Inki Mutindu Beto Lenda “Pesa Mvutu na Konso Muntu”?
“Bika nde mambu ya beno ke tuba kuvanda ntangu yonso ya mbote, . . . ebuna beno ta zaba mutindu beno fwete pesa mvutu na konso muntu.”—BAKOL. 4:6.
1, 2. (a) Tubila mbandu mosi yina ke monisa mfunu ya kuyula bangiufula ya mayele mpi ya me fwana. (Tala kifwanisu yina kele na luyantiku ya disolo.) (b) Sambu na nki beto fwete wa ve boma ntangu masolo yina ke basisaka ntembe me basika?
BAMVULA mingi me luta, mpangi-nkento mosi vandaka kusolula masolo ya Biblia ti bakala na yandi yina vandaka ve Mbangi. Na ntama, bakala yina vandaka muntu ya nene na dibundu mosi ya Kikristu. Ntangu bo vandaka kusolula, bakala tubaka nde yandi ke kwikilaka na dilongi ya Butatu. Sambu mpangi-nkento zabaka nde bakala na yandi vandaka kubakisa kibeni ve dilongi yina, yandi yulaka bakala na yandi na mayele yonso nde: “Keti nge ke kwikilaka nde Nzambi kele Nzambi, Yezu kele Nzambi, mpi mpeve santu kele Nzambi, kansi bo kele ve banzambi tatu kansi Nzambi mosi kaka?” Bakala na yandi yitukaka mpi tubaka nde: “Ve, mono ke kwikilaka ve mpidina!” Na nima, bo solulaka mbote sambu na kuzaba kimuntu ya kieleka ya Nzambi.
2 Mbandu yai ke monisa mfunu ya kuyula bangiufula ya mbote mpi na mayele yonso. Yo ke monisa mpi dibanza yai ya mfunu: Beto fwete wa ve boma na masolo yina ke basisaka ntembe mu mbandu butatu, bilungi ya tiya, to kusosa kuzaba kana Ngangi kele. Kana beto ke tula ntima na Yehowa mpi na formasio yina yandi ke pesa beto, beto lenda pesa bamvutu yina ke ndimisa muntu mpi ya lenda simba ntima ya bawi. (Bakol. 4:6) Beto tadila ntangu yai, mutindu ya (1) kuyula bangiufula yina ke pusa muwi na kumonisa bangindu na yandi, (2) kuyindula ti muntu na nsadisa ya Masonuku, mpi (3) kusadila bambandu sambu na kusadisa muntu na kubakisa diambu yina beto ke tubila.
YULA BANGIUFULA YINA KE PUSA MUWI NA KUMONISA BANGINDU NA YANDI
3, 4. Sambu na nki yo kele mfunu na kuyula bangiufula yina ke sadisa beto na kuzaba mambu yina muwi ke kwikilaka? Pesa mbandu.
3 Bangiufula lenda sadisa beto na kuzaba mambu yina muwi ke kwikilaka. Sambu na nki yo kele mfunu? Bingana 18:13 ke tuba nde: ‘Kana muntu ke pesa mvutu na diambu mosi na ntwala ya kuwa yo, yo kele buzoba mpi nsoni sambu na yandi.’ Yo yina, na ntwala ya kumonisa muntu dibanza ya Biblia na diambu mosi buna, yo ta vanda mbote nde beto sosa kuzaba ntete mambu yina muwi ke kwikilaka kibeni. Kana ve, beto lenda lutisa ntangu mingi na kusosa kundimisa yandi nde dilongi yina kele luvunu mpi kubakisa na nima nde muwi mpi ke kwikilaka ve na yo ata fioti!—1 Bak. 9:26.
4 Yindula nde beto ke solula ti muntu na yina me tala bilungi ya tiya. Bantu yonso ve ke kwikilaka nde bilungi kele kisika yina bantu ta niokwamaka na tiya. Bantu mingi ke tubaka nde yo kele nkadilu ya muntu yina me kabwana ti Nzambi. Kansi, beto lenda tuba nde: “Sambu bantu mingi kele na mabanza ya kuswaswana na yina me tala bilungi, inki kele dibanza na nge?” Na nima ya kuwa mvutu na yandi, beto ta zaba kibeni mutindu ya mbote ya kusadisa yandi na kubakisa mambu yina Biblia ke tubaka na diambu yina.
