Keti nge tangaka na dikebi yonso banimero ya Nzozulu ya Nkengi ya me katuka kubasika? Tala kana nge lenda pesa mvutu na bangiufula yai ya ke landa:

Na Nisani 14, inki ntangu bo vandaka kufwa mwana-dimeme ya Paki?

Bambalula ya nkaka ya Biblia ke monisa nde bo vandaka kufwa yo “na kati ya bankokila zole,” disongidila, na nima ya kudinda ya ntangu kansi na ntwala nde mpimpa kubwa. (Kub. 12:6, NW, noti na nsi ya lutiti)—12/15, balutiti 18-19.

Inki minsiku ya Biblia baleke lenda sadila sambu na kusala bansola ya mayele?

(1) Sosa ntete Kimfumu ya Nzambi ti lunungu na yandi. (Mat. 6:19-34) (2) Zwa kiese na kusadila bankaka. (Bis. 20:35) (3) Sepela na kusadila Yehowa ntangu nge kele leke. (Lo. 12:1)—1/15, balutiti 19-20.

Tanga bantu iya yina ke tambwisa bampunda tuka 1914.

Yezu yina ke tambwisa mpunda ya mpembe, kulaka Satana ti bademo na yandi na zulu. Muntu yina ke tambwisa mpunda ya mbwaki ke monisa bitumba yina ke landa kaka na kuniokula bantu. Muntu yina ke tambwisa mpunda ya ndombe ke monisa nzala. Muntu yina ke tambwisa mpunda ya kunzuluka ke nata lufwa na nzila ya maladi yina ke fwaka bamilio ya bantu. (Kus. 6:2-8)—2/1, balutiti 6-7.

Inki ntangu “makwela ya Mwana-Dimeme” ta salama? (Kus. 19:7)

“Makwela ya Mwana-Dimeme” ta salama ntangu Ntotila, Yezu Kristu, ta nunga mvita tii na nsuka disongidila, na nima ya kufwa ya Babilone ya Nene mpi na nima ya mvita ya Armagedoni.—2/15, lutiti 10.

Inki bikuma sadisaka Bayuda ya mvu-nkama ya ntete na “kuvingila” Mesia? (Luka 3:15)

Beto lenda buya ve to kundima nde Bayuda ya mvu-nkama ya ntete bakisaka mbikudulu ya Daniele na yina me tala Mesia, mutindu beto ke bakisa yo bubu yai. (Dan. 9:24-27) Kansi, yo fwete vanda nde bo waka mambu yina wanzio zabisaka bangungudi to yina profete ya nkento Ana tubaka ntangu yandi monaka Yezu yina vandaka mwana na tempelo. Diaka, bantu ya ke zabisaka makwisa na nsadisa ya bambwetete kwisaka kutala “Mwana yina me butuka sambu na kuvanda ntotila ya Bayuda.” (Mat. 2:1, 2) Na nima, Yoane mbotiki monisaka nde Kristu ta kwisa ntama mingi ve.—2/15, balutiti 26-27.

Inki mutindu beto lenda sala sambu Ee na beto kutendula kaka Ee?

Ya kieleka, diambu mosi ya kintulumukina lenda basika mpi kusala nde yo vanda mpasi sambu beto lungisa bangogo na beto. Kansi, kana beto me sala lusilu to me baka ngidika mosi, beto fwete sala ngolo sambu na kulungisa yo.—3/15, lutiti 32.

Inki mutindu beto lenda nunga mpukumuna ya kutala pornografi?

(1) Beto tanina meso na beto na kutalaka ve bifwanisu yina ke tedimisaka mpusa ya kuvukisa nitu. (2) Beto fwete tanina mabanza na beto na kuyindulaka mambu ya mbote mpi na kusambaka Nzambi. (3) Beto fwete tanina makulu na beto na kutalaka ve bafilme to basite ya Internet yina ke monisaka pornografi.—4/1, balutiti 10-12.

Inki bampasi lenda basika ntangu Mukristu mosi me bika dibuta na yandi mpi me kwenda na insi ya nkaka sambu na kusosa mbongo?

Ntangu bibuti ke baka lukanu ya kuzinga ntama ti dibuta, bana lenda niokwama na mabanza mpi na mawi. Yo lenda sala mpi nde, bana kukuma kuzola bo diaka ve. Bantu yina ke zinga ntama ti bankwelani na bo lenda kutana ti mpukumuna ya kusala bizumba.—4/15, balutiti 19-20.

Sambu na nki yo lombaka nde bo buka makulu ya bantu ya mbi yina bo vandaka kufwa?

Bantu ya Roma vandaka kufwa bantu ya nkaka ya mbi na zulu ya nti. Bayuda lombaka nde bo buka makulu ya bantu ya mbi yina fwaka na lweka ya Yezu. Yo vandaka kusala nde muntu yina kufulumuna diaka mbote ve mpi kufwa nswalu. Diaka, yo vandaka kusala nde bantu ya mbi yina bo vandaka kufwa, kulutisa ve mpimpa ya mvimba na zulu ya nti. (Kul. 21:22, 23)—5/1, lutiti 11.

Inki bangiufula iya beto fwete vanda ti yo na mabanza ntangu beto ke solula ti bantu na kisalu ya kusamuna?

Banani mono ke longa? Na wapi mono ke solula ti bo? Inki ntangu me fwana sambu na kukutana ti bo? Inki mutindu mono fwete yantika kusolula ti bo?—5/15, balutiti 12-15.

Na nki kiteso makaya ke fwa bantu?

Na mvu-nkama ya me katuka kuluta, makaya me fwa bantu 100 000 000. Na bilumbu yai, yo ke fwaka bantu kiteso ya 6 000 000 konso mvula.