Na nkunga mosi yina yandi kumisaka Ngangi na yandi, Davidi, Ntotila ya Izraele yimbaka nde: ‘Nzambi na mono, mono ke mona kiese na kusala luzolo na nge! Bansiku na nge kele na ntima na mono.’ (Nk. 40:9) Ata yandi kutanaka ti bampasi mingi na luzingu na yandi, Davidi vandaka kusepela mingi na kusala luzolo ya Nzambi. Ya kieleka, na kati ya bansambidi ya Yehowa, Davidi mpamba ve vandaka kusepela na kusadila Nzambi ya kieleka.

Ntumwa Polo sadilaka bangogo yina kele na Nkunga 40:9 sambu na kutubila Mesia to Kristu. Yandi sonikaka nde: “Ntangu [Yezu] ke kwisa na nsi-ntoto yandi ke tuba nde: ‘“Nge zolaka ve kimenga mpi dikabu, kansi nge yidikilaka mono nitu. Nge ndimaka ve makabu ya kuyoka mpi dikabu sambu na disumu.” Ebuna mono tubaka nde, “Tala! Mono me kwisa (na rulo ya mukanda bo me sonikaka sambu na mono) sambu na kusala luzolo na nge, O Nzambi.”’”—Baeb. 10:5-7.

Ntangu Yezu vandaka na ntoto, yandi vandaka kusepela kutala bima yina Nzambi me gangaka, kuvanda ti banduku mpi kudia ti bantu ya nkaka. (Mat. 6:26-29; Yoa. 2:1, 2; 12:1, 2) Ata mpidina, diambu ya ntete-ntete yina vandaka mfunu mingi mpi kupesa yandi kiese, vandaka kusala luzolo ya Tata na yandi ya zulu. Yo yina, Yezu tubaka nde: “Madia na mono kele ya kusala luzolo ya muntu yina tindaka mono mpi ya kumanisa kisalu na yandi.” (Yoa. 4:34; 6:38) Balongoki ya Yezu longukaka kinsweki ya kiese ya kieleka na Mfumu na bo. Na kiese yonso, bo ndimaka kukwenda kuzabisa nsangu ya Kimfumu na bantu ya nkaka.—Luka 10:1, 8, 9, 17.

Yezu pesaka balongoki na yandi ntuma yai: “Beno kwenda mpi beno kumisa bantu ya makanda yonso balongoki, beno botika bo na zina ya Tata mpi ya Mwana mpi ya mpeve santu, beno longa bo na kuzitisa mambu yonso ya mono tumaka beno. Mono kele ti beno bilumbu yonso tii na nsukilu ya ngidika ya bima.” (Mat. 28:19, 20) Kulungisa ntuma yina  vandaka kulomba kusosa bantu bisika yonso yina bo lendaka kumona bo, kuvutukila bayina sepelaka na nsangu, mpi kulonguka Biblia ti bo. Kusala kisalu yai lenda natila beto kiese ya mingi kibeni.

Yo vanda bantu ke sepela na nsangu na beto to ve, kikalulu yina beto ke monisa kele kima ya mfunu yina ta sadisa beto na kusepela na kisalu ya kusamuna. Sambu na nki beto ke fulaka kuzabisa nsangu ya mbote ata bantu ya nkaka ke tudilaka yo ve dikebi? Sambu beto ke bakisaka nde kisalu ya kusamuna mpi ya kukumisa bantu balongoki kele kidimbu yina ke monisa nde beto ke zolaka Nzambi mpi bamfinangani na beto. Ya kieleka, luzingu ya bantu kele na kigonsa—yo vanda ya beto mosi to ya bamfinangani na beto. (Ezek. 3:17-21; 1 Tim. 4:16) Bika beto tadila mambu yina me sadisaka bansamuni mingi na kutanina kikesa na bo na kisalu ya kusamuna na bateritware ya mpasi.

