na nki mutindu? Yo kesalaka yandi mpasi na ntima na kumona muntu kesala mambu ya mbi. (Nkunga 78:40, 41) Yindula nde muntu mosi ya kebelaka diabete kezitisa ve nsiku yina munganga kupesaka yandi, kansi yandi kelanda na kudya madya yina kele mbi sambu na mavimpi na yandi. Munganga yina ya kesansaka yandi na zola yonso takudiwa nki mutindu? Beto kendima mpenza nde Yehowa kewaka mpasi ntangu bantu kelemfukilaka yandi ve, sambu yandi kezaba mbuma yina muntu lenda buka kana yandi kelemfuka ve na bansiku na yandi.

6. Inki tasadisa beto na kulemfuka na Nzambi?

⁶ Inki tasadisa konso muntu na kati na beto na kuvanda bulemfu? Yo kele mbote nde beto lomba ntima ya bulemfu na Nzambi, mutindu Ntotila Salomo kusalaka. Salomo kulombaka ntima ya bulemfu sambu yandi zaba ‘nzila ya mbote ti ya kieleka’ mpi yandi kuka kuyala bampangi na yandi bantu ya Izraele. (1 Bantotila 3:9) Beto kele na mfunu ya ntima ya bulemfu sambu na kuswasisa mambu ya mbote ti ya mbi na ntoto yai ya mefulukaka ti mpeve ya kukonda bulemfu. Nzambi mepesaka beto Ndinga na yandi, bisadilu ya kulongukila Biblia, balukutakanu ya Bukristu, mpi bankuluntu ya zola na dibundu na mpila nde beto yedisa ntima ya bulemfu. Keti beto kesadilaka bangidika yai ya zola na mutindu ya mbote?

7. Sambu na nki Yehowa ketulaka dikebi mingi na bulemfu kuluta na makabu?

⁷ Na kuwakana ti mambu yai, yibuka nde na ntangu ya ntama, Yehowa kumonisaka na bantu na yandi nde bulemfu kuvandaka mfunu mingi kuluta makabu ya bambisi. (Bingana 21:3, 27; Ozea 6:6; Matayo 12:7) Sambu Yehowa muntu kulombaka bantu na yandi na kupesa makabu ya bambisi, sambu na nki yo vandaka mutindu yina? Inki kele kikuma ya fwete pusa muntu na kupesa dikabu? Keti yandi kesala yo sambu na kusepedisa Nzambi? To keti yandi kesala yo kaka sambu na kulanda kinkulu mosi buna? Kana nsambidi mosi kezola kusepedisa mpenza Nzambi, yandi tasala kikesa sambu na kulemfuka na bansiku yonso ya Nzambi. Nzambi kele ve na mfunu ya makabu ya bambisi, kansi kima ya valere ya beto lenda pesa yandi kele bulemfu na beto.

Mbandu Mosi ya Kekebisa

8. Sambu na nki Nzambi kubuyaka ntotila Saule?

⁸ Disolo ya Biblia yina ketubila ntotila Saule kemonisa mpenza mfunu ya bulemfu. Ntangu Saule yantikaka kuyala, yandi vandaka mfumu mosi ya kudikulumusa, yina “vandaka kudimona leki” mpenza. Kansi na nima, lulendo mpi bangindu ya mbi yantikaka kutwadisa badesizio na yandi. (1 Samuele 10:21, 22; 15:17) Kilumbu mosi, yo lombaka nde Saule kunwana bitumba ti bantu ya Filistia. Samuele kusongaka ntotila na kukinga yandi sambu na kupesa makabu na Yehowa mpi kusonga yandi mambu ya yandi fwete sala. Kansi, Samuele kukwisaka ve nswalu na ntangu yina bo vandaka kuvingila yandi, ebuna bantu yantikaka kupanzana. Ntangu Saule monaka mpidina, yandi “bakaka mbisi, yandi yantikaka kuyoka yo sambu na kupesa makabu.” Dyambu yai kusepedisaka ve Yehowa. Nsukansuka, ntangu Samuele kwisaka, ntotila kudinungisaka sambu na kukonda bulemfu na yandi. Yandi tubaka nde Samuele kusukininaka, yo yina yandi ‘monaka nde yandi mosi fweti pesa makabu’ sambu na kulembika ilungi ya Yehowa. Sambu na Ntotila Saule, kupesa makabu kuvandaka mfunu mingi kuluta kulemfuka na ntuma yina bo pesaka yandi ya kukinga Samuele sambu na kupesa makabu. Samuele kusongaka yandi nde: “Nge me sala buzoba! Nge me lemfuka ve na nsiku yina ya Mfumu Nzambi, Nzambi na nge, pesaka nge.” Saule kuvidisaka kimfumu na yandi sambu yandi lemfukaka ve na Yehowa.​—1 Samuele 10:8; 13:5-13.

