Keti Nge Kele “Mvwama na Meso ya Nzambi”?

“Yo kele mpidina na konso muntu yina ke bumbaka kimvwama sambu na yandi mosi, kansi yandi kele mvwama ve na meso ya Nzambi.”​—LUKA 12:21.

1, 2. (a) Sambu na nki bantu mendimaka na kusala bibansa ya nene? (b) Inki kigonsa mpi mambu ya mpasi Bakristu fwete nwana ti yo?

BANA mingi kesalaka nsaka mosi ya kelombaka kubumba kima mosi ya ntalu, ebuna bana yankaka fwete kwenda kusosa yo. Kusosa matadi ya ntalu kele kaka ve nsaka yina bana kezolaka kusala. Na nsungi ya bamvula mingi mpi na bansi mingi, bantu kekwendaka mpenza mbala na mbala bisika yankaka sambu na kusosa matadi ya ntalu. Mu mbandu, na mvu-nkama ya 19 ntangu bo sengumunaka wolo na Australie, na Afrika ya Sudi, na Canada mpi na États-Unis, bantu ya bansi mingi kundimaka na kubika banzo na bo mpi bantu ya bo vandaka kuzola sambu na kwenda kusosa matadi ya ntalu na bansi yina bo mekwendaka ntete ve mpi yina bantangu yankaka bo vandaka kuyamba ve banzenza mbote. Ya kyeleka, bantu mingi kendimaka na kutula luzingu na bo na kigonsa mpi kusala bibansa ya nene sambu  na kuzwa kimvwama yina ntima na bo kezola.

² Bubu yai, ata bantu mingi kekwendaka dyaka ve kusosa matadi ya ntalu, bo fwete sala ngolo sambu na kuzwa bima ya kuzingila. Yo lenda vanda mpasi, mpi yo lenda lomba kulutisa ntangu mingi mpi kusala mingi sambu na kuzwa bima ya kuzingila na ngidika yai ya bima. Yo kele mpasi ve na kukuma kudiyangisa mingi sambu na madya, bilele, mpi kisika ya kulala, ebuna kuyambula to nkutu kuvila bima ya kuluta mfunu. (Roma 14:17) Yezu kutaka kingana mosi ya ketendula mpenza kikalulu yai yina bantu kevandaka na yo. Kingana yango kele na Luka 12:16-21.

3. Tubila na bunkufi kingana ya Yezu yina kele na Luka 12:16-21.

³ Yezu kutaka kingana yango kilumbu ya yandi tubilaka mfunu ya kukeba na bilula-lula, yina beto tadilaka na bunda na disolo yina meluta. Na nima ya kupesa lukebisu na yina metala bilula-lula, Yezu kutubilaka mvwama mosi ya kusepelaka dyaka ve na banzo ya yandi vandaka kubumbila bima sambu yo kufulukaka ti bima mingi yina yandi vandaka ti yo dezia, ebuna yandi fwaka banzo yango mpi kutungaka banzo ya kuluta nene sambu na kubumba bima mingi dyaka. Kaka na ntangu yandi yindulaka nde yandi lenda pema mpi kumona kyese na luzingu na yandi, Nzambi kusongaka yandi nde yandi tafwa, mpi nde bima yonso yina yandi bumbaka takwenda na muntu yankaka. Ebuna, Yezu kuyikaka nsa yai na nsuka nde: “Yo kele mpidina na konso muntu yina ke bumbaka kimvwama sambu na yandi mosi, kansi yandi kele mvwama ve na meso ya Nzambi.” (Luka 12:21) Inki dilongi beto lenda baka na kingana yai? Inki mutindu beto lenda sadila dilongi yango na luzingu na beto?

