Kinga Kilumbu ya Yehowa ti Kukanga Ntima
Kinga Kilumbu ya Yehowa ti Kukanga Ntima
“Beno yika na lukwikilu na beno . . . kukanga ntima.”—2 PIERE 1:5, 6, NW.
1, 2. Sambu na nki Bakristu fwete kanga ntima na bampasi?
KILUMBU ya nene ya Yehowa mekuma penepene mpenza. (Yoele 1:15; Sofonia 1:14) Beto Bakristu yina kele ti lukanu ya kubikala ya kwikama na Nzambi, beto kekinga na kyese yonso ntangu yina Yehowa tanungisa kimfumu na yandi. Kansi na ntangu ya beto kevingila, bantu kemenga beto, kevweza beto, kenyokula beto, mpi kefwa beto sambu na lukwikilu na beto. (Matayo 5:10-12; 10:22; Kusonga 2:10) Yo kelomba kukanga ntima na bampasi yai. Ntumwa Piere kelongisila beto nde: “Beno yika na lukwikilu na beno . . . kukanga ntima.” (2 Piere 1:5, 6, NW) Beto fwete kanga ntima, sambu Yezu tubaka nde: “Muntu yina ta kanga ntima tii na nsuka, yandi ta guluka.”—Matayo 24:13.
2 Dyaka, beto kebelaka, kewaka mpasi ya kufwisa muntu, mpi kekutanaka ti bampasi yankaka. Kana beto vidisa lukwikilu na beto, Satana tasepela mingi mpenza! (Luka 22:31, 32) Kansi, na lusadisu ya Yehowa, beto lenda kanga ntima na bampasi ya mutindu na mutindu. (1 Piere 5:6-11) Beto tadila mambu ya kyeleka yina bantu yankaka mekutanaka na yo na luzingu, yina kemonisa nde beto lenda kinga kilumbu ya Yehowa ti kukanga ntima mpi ti lukwikilu ya ngolo.
Maladi Mekangaka Bo Ve Nzila
3, 4. Pesa mbandu ya kemonisa nde beto lenda sadila Yehowa na kwikama yonso, ata beto kebela.
3 Nzambi kebelulaka beto ve na mutindu ya kuyituka, kansi yandi kepesaka beto ngolo ya kukanga ntima na maladi. (Nkunga 41:2-4) Sharon kutubaka nde: “Kana mu yindula mbote, mu ketambulaka na velo ya bikata banda kileke na munu. Banda mu butukaka, mu kebelaka maladi ya ntu mpi mu mezwaka ve dibaku ya kusakana bonso bana yankaka.” Kulonguka mambu ya Yehowa ti balusilu na yandi ya kupesa mavimpi ya kukuka kupesaka Sharon kivuvu. Ata yandi ketubaka mpi ketambulaka na mpasi, yandi kebakaka kyese mingi na kisalu ya kusamuna. Na mvu 1993, yandi tubaka nde: “Mavimpi na munu lenda landa na kubeba, kansi ntima ya mu ketulaka na Nzambi mpi bangwisana na munu ti yandi kele bima ya kuluta mfunu yina kesadisaka munu na kuzinga. Mu ke na kyese mingi na kuvanda na kati ya bantu ya Yehowa mpi na kubaka lusadisu na yandi ntangu yonso!”
4 Ntumwa Polo kulongisilaka Bakristu ya Tesalonika na ‘kupesa kikesa na bantu yina ke na ntima ya petepete.’ (1 Tesalonika 5:14) Mambu bonso kulemba ya nitu lenda nata muntu na kunyokwama na mabanza. Na mvu 1993, Sharon kusonikaka nde: “Sambu mu vandaka kumona luzingu mfunu ve ata fyoti, mu . . . nyokwamaka mingi na mabanza na nsungi ya bamvula tatu. . . . Bankuluntu vandaka kupesa munu kikesa ti bandongisila. . . . Na nzila ya Nzozulu ya Nkengi, Yehowa melongaka munu na zola yonso mambu ya metala kunyokwama na mabanza. Ya kyeleka, yandi kekudibanzaka sambu na bantu na yandi mpi kebakisaka mawi na beto.” (1 Piere 5:6, 7) Sharon kesadila Nzambi na kwikama yonso tii bubu yai, mpi yandi kekinga kilumbu ya nene ya Yehowa.