9. Inki mutindu Saule kumonisaka kukonda bulemfu na Nzambi?

 ⁹ Keti ntotila kubakaka dilongi na mambu yina kukuminaka yandi? Ve! Ntangu fyoti na nima, Yehowa kusongaka Saule na kufwa dikanda ya Amaleki yina kwisaka kunwanisa Izraele kukonda kikuma. Yandi lombaka Saule na kubikisa ve ata bambisi na bo. Yandi lemfukaka sambu yandi “bedisaka bantu ya Amaleki katuka nsi ya Avila tii na ntoto ya zelo na zelo ya Shure.” Ntangu Samuele kwisaka kukutana ti yandi, ntotila kuvandaka na kyese sambu yandi nungaka bitumba mpi yandi tubaka nde: “Mfumu Nzambi kuvanda na nge. Mono me sala mambu ya Mfumu Nzambi tubaka.” Ata mpidina, Saule ti bantu na yandi kulemfukaka ve na bantuma ya Nzambi kupesaka bo. Bo fwaka ve ntotila Agagi mpi “mameme ti bangombe ya kuluta kitoko.” Ntotila Saule kudinungisaka sambu na kukonda bulemfu na yandi nde: “Basoda na mono me . . . baka mameme ti bangombe ya kuluta kitoko sambu na kupesa makabu na Mfumu Nzambi, Nzambi na nge.”​—1 Samuele 15:1-15.

10. Inki dilongi Saule kubakaka ve?

¹⁰ Ebuna Samuele kutubilaka Saule nde: “Nki Mfumu Nzambi ke zola mingi: kulemfuka to kupesa makabu? Zaba nde, kulemfuka na Nzambi kuluta kupesa yandi makabu, kuwa malongi na yandi kuluta kupesa yandi bambisi ya mafuta mingi.” (1 Samuele 15:22) Sambu Yehowa kutubaka nde bo fwete fwa bambisi yina, yandi lendaka ve kundima yo bonso makabu.

Lemfuka na Mambu Yonso

11, 12. (a) Inki mutindu Yehowa ketadilaka bikesa ya beto kesalaka sambu na kusepedisa yandi na lusambu na beto? (b) Inki mutindu muntu lenda kudikusa na kuyindula nde yandi kesala luzolo ya Nzambi, ata yandi kelemfuka ve na Nzambi?

¹¹ Yehowa kevandaka na kyese kibeni ntangu yandi kemonaka bansadi na yandi ya kwikama kebikala ya kwikama ata bo kemonisa bo mpasi, ntangu bo kelongaka Kimfumu ata bantu mingi kebuyaka yo ve, mpi ntangu bo kekwendaka na balukutakanu ya Bukristu ata bo kenwanaka ti bupusi ya kusosa kuzwa bima ya kuzingila! Bulemfu na beto na mambu yai ya mfunu ya luzingu na beto ya kimpeve kesepedisaka ntima ya Yehowa! Bikesa ya beto kesalaka sambu na kusambila Yehowa kevandaka na valere mingi na meso na yandi na ntangu beto kesalaka yo na zola yonso. Ziku bantu lenda tula ve dikebi na kisalu ya ngolo ya beto kesalaka, kansi Nzambi ketulaka dikebi na makabu ya beto kepesaka yandi na ntima na beto ya mvimba mpi yandi keyibukaka yo.​—Matayo 6:4.

¹² Kansi, kana beto zola kusepedisa mpenza Nzambi, beto fwete lemfuka na mambu yonso ya luzingu na beto. Beto fwete kudikusa ve ata fyoti na kuyindula nde beto lenda fwa minsiku yankaka ya Nzambi na ntangu beto kesala mambu yankaka ya metala lusambu na yandi. Mu mbandu, muntu lenda kudikusa na kuyindula nde sambu yandi kesala mambu yankaka ya lusambu na zuluzulu, yandi tabuka ve mbuma ya mansoni to ya masumu yankaka ya nene ya yandi kesala. Kuyindula mutindu yina kele kifu kibeni!​—Galatia 6:7, 8.