Muntu Mosi ya Kuvandaka ti Dikambu

4. Beto lenda tuba nde muntu ya kingana ya Yezu kuvandaka muntu ya nki mutindu?

⁴ Bantu mingi mezaba kingana yina Yezu kutaka. Beto kemona nde Yezu yantikaka disolo na yandi ti bangogo yai ya pete: “Kuvandaka na mvwama mosi vandaka na bilanga; bilanga na yandi butaka bima mingi.” Yezu kutubaka ve nde muntu yina kusadilaka banzila ya mbi sambu na kuzwa kimvwana na yandi. Na kutuba yankaka, Yezu kumonisaka ve muntu yina nde yandi vandaka muntu ya mbi. Kansi, na kutadila mambu yina Yezu tubaka, beto lenda yindula nde muntu yina kusalaka ngolo na kisalu. Beto lenda bakisa nde muntu yango vandaka kuyindula mambote ya dibuta na yandi, yo yina yandi salaka bapula ya kubumba bima sambu na bilumbu kekwisa. Na mabanza ya kimuntu, beto lenda fwanisa yandi ti muntu ya kesalaka ngolo sambu na kulungisa kisalu na yandi na mutindu ya mbote.

5. Muntu ya kingana ya Yezu kukutanaka ti nki dikambu?

⁵ Yezu kubingaka muntu yina ya kingana nde mvwama. Yo ketendula nde muntu yango kuvandaka dezia ti bima mingi ya kinsuni. Kansi, mutindu Yezu kutendulaka yo, mvwama yina kuvandaka ti dikambu. Bilanga na yandi kubutaka bima mingi kibeni, kuluta yina yandi vandaka kukinga mpi yina yandi vandaka na yo mpenza mfunu to yina yandi lendaka kubumba. Yo lombaka nde yandi sala inki?

6. Inki bansola bansadi mingi ya Nzambi fwete sala bubu yai?

⁶ Bansadi mingi ya Yehowa bubu yai kekutanaka mpi ti makambu mpenza bonso mvwama yina. Bakristu ya kyeleka kesalaka kikesa sambu na kuvanda bantu ya masonga, ya kikesa, mpi ya kesalaka kisalu mbote. (Kolosai 3:22, 23) Yo vanda nde bantu mebaka bo na kisalu to bo kesalaka kisalu na bo mosi, mbala mingi bo kesalaka kisalu mbote kibeni. Ntangu bo kezolaka kumatisa bo bagrade to kebakaka mabaku yankaka ya kisalu, yo kelombaka bo nde bo baka desizio. Keti bo fwete ndima bagrade yina sambu na kukuma na mbongo mingi? Mutindu mosi, baleke-Bakristu mingi kevandaka mayele mingi na nzo-nkanda. Ebuna na nsuka, bo lenda pesa bo bakado to kufutila bo mbongo sambu bo kwenda kulonguka na banzo-nkanda yankaka ya lukumu. Keti bo fwete sala bonso bantu yonso mpi kundima bima yina bo kepesa bo?

7. Inki mutindu muntu ya kingana ya Yezu kuyidikaka dikambu na yandi?

⁷ Beto vutuka na kingana ya Yezu. Mvwama yina kusalaka nki ntangu ntoto na yandi kubutaka bimeninu mingi mpenza na mpila nde yandi vandaka ve ti kisika ya kubumba yo? Yandi bakaka lukanu ya kufwa banzo yina yandi vandaka na yo ntete mpi kutunga banzo ya kuluta nene sambu na kubumba bambuma mpi bima mingi yina yandi zwaka. Yo fwete vanda nde pula yina kupusaka yandi na kudiwa na lutaninu mpi na kumona kyese,  na mpila nde yandi yindulaka nde: “Mono ta tuba na mono mosi nde: ‘Nge me bumba bima mingi-mingi sambu na bamvula mingi. Pema ka nge, dia, nwa, sala fete.’”​—Luka 12:19.

Sambu na Nki Nzambi Kubingaka Yandi nde “Zoba”?