5. Inki mutindu bangiufula lenda sadisa beto na kuzaba kikuma yina muwi ke kwikilaka na diambu mosi buna?
5 Kuyula bangiufula na mayele yonso lenda sadisa beto mpi na kubakisa kikuma yina muwi ke kwikilaka diambu mosi buna. Mu mbandu, inki beto ta sala kana beto kutana ti muntu mosi na kisalu ya kusamuna ya ke kwikilaka ve nde Nzambi kele? Beto lenda nwanina kuyindula nde yandi ke landaka mabanza ya bantu mingi, mu mbandu dilongi ya evolisio. (Nk. 10:4) Kansi, bantu ya nkaka ke kwikilaka diaka ve na Nzambi sambu bo ke monaka bantu ke niokwama to bo mosi ke niokwama na bampasi. Sambu na bampasi yina, yo lenda vanda mpasi sambu na bo na kundima nde kele ti Ngangi ya ke zolaka bo. Yo yina, kana muwi me buya kukwikila nde Nzambi kele, beto lenda yula yandi nde: “Keti nge ke kwikilaka mutindu yina banda ntama?” Kana yandi tuba nde ve, beto lenda yula yandi kana kele ti kima mosi yina pusaka yandi na kukwikila ve nde Nzambi kele. Mvutu na yandi lenda sadisa beto na kuzaba mutindu ya kusadisa yandi na kimpeve.—Tanga Bingana 20:5.
6. Inki beto fwete sala na nima ya kuyula muntu ngiufula?
6 Na nima ya kuyula muntu ngiufula, beto fwete widikila mvutu na yandi mpi kuditula na kisika na yandi. Mu mbandu, muntu mosi lenda tuba nde kisumbula mosi yina salamaka salaka nde yandi kwikila diaka ve na Ngangi ya zola. Na ntwala ya kupesa banzikisa ya ke monisa nde Nzambi kele, yo ta vanda mbote na kuditula na kisika na yandi mpi kumonisa yandi nde yo kele ve mbi na kudiyula kikuma yina beto ke niokwamaka. (Hab. 1:2, 3) Kana beto monisa ntima-nda mpi zola, beto lenda pesa yandi mpusa ya kuzaba mambu mingi. *
YINDULA TI MUNTU NA NSADISA YA MASONUKU
Inki diambu kele mfunu sambu na kuvanda bansamuni ya mbote? (Tala paragrafe 7)
7 Beto tadila ntangu yai mutindu beto lenda yindula ti muntu na nsadisa ya Masonuku. Ya kieleka, Biblia kele kisadilu ya kuluta mfunu na kisalu ya kusamuna. Yo ke sadisaka beto na “kuvanda ya kukuka kibeni, mpi ya kufwana kibeni sambu na konso kisalu ya mbote.” (2 Tim. 3:16, 17) Kuvanda nsamuni ya mbote ke lombaka ve kutangila muntu baverse mingi, kansi kuyindula ti yandi na nsadisa ya baverse yina mpi kutendula yo. (Tanga Bisalu 17:2, 3.) Sambu na kubakisa diambu yai, beto tadila bambandu tatu yina me landa.
8, 9. (a) Inki mutindu beto lenda yindula ti muntu yina ke kwikilaka nde Yezu kele kiteso mosi ti Nzambi? (b) Katula bangindu yina beto me tubila, inki bangindu ya nkaka nge lenda sadila sambu na kuyindula ti muwi?