5. Inki nzikisa kemonisa nde Bakristu lenda kanga ntima na bampasi ya ngolo?
5 Bakristu yankaka kenyokwamaka mingi sambu na mambu ya bo kutanaka na yo na luzingu. Harley kunwanaka na Mvita ya Zole ya Ntoto ya Mvimba, mpi yandi monaka mpenza nku ya bantu, ebuna yandi kumaka kulala bandosi ya mbi sambu na mvita yina. Kana yandi ke na mpongi, yandi vandaka kutata: “Keba! Keba!” Lere yandi tatelama na mpongi, nge tamona yandi metoka ngolo. Kansi, yandi wakanisaka luzingu na yandi na minsiku ya Nzambi, mpi na nima, yandi vandaka kulala dyaka ve mbala mingi bandosi ya mutindu yina.
6. Inki mutindu Mukristu mosi nungaka na kunwana ti bampasi ya mawi?
6 Mukristu mosi ya bo kangaka ti maladi mosi ya ntu ya bo kebingaka nde trouble bipolaire vandaka kumona mpasi mpenza sambu na kusamuna nzo na nzo. Kansi, yandi kwaminaka na kisalu yina sambu yandi vandaka kubakisa nde yo tagulusa yandi mpi bantu yina kendimaka yo. (1 Timoteo 4:16) Bantangu yankaka, yandi vandaka kukuka nkutu ve kukokula na kyelo mosi, kansi yandi tubaka nde: “Nsuka-nsuka, mu vandaka kudiyala, kukwenda na kyelo ya kelanda mpi kumeka dyaka. Sambu mu landaka na kusala kisalu ya kusamuna, mu vandaka ntangu yonso ti kimpeve ya mbote.” Kukwenda na balukutakanu kuvandaka mpi mpasi, kansi mpangi yai kubakisaka mfunu ya balukutakanu ya kimpeve. Yo yina, yandi vandaka kusala kikesa sambu na kuvanda pana.—Baebreo 10:24, 25.
7. Ata bantu yankaka kewaka boma ya kutuba na meso ya bantu mingi to ya kukwenda na balukutakanu, inki mutindu bo kemonisaka kikalulu ya kukanga ntima?
7 Bakristu yankaka kewaka boma ya kuluta mingi sambu na mambu to bima yankaka. Bo kebingaka boma yina nde phobie. Mu mbandu, bo lenda wa boma ya kutuba na meso ya bantu mingi to nkutu ya kukwenda na balukutakanu. Yindula mpasi yina bo kemonaka sambu na kupesa bakomantere na balukutakanu to kusala badevware na Nzo-Nkanda ya Kisalu ya Teokrasi! Ata mpidina, bo kekangaka ntima, mpi beto kebakaka kikesa mingi na mutindu bo kekwisaka na balukutakanu mpi kesalaka mambu yai yonso.
8. Inki kima kesadisaka mingi mpenza na ntangu muntu kenwana ti kunyokwama ya mabanza?
8 Kupema mpi kulala mingi lenda sadisa muntu na kukanga ntima na kunyokwama ya mabanza. Yo lenda vanda mfunu na kusosa lusadisu ya minganga. Kansi, kima ya kesadisaka mingi mpenza kele kutula ntima na Nzambi na nzila ya kisambu. Nkunga 55:23 ketuba nde: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.” Yo yina, “tula ntima na nge yonso na Mfumu Nzambi.”—Bingana 3:5, 6.
