1. Inki organizasio yingaka dikanda ya Izraele ya bankolami yina Yehowa solaka sambu na zina na yandi? (Tala kifwanisu yina kele na luyantiku ya disolo.)

YEHOWA muntu vandaka kibeni na kisina ya dibundu ya Bukristu na mvu-nkama ya ntete mpi ya kuvutulama ya lusambu ya kieleka na bilumbu na beto. Mutindu beto tubilaka yo na disolo yina me luta, organizasio yina salamaka na balongoki ya Kristu ya ntete yingaka dikanda ya Izraele ya bankolami yina Yehowa solaka sambu na zina na yandi. Organizasio yina ya mpa yina Nzambi vandaka kusakumuna, gulukaka ntangu Yeruzalemi fwaka na mvu 70 T.B. (Luka 21:20, 21) Mambu yina salamaka na mvu-nkama ya ntete monisaka mambu yina ta kumina bansadi ya Nzambi ya bilumbu na beto. Kubika fioti, ngidika ya bima ya Satana ta kuma na nsuka kansi bansadi ya Nzambi ta guluka na bilumbu ya nsuka. (2 Tim. 3:1) Inki ke ndimisa beto?

2. Yezu tubaka nki na yina me tala “mpasi ya nene,” mpi nki mutindu yo ta yantika?

² Yezu tubaka sambu na kukala na yandi mpi nsuka ya ngidika ya bima nde: “Mpasi ya nene ta vanda, mpasi mosi ya me bwaka ntete ve katuka na luyantiku ya nsi-ntoto tii bubu yai, ve, mpi yo ta bwa diaka ve.” (Mat. 24:3, 21) Mpasi yina beto lenda fwanisa ve  ata ti mpasi mosi ta yantika ntangu Yehowa ta sadila bamfumu ya luyalu sambu na kufwa “Babilonia ya Nene,” kintinu ya nsi-ntoto ya mvimba ya mabundu ya luvunu. (Kus. 17:3-5, 16) Inki mambu ta salama na nima?

3. Na nima ya lufwa ya mabundu ya luvunu, inki ta kumina bansadi ya Yehowa?

³ Na nima ya kufwa mabundu ya luvunu, Satana ti bantu na yandi ta nwanisa bansadi ya Yehowa. Mu mbandu, Biblia ke tuba sambu na ‘Gogi ya nsi ya Magogi’ nde: ‘Gogi ti basoda na yandi ti bantu mingi yina kele na yandi ta nwanisa bo bonso mupepe ya ngolo, ta fika bo bonso matuti.’ Sambu bansadi ya Yehowa me konda minduki mpi kele bantu ya ngemba, bo ta monana bonso nde bo me konda lutaninu. Kansi, kunwanisa bo ta vanda kigonsa ya nene!—Ezek. 38:1, 2, 9-12.

4, 5. Yehowa ta sala nki na bikesa yina Satana ta sala sambu na kunwanisa bansadi ya Nzambi?

⁴ Nzambi ta sala inki na bikesa yonso yina Satana ta sala sambu na kunwanisa bansadi ya Nzambi? Yehowa ta nwanina bansadi na yandi, na kusadilaka kiyeka na yandi ya Mfumu ya Luyalanganu. Ntangu bo ta nwanisa bansadi na yandi, Yehowa ta mona bonso nde bo ke nwanisa yandi. (Tanga Zakaria 2:8.) Yo yina, Tata na beto ya zulu ta sala mambu kukonda kusukinina sambu na kutanina beto. Lutaninu yina ta monana pwelele ntangu Yehowa ta fwa nsi-ntoto ya Satana na Armagedoni, “bitumba ya kilumbu ya nene ya Nzambi Nkwa-Ngolo Yonso.”—Kus. 16:14, 16.

