KITESO ya bamvula 10 me luta, Gregorio ti Marilou, bankwelani yina kele ti bamvula kuluta 30, vandaka bapasudi-nzila na mbanza Manille, mpi bisalu na bo ya kinsuni vandaka kubaka bo ntangu mingi. Yo vandaka mpasi, kansi bo vandaka kununga. Na nima, Marilou kumaka direktere ya banki yina yandi vandaka kusala. Yandi ke tuba nde: “Sambu beto vandaka ti bisalu ya mbote, beto vandaka ti luzingu ya mbote kibeni.” Nkutu, sambu bo kumaka ti mbongo mingi bo bakaka desizio ya kulungisa lukanu yina bo vandaka ti yo tuka ntama, ya kutunga nzo na kisika mosi ya kitoko, na kitamina ya bakilometre kiteso ya 19 na esti ya Manille. Bo salaka kontra ti kompani mosi ya ke tungaka banzo sambu na kutungila bo nzo mpi bo wakanaka na kufutaka mbongo konso ngonda na nsungi ya bamvula kumi.

Marilou ke tuba nde: “Kisalu na mono ya mpa vandaka kubaka ntangu mingi mpi kulembisa mono na mpila nde kikesa na mono sambu na mambu ya kimpeve kulumukaka. Mono monaka bonso nde mono vandaka kuyiba Yehowa.” Yandi ke yika nde: “Mono vandaka diaka ve kupesa Yehowa ntangu yina mono silaka na kisalu na yandi.” Sambu Gregorio ti Marilou sepelaka diaka ve na diambu yina, kilumbu mosi bo fongaka sambu na kutadila mutindu bo vandaka kutwadisa luzingu na  bo. Gregorio ke tuba nde: “Beto bakisaka nde beto fwete sala bansoba kansi beto zabaka ve kibeni mambu yina beto fwete sala. Beto solulaka mutindu beto lendaka kudipesa mingi diaka na kisalu ya Yehowa, mingi-mingi sambu beto vandaka ve ti bana. Beto sambaka Yehowa sambu na kulomba lusadisu.”

Na ntangu yina, bo waka badiskure mingi yina vandaka kutubila kukwenda kusamuna kisika mpusa ya bansamuni ya Kimfumu vandaka mingi. Gregorio ke tuba nde: “Beto monaka nde badiskure yina vandaka mvutu ya Yehowa na bisambu na beto.” Gregorio ti Marilou sambaka sambu na kuvanda ti lukwikilu ya mingi na mpila nde bo vanda ti kikesa ya kubaka badesizio ya mbote. Diambu ya mpasi vandaka nzo yina bo vandaka kutunga. Bo futaka dezia mbongo ya bamvula tatu. Inki bo zolaka kusala? Marilou ke tuba nde: “Kana beto zenga kontra yina, beto ta vidisa mbongo yonso yina beto futaka​—yo vandaka mbongo mingi. Kansi, beto monaka nde yo vandaka dibaku ya kupona na kutula luzolo ya Yehowa na kisika ya ntete to bampusa na beto mosi.” Ntangu bo yibukaka bangogo ya ntumwa Polo ya me tala ‘kuvidisa bima,’ bo zengaka kontra ya nzo, yambulaka bisalu na bo, tekaka bima na bo mingi, mpi kwendaka kuzinga na bwala mosi ya ntama na kisanga ya Palawan, na kitamina ya bakilometre kiteso ya 480 na sudi ya Manille.​—Bafi. 3:8.

Na ntwala ya kukwenda, Gregorio mpi Marilou salaka bikesa sambu na kudibongisa na kuvanda ti luzingu ya kukonda mindondo, kansi bo bakisa mutindu luzingu na bo ya mpa ta vanda kaka ntangu bo kumaka pana. Marilou ke tuba nde: “Yo vandaka mpasi. Kura vandaka ve, tanga mpi bima ya nkaka yina ke salaka nde luzingu kuvanda mbote. Na kisika ya kulamba loso na nzungu ya kura, yo lombaka nde beto zenga bankuni mpi kulamba na zulu ya tiya. Mono vandaka diaka ve kukwenda na zandu ya nene, kudia na restora, mpi kusala mambu ya nkaka yina vandaka na mbanza na beto.” Ata mpidina, bankwelani yai vilaka ve kikuma yina bo kwendaka kuzinga kuna, mpi kukonda kusukinina bo yikanaka. Marilou ke tuba nde: “Ntangu yai, mono ke sepelaka kutala kitoko ya luyalanganu, mu mbandu bambwetete yina ke sema na mpimpa. Kuluta diaka, beto ke vandaka na kiese na kumona mutindu bantu ke sepelaka ntangu beto ke longaka bo. Na kusalaka awa, beto ‘me longukaka kinsweki’ ya kusepela na bima yina beto kele ti yo.”​—Bafi. 4:12.

