Keti Nge Kepesaka Maboko na Luyalu ya Yehowa?

“Beno songa bantu yonso nde: ‘Mfumu Nzambi kele ntotila!’”​—NKUNGA 96:10.

1, 2. (a) Inki dyambu ya kuyituka kusalamaka penepene ya Oktobri ya mvu 29 T.B. (b) Dyambu yina kutendulaka nki sambu na Yezu?

 DYAMBU mosi ya kuyituka, ya mesalamaka ntete ve, kusalamaka na ntoto penepene ya Oktobri ya mvu 29 T.B. Matayo kusonikaka na Evanzile na yandi nde: “Ntangu yandi botikaka Yesu imene, Yesu basikaka na masa. Ebuna zulu kangukaka sambu na yandi, [Yoane mbotiki] monaka Mpeve ya Nzambi ke kwisa kukulumuka bonso pizio na zulu ya ntu [ya Yezu]. Ndinga katukaka na zulu nde: ‘Yai kele Mwana na mono ya mono ke zolaka mingi. Mono ke na kiese mingi sambu na yandi.’” Yai kele mosi na kati ya mambu yina bansoniki yonso iya ya ba Evanzile kusonikaka.​—Matayo 3:16, 17; Marko 1:9-11; Luka 3:21, 22; Yoane 1:32-34.

² Mpeve santu yina kukulumukaka na zulu ya Yezu na mutindu ya pwelele kumonisaka nde yandi kele Mupakulami, disongidila Mesia to Kristu. (Yoane 1:33) Nsukansuka, “nkuna” ya lusilu kumonanaka! Na ntwala ya Yoane Mbotiki kutelamaka muntu yina Satana zolaka kutatika na kisingini, mpi muntu yango zolaka kutatika Satana na ntu sambu yandi kele mbeni ya ntete ya Yehowa ti ya kimfumu na Yandi. (Kuyantika 3:15, NW) Kubanda ntangu yina, Yezu kuzabaka mbote nde yandi fwete sala kikesa sambu na kulungisa lukanu ya Yehowa, na yina metala luyalu ti Kimfumu na Yandi.

3. Inki mutindu Yezu kudibongisaka sambu na mukumba yina yandi zolaka kulungisa ya kukotila luyalu ya Yehowa?

³ Sambu yandi kudibongisa na kisalu yina Nzambi kupesaka yandi, “Yesu katukaka na nzadi ya Yordani sambu na kwisa kuvutuka, yandi vandaka ya kufuluka na mpeve ya Nzambi. Ebuna mpeve nataka yandi na ntoto ya zelo na zelo.” (Luka 4:1; Marko 1:12) Kuna, yandi salaka bilumbu 40, mpi yandi bakaka ntangu ya kuyindulula ntembe ya metala nswa ya Yehowa ya kuyala yina Satana kubasisaka, mpi kisalu yina yandi zolaka kusala sambu na kukotila luyalu ya Yehowa. Ntembe yina ketadila bigangwa yonso ya mayele, ya zulu ti ya ntoto. Yo yina, yo kele mbote nde beto tadila luzingu ya kwikama ya Yezu mpi mambu ya beto fwete sala sambu na kumonisa nde beto mpi kezola kupesa maboko na luyalu ya Yehowa.​—Yobi 1:6-12; 2:2-6.

