Batolotolo ya Bo Tasala Sambu na Kufwa Nge Tanunga Ve

“Batolotolo ya bo ta sala sambu na kufwa nge; yo ta sala nge kima ve.”​—YEZAYA 54:17.

1, 2. Inki mutindu mambu yina Bambangi ya Yehowa ya Albanie kukutanaka na yo kemonisa bukyeleka ya Yezaya 54:17?

 BAMVULA mingi meluta, kibuka mosi ya Bakristu ya kukonda boma vandaka kuzinga na kabwala mosi na zulu ya ngumba, na Eropa ya sudi ya esti. Guvernema mosi ya kominizme yina vandaka kukwikila ve na Nzambi kusalaka yonso sambu na kufwa bo. Kansi, bampasi, baboloko, mpi bansangu ya luvunu yina bo vandaka kupanza sambu na bo kunungaka ve na kufwa bo. Kibuka ya bantu yango kuvandaka banani? Bambangi ya Yehowa ya Albanie. Ata yo vandaka mpasi mpenza sambu nde bo sala balukutakanu mpi kusamuna, kukanga ntima na bo na nsungi ya bamvula mingi kupesaka lukumu na zina ya Yehowa mpi ya Bukristu. Na mvula meluta, kilumbu bo kangulaka babiro ya filiale na bo ya mpa, mpangi mosi ya kubikalaka ya kwikama bamvula mingi kutubaka nde: “Ata konso bikesa yina Satana kesala, yandi kelanda na kubela mpi Yehowa kelanda na kununga!”

² Mambu yai yonso kele mpenza nzikisa ya kemonisa bukyeleka ya lusilu yina kele na Yezaya 54:17 ya Nzambi kusilaka na bantu na yandi. Yo ketuba nde: “Batolotolo ya bo ta sala sambu na kufwa nge; yo ta sala nge kima ve; kiteso mosi, konso muntu yina ta zola kufunda nge, nge ta bedisa yandi.” Masolo ya luzingu ya bantu memonisaka mpenza nde nsi-ntoto ya Satana lenda sala ata kima mosi ve yina lenda kanga bansadi ya Yehowa Nzambi nzila ya kusambila yandi.

Bikesa ya Satana Kenunga Ve

3, 4. (a) Inki mambu beto lenda tanga na kati ya batolotolo yina Satana kesadilaka? (b) Na nki mutindu batolotolo ya Satana kenunga ve?

³ Na kati ya batolotolo yina Satana kesadilaka sambu na kunwanisa bansambidi ya kyeleka, beto lenda tanga kubuyisama ya kisalu ya kusamuna, nku, baboloko, mpi ‘bazuzi yina ke zengaka makambu na nzila ya mbote ve.’ (Nkunga 94:20) Ata na ntangu yai ya Bambangi ya Yehowa ke na kulonguka disolo yai, Bakristu yai  ya kyeleka ke na ‘kumekama’ na bansi mingi sambu na yina metala kwikama na bo na Nzambi.​—Kusonga 2:10.

⁴ Mu mbandu, biro mosi ya filiale ya Bambangi ya Yehowa kutindaka rapore nde na nsungi ya mvula mosi mpamba, bo bulaka ngolo kibeni bansadi ya Nzambi 32 na ntangu bo vandaka kusamuna. Dyaka, ba polisi kukangaka Bambangi 59, baleke ti bambuta mpi babakala ti bankento yina vandaka kusamuna na bisika ya bantu mingi. Bo bakaka banzila ya maboko ya bampangi yankaka, bo kangaka bo bafoto, mpi bo tulaka bo na boloko bonso bantu ya mubulu. Bankaka dyaka, bo bulaka bo ngolo kibeni. Na insi yankaka, bo mekangaka Bambangi ya Yehowa kuluta 1 100, bo mefutisaka bo amande, to mebulaka bo. Na kati ya ntalu yai, bo kangaka bampangi kuluta 200 na ntangu bo vukanaka sambu na kusungimina lufwa ya Yezu! Ata mpidina, mpeve ya Yehowa kesadisa bantu na yandi na kulanda na kuzinga, ata na ntwala ya bampasi ya ngolo, yo vanda na bansi yai to na bansi yankaka. (Zakaria 4:6) Makasi ya ngolo yina mbeni kele na yo takanga ve munoko ya bantu yina kesadilaka Yehowa. Ee, beto ketula mpenza ntima nde ata tolotolo mosi ve lenda bebisa lukanu ya Nzambi.