Kukanga Ntima na Mpasi ya Kufwisa Muntu
9-11. (a) Inki lenda sadisa beto na kukanga ntima na mawa ntangu muntu ya beto kezolaka mefwa? (b) Inki mutindu mbandu ya Ana lenda sadisa beto na kukanga ntima na mpasi ya kufwisa muntu?
9 Ntangu lufwa kekabulaka bantu ya dibuta, yo kenataka mawa mingi mpenza. Abrahami kudilaka na lufwa ya nkento na yandi Sara ya yandi vandaka kuzola mingi. (Kuyantika 23:2) Ata Yezu, muntu ya kukuka, ‘kudilaka’ ntangu nduku na yandi Lazare kufwaka. (Yoane 11:35) Yo yina, yo ke mbi ve na kumona mpasi na ntima kana muntu ya nge kezolaka mefwa. Kansi, Bakristu kezaba nde lufutumuku tavanda. (Bisalu 24:15) Yo yina, bo ‘kevandaka na mawa ve bonso bantu ya nkaka yina ke tulaka ntima na Nzambi ve.’—1 Tesalonika 4:13.
10 Inki mutindu beto lenda nunga mpasi ya kufwisa muntu? Ziku mbandu yai lenda sadisa beto. Kana nduku na beto mesala nzyetelo, mbala mingi beto kewaka ve mpasi ntangu ya nda, sambu beto kezaba nde beto tamona yandi dyaka ntangu yandi tavutuka. Kutadila lufwa ya Mukristu ya kwikama na mutindu yai lenda fyotuna kyadi na beto, sambu beto kezaba nde yandi tafutumuka.—Longi 7:1.
11 Beto lenda kanga ntima na mpasi ya kufwisa muntu kana beto ketula ntima na beto ya mvimba na Nzambi ya “lusadisu na beto yonso.” (2 Korinto 1:3, 4) Kima yankaka ya lenda sadisa beto kele kuyindula na mambu yina mufwidi Ana, ya mvu-nkama ya ntete, kusalaka. Yandi kumaka mufwidi na nima ya bamvula kaka nsambwadi ya makwela. Kansi, tii ntangu yandi kumaka ti bamvula 84, yandi vandaka kaka kusadila Yehowa na tempelo. (Luka 2:36-38) Ntembe kele ve nde luzingu ya kudipesa ya mutindu yina kusadisaka yandi na kununga mpasi ya ntima mpi mawi ya kudiwa yandi mosi. Kusala mbala na mbala bisalu ya Bukristu, mu mbandu kisalu ya kusamuna Kimfumu, lenda sadisa beto na kukanga ntima na mpasi ya kufwisa muntu.
Kukanga Ntima na Bampasi ya Mutindu na Mutindu
12. Bakristu yankaka mekangaka ntima na nki mpasi ya metala luzingu ya dibuta?
12 Bakristu yankaka fwete kanga ntima na bampasi ya metala luzingu ya dibuta. Mu mbandu, kana nkwelani mosi mesala bizumba, yo lenda vanda ti malanda ya mbi mpenza na dibuta! Sambu na mpasi mpi mawa ya ngolo ya yandi kewa na ntima, nkwelani ya muntu yina mesala bizumba lenda kuka dyaka ve na kulala mpongi mpi lenda kuma kudila-dila. Kusala mambu ata ya pete lenda kuma mpasi na mpila nde yandi kesala bifu mpi kebula mabaku. Mbala yankaka yandi lenda kuka ve na kudya, lenda konda, mpi kukuma ti mawi ya kuvalangasa. Yo lenda vandila yandi mpasi na kusala bisalu ya Bukristu. Mpi bana lenda mona mpasi mingi mpenza sambu na dyambu yai!
13, 14. (a) Inki kikesa nge kebaka na kisambu yina Salomo salaka na kilumbu ya bo kangulaka tempelo na mbala ya ntete? (b) Sambu na nki beto kelombaka mpeve santu na kisambu?