Ntembe ya Metala Luyalu ya Yehowa Mebasika Pwelele

4. Inki dyambu Satana kusalaka yina kubasisaka pwelele ntembe ya metala luyalu?

⁴ Ya kyeleka, Satana kumonaka mutindu mambu yonso ya beto metubila kusalamaka. Kukonda kusukinina, yandi yantikaka kunwanisa “nkuna” ya ntetentete ya “nkento” ya kifwani ya Nzambi. (Kuyantika 3:15, NW) Satana kumekaka  Yezu mbala tatu. Yandi lombaka Yezu na kusala mambu yina yandi vandaka kumona mbote, na kisika ya kusala mambu yina Tata na yandi kuzolaka nde yandi sala. Mpukumuna ya tatu kubasisaka pwelele ntembe ya metala luyalu ya Yehowa. Ntangu Satana songisaka Yezu “bimfumu yonso ya nsi-ntoto ti lukumu na yo,” yandi tubilaka yandi pwelele nde: “Yai yonso ya nge ke mona, mono ta pesa nge yo kana nge fukama sambu na kusamba mono.” Sambu Yezu kuzabaka mbote nde “bimfumu yonso ya nsi-ntoto” kuvandaka na maboko ya Satana, yandi monisaka lweka yina yandi vandaka na yina metala ntembe ya luyalu mpi kuvutudilaka Satana nde: “Katuka, Satana! Sambu bo sonikaka na Mukanda ya Nzambi nde: ‘Nge fweti samba Mfumu Nzambi, Nzambi na nge. Kaka yandi mpamba nge fweti samba!’”​—Matayo 4:8-10.

5. Inki mukumba ya mpasi yo lombaka nde Yezu kulungisa?

⁵ Luzingu ya Yezu kumonisaka pwelele nde, kupesa maboko na luyalu ya Yehowa kuvandaka lukanu na yandi ya ntetentete. Yezu kuzabaka mbote nde, sambu na kumonisa nde Nzambi kele ti nswa ya kuyala, yo lombaka nde yandi bikala ya kwikama tii na lufwa na maboko ya Satana, dyambu yina mbikudulu kumonisaka bonso kutatika ya “nkuna” ya nkento na kisingini. (Matayo 16:21; 17:12) Yo lombaka mpi nde yandi ta kimbangi nde Kimfumu ya Nzambi kele mwaye yina Yehowa tasadila sambu na kufwa nkolami Satana mpi kuvutula ngemba mpi ndonga na lugangu yonso. (Matayo 6:9, 10) Inki Yezu kusalaka sambu na kulungisa mukumba yai ya mpasi?

“Kimfumu ya Nzambi Me Kuma Penepene”

6. Inki mutindu Yezu kumonisaka nde Kimfumu kele mwaye yina Nzambi tasadila sambu na ‘kufwa bisalu ya Satana’?

⁶ Ntetentete, “Yesu kwendaka na ntoto ya Galilea. Yandi vandaka kwenda kulonga nsangu ya mbote ya Nzambi nde: ‘Ntangu me lunga. Kimfumu ya Nzambi me kuma penepene.’” (Marko 1:14, 15) Nkutu, yandi tubaka nde: “Mono fweti zabisa nsangu ya mbote ya Kimfumu ya Nzambi . . . , sambu yina kele kisina ya mambu ya Nzambi tindilaka mono.” (Luka 4:18-21, 43) Yezu kutambulaka na babwala ya nene ti ya fyoti, “yandi vandaka kulonga nsangu ya mbote ya Kimfumu ya Nzambi.” (Luka 8:1) Yezu kusalaka mpi bidimbu mingi ya nkumbwa. Yandi disaka bibuka ya bantu, kunganinaka mupepe ya ngolo, kubelulaka bantu ya maladi, mpi kufutumunaka bafwa. Na nzila ya bidimbu yai ya nkumbwa, yandi monisaka nde Nzambi lenda katula mambu ya mbi mpi bampasi yonso yina kukatukaka na kukolama ya Edeni mpi na nima, ‘kufwa bisalu ya Satana.’​—1 Yoane 3:8.

7. Inki kisalu Yezu kupesaka balongoki na yandi, mpi nki mbuma yo butaka?

⁷ Yezu kusalaka kimvuka mosi ya balongoki ya kwikama mpi kupesaka bo formasio sambu na kusamuna nsangu ya mbote ya Kimfumu na ntoto ya mvimba. Ntetentete, yandi pesaka kisalu yina na bantumwa na yandi 12 mpi “yandi tindaka bo sambu na kwenda kuzabisa bantu nsangu ya Kimfumu ya Nzambi.” (Luka 9:1, 2) Na nima, yandi tindaka balongoki yankaka 70 sambu na kuzabisa nsangu yai: “Kimfumu ya Nzambi me kuma penepene na beno.” (Luka 10:1, 8, 9) Ntangu balongoki yai kuvutukaka mpi kupesaka rapore na Yezu nde bo salaka mbote kisalu ya kusamuna Kimfumu, yandi vutudilaka bo nde: “Mono monaka Satana ke katuka na zulu, ke kwisa kubwa na ntoto bonso nzasi.”​—Luka 10:17, 18.