Gregorio ke tuba nde: “Ntangu beto kumaka awa, Bambangi vandaka kaka 4. Bo vandaka na kiese mingi ntangu mono yantikaka kusala badiskure ya bantu yonso konso mposo mpi kubula gitare ntangu beto ke yimba bankunga ya Kimfumu.” Na nsungi ya mvula mosi, bankwelani yai monaka mutindu kimvuka yina ya fioti yelaka mpi kumaka dibundu ya bansamuni 24. Gregorio ke tuba nde: “Zola yina bampangi ya dibundu monisilaka beto simbaka ntima na beto.” Bubu yai, kana bo yindula bamvula sambanu yina bo me lutisa na kusamuna na bwala yina ya ntama, bo ke tuba nde: “Ata kima mosi ve lenda fwanana ti kiese ya kumona kuyela ya kimpeve. Ntangu yai, beto ke monaka kibeni nde luzingu na beto kele na mfunu.”

Na Philippines, kiteso ya bampangi-babakala mpi bankento 3 000 me kwendaka kusamuna bisika mpusa ya bansamuni ya Kimfumu kele mingi. Kiteso ya bampangi 500 na kati na bo kele bampangi-bankento yina me kwelaka ve. Beto tadila mbandu ya Karen.

Karen yina kele bubu yai ti bamvula 25, yelaka na mbanza Baggao na Cagayan. Ntangu yandi vandaka toko, yandi vandaka kuyindula mutindu ya kudipesa mingi na kisalu na yandi ya kusamuna. Yandi ke tuba nde: “Sambu mono zabaka nde ntangu yina me bikala kele nkufi mpi nde bantu ya mitindu yonso fwete wa nsangu ya Kimfumu, mono waka mpusa ya kukwenda kusamuna kisika mpusa ya bansamuni kele mingi.” Ata bantu ya nkaka ya dibuta na yandi longisilaka yandi na kusala banzo-nkanda ya nda na kisika ya kukwenda kusamuna na bwala ya ntama, Karen sambaka Yehowa sambu na kulomba lutwadisu. Yandi solulaka mpi ti bampangi yina ke samunaka na babwala ya ntama. Ntangu yandi lungisaka bamvula 18, yandi kwendaka na bwala mosi ya ntama, na kitamina ya bakilometre kiteso ya 64 tuka mbanza na bo.

Dibundu ya fioti yina Karen kwendaka kupesa maboko vandaka na teritware ya bangumba na lueka ya nzadi ya Pacifique. Karen ke yibuka nde: “Sambu na kukuma na dibundu yina katuka na Baggao, beto vandaka kutambula bilumbu tatu, kutombuka ti kukulumuka bangumba mpi kusabuka bamasa mbala kuluta 30.” Yandi ke yika nde: “Sambu na kukuma na balongoki ya nkaka ya Biblia, mono ke tambulaka bangunga sambanu, ke lalaka na nzo ya longoki, mpi na kilumbu yina me landa mono ke tambulaka diaka bangunga sambanu sambu na kuvutuka na nzo.” Keti bikesa yina basisaka mbutu? Karen ke tuba ti kuseka nde: “Bantangu ya nkaka mono ke waka makulu mpasi kansi mono me longukaka Biblia ti bantu 18. Mono ‘me mekaka mpi me monaka nde Yehowa kele mbote’!”​—Nk. 34:9.

Inki pusaka Sukhi, mpangi-nkento mosi ya mpumpa ya kele ti bamvula kuluta 40, na kukatuka na États-Unis mpi kukwenda na Philippines? Na 2011, yandi kwendaka na lukutakanu mosi ya nziunga yina bo yulaka bangiufula na mpangi-bakala mosi ti nkento na yandi. Bo tubilaka mutindu bo tekaka bima na bo mingi sambu na kukwenda na Mexique mpi kupesa maboko na kisalu ya kusamuna. Sukhi, ke tuba nde: “Bangiufula yina bo yulaka bampangi yina pusaka mono na kuyantika kuyindula balukanu yina mono me yindulaka ntete ve.” Ba-nkaka ya Sukhi kele bantu ya Inde. Ntangu yandi waka nde bo vandaka na mfunu ya bansamuni sambu na kulonga bantu yina ke tubaka ndinga Punjabi na Philippines, Sukhi bakaka lukanu ya kukwenda sambu na kupesa lusadisu. Inki bampasi yandi kutanaka ti yo?

