KAKA ntangu fioti na nima ya kubutuka ya Gary, mwana mono ya bakala na mvu 1958, mono bakisaka nde diambu mosi vandaka kukwendila ve na nitu na yandi. Kansi bangonda kumi lutaka na ntwala nde munganga kumona maladi na yandi mpi bamvula tanu diaka na nima nde minganga ya Londres kundimisa beto nde yandi vandaka mpenza ti maladi yina. Mono waka diaka mpasi mingi ntangu Louise, mwana na mono ya nkento, yina butukaka bamvula uvwa na nima ya Gary, monisaka bidimbu ya ngolo ya maladi yina kuluta ya Gary.

Minganga zabisaka mono na mawete yonso nde: “Bana na nge yonso zole kele ti maladi yina bo ke bingaka syndrome LMBB, * mpi yo kele ve ti lusansu.” Na ntangu yina, minganga zabaka mambu fioti mpenza na yina me tala maladi yai ya ke vandaka na kati ya baselile. Bidimbu na yo kele: kukonda kumona mbote yina ke nataka nsuka-nsuka na kufwa meso, nene ya mingi, kuvanda ti misapi ya maboko to ya makulu kuluta tanu, kukonda kuyela, diabete, maladi ya mikwa mpi bapiku yina ke salaka mbote ve. Yo yina, yo vandaka mpasi sambu na kusansa bana na mono. Nsosa mosi ya bo me katuka kusala ntama mingi ve monisaka nde muntu mosi na kati ya bantu 125 000 na Angleterre ke belaka maladi yina, ata bantu mingi ke monisaka mwa bidimbu ya maladi yango.

Ntangu fioti na nima ya makwela na beto, mono solulaka ti Mbangi mosi ya Yehowa mpi kukonda kusukinina mono bakisaka nde yo vandaka nzila ya kieleka. Kansi, bakala na mono vandaka kusepela ve. Sambu na kisalu na yandi, ntangu yonso beto vandaka kukatuka na bwala mosi mpi kukwenda kuzinga na bwala ya nkaka, yo yina yo vandaka mpasi sambu nde mono kwenda na balukutakanu ya Bambangi. Ata mpidina, mono landaka kutanga Biblia mpi kusamba Yehowa. Mono bakaka kikesa ya mingi ntangu mono tangaka nde: ‘Bantu yina ya bo ke pesa mpasi, Yehowa ta kuma kisika ya bo ke tininaka, kisika na bo ya ngemba na ntangu ya mpasi’ mpi nde yandi ‘ke buyaka ve muntu yina ke kwisaka na yandi.’​—Nk. 9:10, 11.

Gary vandaka kumona mbote ve, yo yina ntangu yandi lungisaka bamvula 6, beto tindaka yandi na internat mosi na sudi ya Angleterre. Mbala na mbala yandi vandaka kubinga mono na telefone sambu na kuzabisa mono mambu yina vandaka kuyangisa yandi mpi mono vandaka kusadisa yandi na kubakisa minsiku ya mfunu ya Biblia. Bamvula fioti na nima ya kubutuka ya Louise, mono belaka maladi ya sclérose mpi fibromyalgie. Gary vutukaka na nzo ntangu yandi lungisaka bamvula 16. Kansi, meso na yandi bebaka ngolo mpenza mpi yo yina na 1975, bantu ya leta tulaka zina na yandi na kati ya bantu yina me fwaka meso. Na 1977, bakala na mono yambulaka beto.

Ntangu fioti na nima ya kuvutuka ya Gary, beto kudipesaka mingi na mambu ya dibundu mosi yina bampangi vandaka na zola mingi, mpi mono bakaka mbotika na 1974. Mono vandaka na kiese mingi ntangu nkuluntu mosi sadisaka Gary na kununga bansoba yina salamaka na nitu na yandi na bamvula na yandi ya butoko. Bampangi ya nkaka ya dibundu vandaka kusadisa mono na bisalu ya nzo mpi nsuka-nsuka, bamfumu ya leta ponaka bampangi tanu yina bo vandaka kufuta sambu bo sadisa beto. Yo vandaka lusakumunu mosi ya nene kibeni!

Gary landaka kuyela mbote na kimpeve mpi yandi bakaka mbotika na 1982. Yandi vandaka na mpusa ya ngolo ya kuyantika kisalu ya kimupasudi-nzila nsadisi. Yo yina mono mpi bakaka lukanu ya kusadisa yandi na kisalu yina mpi beto salaka yo na nsungi ya bamvula mingi. Yandi vandaka na kiese mingi ntangu, na nima ya bamvula, nkengi na beto ya nziunga yulaka yandi nde: “Gary, sambu na nki nge ke kuma ve mupasudi-nzila  ya ntangu yonso?” Gary vandaka mpenza na mfunu ya nsiamisa ya mutindu yina, mpi na 1990 yandi kumaka mupasudi-nzila ya ntangu yonso.