⁵ Biblia ke tuba sambu na bitumba ya Armagedoni nde: “Yehowa kele na ntembe ti makanda. Yandi mosi ta sambisa bantu yonso. Mpi yandi ta fwa bantu ya mbi na mbele ya kunwanina, Yehowa muntu me tuba. Yehowa ke tuba nde: ‘Mpasi ta bwila bantu yonso bonso mupepe ya ngolo me katuka ntama. Bantu yina Yehowa ta fwa na kilumbu yina ta vanda katuka na nsuka mosi ya ntoto tii na nsuka ya nkaka ya ntoto. Bo ta dila bo ve, bo ta katula bo ve, mpi bo ta zika bo ve. Bo ta kuma bonso nsasa na zulu ya ntoto.’” (Yer. 25:31-33, NW) Bitumba ya Armagedoni ta tula nsuka na ngidika ya bima ya Satana. Kansi, kitini ya organizasio ya Yehowa yina kele na ntoto ta guluka.

6, 7. (a) Bantu yina ke sala ‘kibuka ya nene’ me katuka na wapi? (b) Inki kuyela ke monana na bamvula yai?

⁶ Organizasio ya Nzambi ke landa na kukwenda na ntwala sambu bantu yina kele na kati na yo me ndimamaka na Nzambi. Biblia ke ndimisa beto nde: “Meso ya Yehowa ke talaka bantu ya lunungu, mpi makutu na yandi ke waka badodokilu na bo.” (1 Pie. 3:12) Na kati ya bantu yina ya lunungu, beto lenda tanga “kibuka mosi ya nene ya bantu” yina “me katuka na mpasi ya nene.” (Kus. 7:9, 14) Bantu yango kele kaka ve ‘kibuka mosi ya bantu.’ Kansi, bo kele “kibuka mosi ya nene ya bantu,” disongidila bankama ya mafunda ya bantu. Keti nge ke kudimona na kati ya bantu yina ta guluka na “mpasi ya nene”?

⁷ Bantu yina ke sala kibuka ya nene me katuka na wapi? Na makanda yonso. Kisalu ya kusamuna, diambu yina Yezu tubilaka bonso kidimbu ya kukala na yandi, me vukisaka bo. Yandi tubaka nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, mpi na nima nsuka ta kwisa.” (Mat. 24:14) Yo yina, kisalu ya kusamuna kele kisalu ya kuluta mfunu ya organizasio ya Nzambi. Na nsadisa ya kisalu yina, bamilio ya bantu me longukaka na kusambila Nzambi “na mpeve mpi na kieleka.” (Yoa. 4:23, 24) Mu mbandu, na bamvula 10 yina me katuka kuluta, disongidila tuka mvula ya kisalu 2003 tii na 2012, bantu kuluta 2 707 000 bakaka mbotika sambu na kumonisa kudipesa na bo na Nzambi. Bubu yai, Bambangi  ya Yehowa na nsi-ntoto ya mvimba kele kuluta 7 900 000; mpi konso mvula bamilio ya bantu ke vukanaka ti beto, mingi-mingi sambu na kusungimina Lufwa ya Kristu. Beto ke kudisikisaka ve sambu na ntalu yina ya mingi, sambu ‘Nzambi muntu ke yedisa mambu.’ (1 Bak. 3:5-7) Ata mpidina, yo kele pwelele nde kibuka ya nene ke landa na kuyela mpi kukuma nene konso mvula.

8. Sambu na nki organizasio ya Yehowa ke landa na kuyela?

⁸ Bansadi ya Nzambi ke landa na kukuma mingi sambu Yehowa yandi mosi ke sakumuna Bambangi na yandi. (Tanga Yezaya 43:10-12.) Mbikudulu mosi tubilaka kuyela yina na bangogo yai: ‘Kimvuka ya fioti ta kuma difunda mpi dikanda ya fioti ta kuma dikanda ya ngolo. Mono Yehowa, ta sala yo nswalu na ntangu na yo.’ (Yez. 60:22) Na ntangu mosi buna, Bakristu yina bo me tulaka mafuta ya kele na ntoto vandaka bonso “dikanda ya fioti,” kansi ntalu na bo kumaka mingi ntangu Bakristu ya nkaka ya bo me tulaka mafuta kotaka na organizasio ya Nzambi. (Bag. 6:16) Sambu Yehowa ke sakumuna dikanda yai, ntalu ya bantu ya kibuka ya nene ke kuma mpi mingi.