13. Inki mutindu bulemfu na beto na Yehowa lenda mekama na kinsweki?

¹³ Yo yina, beto lenda kudiyula nde: ‘Keti mu kelemfukaka na Yehowa na bisalu na munu ya konso kilumbu, ata na mambu na munu ya kinsweki?’ Yezu kutubaka nde: “Muntu yina ya bo lenda tula ntima na bima ya fioti, bo lenda tula yandi mpi ntima na bima ya nene; muntu yina ya bo lenda tula ntima ve na bima ya fioti, bo lenda tula yandi ntima mpi ve na bima ya nene.” (Luka 16:10) Keti beto ke na ‘kutambula na kwikama ya ntima na beto’ ata ‘na kati ya nzo na beto’ kisika bantu lenda mona beto ve? (Nkunga 101:2, NW) Ee, kwikama na beto lenda mekama ata na kati ya nzo na beto. Na bansi mingi, ba ordinatere mekumaka bima ya nzo yina bantu kezwaka kukonda mpasi, ebuna yo kevandilaka bo pete kibeni sambu na kumona bifwanisu ya kemonisa kikonga. Bamvula fyoti meluta, bantu lendaka kutala bifwanisu ya mutindu yina kaka kana bo kwenda na bisika ya bansaka ya kulutisila ntangu ya kemonisaka pwelele mutindu bantu kevukisaka nitu. Keti beto talemfuka mpi tatula dikebi na bulemfu yonso na bangogo yai ya Yezu: “Konso muntu yina ke tala nkento ya ngani ti nzala ya kuladisa yandi, yandi me sala pite ti yandi na ntima na yandi na ntangu yina”? Ee, keti beto tabuya kutala bifwanisu ya kesonga mansoni? (Matayo 5:28; Yobi 31:1, 9, 10; Nkunga 119:37; Bingana 6:24, 25; Efezo 5:3-5) Ebuna, inki beto lenda tuba sambu na nku yina kelutaka na TV?  Keti beto kendimaka mabanza ya Nzambi na beto yina “ke zolaka ve ata fioti bantu yina ke zolaka kusala nku”? (Nkunga 11:5) Inki beto lenda tuba sambu na yina metala kunwa malafu mingi na kinsweki? Biblia kebuyisa kulauka malafu, kansi yo kekebisa mpi Bakristu na kuvanda ve “bampika ya malafu.”​—Tito 2:3; Luka 21:​34, 35; 1 Timoteo 3:3.

14. Tanga mwa mitindu yina bulemfu na Nzambi kemonanaka na mambu ya metala mbongo.

¹⁴ Kima yankaka yina beto fwete keba na yo kele mambu ya metala mbongo. Mu mbandu, keti beto kesadilaka banzila yina kesadisaka na kukuma mvwama nswalu, yina kenataka penepene na kuyiba? Keti beto kewaka mpusa ya kusadila bametode yina kele mbote ve sambu na kutina kufuta bampaku? To keti beto kelemfukaka na luzolo yonso na nsiku ya ‘kupesa na konso muntu konso kima yina ya beto fweti pesa, mpi kufuta mpaku na bantu yina ya beto fweti futa mpaku’?​—Roma 13:7.

Bulemfu ya Mesimbama na Zola

15. Sambu na nki nge kelemfukaka na bansiku ya Yehowa?

¹⁵ Bulemfu na minsiku ya Nzambi kenataka mambote. Mu mbandu, kana beto kebuya kunwa makaya, kezinga luzingu ya mbote mpi kezitisa busantu ya menga, beto tazwa ve bamaladi yankaka. Dyaka, kana beto kezinga na kuwakana ti kyeleka ya Biblia na mambu yankaka ya luzingu, beto tabaka mambote. Beto tabebisa ve mbongo na beto, beto tazinga mbote ti bankaka mpi ti bantu ya dibuta na beto. (Yezaya 48:17) Beto lenda tadila mambote yai yonso ya kinsuni bonso balusakumunu yina kemonisaka nde minsiku ya Nzambi kele mbote mpenza. Ata mpidina, kikuma ya ntetentete yina fwete pusa beto na kulemfuka na Yehowa kele zola na beto sambu na yandi. Beto kesadilaka ve Nzambi sambu na kusosa mambote na beto mosi. (Yobi 1:9-11; 2:4, 5) Nzambi mepesaka beto kimpwanza ya kupona nani beto kezola kulemfukila. Beto meponaka na kulemfuka na Yehowa sambu beto kezolaka kusepedisa yandi mpi kesosaka kusala mambu ya mbote.​—Roma 6:16, 17; 1 Yoane 5:3.

