MWA bamvula me luta, Roald mpi Elsebeth, vandaka na bamvula 40 ya makwela na bo, mpi bo vandaka ti luzingu ya mbote na Bergen, mbanza ya zole ya nene na Norvège. Kumosi ti bana na bo, ya nkento Isabel mpi ya bakala Fabian, bo vandaka kusala bisalu ya dibundu na kwikama yonso. Roald vandaka nkuluntu, Elsebeth mupasudi-nzila, mpi Isabel ti Fabian bansamuni ya mbote.

Kansi, na Septembri 2009, dibuta yai bakaka lukanu ya kusala diambu mosi yina bo me salaka ntete ve​—kusamuna na nsungi ya mposo mosi na teritware mosi ya mpa. Yo yina, Roald mpi Elsebeth kumosi ti Fabian yina kumaka ti bamvula 18, kwendaka na Nordkyn mbanza mosi yina kele na lweka ya Cercle artique ti Finnmark. Kuna, na bwala Kjøllefjord, bo samunaka kumosi ti bampangi ya nkaka ya babakala mpi ya bankento yina kwisaka mpi na teritware yina sambu na kusamuna. Roald ke tuba nde: “Na luyantiku ya mposo, mono waka mwa kiese na mutindu mono yidikaka mambu na mono sambu na kusala kisalu yai ya sipesiali mposo ya mvimba.” Kansi na nima ya mposo yina, Roald vandaka diaka ve na kiese. Sambu na nki?

Roald ke tuba nde: “Mario mupasudi-nzila mosi na Finnmark, yulaka beto kana beto ta zola kukwenda na mbanza Lakselv sambu na kusadisa dibundu yina vandaka ti bansamuni 23.” Roald yitukaka ngolo mpenza. Yandi ke tuba nde: “Mono ti Elsebeth vandaka kuyindula kupesa maboko kisika yina mpusa vandaka mingi​—kansi yo zolaka kuvanda na makwisa ntangu bana na beto ta katuka na nzo.” Kansi, ata na nsungi ya mwa bilumbu yina bo samunaka na teritware yina, Roald monaka nde bantu vandaka ti luzolo ya kulonguka mambu ya Yehowa. Bo vandaka na mfunu ya lusadisu bubu yai kansi na makwisa ve. Yandi ke yibuka nde: “Ngiufula yina yangisaka kansansa na mono mpi nkutu yo katulaka mono mpongi bilumbu mingi.” Na nima, Mario nataka Roald ti dibuta na yandi na Lakselv yina vandaka na kitamina ya bakilometre kiteso ya 240 na sudi ya Kjøllefjord. Mario vandaka kuzola nde dibuta yai kumona bo mosi dibundu yina ya fioti.

Na Lakselv, Andreas mosi ya bankuluntu zole ya dibundu yina, songaka dibuta yai teritware mpi Nzo ya Kimfumu. Bampangi ya dibundu yina yambaka bo mbote mpi sadilaka bo mwa feti mpi zabisaka Roald ti Elsebeth nde bo ta sepela kana dibuta na bo ta kuma kuzinga kuna sambu na kusadisa bo na kisalu ya kusamuna. Sambu na kusekisa, Andreas tubaka nde bo vandaka dezia ti kisalu yina bo yidikilaka Roald mpi Fabian! Dibuta yai salaka nki?

Bangogo ya ntete ya Fabian vandaka nde: “Mono kele ve ti mpusa ya kukwisa awa.” Dibanza ya kuyambula banduku na yandi ya ngolo yina yandi yelaka ti bo na dibundu mpi kukwenda kuzinga na bwala mosi ya fioti, sepedisaka yandi ve. Diaka yandi manisaka ntete ve nzo-nkanda na yandi ya kukuma électricien. Kansi, ntangu bo yulaka Isabel (yina kumaka ntangu yina ti bamvula 21) na telefone sambu kuzaba kana yandi ta ndima kukwenda na bwala yina, yandi tubaka ti kiese yonso nde: “Yo kele mpenza diambu yina mono ke zolaka kusala!” Kansi na nima, Isabel tubaka nde: “Ntangu mono yindulaka mwa mingi sambu na yo, mono kudiyulaka nde, ‘Keti yo kele mpenza dibanza ya mbote? Keti mono fwete yambula banduku na mono? Keti mono fwete bikala kaka na dibundu na mono kisika mambu yonso kele mbote mpi kukonda mpasi?’” Ebuna Elsebeth tubaka nki? Yandi ke tuba nde: “Mono bakisaka nde Yehowa pesaka dibuta na beto mukumba mosi, kansi mono vandaka mpi kuyindula nzo ya mpa yina beto katukaka kuyidika ntama mingi ve mpi bima yonso yina vandaka na kati, ya beto sumbaka na nsungi ya bamvula 25 yina lutaka.”