13 Kana beto mekutana ti bampasi ya mutindu yai, Yehowa kepesaka beto lusadisu ya beto kevandaka na yo mfunu. (Nkunga 94:19) Kisambu yina Salomo salaka na kilumbu ya bo kangulaka tempelo ya Yehowa na mbala ya ntete, kemonisa nde Nzambi kewaka bisambu ya bantu na yandi. Salomo kusambaka Nzambi nde: “Kana bantu na nge Israele mutindu bo ke na mawa na ntima, bo samba nge ti kubondila nge, bo kwisa na nzo yai bo tedimisa maboko na bo sambu na kusamba nge, pana nge Mfumu Nzambi kuna na zulu ya nge kele, wa bo, wila bo mawa nge sadisa bo. Nge mpamba muntu kuzaba ntima ya bantu yonso; sala na konso muntu mutindu kele kisalu na yandi, mpidina bantu na nge ta tinaka nge boma bilumbu yonso ya bo kele na ntoto yai ya nge pesaka na bankaka na beto.”—1 Bantotila 8:38-40.
14 Yo lenda vanda mingimingi mfunu na kulanda na kusamba sambu na kulomba mpeve santu. (Matayo 7:7-11) Kyese ti ngemba kele na kati ya bikalulu ya mbuma ya mpeve. (Galatia 5:22, 23) Beto kewaka kyese mingi mpenza ntangu Tata na beto ya zulu kepesaka mvutu na bisambu na beto, na ntangu yina kyese keyingaka mawa, mpi ngemba keyingaka mpasi!
15. Inki baverse lenda sadisa beto na kufyotuna susi?
15 Na ntangu beto kekanga ntima na mpasi ya mingi, beto fwete zaba nde susi kevandaka na kiteso mosi buna. Kansi, beto lenda fyotuna susi yina kana beto yibuka mambu yina Yezu tubaka nde: “Beno lenda mona mpasi ve nde nki beno ta dia to nki beno ta nwa sambu na luzingu na beno, beno lenda mona mpasi mpi ve nde nki bilele beno ta lwata na nitu na beno. . . . Kansi, beno landa kaka na kusosa Kimfumu [ya Nzambi] ti mambu yina yandi ke zolaka, ebuna yandi ta yika beno bima yina yonso.” (Matayo 6:25, 33, 34) Ntumwa Piere kelongisila beto na kupesa na Nzambi ‘mabanza na beto yonso yina keyangisaka beto sambu yandi’ kekudibanzaka sambu na beto. (1 Piere 5:6, 7) Yo mefwana na kusala bikesa sambu na kumanisa dikambu ya beto mekutana na yo. Kansi, na nima ya kusala yonso yina beto lendaka, kulanda na kutula susi tasadisa beto ve. Kima ya lenda sadisa beto kele kusamba sambu na dikambu yango. Muyimbi-bankunga kuyimbaka nde: “Kudipesa na Mfumu Nzambi, tula yandi ntima, ebuna yandi ta sadisa nge.”—Nkunga 37:5.
16, 17. (a) Sambu na nki beto kekondaka ve susi? (b) Kana beto sadila mambu yina kele na Filipi 4:6, 7, inki beto tabaka?
16 Ntumwa Polo kusonikaka nde: “Beno kumona mpasi ve na ntima sambu na konso mambu yina; kansi konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi. Ebuna ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.” (Filipi 4:6, 7) Sambu beto kele bana ya kukonda kukuka ya Adami, beto lenda konda ve susi. (Roma 5:12) Izaki ti Rebeka kuvandaka bibuti ya Ezau mpi bo vandaka kutina Nzambi boma, kansi bankento ya dikanda ya Heti yina Ezau kubakaka, “pesaka [bo] mpasi mingi.” (Kuyantika 26:34, 35) Yo fwete vanda nde maladi kupesaka Timote na Trofime susi. (1 Timoteo 5:23; 2 Timoteo 4:20) Polo vandaka na susi sambu na bampangi na yandi Bakristu. (2 Korinto 11:28) Kansi, Nzambi yina “ke ndimaka bisambu ya bantu” kevandaka ntangu yonso ya kuyilama sambu na kuwa bantu yina kezolaka yandi.—Nkunga 65:3.