9. Inki beto fwete sala kana beto ke zola kubaka balusakumunu yina Nzambi ke sila?

⁹ Yehowa me sila na kupesa beto balusakumunu na nsi-ntoto ya mpa, yo vanda Bakristu yina bo me tulaka mafuta to kibuka ya nene. Kansi sambu na kubaka balusakumunu yina, beto fwete sala mambu yina Yehowa ke lombaka beto. (Yez. 48:17, 18) Mu mbandu, Yehowa vandaka kulomba bantu ya Izraele na kulemfukila Nsiku ya Moize. Lukanu ya Nsiku vandaka ya kutanina bantu ya Izraele na kupesaka bo minsiku ya mfunu na yina me tala kuvukisa nitu, mumbongo, kusansa bana, kusadila bankaka mambu na mutindu ya mbote, mpi buna na buna. (Kub. 20:14; Levi 19:18, 35-37; Kul. 6:6-9) Kusadila mambu yina Nzambi ke lombaka beto ke natilaka beto mpi mambote kaka bonso bantu ya Izraele mpi ntembe kele ve nde beto ke monaka nde kusala luzolo ya Nzambi kele ve kilo. (Tanga 1 Yoane 5:3.) Nkutu, kaka mutindu Nsiku vandaka kutanina bantu ya Izraele, kuzitisa bansiku mpi minsiku ya Yehowa Nzambi ke taninaka beto mpi ke sadisaka beto na kuvanda ti “lukwikilu ya ngolo.”—Tito 1:13.

10. Sambu na nki beto fwete bumba ntangu sambu na kulonguka Biblia mpi kusala Lusambu ya Dibuta konso mposo?

¹⁰ Kitini ya organizasio ya Yehowa yina kele na ntoto ke kwenda na ntwala na mitindu mingi. Mu mbandu, mutindu na beto ya kubakisa bakieleka ya Biblia ke landaka kaka na kukuma pwelele. Yo kele kibeni diambu yina Biblia bikulaka nde: ‘Nzila ya bantu ya lunungu kele bonso nsemo ya suka yina ke landa kukuma mingi tii kuna mwini ke kuma ngolo kibeni.’ (Bing. 4:18) Kansi, beto lenda kudiyula nde: ‘Keti mono ke tambula kumosi ti bantendula ya mpa yina ke basika na mutindu ya kubakisa bakieleka ya Masonuku? Keti mono ke vandaka ti kikalulu ya kutanga Biblia konso kilumbu? Keti mono ke vandaka ti mpusa ya ngolo ya kutanga mikanda na beto? Keti mono ti dibuta na mono ke salaka Lusambu ya Dibuta konso mposo? Mingi na kati na beto ta ndima nde kusala mambu yai kele ve kilo. Yo ke lombaka kaka kubumba ntangu sambu na kusala yo. Yo kele mfunu kibeni na kulanda kulonguka Ndinga ya Nzambi, kusadila yo mpi kuyela na kimpeve, mingi-mingi na ntangu yai mpasi ya nene me finama kibeni!

11. Inki mutindu bansadi ya Nzambi ya ntama mpi ya bubu yai me bakaka mambote na bankinsi, balukutakanu ya dibundu mpi ya nene?