Ntangu mposo yina ya sipesiali manaka, Roald ti dibuta na yandi vutukaka na Bergen, kansi ntangu yonso bo vandaka kuyindula bampangi na bo ya Lakselv, yina bikalaka na kitamina ya bakilometre kiteso ya 2 100. Elsebeth ke tuba nde: “Mono sambaka Yehowa mingi mpi mono landaka kusolula ti banduku yina beto kutanaka ti bo na mutindu beto vandaka kutindilana bafoto mpi mikanda.” Roald ke tuba nde: “Mono vandaka na mfunu ya ntangu sambu na kundima dibanza ya kukwenda kuzinga kuna. Diaka, yo lombaka nde mono tadila kana beto ta kuka na kulungisa bampusa ya dibuta. Inki mutindu beto ta zinga? Mono sambaka Yehowa mingi mpi beto solulaka ti dibuta na mono mpi bampangi ya nkaka ya kuyela na kimpeve.” Fabian ke tuba nde: “Sambu mono vandaka kuyindula mingi diambu yina, mono bakisaka nde mono vandaka mpenza ve ti kikuma ya kubuya. Mono sambaka Yehowa mbala mingi, mpi malembe-malembe mpusa ya kuvutuka kumaka ngolo.” Ebuna Isabel? Na nima ya kusala kisalu ya kimupasudi-nzila na nsungi ya bangonda sambanu, mpi kulutisa ntangu mingi na kulonguka Biblia ti bantu, yandi monaka nde yandi vandaka ya kuyilama sambu na kukwenda.

Sambu mpusa na bo ya kupesa maboko na kisika yina mpusa vandaka mingi yelaka, dibuta yai bakaka bangidika sambu na kulungisa lukanu na bo. Roald vandaka ti kisalu yina bo vandaka kufuta yandi mbote mpi yandi vandaka kusepela ti yo, kansi yandi lombaka nde yandi ta vanda ve na kisalu mvula ya mvimba. Ata mpidina, mfumu na yandi lombaka yandi na kukwisaka kusala na bantangu ya nkaka, disongidila bamposo zole na kisalu, mpi bamposo sambanu na teritware. Roald ke tuba nde: “Lufutu na mono kumaka fioti mpenza, kansi yo sadisaka mono.”

Elsebeth ke tuba nde: “Bakala na mono lombaka mono na kusosa nzo na Lakselv mpi na kutula bantu ya kufutila na nzo ya Bergen. Yo bakaka bantangu mpi bikesa mingi, kansi beto nungaka. Na nima, bana na beto zwaka bisalu ya ntangu fioti mpi yo ke sadisaka beto sambu na madia mpi tike.”

Isabel ke tuba nde: “Sambu mbanza yina beto kwendaka vandaka ya fioti, susi na mono ya nene vandaka ya kuzwa kisalu sambu na kulungisa bampusa na mono sambu na kusala mbote kisalu ya kimupasudi-nzila. Na luyantiku, yo vandaka kumonana bonso  nde kivuvu ya kuzwa kisalu vandaka ve.” Kansi, sambu yandi vandaka kundima konso kisalu ya ntangu fioti yina vandaka kumonana​—na nsungi ya bangonda uvwa na mvula ya ntete—​Isabel vandaka ti makuki ya kulungisa bampusa na yandi. Kansi nki mutindu mambu salamaka sambu na Fabian? Yandi ke tuba nde: “Sambu na kumanisa nzo-nkanda na mono ya électricien, mono vandaka na mfunu ya kusala bonso muntu yina ke longuka kisalu. Mono vandaka kusala mpidina na Lakselv. Na nima, mono nungaka na ekzame mpi zwaka kisalu ya ntangu fioti bonso électricien.”