8 Mbandu 1: Na kisalu ya kusamuna, beto me kutana ti muntu yina ke kwikilaka nde Yezu kele kiteso mosi ti Nzambi. Inki baverse beto lenda tanga sambu na kuyindula ti yandi na diambu yina? Beto lenda lomba yandi na kutanga Yoane 6:38, kisika Yezu ke tuba nde: “Mono katukaka na zulu mpi kwisaka kukulumuka sambu na kusala luzolo na mono ve, kansi luzolo ya muntu yina tindaka mono.” Na nima ya kutanga verse yina, beto lenda yula yandi nde: “Kana Yezu kele Nzambi, nani tindaka yandi awa na ntoto? Keti muntu yina tindaka Yezu lutaka yandi ve na kiyeka? Na kutuba masonga, muntu yina ke tindaka ke lutaka muntu yina yandi me tinda.”
9 Beto lenda tanga mpi Bafilipi 2:9, kisika ntumwa Polo monisaka diambu yina Nzambi salaka na nima ya lufwa mpi ya lufutumuku ya Yezu. Verse yango ke tuba nde: “Nzambi tombulaka [Yezu] na kisika mosi ya kuzanguka mpi pesaka yandi na luzolo yonso zina yina me luta bazina yonso ya nkaka.” Sambu na kusadisa muntu yina na kuyindula na verse yina, beto lenda yula yandi nde: “Kana Yezu vandaka kiteso mosi ti Nzambi na ntwala ya kufwa, mpi ntangu yandi futumukaka, Nzambi tombulaka yandi na kisika mosi ya kuzanguka, keti nge ke mona ve nde Yezu zolaka kuluta Nzambi? Keti yo lenda salama nde muntu mosi kuluta Nzambi na kiyeka?” Kana muntu yina ke zitisaka Ndinga ya Nzambi mpi kele muntu ya ntima ya masonga, bangindu yai lenda pusa yandi na kusosa kuzaba mambu mingi na yina me tala diambu yina.—Bis. 17:11.
10. (a) Inki mutindu beto lenda yindula ti muntu yina ke kwikilaka na bilungi ya tiya? (b) Katula bangindu yina beto me tubila, inki bangindu ya nkaka nge lenda sadila sambu na kuyindula ti muntu na yina me tala bilungi ya tiya?
10 Mbandu 2: Muwi mosi ya me kudipesaka na mambu ya lusambu ke mona mpasi na kukwikila nde bantu ya mbi ta niokwama ve na bilungi ya tiya mvula na mvula. Ziku, yandi me kumaka ti mabanza yina sambu yandi ke vandaka na mpusa nde bantu ya mbi kubaka ndola na mambi na bo. Inki mutindu beto lenda yindula ti muntu ya mutindu yina? Ya ntete, beto lenda ndimisa yandi nde bantu ya mbi ta baka kibeni ndola. (2 Bate. 1:9) Na nima, beto lenda lomba yandi na kutanga Kuyantika 2:16, 17 yina ke monisaka nde ndola ya disumu kele lufwa. Beto lenda monisa yandi nde, na nzila ya disumu ya Adami, bantu yonso ke butukaka bansumuki. (Bar. 5:12) Kansi, beto lenda monisa yandi pwelele nde Nzambi me tubaka ata kima mosi ve na yina me tala kubaka ndola na bilungi ya tiya. Na nima, beto lenda yula yandi nde: “Kana Adami mpi Eva zolaka kuniokwama mvula na mvula, keti yo fwanaka ve nde Nzambi kuzabisa bo diambu yina na ntwala? Ebuna, beto lenda tanga Kuyantika 3:19, kisika Nzambi monisaka ndola yina yandi zengilaka bo na nima ya kusala disumu, kansi yandi tubaka ve ata kima mosi na yina me tala bilungi ya tiya. Nkutu, yandi zabisaka Adami nde yandi ta vutuka na putulu. Beto lenda yula yandi nde: “Keti yo fwanaka kibeni na kusonga Adami nde yandi ta vutuka na putulu kana yandi zolaka kukwenda kibeni na bilungi ya tiya?” Kana muntu yina kele ti mabanza ya mbote, ngiufula yina ta sadisa yandi na kuyindula mbote-mbote na diambu yai.