¹¹ Organizasio ya Yehowa ke sadisaka beto na mutindu yo ke longisilaka beto na kuwidikila na dikebi yonso ndongisila yai ya ntumwa Polo: “Bika beto tulana dikebi sambu beto pesana kikesa ya kumonisa zola mpi ya kusala  bisalu ya mbote, mpi beto yambula ve kuvukana na balukutakanu na beto, mutindu bantu ya nkaka kele ti kikalulu ya kusala, kansi beto pesana kikesa, mpi beno sala yo mingi kuluta sambu beno ke mona kilumbu ke finama.” (Baeb. 10:24, 25) Balukutakanu mpi bankinsi yina bantu ya Izraele vandaka kusala konso mvula sambu na kusambila Yehowa vandaka kukumisa kimpeve na bo ngolo. Diaka, Nkinsi ya Bisasa yina bo vandaka kusala na bilumbu ya Nehemia vandaka dibaku mosi ya kiese. (Kub. 23:15, 16; Neh. 8:9-18) Beto ke bakaka mambote ya mutindu mosi na balukutakanu na beto ya dibundu mpi ya nene. Bika beto sadila bangidika yai yonso na kiteso ya mingi sambu nde beto yela na kimpeve mpi kuvanda na kiese.—Tito 2:2.

12. Inki mutindu beto fwete kudiwa na yina me tala kisalu ya kusamuna Kimfumu?

¹² Sambu beto kele na kati ya organizasio ya Nzambi, beto kele na kiese ya kusala “kisalu ya santu ya nsangu ya mbote ya Nzambi.” (Bar. 15:16) Kusala “kisalu [yai] ya santu” ke kumisaka beto “banduku ya kisalu” ya Yehowa, “Muntu ya Santu.” (1 Bak. 3:9; 1 Pie. 1:15) Kusamuna nsangu ya mbote ke pesaka beto dibaku ya kusantisa zina ya santu ya Yehowa. Diaka, kusamuna “nsangu ya mbote ya nkembo ya Nzambi ya kiese” kele dibaku mosi ya mbalu kibeni!—1 Tim. 1:11.

13. Inki beto fwete sala sambu na kuvanda ti kimpeve ya ngolo mpi kuvanda na luzingu?

¹³ Nzambi ke zola nde beto vanda ti kimpeve ya ngolo na kukangamaka na yandi mpi na kupesaka maboko na bisalu yina ke salama na organizasio na yandi. Moize zabisaka dikanda ya Izraele nde: ‘Mono ke baka zulu mpi ntoto bonso bambangi na ntwala na beno bubu yai, nde mono me tula luzingu mpi lufwa na ntwala na nge, lusakumunu mpi lusingu; nge fwete pona luzingu sambu nge zinga, nge ti bana na nge, na kuzolaka Yehowa Nzambi na nge, na kuwidikilaka ndinga na yandi, mpi na kukangamaka na yandi; sambu yandi kele luzingu na nge mpi na nzila na yandi, nge ta zinga mingi na insi yina Yehowa zengaka kieleka na kupesa ba-nkaka na nge, Abrahami, Izaki, mpi Yakobi.’ (Kul. 30:19, 20) Luzingu na beto me simbama na kusala luzolo ya Yehowa, kuzola yandi, kulemfukila yandi mpi kukangama na yandi.

14. Inki mutindu mpangi-bakala mosi vandaka kutadila organizasio ya Nzambi?

¹⁴ Mpangi Pryce Hughes, yina vandaka ya kwikama na Yehowa mpi landaka kutambula ti organizasio na yandi sonikaka nde: “Mono kele na kiese mingi mutindu mono me zingaka na kuwakana ti nzayilu ya balukanu ya Yehowa tuka bilumbu yina ya luyantiku tii na ntwala ya mvu 1914 . . . Diambu ya mfunu mingi yina mono me longukaka kele kukangama na organizasio ya Yehowa yina ke monana. Mambu yina mono me kutanaka ti yo me longaka mono na kutula ve ata fioti ntima na mayele ya bantu. Ntangu mono bakisaka diambu yina, mono bakaka lukanu ya kukangama ti organizasio yai ya kwikama. Katula organizasio ya Yehowa, na wapi mono lendaka kubaka balusakumunu na yandi?”

15. Pesa mbandu mosi ya Masonuku ya ke monisa mutindu beto fwete tadila bansoba yina ke salama na mutindu na beto ya kubakisa Biblia.