Beto Kemonisa Luvunu ya Bantu Yina Kefundaka Beto

5. Inki mambu ya luvunu bantu vandaka kutuba sambu na bansadi ya Yehowa na mvu-nkama ya ntete?

⁵ Yezaya kubikulaka nde bantu ya Nzambi tamonisa luvunu ya bantu yina kefundaka bo. Na mvu-nkama ya ntete, mbala mingi bo vandaka kukusila Bakristu makambu mpi kutuba nde bo vandaka bantu ya mbi. Mambu yai ya kele na Bisalu 16:20, 21 kemonisa mwa mbandu ya mambu yina ya luvunu: “Bantu yai me bwisa bwala na beto kisakasaka, . . . bo ke longa beto . . . bifu yina kele nsiku beto bantu ya kimfumu ya Roma na kundima yo ti na kulanda yo.” Na dibaku yankaka, bamfumu ya mabundu yina kuvandaka bambeni kusosaka kupusa bamfumu ya bwala na kunwanisa balongoki ya Kristu, mpi bo tubaka nde: “Bantu yai me tula bansi yonso kisakasaka, ebuna ntangu yai bo me kwisa kukuma awa! [Mpi bo] ke fwaka bansiku ya ntotila ya nene ya Roma.” (Bisalu 17:6, 7) Bo vandaka kutuba nde ntumwa Polo kuvandaka “muntu ya matata mingi” mpi mfumu ya kadibundu yina vandaka kukotisa mubulu na “bansi yonso.”​—Bisalu 24:2-5.

6, 7. Inki kele mutindu mosi yina Bakristu ya kyeleka kemonisaka luvunu ya bantu yina kefundaka bo?

⁶ Yo yina, yo keyitukisa beto ve na kumona nde bubu yai, bo mekusilaka Bakristu ya kyeleka makambu mingi mpi bo mepanzaka bansangu ya luvunu sambu na kubebisa lukumu na bo. Sambu na nki beto lenda tuba nde beto kemonisaka luvunu ya bantu yai ya kefunda beto?​—Yezaya 54:17.

⁷ Mbala mingi, bikalulu ya mbote ya Bambangi ya Yehowa kebedisaka mambu mpi bansangu ya luvunu yina bantu ketubaka sambu na bo. (1 Piere 2:12) Ntangu Bakristu kezitisaka bansiku ya leta mpi kemonisaka bikalulu ya mbote na mutindu bo kekudibanzaka na masonga yonso sambu na mambote ya bantu yankaka, mambu ya mbi yina bo ketubaka sambu na bo kemonanaka nde yo kele ya luvunu. Bikalulu na beto ya mbote ketubaka yo mosi. Ntangu bantu yina ketalaka beto kemonaka nde beto kelandaka na kusala mambu ya mbote, mbala mingi yo kepusaka bo na kukumisa Tata na beto ya zulu mpi na kundima nde mutindu ya luzingu ya bansadi ya Yehowa meluta mpenza.​—Yezaya 60:14; Matayo 5:14-16.

8. (a) Bantangu yankaka, nki lenda vanda mfunu sambu na kutubila mambu ya Biblia ya beto kekwikilaka? (b) Na mbandu ya Kristu, nki mutindu beto kemonisaka luvunu ya bantu yina kefundaka beto?

⁸ Katula bikalulu na beto ya Bukristu, bantangu yankaka yo lenda vanda mfunu na kutuba ti kikesa yonso mambu ya Biblia yina beto kekwikilaka. Mutindu mosi ya kusala yo kele kunata makambu na Leta to na batribinale. (Estere 8:3; Bisalu 22:25-29; 25:10-12) Kilumbu mosi, ntangu Yezu kuvandaka na ntoto, yandi tubilaka ti kikesa yonso bambeni yina vandaka kusosa bifu na malongi na yandi mpi yandi monisaka luvunu ya mambu yina bo vandaka kutuba. (Matayo 12:34-37; 15:1-11) Na mbandu ya Yezu, kana beto kuzwa mabaku ya kupesa bankaka ntendula ya pwelele ya mambu yina beto kekwikilaka na ntima na beto ya mvimba, beto fwete sadila yo. (1 Piere 3:15) Bika nde beto pesa ve ata fyoti nzila nde kuseka yina bo kesekaka beto na nzo-nkanda,  na kisalu, to na bantu ya fami na beto yina kele ve Bakristu kusala nde beto yambula kuzabisa kyeleka ya Ndinga ya Nzambi.​—2 Piere 3:3, 4.