8. Inki luzingu ya Yezu kumonisaka pwelele?

⁸ Yezu kudipesaka ya mvimba mpi kulutisaka ve ata dibaku mosi sambu na kuta kimbangi na Kimfumu. Yandi salaka ti kikesa yonso, mpimpa ti mwini, nkutu yandi buyaka kuvanda ti bima mingi ya kinsuni. Yandi tubaka nde: “Bamikengi ke na mabulu na bo sambu na kulala, bandeke ke na babuyamba na bo, kansi Mwana-muntu ke na kisika ve ya yandi lenda kwenda kulala.” (Luka 9:58; Marko 6:31; Yoane 4:31-34) Ntangu fyoti na ntwala ya lufwa na yandi, Yezu kutubilaka Ponce Pilate ti kikesa yonso nde: “Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe na mambu yina kele ya kieleka.” (Yoane 18:37) Luzingu ya mvimba ya Yezu kumonisaka nde yandi kwisaka kaka ve sambu na kuvanda longi ya nene, kusala bidimbu  ya nkumbwa to kudipesa sambu na kugulusa bantu. Kansi, yo monisaka mpi pwelele nde yandi kwisaka sambu na kupesa maboko na luzolo ya Yehowa mpi na kuta kimbangi na mayele yina Nzambi kele na yo ya kulungisa luzolo na yandi na nzila ya Kimfumu.​—Yoane 14:6.

“Yo Melungana!”

9. Nsukansuka, nki mutindu Satana kunungaka na kutatika “nkuna” ya nkento ya kifwani ya Nzambi na kisingini?

⁹ Mambu yonso yina Yezu kusalaka sambu na yina metala Kimfumu kusepedisaka ve Mbeni, Satana Dyabulu. Mbala mingi, na nzila ya kitini ya “nkuna” na yandi ya ntoto, disongidila bantu ya politiki ti ya mabundu, Satana kusosaka na kufwa “nkuna” ya nkento ya kifwani ya Nzambi. Banda na lubutuku na yandi tii na nsuka ya luzingu na yandi na ntoto, Satana ti bantu na yandi vandaka kusosa na kufwa Yezu. Nsukansuka, na nsungi ya printemps ya mvu 33 T.B., ntangu kulungaka sambu Mwana ya muntu kupesama na maboko ya mbeni sambu mbeni kutatika yandi na kisingini. (Matayo 20:18, 19; Luka 18:31-33) Masolo ya ba Evanzile kemonisa pwelele mutindu Satana kusadilaka bantu, banda na Yudasi Iskariote, banganga-nzambi, bakalaki ya nsiku, Bafarize, tii na bantu ya Roma, sambu na kuzengila Yezu nkanu ya lufwa mpi kupesa yandi lufwa ya mpasi na zulu ya nti ya mpasi.​—Bisalu 2:22, 23.

10. Lufwa ya Yezu na zulu ya nti ya mpasi kulungisaka ntetentete nki?

¹⁰ Inki kekwisilaka nge na mabanza ntangu nge keyindulaka mpasi yina Yezu kumonaka na zulu ya nti ya mpasi mpi yina vandaka kunata yandi na lufwa malembemalembe? Ziku nge keyibukaka nkudulu ya kimenga yina Yezu kupesaka kukonda bwimi sambu na masumu ya bantu. (Matayo 20:28; Yoane 15:13) Mbala yankaka nge keyitukaka sambu na zola ya nene yina Yehowa kumonisaka na mutindu yandi pesaka kimenga yina. (Yoane 3:16) Ziku nge kekudiwaka mutindu mfumu ya basoda ya Roma yina kutubaka: “Ya kieleka, muntu yai vandaka Mwana-Nzambi!” (Matayo 27:54) Ntembe kele ve nde bamvutu yai yonso kele ya mbote. Kansi, yibuka nde bangogo ya nsuka yina Yezu kutubaka na nsi ya mpasi kuvandaka: “Yo melungana!” (Yoane 19:30, NW) Inki kulunganaka? Ata luzingu ti lufwa ya Yezu kulungisaka mambu mingi, keti kukwisa na yandi na ntoto kuvandaka ve ntetentete sambu na kumanisa ntembe ya metala luyalu ya Yehowa? Dyaka, keti mbikudulu kutubaka ve nde sambu yandi kele “nkuna,” yandi zolaka kumona mpasi ya ngolo na maboko ya Satana sambu na kusantisa zina ya Yehowa? (Yezaya 53:3-7) Yai kuvandaka mikumba ya nene mpenza ata mpidina, Yezu kulungisaka yo yonso. Yai kulungana ya nene kibeni!