8. Inki kima ya mfunu muntu ya kingana ya Yezu kutadilaka ve?

⁸ Kansi, mutindu Yezu kumonisaka yo, pula ya mvwama yina kupusaka yandi na kudikusa na kuyindula nde yandi vandaka na lutaninu. Ata yo monanaka bonso nde yo vandaka mbote, pula yina kukondaka kima mosi ya mfunu, disongidila, yo tadilaka ve luzolo ya Nzambi. Muntu yina vandaka kuyindula kaka na yandi mosi, mutindu yandi takuma ti bima ya kudya, ya kunwa mpi kusepela ti bima na yandi. Yandi yindulaka nde sambu yandi vandaka ti “bima mingi,” yandi tavanda mpi ti “bamvula mingi.” Kansi, yo ke mawa na kumona nde mambu kusalamaka ve mutindu yandi yindulaka. Kaka mutindu Yezu kutubaka yo ntete, “ata ntangu muntu kele ti bima mingi, luzingu na yandi mekatuka ve na bima yina yandi kele na yo.” (Luka 12:15, NW) Kaka na mpimpa yina, bima yonso yina muntu yango kusalaka ngolo na kuzwa kusukaka na mbala mosi, sambu Nzambi songaka yandi nde: “Nge zoba yai, na mpimpa yai kaka, mono ke katula moyo na nge. Ebuna bima yai yonso ya nge me bumba, yo ta vanda ya nani?”​—Luka 12:20.

9. Sambu na nki Nzambi kubingaka muntu ya kingana nde zoba?

⁹ Ntangu yai, beto mekuma na dilongi ya mfunu ya kingana ya Yezu. Nzambi kubingaka muntu yina nde zoba. Diksionere mosi ketendula nde mitindu ya ngogo ya Kigreki ya bo sadilaka “ketendulaka ntangu yonso kukonda kubakisa.” Diksionere yango ketuba nde na kingana yai, Nzambi kusadilaka ngogo yina sambu na kumonisa nde “bapula ya mvwama yina kusalaka sambu na bilumbu kekwisa kuvandaka mpamba.” Ngogo yango ketendula ve muntu yina kele ve mayele, kansi yo ketendula “muntu yina kebuya na kundima nde yandi fwete tula ntima na Nzambi.” Ntendula yina Yezu kupesaka ya mvwama keyibusa beto mambu ya yandi songaka Bakristu ya Laodisea, na Asie Mineure, na mvu-nkama ya ntete, nde: “Nge ke tubaka nde: ‘Mono kele mvwama, mono ke na mbongo mingi, ata kima mosi me konda mono ve.’ Kansi nge zaba ve nde nge kele muntu mosi ya mawa mpenza. Nge kele nsukami, nge kele kinkonga, nge kele mpi ya kufwa-meso.”​—Kusonga 3:17.

10. Sambu na nki kuvanda ti “bima mingi” kepesa ve kivuvu ya kuzinga “bamvula mingi”?

¹⁰ Beto fwete yindulula dilongi yai. Keti beto kele bonso muntu ya kingana, disongidila nde beto kesalaka ngolo sambu na kuvanda ti “bima mingi,” kansi beto kesalaka ve mambu yina kele mfunu sambu na kuvanda ti kivuvu ya kuzinga “bamvula mingi”? (Yoane 3:16; 17:3) Biblia ketuba nde: ‘Na kilumbu ya mpasi kimvwama ta sadisaka muntu ve,’ mpi “bantu yina ke tulaka ntima na kimvwama na bo, bo ta bwa.” (Bingana 11:4, 28) Yo yina, Yezu kuyikaka ndongisila yai ya nsuka na kingana yina nde: “Yo kele mpidina na konso muntu yina ke bumbaka kimvwama sambu na yandi mosi, kansi yandi kele mvwama ve na meso ya Nzambi.”​—Luka 12:21.