Yeruzalemi Takuma “Ditadi Mosi ya Kilo”

9. ‘Ditadi ya kilo’ yina Zakaria 12:3 vandaka kutubila nki Yeruzalemi, mpi banani kemonisa yo na ntoto?

⁹ Mbikudulu ya Zakaria kemonisa kikuma yina makanda kenwanisa Bakristu ya kyeleka. Tala mambu yina Zakaria 12:3 ketuba: “Na kilumbu yina mono ta kumisa Yeruzalemi bonso ditadi mosi ya kilo.” Mbikudulu yai vandaka kutubila nki Yeruzalemi? Mbikudulu ya Zakaria ya metala Yeruzalemi ketubila ‘Yeruzalemi ya zulu,’ disongidila, Kimfumu ya zulu yina Bakristu bapakulami tayala. (Baebreo 12:22) Bantu fyoti na kati ya bantu yai ya tayala na Kimfumu ya Mesia kele ntete awa na ntoto. Kumosi ti banduku na bo “mameme ya nkaka,” bo kelongisila bantu na kundima Kimfumu ya Nzambi sambu bubu yai ntangu kele ntete. (Yoane 10:16; Kusonga 11:15) Inki makanda kesala ntangu bo kewa emvitasio yai? Inki mutindu ya lusadisu Yehowa kepesa bansambidi ya kyeleka bubu yai? Bika beto baka mvutu na kutadila Zakaria kapu ya 12. Kana beto sala mutindu yina, yo lenda sadisa beto na kundima mpenza nde ata ‘tolotolo mosi ve’ tanunga bapakulami ya Nzambi mpi banduku na bo ya mekudipesaka na yandi.

10. (a) Sambu na nki makanda kenwanisa bantu ya Nzambi? (b) Inki kekuminaka bantu yina kesosa kukatula ‘ditadi ya kilo’ na nzila?

¹⁰ Zakaria 12:3 kemonisa nde makanda “ta lwala.” Inki mutindu dyambu yai ke na kusalama? Nzambi mepesaka nsiku nde beto fwete samuna nsangu ya mbote ya Kimfumu. Bambangi ya Yehowa kelungisaka mbotembote mukumba yai ya kusamuna. Kansi, kuzabisa bantu nde Kimfumu kele kima mosi kaka yina bo fwete tudila ntima mekumaka ‘ditadi ya kilo’ sambu na makanda. Sambu na kusosa kukatula ditadi yango na nzila, bo kekanga bansamuni ya Kimfumu nzila na mpila nde bo sala ve kisalu ya Nzambi. Ntangu makanda yango kesala mutindu yina, bo ‘kekudilwadisa’ mpi kekudizenga bo mosi. Sambu bo kenunga ve, bo kewa nsoni mpi lukumu na bo kebeba. Bo takuka ve kukanga munoko ya bansambidi ya kyeleka, yina kebakaka na valere dibaku na bo ya kusamuna “nsangu ya mbote ya mvula na mvula” ya Kimfumu ya Mesia ya Nzambi, na ntwala nde nsuka ya ngidika ya bima yai kukwisa. (Kusonga 14:6) Ntangu yandi monaka mambu ya nku ya bo vandaka kusala na bansambidi ya Yehowa, soda mosi yina vandaka kukengila boloko ya nsi mosi ya Afrika kutubaka nde, ‘Beno kelutisa ntangu na beno mpamba na kumonisa bantu yai mpasi. Bo tayambula ve lukwikilu na bo. Bo talanda kaka na kukuma mingi.’