16, 17. (a) Inki mutindu Yezu kulemfukaka na Nzambi na zola yonso? (b) Inki mutindu beto lenda landa mbandu ya Yezu?

 ¹⁶ Yezu kupesaka mbandu mosi ya mbote kibeni na yina metala kulemfuka na Yehowa na zola yonso. (Yoane 8:28, 29) Ntangu Yezu vandaka na ntoto, yandi “longukaka na kulemfuka na Nzambi sambu na bampasi yina yonso ya yandi vandaka kumona.” (Baebreo 5:8, 9) Inki mutindu? “Yandi kudikulumusaka mpenza, yandi mpi lemfukaka na Nzambi tii kuna ya yandi fwaka” na nti ya mpasi. (Filipi 2:7, 8) Ata Yezu vandaka dezia kulemfuka na zulu, bulemfu na yandi kumekamaka dyaka awa na ntoto. Beto lenda ndima nde Yezu mefwana mpenza na kusala bonso Nganga-Nzambi ya Nene sambu na bampangi na yandi ya kimpeve mpi sambu na bantu yankaka yina kekwikilaka na yandi.​—Baebreo 4:15; 1 Yoane 2:1, 2.

¹⁷ Ebuna beto? Beto lenda landa mbandu ya Yezu kana bulemfu na luzolo ya Nzambi kebaka kisika ya ntete na luzingu na beto. (1 Piere 2:21) Beto lenda mona kyese kana zola na beto sambu na Nzambi kepusa beto na kusala mambu yina Yehowa kelomba beto na kusala, ata bo kepusa beto to kepukumuna beto na kukolama. (Roma 7:18-20) Dyambu yai kelomba mpi nde beto vanda na luzolo ya kulemfuka na lutwadisu ya bampangi yina kele na ntu ya lusambu ya kyeleka, ata bo kele bantu ya kukonda kukuka. (Baebreo 13:17) Bulemfu na beto na bansiku ya Yehowa na luzingu na beto ya kinsweki kele na valere mingi kibeni na meso na yandi.

18, 19. Inki mambote beto tazwa kana beto kelemfuka na Nzambi na zola yonso?

¹⁸ Bubu yai, kulemfuka na Nzambi lenda lomba nde beto kanga ntima na bampasi sambu na kutanina kwikama na beto. (Bisalu 5:29) Dyaka, kulemfuka na ntuma ya Yehowa ya kusamuna mpi kulonga kelombaka nde beto kanga ntima tii na nsuka ya ngidika yai ya bima. (Matayo 24:13, 14; 28:19, 20) Beto fwete kanga ntima sambu na kulanda kuvukana kumosi ti bampangi na beto, ata bantangu yankaka beto lenda wa kilo ya bupusi ya ntoto yai. Nzambi na beto ya zola kezaba mpenza bikesa ya beto kesalaka sambu na kulemfuka na mambu yina. Kansi, sambu na kulemfuka ya mvimba na Nzambi, beto fwete nwana ti nitu na beto ya masumu, kuyambula mambi mpi kuyedisa zola sambu na mambu ya mbote.​—Roma 12:9.

¹⁹ Kana beto kesadila Yehowa na zola yonso mpi na ntima ya kufuluka na ntonda, Nzambi takuma muntu ya “ke pesaka matabisi na bantu yina ke sosaka yandi.” (Baebreo 11:6) Kupesa Nzambi makabu yina mefwana kele mfunu mpi kesepedisaka yandi mpenza, kansi kima ya kesepedisaka yandi mingi kuluta kele bulemfu ya mekatuka na zola sambu na yandi.​—Bingana 3:1, 2.

Inki Mvutu Nge Tapesa?

• Sambu na nki beto lenda tuba nde beto kele ti kima mosi ya kupesa na Yehowa?

• Inki bifu Saule kusalaka?

• Inki mutindu nge lenda monisa nde nge kekwikilaka nde bulemfu meluta kupesa makabu?

• Inki kepusaka nge na kulemfuka na Yehowa?

[Bangyufula ya disolo ya kulonguka]

[Bifwanisu ya kele na lutiti 22]

Keti nge kelemfukaka na minsiku ya Nzambi na kati ya nzo na nge?