17 Na ntangu beto kekinga kilumbu ya Yehowa, beto kebaka lusadisu ti kikesa na “Nzambi yina ke pesaka beto ngemba.” (Filipi 4:9) Yehowa “ke zolaka bantu ti kuwila bo mawa,” yandi ‘kele muntu ya mbote,’ mpi “yandi zaba mbote nde beto kele kaka putulu.” (Kubasika 34:6; Nkunga 86:5; 103:13, 14) Yo yina, bika beto ‘lomba yandi konso mambu yina ya beto ke na yo mfunu,’ sambu yo tanatila beto “ngemba ya Nzambi,” ngemba ya kuluta yina bantu lenda bakisa ve.
18. Mutindu Yobi 42:5 ketuba, inki mutindu muntu lenda “mona” Nzambi?
18 Ntangu Nzambi kepesaka mvutu na bisambu na beto, beto kebakisaka nde yandi kele ti beto. Na nima ya kukanga ntima na bampasi na yandi, Yobi tubaka nde: “Mono vandaka kuzaba nge [Yehowa] kaka na kutuba ya bantu ya nkaka, kansi ntangu yai mono me mona nge na meso na mono mosi.” (Yobi 42:5) Kana beto keyindula na mabanza, kele ti meso ya lukwikilu, mpi kemonisa ntonda, beto lenda yindula na bangwisana na beto ti Nzambi mpi ‘kumona’ yandi mpenza. Kinduku ya ngolo ya mutindu yai kenatilaka beto ngemba ya ntima ti ya mabanza!
19. Inki mambu tasalama kana beto pesa Yehowa ‘mabanza na beto yonso yina keyangisaka beto’?
19 Kana beto pesa Yehowa ‘mabanza na beto yonso yina keyangisaka beto,’ beto lenda kanga ntima na bampasi mpi kuvanda na ngemba ya kati yina tataninaka ntima ti mabanza na beto. Na kati ya ntima na beto, beto tavanda na ngemba, beto takudiyangisa ve. Mabanza na beto tanyokwama ve na susi.
20, 21. (a) Mbandu ya Etiene kemonisa nki na yina metala kuvanda na ngemba ntangu bo kenyokula beto? (b) Pesa bambandu ya ntangu na beto ya bantu kuvandaka na ngemba na ntangu bo vandaka kukanga ntima na bampasi.
20 Longoki Etiene kuvandaka na ngemba na ntangu yandi kangaka ntima na mumekamu ya ngolo ya lukwikilu na yandi. Na ntwala ya kuta kimbangi ya nsuka, bantu yonso yina vandaka na Sanedreni “monaka nde ilungi na yandi vandaka bonso ilungi ya wanzio.” (Bisalu 6:15) Ilungi na yandi kuvandaka pima, bonso ya wanzyo, to bonso ya kinati-nsangu ya Nzambi. Ntangu Etiene kumonisaka pwelele mukumba na bo na lufwa ya Yezu, bazuzi “dasukaka. Bo vandaka kukangisa meno na bo ngolo sambu bo wilaka Etiene makasi mpenza.” Kansi Etiene “vandaka ya kufuluka na mpeve ya Nzambi. Yandi talaka na zulu, ebuna yandi monaka lukumu ya Nzambi. Yandi monaka mpi Yesu me telama na diboko ya [kitata] ya Nzambi.” Mbona-meso yina kupesaka Etiene kikesa, ebuna yandi bikalaka ya kwikama tii na lufwa. (Bisalu 7:52-60) Ata beto kemonaka ve bambona-meso, beto lenda vanda ti ngemba yina Nzambi kepesaka ntangu bo kenyokulaka beto.