11. Inki Yezu tasala sambu na kulungisa mbikudulu ya Edeni na mvimba?

¹¹ Sambu Yezu kubikalaka ya kwikama, Nzambi kufutumunaka yandi bonso “mpeve yina ke pesaka moyo,” kansi ve bonso muntu. (1 Korinto 15:45; 1 Piere 3:18) Yehowa kusilaka Mwana na yandi yina kubakaka lukumu nde: ‘Vanda awa na diboko na mono ya kitata tii kuna mono ta tula bambeni na nge na nsi ya makulu na nge.’ (Nkunga 110:1) Na kati ya “bambeni” yango, beto ketanga Satana, mfumu ya bantu ya mbi, mpi bantu yonso yina kesala “nkuna” na yandi. Yezu Kristu yina kele Ntotila ya Kimfumu ya Mesia ya Yehowa, tatwadisa bitumba yina tafwa bankolami yonso, na zulu ti na ntoto. (Kusonga 12:7-9; 19:11-16; 20:1-3, 10) Ebuna, mbikudulu yina kele na Kuyantika 3:15 mpi kisambu yina Yezu kulongaka balongoki na yandi nde, “Kimfumu na nge kwisa, luzolo na nge kusalama awa na ntoto bonso na zulu,” talungana na mvimba na yo.​—Matayo 6:10; Filipi 2:8-11.

 Mbandu Mosi ya Kulanda

12, 13. (a) Inki bantu kesala bubu yai sambu na kulemfuka na nsangu ya mbote ya Kimfumu? (b) Inki bangyufula beto fwete kudiyula kana beto kezola kulanda mbandu ya Kristu?

¹² Bubu yai, beto ke na kusamuna nsangu ya mbote ya Kimfumu na bansi mingi, mutindu Yezu kubikulaka yo. (Matayo 24:14) Nsukansuka, bamilio ya bantu kekudipesa na Nzambi. Bo kele na kyese sambu na balusakumunu yina Kimfumu tanata. Bo kevingila na kuzinga mvula na mvula na ngemba ti lutaninu na paladisu na ntoto, mpi na kyese yonso bo kezabisa bantu yankaka kivuvu na bo. (Nkunga 37:11; 2 Piere 3:13) Keti nge kele mosi na kati ya bansamuni yai ya Kimfumu? Kana yo ke mpidina, beto kesikisa nge. Kansi, kele ti kima yankaka yina konso muntu fwete tadila.

¹³ Ntumwa Piere kusonikaka nde: “Kristo yandi mosi monaka mpasi sambu na beno, ebuna yandi bikilaka beno mbandu sambu beno landa yo.” (1 Piere 2:21) Simba nde, na verse yai Piere ketubila ve kikesa ya Yezu na kisalu ya kusamuna to mayele na yandi ya kulongila, kansi yandi ketubila bampasi na yandi. Sambu yandi monaka mambu yai yonso, Piere kuzabaka mbote tii na nki kiteso Yezu kundimaka na kumona mpasi sambu na kulemfuka na luyalu ya Yehowa mpi kumonisa nde Satana kele muntu ya luvunu. Ebuna, nki mitindu beto lenda landa mbandu ya Yezu? Beto fwete kudiyula nde: ‘Tii na nki kiteso mu kendimaka kumona mpasi sambu na kupesa maboko ti lukumu na luyalu ya Yehowa? Keti luzingu mpi mutindu mu kelungisaka kisalu na munu ya kusamuna kemonisaka nde mpusa na munu ya ntete kevandaka ya kupesa maboko na luyalu ya Yehowa?’​—Kolosai 3:17.