Bo salaka Gary operasio na luketo mbala zole (Prothèse de hanche), ya ntete na 1999 mpi ya zole na 2008. Kansi maladi ya Louise vandaka ngolo mpenza. Yandi butukaka kifwa-meso, mpi ntangu mono monaka nde yandi vandaka ti musapi ya ngika na dikulu na yandi, mono bakisaka nde yandi mpi vandaka ti maladi ya LMBB. Kukonda kusukinina, baekzame yina bo salaka monisaka nde bitini mingi ya nitu na yandi vandaka kusala mbote ve. Na nima ya bamvula, bo salaka yandi ba operasio mingi ya nene, tanga mpi ba operasio tanu ya bapiku na yandi. Bonso Gary, yandi mpi kele ti diabete.

Sambu Louise zabaka mbote-mbote bampasi yina lenda basisa kana bo ke zola kusala muntu operasio, yandi zabisaka na ntwala minganga yina ke pasulaka, bayina ke pesaka ntunga ya anestezi mpi bantu ya nkaka yina ke salaka na lupitalu lukanu na yandi na yina me tala lusansu ya kukonda menga. Yo yina, yandi vandaka ti bangwisana ya mbote ti bantu yonso yina ke salaka na lupitalu, bayina sadisaka yandi mingi na maladi na yandi.

Beto ke salaka mambu mingi na nzo na beto sambu na lusambu ya Yehowa. Na ntwala nde ba ordinatere mpi ba apareyi ya nkaka kubasika, mono vandaka kulutisa bangunga mingi sambu na kutangila Gary mpi Louise mambu ya Biblia. Bubu yai, ba CD, ba DVD mpi site www.pr418.com ke sadisaka beto yonso na kubaka mambote ya manaka ya kulonguka ya Biblia ya konso mposo na bantangu ya kuswaswana, mpi beto lenda pesa bamvutu na balukutakanu ya Bukristu.

Bantangu ya nkaka, Gary ke kangaka na ntu bamvutu yina yandi ke pesaka, mpi kana yandi kele ti disolo na Nzo-Nkanda ya Kisalu ya Teokrasi, yandi ke salaka yo na bangogo na yandi mosi. Na 1995, yandi kumaka nsadi ya kisalu mpi ntangu yonso yandi ke vandaka ti mambu mingi ya kusala na Nzo ya Kimfumu, mu mbandu kuyamba bampangi ya dibundu mpi kusala na masini ya kubasisa ndinga.

Bampangi ya nkaka ke basikaka ti Gary na kisalu ya kusamuna, mpi mbala mingi bo ke pusaka velo na yandi ya bikata. Mbangi mosi sadisaka yandi na kulonguka Biblia ti muntu mosi yina sepelaka na nsangu ya mbote. Gary sadisaka mpi Mukristu mosi yina vandaka kusamuna diaka ve tuka bamvula 25. Ntangu yai, muntu yina Gary longukaka Biblia ti yandi mpi nsamuni yina yandi sadisaka ke kwisaka na balukutakanu ya Bukristu.

Ntangu Louise lungisaka bamvula 9, nkaka na yandi longaka yandi kutunga bilele, mpi mono ti mpangi mosi yina ke sadisaka beto na nzo, longaka yandi mutindu ya kutula broderie. Sambu yandi ke zolaka mingi kisalu ya kutunga, yandi ke tungaka ba dra ya babebe ya mikubu ya kitoko mpi bilele sambu na bampangi ya dibundu yina me kuma bambuta. Yandi ke salaka mpi bakarti ya kusonikila mikanda mpi ke tulaka yo bifwanisu ya fioti ya kitoko. Bantu yina ke bakaka bakarti yango ke sepelaka mingi. Ntangu Louise kumaka toko, yandi longukaka kubula masini. Bubu yai, ti lusadisu ya ordinatere, yandi lenda solula mbala na mbala ti banduku na yandi na nzila ya Internet. Louise bakaka mbotika ntangu yandi lungisaka bamvula 17. Na nsungi ya kampanye ya kisalu ya kusamuna, beto zole salaka kisalu ya kimupasudi-nzila nsadisi. Bonso Gary, Louise ke kangaka baverse na ntu sambu na kumonisa lukwikilu na yandi na balusilu yina Nzambi me sila na nsi-ntoto yina ‘meso ya bifwa-meso ta mona’ mpi ‘ata muntu mosi ve ta tuba nde: “Mono ke bela.”’​—Yez. 33:24; 35:5.

Beto kele na ntonda mingi sambu na bakieleka ya mbalu yina kele na kati ya Ndinga ya kupemama ya Yehowa! Bantima na beto me fuluka na ntonda sambu na lusadisu ya zola ya bampangi ya dibundu na beto, sambu kukonda yo, beto lendaka ve kuvanda ti makuki ya kusala bisalu mingi yina beto ke salaka. Mpi mingi-mingi na lusadisu ya Yehowa, luzingu na beto kele na mfunu mpenza.