11. (a) Inki mutindu nge lenda yindula ti muntu yina ke kwikilaka nde bantu yonso ya mbote ta kwenda na zulu? (b) Katula bangindu yina beto me tubila, inki bangindu ya nkaka nge lenda sadila sambu na kuyindula ti bantu yina ke kwikilaka na dilongi yina?
11 Mbandu 3: Ntangu beto ke samuna, beto me kutana ti muntu yina ke kwikilaka nde bantu yonso ya mbote ta kwenda na zulu. Ziku, yandi ke kwikilaka mutindu yina na kutadila mutindu yandi ke bakisaka Biblia. Mu mbandu, beto ke tadila ti yandi Kusonga 21:4. (Tanga.) Yandi lenda yindula nde balusakumunu yina bo ke tubila na verse yai ke tadila luzingu na zulu. Inki mutindu beto lenda yindula ti yandi? Na kisika ya kutanga baverse ya nkaka sambu na kumonisa kana dibanza na yandi kele ya kieleka to ve, beto lenda benda dikebi na yandi kaka na verse yina. Yo ke tuba nde: “Lufwa ta vandaka diaka ve.” Beto lenda yula yandi nde: “Keti nge ke ndimaka nde sambu kima mosi kuvanda diaka ve, ntete kima yina kuvandaka?” Ntembe kele ve nde yandi ta ndima. Na nima, beto ta monisa pwelele nde, beto me waka ntete ve nde wanzio mosi na zulu me fwa kansi bantu ke fwaka kaka awa na ntoto. Yo yina, yo me fwana nde balusakumunu yina bo ke tubila na Kusonga 21:4 ke tadila bantu yina ta zinga awa na ntoto.—Nk. 37:29.
SADILA BAMBANDU SAMBU NA KUSADISA MUNTU NA KUBAKISA DIAMBU YINA BETO KE TUBILA
12. Sambu na nki Yezu vandaka kusadila bambandu?
12 Katula kuyula bangiufula, Yezu vandaka kusadila bambandu na kisalu na yandi ya kusamuna. (Tanga Matayo 13:34, 35.) Bambandu yina Yezu vandaka kusadila vandaka kusadisa yandi na kubakisa mambu yina vandaka na ntima ya bawi na yandi. (Mat. 13:10-15) Bambandu vandaka kusala mpi nde bantu kusepela na malongi ya Yezu mpi kuvila yo ve. Inki mutindu beto lenda sadila bambandu ntangu beto ke longa?
13. Inki mutindu beto lenda monisa nde Nzambi me luta Yezu?
13 Mbala mingi yo ke vandaka mbote na kusadila bambandu ya pete. Mu mbandu, ntangu beto ke tendula nde Nzambi me luta Yezu, ziku beto lenda pesa mbandu yai: Nzambi ti Yezu ke sadilaka bangwisana yina ke vandaka na kati ya bantu ya dibuta sambu na kutubila bangwisana na bo. Nzambi tubaka nde Yezu kele Mwana na yandi mpi Yezu tubaka nde Nzambi kele Tata na yandi. (Luka 3:21, 22; Yoa. 14:28) Na nima, beto lenda yula yandi nde: “Inki bangwisana nge lenda sadila sambu na kumonisa nde bantu zole kele kiteso mosi?” Yandi lenda tubila bampangi ya dibuta mosi to nkutu mapasa. Kana yandi tuba mpidina, beto lenda monisa yandi nde mbandu yina me fwanana kibeni. Na nima, beto lenda yula yandi nde: “Kana mono ti nge ke bakisa mbandu yai, keti nge ke yindula ve nde Yezu yina kele Longi ya Nene lendaka mpi kusadila mbandu yai na bangogo na yandi? Kansi, Yezu bingaka Nzambi Tata na yandi. Na bangogo yina, Yezu monisaka nde Nzambi kele mbuta na yandi mpi kele ti kiyeka mingi kuluta yandi.”
14. Inki mbandu ke monisa nde, yo lenda salama ve nde Nzambi kupesa Diabulu kiyeka ya kuniokula bantu na bilungi ya tiya?