14, 15. (a) Inki Yezu kusalaka ntangu bo pesaka yandi bandongisila ti mabanza ya mbi, mpi sambu na inki? (b) Inki ntembe beto fwete vilaka ve ntangu yonso? (Tubila mpi mambu yina kele na lupangu “Landa na Kuvanda na Lweka ya Yehowa.”)

¹⁴ Konso kilumbu, beto kekutanaka ti mambu ya mpasi mpi yina kelombaka nde beto baka badesizio, yo vanda ya nene to ya fyoti. Inki fwete vanda na bupusi na mvutu na beto? Mu mbandu, inki beto tasala kana beto kutana ti mpukumuna ya kusala dyambu mosi ya ketula luzingu na beto ya Bukristu na kigonsa? Inki Yezu kusalaka ntangu Piere kusongaka yandi nde Nzambi takeba yandi na mambu yina zolaka kubwila yandi? Yezu kutubaka nde: “Nge  Satana, katuka awa na meso na mono! . . . Nge ke banza mabanza ya kinzambi ve kansi mabanza ya kimuntu!” (Matayo 16:21-23) To, kana na kisalu na beto, bo pesa beto mabaku ya kukuma ti mbongo to mikumba mingi yina lenda tula mambote na beto ya kimpeve na kigonsa, keti beto tasala bonso Yezu? Ntangu Yezu kubakisaka nde bantu yina kumonaka bidimbu na yandi ya nkumbwa “zolaka kwisa kubaka yandi na ngolo sambu na kutula yandi ntotila,” yandi tinaka kukonda kusukinina.​—Yoane 6:15.

¹⁵ Sambu na nki Yezu kubuyaka mpenza na dibaku yai ti na mabaku yankaka? Sambu yandi vandaka kubakisa mbote nde yo vandaka ti kima mosi ya mfunu, kuluta mambote na yandi mosi. Yezu vandaka na mpusa ya kusala luzolo ya Tata na yandi. Yandi vandaka mpi na mpusa ya kupesa maboko na luyalu ya Yehowa, ata yo zolaka kulomba nde yandi sala bibansa. (Matayo 26:50-54) Yo yina, kana beto keyibuka ve ntangu yonso ntembe ya kyeleka ya metala luyalu ya Yehowa, bonso Yezu, beto tavandaka ntangu yonso ti mpukumuna ya kusala mambu ya mbi. Sambu na nki? Sambu beto lenda bwa kukonda mpasi na mayele ya mbi ya Satana, yina kele mfumu na yina metala kumonisa mambu ya mbi bonso ya mbote, mutindu yandi salaka ntangu yandi pukumunaka Eva.​—2 Korinto 11:14; 1 Timoteo 2:14.

16. Inki fwete vanda lukanu na beto ya kuluta mfunu na ntangu beto kesadisaka bantu yankaka?

¹⁶ Na kisalu ya kusamuna, beto kesalaka kikesa sambu na kutubila bantu mambu ya keyangisaka bo mpi kumonisa bo bamvutu yina Biblia kepesaka. Yai kele mutindu ya mbote ya kutedimisa mpusa na bo sambu na kulonguka Biblia. Kansi, lukanu na beto ya kuluta mfunu kele ve kaka kusadisa bantu na kuzaba mambu yina Biblia ketuba to mambote yina Kimfumu ya Nzambi tanata. Beto fwete sadisa bo na kubakisa ntembe ya kyeleka ya metala luyalu ya Yehowa. Keti bo kendima na kukuma Bakristu ya kyeleka, kubaka nti na bo ya mpasi mpi kumona mpasi sambu na Kimfumu? (Marko 8:34) Keti bo kele ya kuyilama sambu na kukwenda na lweka ya bantu yina kepesaka maboko na luyalu ya Yehowa mpi kumonisa nde Satana kele muntu ya luvunu mpi ya nku? (Bingana 27:11) Beto kele ti dibaku ya kudisadisa mpi kusadisa bantu yankaka na kusala mutindu mosi.​—1 Timoteo 4:16.