21 Beto tadila mawi ya Bakristu yankaka yina bantu ya Nazi kufwaka na Mvita ya Zole ya Ntoto ya Mvimba. Mukristu mosi kutaka eksperiansi na yandi na tribinale, yandi tubaka nde: “Bo zengilaka munu nkanu ya lufwa. Mu waka, mpi na nima mu tubaka bangogo yai, ‘Vanda ya kwikama tii na lufwa,’ ti mwa bangogo yankaka ya Mfumu na beto, mpi mu sukaka pana. . . . Kansi, ntangu yai beno kudiyangisa ve, sambu mu kewa ngemba mosi yina beno lenda yindula ve!” Mbandu yankaka ketadila leke mosi ya Mukristu. Ntangu fyoti na ntwala nde bantu ya Nazi kuzenga yandi ntu, yandi sonikilaka bibuti na yandi nde: “Beto ke dezia na kati-kati ya mpimpa. Mu lenda soba dyaka mabanza na munu. Kansi, keti mu tavanda dyaka na kyese na ntoto yai kana mu buya Mfumu na beto? Ve ata fyoti! Ntangu yai, beno tula ntima nde mu kefwa na kyese mpi na ngemba.” Ntembe kele ve nde Yehowa kesadisaka bansadi na yandi ya kwikama.
Nge Lenda Kanga Ntima!
22, 23. Ntangu nge kekinga kilumbu ya Yehowa ti kukanga ntima, nge lenda tula ntima na inki?
22 Mbala yankaka nge takutana ve ti bampasi ya beto metadila. Ata mpidina, Yobi yina vandaka kutina Nzambi boma, vandaka na raison ntangu yandi tubaka nde: “Muntu yonso me butuka na ntoto yai ke na luzingu mosi ya nkufi ti ya mpasi.” (Yobi 14:1) Mbala yankaka nge kele kibuti yina kesala ngolo sambu na kupesa bana na nge lutwadisu ya kekatuka na Biblia. Bo fwete kanga ntima na bampasi ya bo kekutanaka na yo na nzo-nkanda, kansi nge kevandaka na kyese mingi ntangu bo kekangamaka na Yehowa ti na minsiku na yandi ya lunungu! Ziku nge kemona mpasi mpi kekutana ti bampukumuna na kisika ya kisalu. Kansi, nge lenda kanga ntima na mambu yai ti yankaka, sambu Yehowa ‘kebakaka kilo na nge konso kilumbu.’—Nkunga 68:20.
23 Nge lenda yindula nde nge ke kaka muntu ya mpamba, kansi zaba nde Yehowa tavila ve ata fyoti kisalu na nge mpi zola ya nge kemonisa sambu na zina na yandi ya santu. (Baebreo 6:10) Yandi tasadisa nge na kukanga ntima na mimekamu ya lukwikilu. Yo yina, tubila mpusa na nge ya kusala luzolo ya Nzambi na bisambu na nge mpi tula yo na balukanu na nge. Ebuna, nge lenda tula ntima nde Nzambi tasakumuna mpi tasadisa nge ntangu nge kekinga kilumbu na yandi ti kukanga ntima.
Inki Mvutu Nge Tapesa?
• Sambu na nki Bakristu fwete kanga ntima?
• Inki lenda sadisa beto na kukanga ntima na maladi mpi na mpasi ya kufwisa muntu?
• Inki mutindu kisambu lenda sadisa beto na kukanga ntima na bampasi?
• Sambu na nki beto lenda kinga kilumbu ya Yehowa ti kukanga ntima?
[Bangyufula ya disolo ya kulonguka]
[Kifwanisu ya kele na lutiti 17]
Kutula ntima na Yehowa kesadisaka beto na kukanga ntima na mpasi ya kufwisa muntu