14 Beto tadila mbandu ya nkaka. Bantu ya nkaka ke yindulaka nde Satana kele “mfumu” ya bilungi ya tiya. Kele ti mbandu mosi yina lenda sadisa kibuti na kumona nde yo lenda salama ve nde Nzambi kupesa Diabulu kiyeka ya kuniokula bantu na bilungi ya tiya. Beto lenda tuba nde: “Yindula nde mwana na nge me kuma kibeni nkolami mpi ke sala mambu mingi ya mbi. Inki nge ta sala?” Ntembe kele ve nde, kibuti ta tuba nde yandi fwete sungika mwana na yandi. Yandi lenda meka kusadisa yandi mbala na mbala na kuyambula kusala mambu ya mbi. (Bing. 22:15) Na nima, beto lenda yula kibuti inki yandi ta sala kana mwana ke soba ve. Bibuti mingi ta tuba nde nsuka-nsuka, yo ta lomba kaka kupesa mwana yina ndola. Beto lenda yula yandi diaka nde: “Inki nge ta sala kana na nima nge bakisa nde muntu mosi ya mbi pusaka mwana na nge na kukuma nkolami?” Ntembe kele ve nde, kibuti ta wila muntu yina makasi. Sambu na kusadisa kibuti yina na kubakisa diambu yina beto ke tubila, beto lenda yula yandi nde: “Kana nge me zaba nde muntu mosi ya mbi pusaka mwana na nge na kukuma nkolami, keti nge ta lomba muntu yina na kupesa mwana ndola na kisika na nge?” Ntembe kele ve nde yandi ta vutula nde ata fioti ve. Yo ke pwelele nde, Nzambi lenda sadila ve Satana sambu na kupesa ndola na bantu yina Satana yandi mosi pusaka na kusala mambu ya mbi!
VANDA TI DIBANZA YA BUKATI-KATI
15, 16. (a) Sambu na nki beto fwete vingila ve nde bantu yonso kundima nsangu ya Kimfumu? (b) Keti beto fwete vanda bantu ya me longukaka mingi sambu na kuvanda bansamuni ya mbote? Tendula. (Tala mpi lupangu “ Kisadilu Yina Ke Sadisaka Beto na Kupesa Mvutu.”)
15 Beto me zaba nde, bantu yonso ve ta ndima nsangu ya Kimfumu yina beto ke longaka bo. (Mat. 10:11-14) Yo kele kiteso mosi ata beto me yula bangiufula ya mbote, me yindula ti bawi na mutindu ya mbote mpi me sadila bambandu ya kuluta mbote. Ata Yezu vandaka Longi ya kuluta nene na nsi-ntoto ya mvimba, bantu fioti mpamba ndimaka malongi na yandi!—Yoa. 6:66; 7:45-48.
16 Diaka, ata beto kele bantu ya me longukaka mingi ve, beto lenda vanda bansamuni ya mbote. (Tanga Bisalu 4:13.) Ndinga ya Nzambi ke pesa beto bikuma ya kukwikila nde “bantu yonso yina [kele] ti nkadilu ya mbote sambu na kubaka luzingu ya mvula na mvula” ta ndima nsangu ya mbote. (Bis. 13:48) Yo yina, bika nde beto landa kuditadila na mutindu ya mbote mpi beto vanda ti mabanza ya mbote sambu na bantu yina beto ke longaka nsangu ya mbote ya Kimfumu. Bika nde beto sadila formasio yina Yehowa ke pesa beto mpi beto tula ntima nde yo ta natila beto mpi bantu yina ke widikila beto mambote. (1 Tim. 4:16) Yehowa lenda sadisa beto na kuzaba mutindu beto fwete “pesa mvutu na konso muntu.” Mutindu beto ta mona yo na disolo yina ke landa, mutindu mosi ya kununga na kisalu na beto ya kusamuna kele ya kusadila Munsiku ya wolo.
^ par. 6 Tala disolo “Est-il possible de devenir croyant ?” na Nzozulu ya Nkengi ya Kifalansa ya Oktobri 1, 2009.