11. Inki mutindu Nzambi kelanda na kulungisa lusilu na yandi yina kele na Zakaria 12:4?

¹¹ Tanga Zakaria 12:4. Yehowa kesila nde na mutindu mosi ya kifwani, yandi tapesa “boma” mpi tafwa meso ya bantu yina kenwanisa bantu na yandi yina kenataka nsangu ya Kimfumu na kikesa yonso. Yandi kelanda na kulungisa lusilu na yandi. Mu mbandu, na insi mosi ya bo buyisaka lusambu ya kyeleka, bambeni kunungaka ve na kukanga nzila nde madya ya kimpeve kukumina ve bansadi ya Nzambi. Nkutu, zulunalu mosi kutubaka nde Bambangi ya Yehowa vandaka kusadila ba balo sambu na kukotisa  mikanda yina ketendulaka Biblia na bansi! Lusilu yai ya Nzambi kupesaka bansadi na yandi ya kwikama kulunganaka mpenza: “Mono ta kangula meso na kutalaka bantu ya Yuda kansi mono ta fwa-fwa meso ya bampunda ya bambeni na bo.” Makasi ya bambeni ya Kimfumu kekumisa bo bonso bifwa-meso, ebuna bo kezaba ve nki nzila bo fwete kwenda. Ata mpidina, beto kendima mpenza nde Yehowa ketanina bantu na yandi na kimvuka mpi kekudibanza sambu na mambote na bo.​—2 Bantotila 6:15-19.

12. (a) Inki mutindu Yezu kutulaka tiya ntangu yandi vandaka na ntoto? (b) Inki mutindu bapakulami yina mebikalaka ketula tiya na mutindu mosi ya kifwani, mpi na nima yo basisaka inki?

¹² Tanga Zakaria 12:5, 6. “Bambuta ya Yuda” kemonisa bantu yina ketwadisa bantu ya Nzambi. Yehowa kepesa bantwadisi to bankengi yai kikesa mingi sambu na kukotila mambote ya Kimfumu na yandi awa na ntoto. Kilumbu mosi, Yezu kusongaka balongoki na yandi nde: ‘Mono kwisaka kutula tiya na nsi-ntoto.’ (Luka 12:49) Ya kyeleka, yandi kwisaka mpenza kutula tiya. Na nzila ya kisalu ya kusamuna yina yandi salaka ti kikesa yonso, Yezu kumonisaka nde nsangu ya metala Kimfumu ya Nzambi kuvandaka dyambu ya kuluta mfunu sambu na bantu. Dyambu yai kubasisaka mavwanga na kati ya dikanda ya Bayuda. (Matayo 4:17, 25; 10:5-7, 17-20) Mutindu mosi, “bonso dikala ya tiya na kati ya bankuni,” bantu yina kelanda mbandu ya Kristu bubu yai ketula tiya na mutindu mosi ya kifwani. Mukanda Le mystère de Dieu accompli a yina kubasikaka na mvu 1917 kumonisaka pwelele luvunu ya Kikristu. Yo pesaka bamfumu ya mabundu  makasi mingi mpenza. Ntama mingi ve, Nsangu ya Kimfumu No. 37 yina kuvandaka na ntu-dyambu, “Nsuka ya Dibundu ya Luvunu Mefinama!” kupusaka bantu mingi na kumonisa kana bo kele sambu na Kimfumu ya Nzambi to ve.

Batenta “ya Yuda” Meguluka

13. Bangogo batenta “ya Yuda” kemonisa banani, mpi sambu na nki Yehowa tagulusa bantu yina mbeni kenwanisa?

¹³ Tanga Zakaria 12:7, 8. Batenta kuvandaka mingi na Izraele ya ntama. Bangungudi mpi bansadi-bilanga vandaka kusadila yo mbala na mbala. Bantu yai kuvandaka bantu ya ntete yina zolaka kuvanda na mfunu ya lutaninu kana bambeni kwisa kunwanisa mbanza ya Yeruzalemi. Bangogo batenta “ya Yuda” kemonisa nde bapakulami yina mebikalaka na ntangu na beto kezinga na kutuba ya kifwani na kisika mosi ya kukonda lutaninu, kansi bo kezinga ve na babwala ya bo metunga ti bibaka ya nda. Kuna, bo kekotila mambote ya Kimfumu ya Mesia kukonda boma. Yehowa “ta gulusa ntete” bantu ya kezinga na batenta “ya Yuda” sambu bo kele bantu ya ntete yina Satana kenwanisa.