¹⁵ Kana beto ke zola kundimama na Yehowa mpi kubaka balusakumunu na yandi, beto fwete pesa maboko na organizasio na yandi mpi kundima bansoba yina ke salama na mutindu ya kubakisa Masonuku. Beto tadila diambu yai: Na nima ya lufwa ya Yezu, Bayuda mingi yina kumaka Bakristu landaka kulemfukila Nsiku ya Moize mpi bo vandaka kumona mpasi na kuyambula yo. (Bis. 21:17-20) Kansi na nsadisa ya mukanda yina Polo sonikilaka Baebreo, bo bakisaka nde bo vandaka ya kusantisama “na nzila ya dikabu ya nitu ya Yezu  Kristu [yina pesamaka] mbala mosi mpamba,” kansi ve “na nzila ya bimenga yina bo ke pesaka na kutadila Nsiku.” (Baeb. 10:5-10) Ntembe kele ve nde, mingi na kati ya Bakristu yina ya Bayuda sobaka mutindu na bo ya kuyindula mpi landaka kuyela na kimpeve. Beto mpi fwete longuka Masonuku na dikebi yonso mpi kuvanda ti mabanza ya mbote ntangu bansoba ke salama na mutindu na beto ya kubakisa Ndinga ya Nzambi to na kisalu na beto ya kusamuna.

¹⁶ Bakristu yonso yina ke bikala ya kwikama na Yehowa mpi na organizasio na yandi ta landa kubaka balusakumunu na yandi. Bakristu ya kwikama yina bo me tulaka mafuta ta baka dibaku ya nene ya kuyala ti Kristu na zulu. (Bar. 8:16, 17) Bakristu yina kele ti kivuvu ya kuzinga na ntoto ke vingila luzingu ya kiese na Paladisu. Sambu beto kele na kati ya organizasio ya Yehowa, beto kele na kiese kibeni ya kuzabisa bankaka mambu ya me tala ntoto ya mpa yina Nzambi me sila! (2 Pie. 3:13) Nkunga 37:11 ke tuba nde: ‘Bantu ya kudikulumusa ta baka ntoto, mpi bo ta mona kiese mingi kibeni na ngemba ya mingi.’ Bantu ‘ta tunga banzo mpi ta zinga muna,’ mpi “ta mona kiese na bisalu ya maboko na bo.” (Yez. 65:21, 22) Bantu ta monisaka diaka ve bankaka mpasi, mpi kinsukami ti nzala ta vanda diaka ve. (Nk. 72:13-16) Babilone ya Nene ta kusa diaka ve bantu, sambu yo ta vanda diaka ve. (Kus. 18:8, 21) Bafwa ta futumuka mpi ta baka dibaku ya kuzinga mvula na mvula. (Yez. 25:8; Bis. 24:15) Yai kele bivuvu ya kitoko ya ke vingila bamilio ya bantu yina me kudipesaka na Yehowa! Sambu na kumona kulungana ya balusilu yai, beto fwete landa na kuyela na kimpeve mpi kulanda kutambula ti organizasio ya Nzambi.

17. Inki mutindu beto fwete tadila lusambu ya Yehowa mpi organizasio na yandi?

¹⁷ Sambu nsuka ya ngidika ya Satana ke finama, bika beto landa kuvanda ti lukwikilu ya ngolo mpi kumonisa ntonda ya mingi na bangidika yina Nzambi ke baka sambu na kusambila yandi. Yo kele diambu yina muyimbi-bankunga Davidi monisaka ntangu yandi yimbaka nde: ‘Mono lombaka Yehowa kima mosi mpamba: mono vanda na nzo ya Yehowa luzingu na mono ya mvimba, sambu na kutala kitoko ya Yehowa mpi sambu na kutala ti ntonda tempelo na yandi.’ (Nk. 27:4) Bika nde konso muntu na kati na beto kukangama na Nzambi mpi kulanda kutambula ti organizasio ya Yehowa.