Sukhi ke tuba nde: “Yo vandaka mpasi kibeni sambu na kubaka lukanu ya bima yina mono fwete nata mpi yina mono fwete teka. Diaka, na nima ya kuzinga bamvula 13 na nzo na mono mpi na luzingu ya mbote, mono kwendaka kuzinga na nsungi ya mwa ntangu na dibuta mosi, mpi na luzingu yina swaswanaka ti yina mono vandaka ti yo ntete. Yo vandaka ve pete, kansi yo vandaka mutindu ya mbote ya kulonguka mutindu  ya kuvanda ti luzingu ya kukonda mindondo.” Inki bampasi yandi kutanaka ti yo na nima ya kukwenda kuzinga na Philippines? Yandi ke tuba nde: “Sambu mono ke waka boma mingi, diambu ya mpasi vandaka kuwa baniama ti biningi-ningi boma mpi kukonda kuyikana ti bwala ya nzenza. Mono longukaka kutudila Yehowa ntima ya mvimba kuluta mutindu mono vandaka kusala yo ntete!” Keti yo fwanaka nde yandi sala mambu yina yonso? Sukhi ke tuba ti kuseka nde: “Yehowa ke songa beto nde, ‘Beno meka mono, kana mono ta pesa beno ve balusakumunu.’ Mono ke bakisaka bukieleka ya bangogo yai na ntangu yonso yina muwi mosi ke yulaka mono nde: ‘Inki kilumbu nge ta kwisa diaka? Mono kele ti bangiufula mingi ya nkaka.’ Yo ke pesaka mono kiese mingi na kusadisa bantu yina kele na nzala ya kimpeve!” (Mal. 3:10) Sukhi ke yika nde: “Na masonga yonso, diambu ya kuluta mpasi vandaka kubaka lukanu ya kukwisa awa. Ntangu mono salaka yo, mono ke yitukaka na kumona mutindu Yehowa ke lungisa bampusa na mono yonso.”

Sime, mpangi-bakala mosi ya me kwelaka ya kele ti bamvula kuluta 30, katukaka na Philippines mpi kwendaka na insi mosi na Moyen-Orient sambu na kusala kisalu mosi ya ke futaka mbote. Ntangu yandi vandaka kuna, yandi bakaka nsiamisa na nkengi mosi ya nziunga mpi na diskure yina mpangi mosi ya Nto-Kimvuka salaka; Sime bakisaka nde yandi fwete tula Yehowa na kisika ya ntete na luzingu na yandi. Sime ke tuba nde: “Kansi, kuyindula nde mono fwete yambula kisalu na mono, vandaka kupesa mono mpasi.” Ata mpidina, yandi yambulaka kisalu yina mpi vutukaka na Philippines. Bubu yai, Sime ti nkento na yandi, Haidee, ke samuna na Davao del Sur na sudi ya Philippines, kisika mpusa ya bansamuni ya Kimfumu kele mingi sambu na kusamuna na teritware yina ya nene. Sime ke tuba nde: “Kana mono yindula, mono ke sepelaka mingi mutindu mono nungaka boma na mono ya kuvidisa kisalu mpi kutula Yehowa na kisika ya ntete. Kele ve ti kima ya nkaka ya ke pesaka kiese na luzingu kuluta kupesa Yehowa bima na nge ya kuluta mbote!”

Ntangu Ramilo ti nkento na yandi Juliet, bapasudi-nzila yina kele ti bamvula kuluta 30, waka nde dibundu mosi ya kele na kitamina ya bakilometre kiteso ya 30 tuka na nzo na bo vandaka na mfunu ya lusadisu, bo ndimaka kukwenda kupesa maboko. Yo yina, konso mposo, yo vanda na nsi ya mvula to ya mwini, Ramilo ti Juliet ke salaka banzietelo na moto na bo sambu na kukwenda na balukutakanu mpi kusamuna. Ata kusala banzietelo na banzila ya mabulu-mabulu mpi kusabuka kilalu (pont) ke vandaka ti bampasi na yo, bo ke sepelaka mutindu bo ke kudipesaka mingi na kisalu ya kusamuna. Ramilo ke tuba nde: “Mono ti nkento na mono, ke longukaka Biblia ti bantu 11! Kusamuna kisika mpusa kele mingi ke lombaka bibansa, kansi yo ke pesaka beto kiese mingi!”​—1 Bak. 15:58.

Keti nge ta zola kuzaba mambu mingi na yina me tala kukwenda kusamuna kisika mpusa ya bansamuni ya Kimfumu kele mingi yo vanda na insi na beno to na insi ya nzenza? Kana mpidina, solula ti nkengi ya nziunga na beno, mpi tanga disolo “Keti Nge Lenda ‘Sabuka na Masedonia’?” na Kisalu na Beto ya Kimfumu ya Augusti 2011.