Keti nge tangaka na dikebi yonso banimero ya Nzozulu ya Nkengi yina me katuka kubasika? Tala kana nge lenda pesa mvutu na bangiufula yai ya ke landa:

Inki ntangu Yezu ‘samunaka na bampeve yina kele na boloko’? (1 Pie. 3:19)

Yo ke monana nde, na nima ya lufutumuku ya Yezu, yandi zabisaka bampeve ya mbi ndola yina bo ta baka.​—6/15, lutiti 23.

Inki mambu tatu muntu fwete sala sambu makwela ya zole kununga?

Yo kele: kubika ve nde makwela na nge ya ntete kubebisa makwela ya zole; kubuya kukangama ti banduku ya ntama yina me zaba ve nkwelani na nge ya mpa; kutudila nkwelani na nge ya mpa ntima ata nkwelani na nge ya ntama vandaka ve ya kwikama.​—7/1, balutiti 9-10.

Inki ntangu Yezu ta kabula bantu bonso mameme mpi bankombo? (Mat. 25:32)

Yo ta salama ntangu Yezu ta kwisa kusambisa bantu na mpasi ya nene na nima ya lufwa ya mabundu ya luvunu.​—7/15, lutiti 6.

Inki ntangu bantu ya ke fwaka nsiku yina bo me tubila na kingana ya ble ti matiti ya mbi ta dila mpi ta kwetisa meno na bo? (Mat. 13:36, 41, 42)

Bo ta sala mpidina na mpasi ya nene ntangu bo ta bakisa nde mpila ya kutina lufwa kele ve.​—7/15, lutiti 13.

Inki ntangu bangogo ya Yezu ya me tala mpika ya kwikama mpi ya mayele ta lungana? (Mat. 24:45-47)

Yo yantikaka ve kulungana na Pantekoti ya mvu 33 T.B., kansi na nima ya 1914. Na 1919, bo tulaka mpika yina na zulu ya bansadi, disongidila Bakristu yonso yina ke bakaka madia ya kimpeve.​—7/15, balutiti 21-23.

Inki ntangu Yezu tulaka mpika ya kwikama na zulu ya bima na yandi yonso?

Yo ta salama na makwisa, na nsungi ya mpasi ya nene ntangu mpika ya kwikama ta baka lufutu na zulu.​—7/15, lutiti 25.

Keti Biblia ke tangaka ve bazina ya bantu ya nkaka yina yo ke tubila sambu bo vandaka bantu ya mbi to ya kukonda mfunu?

Beto fwete tuba ve mpidina. Biblia ke tanga ve bazina ya bantu ya nkaka ya mbote mpi ya bantu ya nkaka ya mbi. (Ruti 4:1-3; Mat. 26:18) Yo me zabisaka beto kaka bazina ya bawanzio zole ya kwikama.​—8/1, lutiti 10.

Katula ngolo yina Nzambi me pesaka bo, inki sadisaka Bambangi 230 na kununga nzietelo ya nda yina bo salaka tuka na kan ya konsatrasio ya Sachsenhausen?

Ata bo lembaka na nzala mpi maladi, bo landaka kupesana kikesa mpi kusala nzietelo.​—8/15, lutiti 18.

Sambu na nki disolo yina ke tubilaka mutindu bantu ya Izraele sabukaka Nzadi Yordani sambu na kukota na Ntoto ya Lusilu ke pesaka beto kikesa?

Ata nzadi fulukaka na masa, Yehowa kausaka yo sambu bantu na yandi kuluta. Ntembe kele ve nde, diambu yina kumisaka ngolo lukwikilu ti kivuvu na bo, mpi disolo yina lenda pesa beto kikesa.​—9/15, lutiti 16.

Mutindu Biblia ke tubilaka mingi mukubu ke monisa inki?

Biblia ke sadilaka mikubu sambu na kumonisa nde Nzambi ke bakisaka mutindu bantu ke waka ntangu bo me mona mukubu mosi buna mpi nde mikubu lenda sadisa beto na kuyibuka mambu.​—10/1, balutiti 14-15.

Inki mutindu mbikudulu yina kele na Mishe 5:5 (NW) ya ke tubila bamfumu mpi bangungudi ke lungana bubu yai?

Beto ke bakisa nde ‘bangungudi nsambwadi mpi bamfumu nana’ yina bo ke tubila na Mishe 5:5 ke tadila bankuluntu na mabundu, bayina ke pesaka bansadi ya Nzambi kikesa sambu na mvita yina ta kwisila bo.​—11/15, lutiti 20.

Inki kele mwa bikuma yina beto kele na mfunu ya Nzambi?

Beto ke vandaka na mfunu ya lutwadisu mpi ya bamvutu ya mbote na mambu yina beto ke kutana ti yo na luzingu; Nzambi lenda pesa beto mambu yina yonso. Yandi ke sadisaka beto na kuvanda ti luzingu ya mbote mpi ya kiese, mpi yandi ta lungisa balusilu yina kele na Ndinga na yandi.​—12/1, balutiti 4-6.