11. Sambu na nki yo kele mfunu ve na kutunga kivuvu mpi lutaninu na bima ya kinsuni?

¹¹ Ntangu Yezu kutubaka nde “yo kele mpidina,” yandi monisaka nde mambu yina kukuminaka mvwama ya kingana takumina mpi bantu yina ketungaka luzingu na bo (kivuvu mpi lutaninu) kaka na bima ya kinsuni. Kifu kele ve ya ‘kubumba kimvwama sambu na beto mosi,’ kansi ya kukonda kuvanda ‘mvwama na meso ya Nzambi.’ Longoki Yakobo kupesaka lukebisu ya mutindu mosi ntangu yandi sonikaka nde: “Ntangu yai, beno kuwa mono, beno bantu yina ke tubaka  nde: ‘Bubu yai to mbasi beto ta kwenda na bwala yai to na bwala yai, beto ta kwenda kusala mvula mosi kuna, beto ta kwenda kusala kisalu na beto ya komersa, ebuna beto ta vanda na mbongo mingi.’ Beno zaba ve nki mutindu luzingu na beno ta kuma mbasi!” Yo lombaka nde bo sala inki? “Mambu ya beno zolaka kutuba, yo yai: ‘Kana Mfumu Nzambi kuzola, beto ta zinga, ebuna beto ta sala mambu yai to beto ta sala mambu yai.’” (Yakobo 4:13-15) Ata muntu kele mvwama to kele ti bima mingi, kimvwama na yandi tavanda na mfunu ve kana yandi kele ve mwvama na meso ya Nzambi. Ebuna, kuvanda mvwama na meso ya Nzambi ketendula inki?

Kuvanda Mvwama na Meso ya Nzambi

12. Inki takumisa beto bamvwama na meso ya Nzambi?

¹² Na kutuba na yandi, Yezu keswaswanisa muntu yina kele mvwama na meso ya Nzambi ti yina kebumba kimvwama sambu na yandi mosi. Yandi vandaka kutuba nde susi na beto ya ntetentete na luzingu fwete vanda ve ya kuzwa kimvwama ya kinsuni to kusepela na bima yina beto kele na yo. Kansi, beto fwete sadila kimvwama na beto sambu na kutomisa bangwisana na beto ti Yehowa mpi kukumisa yo ngolo. Ntembe kele ve nde kusala mpidina takumisa beto bamvwama na meso ya Nzambi. Sambu na inki? Sambu yo tanatila beto balusakumunu mingi ya Yehowa. Biblia kezabisa beto nde: “[Balusakumunu, NW] ya Mfumu Nzambi kaka ke kumisaka muntu mvwama; ngolo ya muntu ke yikaka yandi kima ve.”​—Bingana 10:22.

13. Inki mutindu balusakumunu ya Yehowa “ke kumisaka muntu mvwama”?

¹³ Ntangu Yehowa kesakumunaka bantu na yandi, yandi kepesaka bo kaka mambu ya kuluta mbote. (Yakobo 1:17) Mu mbandu, ntangu Yehowa kupesaka bantu ya Izraele ntoto, yo vandaka ‘ntoto mosi ya mbote’ ya kufulukaka ti “bima mingi ya kudia.” Ata Biblia ketubaka nde ntoto ya Ezipte kuvandaka mpi mutindu yina, ntoto yina Yehowa kupesaka bantu ya Izraele kuswaswanaka na kima mosi ya mfunu. Moize kusongaka bantu ya Izraele nde: “Mfumu Nzambi na beno muntu ke talaka ntoto yango ntangu yonso.” Na kutuba yankaka, bo tavanda mbote sambu Yehowa takebaka bo. Ntangu yonso yina bantu ya Izraele kubikalaka ya kwikama, Yehowa kusakumunaka bo mingi mpi yo vandaka kumonana pwelele nde mutindu na bo ya kuzinga kulutaka ya makanda yonso yina kuvandaka na nzyunga na bo. Ee, balusakumunu ya Yehowa “ke kumisaka muntu mvwama”!​—Kutanga 16:13; Kulonga 4:5-8; 11:8-15.

