Ntangu mono vandaka kaka ti bamvula kumi na 1985, bana yina katukaka na Cambodge kwisaka kutanga na ekole na beto na Columbus, mbanza ya Ohio, na insi Etats-Unis. Mosi na kati na bo zabaka mwa Kingelesi. Na nsadisa ya bifwanisu, yandi yantikaka kutela mono masolo ya boma ya kuniokula bantu, kufwa bantu mpi mutindu bantu vandaka kutina. Mono vandaka kudila na mpimpa kana mono yindula bana yina. Mono vandaka na mfunu ya kuzabisa bo kivuvu ya paladisu mpi ya lufutumuku, kansi bo zabaka ve ndinga yina mono vandaka kutuba. Ata mono vandaka kaka mwana-fioti, mono bakaka lukanu ya kulonguka ndinga ya insi Cambodge sambu na kulonga banduku na mono ya nzo-nkanda mambu ya me tala Yehowa. Mono zabaka ve nde nsola yai lendaka kusadisa mono na bilumbu ke kwisa.

Kulonguka ndinga yina vandaka ve pete. Mbala zole, mono bakaka lukanu ya kuyambula, kansi Yehowa sadisaka mono na nzila ya bibuti na mono. Na nima, balongi na mono mpi banduku na mono ya nzo-nkanda yantikaka kusiamisa mono na kusala banzo-nkanda yina ta sadisa mono na kuzwa kisalu mosi ya kuluta mbote. Kansi mono vandaka na mfunu ya kukuma mupasudi-nzila mpi mono ponaka nzo-nkanda yina zolaka kusadisa mono na kuzwa kisalu ya ntangu fioti sambu na kulungisa lukanu na mono. Na nima ya nzo-nkanda, mono vandaka kukutana ti bapasudi-nzila ya nkaka mpi kusamuna ti bo. Mono ndimaka mpi kulonga bana ya nzo-nkanda yina vandaka kulonguka Kingelesi, mpi yo natilaka mono balusakumunu mingi na nima.

Ntangu mono kumaka ti bamvula 16, mono waka nde kuvandaka ti kimvuka mosi ya ke tubaka ndinga ya insi Cambodge, na mbanza Long Beach, na Californie na insi États-Unis. Mono kwendaka na Cambodge mpi longukaka kutanga ndinga ya insi yina. Ntangu kaka mono manisaka nzo-nkanda, mono kumaka mupasudi-nzila mpi landaka kusamuna na bantu yina ke tubaka ndinga ya insi Cambodge yina vandaka pene-pene ya nzo na beto. Kansi, ntangu mono lungisaka bamvula 18, mono yantikaka kuyindula na kukwenda na Cambodge. Yo vandaka kisika mosi ya kigonsa kibeni, kansi mono zabaka nde bantu fioti na kati ya bamilio kumi yina vandaka kuzinga na Cambodge waka nsangu ya mbote ya Kimfumu. Na ntangu yina, mbanza ya mvimba vandaka kaka ti dibundu mosi ya bansamuni 13. Mono kwendaka na Cambodge sambu na mbala ya ntete ntangu mono vandaka ti bamvula 19. Bamvula zole na nima, mono kwendaka mpi kumaka kuzinga kuna. Sambu na kusala mbote kisalu na mono ya kusamuna, mono zwaka kisalu ya kinsuni ya ntangu fioti ya kubalula mpi kulonga bantu Kingelesi. Na nima, mono kwelaka nkento mosi yina vandaka mpi ti balukanu bonso mono. Kumosi, beto sadisaka bantu mingi ya Cambodge na kudipesa na Nzambi.

Yehowa pesaka mono ‘bima yina ntima na mono ke zolaka.’ (Nk. 37:4) Kukumisa bantu balongoki kele kisalu ya ke pesaka mono kiese mingi kuluta bisalu yonso ya nkaka. Na nsungi ya bamvula 16 yina mono me lutisa na Cambodge, kimvuka yina ya fioti ya Bambangi ya Yehowa 13 me yelaka mpi me kumaka mabundu 12 mpi bimvuka 4!—Disolo ya Jason Blackwell.