Mbala mingi, ntangu beto ke yulaka bangiufula ya mbote na kisalu ya kusamuna, yo ke butaka mbutu ya mbote. Kilumbu mosi na suka, Amalia monaka muntu mosi na parke ke tanga zulunalu. Yandi pusanaka pene-pene na yandi mpi yulaka yandi kana kele ti kima ya mfunu yina yandi me mona na kati. Ntangu yandi pesaka mvutu nde yandi me mona ve ata kima mosi ya mfunu, Amalia tubaka nde: “Mono me natila nge nsangu ya mbote na yina me tala Kimfumu ya Nzambi.” Diambu yai bendaka dikebi na yandi, mpi yandi ndimaka kulonguka Biblia. Nkutu, Amalia yantikaka kulonguka Biblia ti bantu tatu na parke yina.

Janice me kumisaka kisika na yandi ya kisalu teritware na yandi. Ntangu bantu yina ke kengilaka mpi banduku na yandi ya kisalu sepelaka ti disolo mosi ya Nzozulu ya Nkengi, Janice kumaka kunatila bo bazulunalu mbala na mbala. Yandi salaka mpi mutindu yina na nduku na yandi ya kisalu yina yitukaka na masolo mingi yina ke basikaka na Nzozulu ya Nkengi mpi na Réveillez-vous ! Yo salaka nde nduku na yandi ya nkaka ya kisalu kulomba bazulunalu. Janice ke tuba nde: “Yo kele kibeni lusakumunu ya Yehowa!” Nsuka-nsuka yandi kumaka kukabula bazulunalu na bantu 11 na kisika na yandi ya kisalu.

Nkengi-ntambudi mosi pesaka ndongisila nde ntangu bansamuni ke samuna nzo na nzo, bo fwete sukisa ve masolo na bo ti muwi na kutubaka kaka nde bo ta vutuka kilumbu ya nkaka. Kansi, bo lenda yula muwi nde: “Keti nge ta zola nde mono songa nge mutindu kulonguka ya Biblia ke salamaka?” to, “Inki kilumbu mpi nki ntangu nge ta zola nde mono kwisa diaka sambu beto fula disolo na beto?” Nkengi-ntambudi yina tubaka nde ntangu bampangi ya dibundu mosi ya nziunga na yandi sadilaka metode yai, bo yantikaka kulonguka Biblia ti bantu 44 na mposo mosi.

Kusala bamvutukila ya mpa kukonda kusukinina—ata nkutu bilumbu fioti na nima ya kilumbu yina beto solulaka ti muntu na mbala ya ntete—lenda vanda mbote kibeni. Sambu na nki? Sambu kusala mutindu yina ke monisaka nde beto kele mpenza  na mfunu ya kusadisa bantu na kubakisa Biblia. Ntangu bo yulaka nkento mosi sambu na nki yandi ndimaka kulonguka Biblia ti Bambangi ya Yehowa, yandi tubaka nde: “Mono yantikaka kulonguka sambu bo monisilaka mono zola mpi dikebi ya masonga.”

Bilumbu fioti na nima ya kukota Nzo-Nkanda ya Kisalu ya Kimupasudi-Nzila, Madaí kumaka kulonguka Biblia ti bantu 15 mpi lombaka bampangi ya nkaka na kulonguka ti balongoki na yandi ya nkaka kuluta 5. Balongoki na yandi mingi yantikaka kukwisa na balukutakanu mbala na mbala. Inki sadisaka Madaí na kulonguka ti bantu mingi? Nzo-nkanda monisaka mfunu ya kusala bamvutukila ya mpa tii ntangu yandi ta zwa bantu yina ke monisa mpenza mpusa. Mpangi mosi yina me sadisaka bantu mingi na kulonguka kieleka ke tuba nde: “Mono bakisaka nde kusala bamvutukila ya mpa kele kima ya mfunu sambu na kusadisa bantu yina ke zola kuzaba Yehowa.”

Kusala bamvutukila ya mpa mpi kulonguka Biblia ti bantu ke lombaka bikesa mingi. Kansi, balusakumunu yina beto ta baka me luta bikesa yina yonso. Ntangu beto ke kudipesa na kisalu ya kusamuna, beto lenda sadisa bantu ya nkaka na “kubaka nzayilu ya sikisiki ya kieleka” yina lenda sadisa bo na kuguluka. (1 Tim. 2:3, 4) Yo lenda natila beto kiese ya mingi kibeni.