Ntangu Nzambi “Ta Yalaka Bima Yonso Mpenza”

17, 18. Inki ntangu ya mbote beto lenda kinga kana beto kezola kumonisa nde beto kepesa luyalu ya Yehowa maboko?

¹⁷ Na ntangu beto kesala kikesa sambu na kumonisa na bikalulu mpi na kisalu na beto ya kusamuna nde beto kepesa maboko na luyalu ya Yehowa, beto lenda kinga ntangu yina Yezu Kristu “ta pesa Kimfumu na Tata Nzambi.” Dyambu yai tasalama nki ntangu? Ntumwa Polo ketendula nde: “Ntangu Yesu ta sukisa bawanzio yonso yina ke na kiyeka ya mutindu na mutindu. . . . Sambu Kristo fweti yala tii kuna ya Nzambi ta tula bambeni na yandi yonso na nsi ya makulu ya Kristo. . . . Yandi mosi mwana ta lemfuka na Nzambi yina me tulaka bima yonso na nsi ya kiyeka na yandi Mwana; mpidina Nzambi ta yalaka bima yonso mpenza.”​—1 Korinto 15:24, 25, 28.

¹⁸ Ntangu yina Nzambi “ta yalaka bima yonso mpenza,” tavanda ntangu ya mbote kibeni! Kimfumu talungisa lukanu na yo. Bambeni yonso ya luyalu ya Yehowa tafwa. Ngemba ti ndonga tavanda dyaka na luyalanganu ya mvimba. Na kuwakana ti bangogo yai ya muyimbi-bankunga, lugangu yonso tayimba: “Beno pesa zina ya Mfumu Nzambi lukumu. . . . Beno songa bantu yonso nde: ‘Mfumu Nzambi kele ntotila!’”​— Nkunga 96:8, 10.

Keti Nge Lenda Pesa Mvutu?

• Inki mutindu Yezu kulandaka na kumonisa pwelele ntembe yina metala luyalu ya Nzambi?

• Kisalu ya kusamuna ya Yezu mpi lufwa na yandi kulungisaka ntetentete inki?

• Na nki mitindu beto lenda landa mbandu ya Yezu sambu na kumonisa nde beto kepesaka maboko na luyalu ya Yehowa?

[Bangyufula ya disolo ya kulonguka]

[Lupangu/​Bifwanisu ya kele na lutiti 11]

“LANDA NA KUVANDA NA LWEKA YA YEHOWA”

Bampangi mingi ya Corée mpi ya bisika yankaka kezaba nde kana bo kekutana ti bampasi ya ngolo, bo fwte vila ve sambu na nki bampasi ya mutindu yina kekumina bo.

Mbangi ya Yehowa mosi ya bo kangaka na rezime ya Ex-Union soviétique kutubaka nde: “Sambu beto bakisaka mbote ntembe yina kubasikaka na kilanga ya Edeni ya metala nswa ya Yehowa ya kuyala, yo sadisaka beto na kukanga ntima. . . . Beto zabaka nde beto kele ti dibaku ya kumonisa nde beto kele na lweka ya luyalu ya Yehowa. . . . Dyambu yai kupesaka beto ngolo mpi kusadisaka beto na kulanda na kuvanda ya kwikama.”

Mbangi yankaka kutendulaka kima kusadisaka yandi ti Bambangi yankaka na kan mosi ya mpasi. Yandi tubaka nde: “Yehowa kusadisaka beto. Ata luzingu na beto na kan kuvandaka mbote ve, kimpeve na beto kuvandaka kaka ngolo. Ntangu yonso, beto vandaka kupesana kikesa ti mabanza ya mbote yina vandaka kuyibusa beto nde beto vandaka na lweka ya Yehowa na ntembe yina metala nswa na yandi ya kuyala luyalanganu ya mvimba.”

[Kifwanisu ya kele na lutiti 8]

Inki mutindu Yezu kupesaka maboko na luyalu ya Yehowa ntangu Satana kupukumunaka yandi?

[Kifwanisu ya kele na lutiti 10]

Inki dyambu lufwa ya Yezu kulungisaka?