14. Inki mutindu Yehowa ketanina bantu yina kezinga na batenta “ya Yuda” mpi sambu bo vanda ngolo?

¹⁴ Ya kyeleka, disolo ya luzingu ya bantu kemonisa nde Yehowa ketanina ba ambasadere yai ya kupakulama ya Kimfumu yina kezinga na batenta na nganda ya bwala. b Yandi ketanina bo sambu nde bayina kele “ngolo ve,” bo kuma ngolo mpi kikesa bonso Davidi, ntotila yina kuvandaka ngolo na bitumba.

15. Sambu na nki Yehowa ‘tafwa bantu’ yonso ya makanda, mpi yandi tasala yo tii na nki kiteso?

¹⁵ Tanga Zakaria 12:9. Sambu na nki Yehowa ‘tafwa bantu’ yonso ya makanda? Sambu bo kelanda na kubuya Kimfumu ya Mesia. Nzambi mezengila bo nkanu ya lufwa sambu bo kenyokula mpi kemonisa bantu na yandi mpasi. Kubika fyoti, bantu ya Satana tanwanisa bansambidi ya kyeleka ya Nzambi sambu na mbala ya nsuka. Ebuna, yo tanata nsi-ntoto ya mvimba na bitumba yina Biblia kebingaka nde Armagedoni. (Kusonga 16:13-16) Na ntangu yina, Zuzi ya Kuluta Nene tatanina bantu na yandi mpi tasantisa zina na yandi na kati ya makanda.​—Ezekiele 38:14-18, 22, 23.

16, 17. (a) Inki kele kimvwama yina Yehowa kepesaka “bantu” na yandi? (b) Kana beto kekanga ntima na kimbeni ya Satana, yo tamonisa inki?

¹⁶ Satana kele ve ata ti tolotolo mosi yina lenda lembisa lukwikilu to kikesa ya bantu ya Nzambi na ntoto ya mvimba. Ngemba ya kimpeve ya beto kevandaka na yo ya kekatukaka na kuzaba nde Yehowa tagulusa beto kele kimvwama yina Yehowa kepesaka “bantu” na yandi. (Yezaya 54:17) Ata muntu mosi ve lenda katula na ngolo yonso ngemba ti kimvwama na beto ya kimpeve. (Nkunga 118:6) Satana talanda na kukumisa kimbeni ngolo mpi kusosa kumonisa beto dyaka mpasi mingi. Kana beto kekanga ntima na kwikama yonso, ata bo kefinga beto, yo tamonisa nde beto kele na mpeve ya Nzambi. (1 Piere 4:14) Bansadi ya Yehowa ke na kulonga nsangu ya mbote ya Kimfumu na yandi na ntoto ya mvimba. Satana melosilaka bantu ya Nzambi matadi mingi ya kifwani yina kele bonso batolotolo sambu na kunyokula bo. Ata mpidina, na ngolo ya Yehowa, bansadi ya Yehowa kenunga matadi yina mpi yo kesala bo kima ve. (Zakaria 9:15) Bapakulami yina mebikalaka mpi banduku na bo ya kwikama tayambula ve kisalu na bo!

¹⁷ Beto kevingila ntangu yina Yehowa tagulusa beto kimakulu na maboko ya Satana. Beto kebaka kikesa kibeni na lusilu yai ya ketuba nde ‘batolotolo ya bo ta sala sambu na kufwa beto; yo ta sala beto kima ve; kiteso mosi, konso muntu yina ta zola kufunda beto, beto ta bedisa yandi’!

[Banoti na nsi ya lutiti]

Inki Mvutu Nge Tapesa?

• Inki kemonisa nde batolotolo ya Satana kenunga ve?

• Inki mutindu Yeruzalemi ya zulu takuma ‘ditadi ya kilo’?

• Inki mutindu Yehowa kegulusa batenta “ya Yuda”?

• Sambu Armagedoni mekuma penepene, na nki beto ketula ntima?

[Bangyufula ya disolo ya kulonguka]

[Bifwanisu ya kele na lutiti 23]

Bansadi ya Yehowa ya Albanie kubikalaka ya kwikama ata na ntwala ya kimbeni ya Satana

[Kifwanisu ya kele na lutiti 25]

Yezu kumonisaka luvunu ya mambu yina bambeni na yandi vandaka kutuba

[Bifwanisu ya kele na lutiti 26]

Ata tolotolo mosi ve ya bo tasala sambu na kufwa bantu yina kesamunaka nsangu ya mbote tanunga