14. Bantu yina kele bamvwama na meso ya Nzambi kezwaka nki mambote?

¹⁴ Biblia ketuba nde beto fwete vanda ‘bamvwama na meso ya Nzambi.’ Kansi, bantu yina kele bamvwama kekudiyangisaka mingi na kusosa kuzaba mutindu bo kemonanaka na meso ya bantu yankaka. Yo kemonanaka mbala mingi na mutindu na bo ya kuzinga. Bo kesosaka kuyitukisa bantu yankaka ti bima yina Biblia kebinga nde ‘bima yina ya bantu ke tulaka lulendo sambu na yo.’ (1 Yoane 2:16) Kansi, bantu yina kele bamvwama na meso ya Nzambi, Nzambi kendimaka bo mpi kemonisaka bo mambote na yandi yina bantu mefwana ve na kubaka. Bo kele mpi ti bangwisana ya ngolo ti Nzambi. Ya kyeleka, mambote ya mutindu yai kepesaka bo kyese mpi kepusaka bo na kudiwa na lutaninu, kuluta mambote yonso yina kimvwama lenda natila muntu. (Yezaya 40:11) Ngyufula ya mebikala yo yai, Inki beto fwete sala sambu na kuvanda bamvwama na meso ya Nzambi?

Mvwama na Meso ya Nzambi

15. Inki beto fwete sala sambu na kuvanda mvwama na meso ya Nzambi?

¹⁵ Muntu ya kingana ya Yezu kusalaka bapula mpi kusalaka kisalu ya ngolo kaka sambu na kuzwa kimvwama sambu na yandi mosi, ebuna Nzambi kubingaka yandi zoba. Yo yina, sambu na kuvanda mvwama na meso ya Nzambi, beto fwete sala  kikesa sambu na kusala mingi na bisalu yina kele mpenza na valere mpi na mfunu mingi na meso ya Nzambi. Na kati ya bisalu yango, beto lenda tanga ntuma yai ya Yezu: “Beno kwenda kukumisa bantu yonso balonguki.” (Matayo 28:19) Kana beto kesadila ntangu, ngolo, mpi mayele na beto sambu na kusosa ve kutomisa luzingu na beto mosi, kansi sambu na kusala kisalu ya kusamuna Kimfumu mpi kukumisa bantu balongoki, yo kele bonso kutula mbongo na banki. Bantu yina mesalaka yo mebakaka balusakumunu mingi na kimpeve, mutindu bambandu yai kemonisa yo.​—Bingana 19:17.

16, 17. Inki baeksperiansi nge lenda ta sambu na kumonisa mutindu ya luzingu yina kekumisaka muntu mvwama na meso ya Nzambi?

¹⁶ Beto tadila mbandu ya Mukristu mosi ya bakala, na insi mosi ya Asie. Yandi vandaka kusala kisalu ya kuyidika baordinatere mpi bo vandaka kufuta yandi mbote mpenza. Kansi, kisalu na yandi vandaka kubaka yandi ntangu na yandi yonso, mpi yandi kumaka kudiwa ya kulemba na kimpeve. Nsukansuka, na kisika ya kusosa kukuma muntu ya nene, yandi katukaka na kisalu yina mpi yantikaka kusala crème ti kuteka yo na balabala na mpila nde yandi kuzwa ntangu mingi sambu na kulungisa bampusa mpi mikumba na yandi ya kimpeve. Banduku na yandi yina vandaka kusala ntete kisika mosi ti yandi yantikaka kuseka yandi, kansi nki kusalamaka na nima? Yandi ketuba nde: “Mu kumaka na mbongo mingi kuluta ntangu mu vandaka kuyidika baordinatere. Yo pesaka munu kyese sambu mu kevandaka dyaka ve ti basusi yina mu vandaka na yo na ntangu mu vandaka kusala kisalu ya kuyidika baordinatere. Mpi kima ya kuluta mfunu kele nde mu kekudiwa mpenza penepene ya Yehowa.” Nsoba kusadisaka Mukristu yai na kusala kisalu ya ntangu yonso, mpi ntangu yai yandi kesala na biro ya filiale ya Bambangi ya Yehowa na insi na yandi. Ya kyeleka, balusakumunu ya Yehowa kekumisaka muntu mvwama.