Marelius mpi nkento na yandi Kesia, vandaka mpi na mfunu ya kupesa maboko na kisika yina mpusa ya bansamuni vandaka mingi. Marelius yina kele ti bamvula 29 ntangu yai ke tuba nde: “Ba diskure mpi ba interview ya lukutakanu ya distrike pusaka mono na kuyindula na mutindu ya kuyedisa kisalu na mono.” Kansi, sambu na Kesia, yina kele ti bamvula 26 bubu yai, ngindu ya kuyambula dibuta na yandi mpi kukwenda kisika ya nkaka vandaka diambu ya mpasi. Yandi ke tuba nde: “Dibanza ya kuvanda ntama ti bantu yina mono ke zolaka, ke pesaka mono boma mingi.” Diaka, Marelius vandaka kusala kisalu ya kinsuni ya ntangu yonso sambu na kufuta mfuka ya nzo. Yandi ke tuba nde: “Na lusadisu ya Yehowa mpi ya bisambu mingi yina beto lombaka yandi na kusadisa beto na kusala bansoba, beto vandaka ti makuki ya kukwenda.” Na luyantiku, bo lutisaka ntangu mingi na kulonguka Biblia ti bantu. Na nima, bankwelani yai tekaka nzo na bo, yambulaka bisalu na bo, mpi na Augusti 2011 bo kwendaka na mbanza Alta yina kele na nordi ya Norvège. Sambu na kulungisa bampusa na bo bonso bapasudi-nzila, Marelius ke salaka bonso kontable mpi Kesia ke salaka na magazini.

Knut mpi Lisbeth, yina kele na bamvula 30 ya makwela na bo sepelaka mingi na masolo ya Annuaire ya ke tubilaka bantu yina ke pesaka maboko na bisika yina bo kele ti mpusa ya bansamuni mingi ya Kimfumu. Lisbeth ke tuba nde: “Masolo yina vandaka kupusa beto na kuyindula na yina me tala kukwenda kusamuna na nsi ya nkaka. Kansi, mono vandaka kudiyula kana muntu bonso mono lendaka mpi kusala kisalu yina.” Ata mpidina, bo bakaka bangidika sambu na kulungisa lukanu na bo. Knut ke tuba nde: “Beto tekaka nzo na beto mpi bumbaka mbongo, mpi na nima beto kwendaka ti mama na mono. Na nima, sambu na kusepela na kusala na teritware ya nsi ya nkaka, beto kwendaka na dibundu ya ndinga ya Kingelesi na Bergen na nsungi ya mvula mosi; kuna beto vandaka ti mama ya Lisbeth.” Bamvula mingi na ntwala, Knut mpi Lisbeth vandaka kudiwa bonso nde bo vandaka ya kuyilama sambu na kukwenda ntama diaka, na Ouganda. Bo vutukaka na Norvège sambu na kusala kisalu ya kinsuni na nsungi ya bangonda zole. Mpidina, bo zwaka mbongo ya kufwana sambu na kuzingila mpi kusala kisalu ya ntangu yonso na Ouganda na nsungi ya bangonda yina bikalaka.

Inki mutindu mambu sukaka sambu na bansadi yai ya luzolo ya mbote? Roald ke tuba nde: “Beto ke lutisa ntangu mingi kumosi ti dibuta na teritware yina kuluta ntangu yina beto vandaka kulutisa na Bergen. Bangwisana ya dibuta me kumaka ngolo. Kumona kuyela ya kimpeve ya bana na beto vandaka lusakumunu.” Yandi ke yika nde: “Diaka, beto me kuma ti dibanza ya  bukati-kati sambu na bima ya kinsuni. Yo kele diaka ve na mfunu mingi kuluta mutindu yo vandaka ntete.”

Elsebeth bakisaka mfunu ya kulonguka ndinga ya nkaka. Sambu na nki? Teritware ya dibundu ya Lakselv kele mpi ti bwala Karasjok, na kati-kati ya Balapon, bantu yina ke zingaka na nordi ya Norvège, Suède, Finlande, mpi ya Russie. Sambu na kulonguka Biblia ti bantu yina kukonda mpasi, Elsebeth yantikaka kulonguka ndinga ya Lapon. Bubu yai, yandi ke vandaka ti makuki ya kuyantika masolo ti bantu na ndinga yina. Keti yandi ke sepela ti teritware na yandi ya mpa? Yandi ke tuba ti kiese nde: “Mono ke longuka Biblia ti bantu 6. Mono ke sepelaka kuvanda awa kuluta konso kisika ya nkaka!”

Fabian, yina kele ntangu yai mupasudi-nzila mpi nsadi ya kisalu, ke tuba nde yandi ti Isabel sadisaka ba toko tatu ya dibundu na bo ya mpa yina vandaka na mfunu ya kikesa sambu na kusala mingi na dibundu. Batoko yina tatu kele bansamuni ya kikesa. Nkutu, zole na kati na bo me bakaka mbotika mpi vandaka bapasudi-nzila nsadisi na ngonda ya Marsi 2012. Toko yina yantikaka kulemba na kimpeve pesaka Fabian mpi Isabel mersi sambu bo sadisaka yandi na “kukuma ngolo na kimpeve.” Fabian ke tuba nde: “Bangogo yina simbaka mpenza ntima na mono. Yo kele kiese mingi na kusadisa muntu!” Isabel ke tuba nde: “Na nsadisa ya kisalu yai, mono ‘me meka mpenza mpi me mona nde Yehowa kele mbote.’” (Nk. 34:9) Yandi ke yika nde: “Diambu ya kuluta mbote kele nde, kusala awa ke sepedisa mpenza!”

Marelius mpi Kesia kele ntangu yai ti luzingu ya kukonda mindondo mpi ya kitoko. Dibundu ya Alta, yina bo kwendaka kupesa maboko kele bubu yai ti bansamuni 41. Marelius ke tuba nde: “Kana beto vutula mwa mabanza na nima, yo ke pesa kikesa na kumona mutindu luzingu na beto me sobaka. Beto ke tonda Yehowa mutindu beto ke sadila yandi bonso bapasudi-nzila. Kele ve ti kima ya nkaka ke pesaka kiese mingi kuluta.” Kesia ke yika nde: “Mono longukaka na kutula ntima ya mvimba na Yehowa, mpi yandi me lungisaka bampusa na beto. Mono me bakisaka mpi nde kuzinga ntama ti bampangi ya kinsuni sadisaka mono na kubaka na mbalu bantangu yina beto vandaka kulutisa kumosi. Mono ke waka ve mawa na ntima sambu na lukanu yina beto bakaka.”

Inki beto lenda tuba sambu na Knut mpi Lisbeth yina kele na Ouganda? Knut ke tuba nde: “Yo bakaka ntangu sambu na kuyikana ti luzingu na beto ya mpa. Masa, kura, mpi madia vandaka mpasi, mpi beto yonso ke kutanaka ti bampasi yina; ata mpidina beto vandaka ti makuki ya kulonguka Biblia ti bantu mingi na mutindu yina beto me zola.” Lisbeth ke tuba nde: “Na kitamina ya baminuta 30 ti kisika yina beto ke zingaka, kele ti ba teritware yina bo me waka ntete ve nsangu ya mbote. Kansi, ntangu beto ke kwendaka kuna, beto ke kutaka bantu ke tanga Biblia mpi ke lomba beto na kulonga bo. Kulonga nsangu ya Biblia na bantu yina ya kudikulumusa kele kiese ya mingi mpenza!”

Ntembe kele ve nde, Ntwadisi na beto Yezu Kristu, kele na kiese ya kumona tuka na zulu mutindu kisalu yina yandi yantikaka ke landa kusalama na bisika mingi ya nsi-ntoto! Ya kieleka, sambu na bansadi yonso ya Nzambi, yo kele kiese na kudipesa ya mvimba sambu na kulungisa ntuma yai ya Yezu ya ‘kukumisa bantu ya makanda yonso balongoki.’​—Mat. 28:19, 20.