¹⁷ Mbandu yankaka kele ya nkento mosi ya meyelaka na dibuta mosi ya bo vandaka kutadila kusala banzo-nkanda bonso kima mosi ya valere kibeni. Yandi longukaka na iniversite na France, na Mexique, ti na Suisse mpi kisalu mosi ya mbote vandaka kukinga yandi. Yandi ketuba nde: “Mu vandaka kununga mpenza. Bantu vandaka kuzitisa munu mpi mu vandaka kuzwa mabaku mingi ya sipesiali. Kansi, mu vandaka ve na kyese.” Na nima, yandi longukaka mambu ya Yehowa. Yandi ketuba nde: “Na ntangu mu vandaka kuyela na kimpeve, mpusa ya kusepedisa Yehowa mpi ya kuvutudila yandi mwa bima yina yandi mepesaka munu kusadisaka munu na kubakisa mpenza nzila ya mu fwete landa, disongidila, kusadila yandi na ntangu yonso.” Yandi katukaka na kisalu na yandi, mpi ntama mingi ve kubakaka mbotika. Banda bamvula 20 ya meluta, yandi kesalaka na kyese yonso kisalu ya kimupasudi-nzila ya ntangu yonso. Yandi ketuba nde: “Bantu mingi keyindulaka nde mu mebebisaka mayele na munu. Ata mpidina, bo kendimaka nde mu kele na kyese, mpi bo kesepelaka na minsiku yina ketwadisaka luzingu na munu ntangu yai. Konso kilumbu, mu kesambaka Yehowa sambu yandi sadisa munu na kuvanda ya kudikulumusa na mpila nde yandi ndima munu.”

18. Bonso Polo, inki mutindu beto lenda vanda bamvwama na meso ya Nzambi?

¹⁸ Saule, yina kukumaka ntumwa Polo, zolaka kukuma muntu ya nene. Kansi, yandi sonikaka nde: “Mambu yonso mpi; mono ke monaka yo mfunu ve sambu na mambu yai ya kuluta mfunu mpenza: kuzaba Mfumu na beto Yesu Kristo. Mono me bikisaka mambu yonso sambu na yandi.” (Filipi 3:7, 8) Sambu na Polo, kimvwama yina yandi bakaka na nzila ya Kristu kulutaka konso kima yina nsi-ntoto yai lendaka kupesa yandi. Mutindu mosi, kana beto yambula bampusa na beto yonso ya bwimi mpi kulanda luzingu ya kinzambi, beto mpi tavanda bamvwama na meso ya Nzambi. Ndinga ya Nzambi kendimisa beto nde: “Zitisa Mfumu Nzambi, kudikulumusa, ebuna nge ta kuma mvwama, nge ta baka lukumu, nge ta vanda mpi na luzingu ya nda.”​—Bingana 22:4.

Keti Nge Lenda Tendula?

• Muntu ya kingana ya Yezu kuvandaka ti nki dikambu?

• Sambu na nki Nzambi kubingaka muntu ya kingana nde zoba?

• Kuvanda mvwama na meso ya Nzambi ketendula inki?

• Inki mutindu beto lenda kuma bamvwama na meso ya Nzambi?

[Bangyufula ya disolo ya kulonguka]

[Kifwanisu ya kele na lutiti 30]

‘Balusakumunu ya Nzambi kekumisaka muntu mvwama’