NA NIMA ya kubuya Yezu, Piere dilaka mingi. Ata yo lombaka nde ntumwa Piere kusala bikesa sambu na kuvutukila ngolo na yandi ya kimpeve, Yezu sepelaka na kusadila yandi sambu na kusadisa bampangi ya nkaka. Yo yina, Yezu zabisaka yandi nde: “Kana nge me vutuka, pesa bampangi na nge kikesa.” (Luka 22:32, 54-62) Piere kumaka mosi ya makunzi ya dibundu ya Bukristu ya mvu-nkama ya ntete. (Bag. 2:9) Mutindu mosi, mpangi mosi yina me vandaka nkuluntu, lenda vutukila diaka mukumba na yandi sambu na kupesa bampangi kikesa na kimpeve.

Bampangi ya nkaka yina vandaka bankuluntu me vidisaka mukumba na bo, mpi bo lenda mona bonso nde bo kele diaka mfunu ve. Julio, * yina vandaka nkuluntu na Amerika ya Sudi bamvula kuluta 20 ke tuba nde: “Kuyidika badiskure, kutala bampangi, mpi kusala kisalu ya kingungudi na kati ya dibundu kumaka mambu yina mono vandaka kusala mbala na mbala! Na mbala mosi, mono vidisaka mukumba yango, mpi yo salaka nde mono yambula kusala mambu yina mono vandaka kusala. Yo vandaka kuyangisa mono mbala na mbala.” Bubu yai, Julio me vutukilaka mukumba na yandi ya nkuluntu.

Ntumwa Yakobo sonikaka nde: “Ntangu beno ke kutana ti mimekamu ya mutindu na mutindu, beno baka yo bonso mambu ya kiese mingi.” (Yak. 1:2) Yakobo vandaka kutubila bampasi yina lenda kumina beto sambu beto kele bantu ya kukonda kukuka mpi sambu na mbangika. Yandi tubilaka bampusa ya bwimi, kupona-pona, mpi buna na buna. (Yak. 1:14; 2:1; 4:1, 2, 11) Ntangu Yehowa ke pesaka beto disipline, yo lenda sala beto mpasi. (Baeb. 12:11) Kansi, mpasi yina fwete katula beto ve kiese.

Ata beto me vidisaka mukumba na dibundu, beto kele kaka ti dibaku ya kutanina lukwikilu na beto mpi kumonisa nde beto ke zolaka Yehowa. Beto lenda yindulula mpi bikuma yina pusaka beto na kukuma nkuluntu. Keti yo vandaka sambu na mambote na beto mosi to beto ndimaka mukumba yina sambu beto ke  zolaka Nzambi mpi ke ndimaka nde dibundu kele ya yandi mpi nde yandi ke taninaka yo? (Bis. 20:28-30) Bampangi yina me vidisaka mukumba na bo ya nkuluntu kansi, ke landaka kusadila Nzambi kisalu ya santu, ke monisaka na bantu yonso mpi na Satana nde zola na bo sambu na Yehowa kele ya masonga kibeni.

Ntangu Ntotila Davidi bakaka disipline sambu na masumu ya nene yina yandi salaka, yandi ndimaka ndola mpi Nzambi lolulaka yandi. Davidi yimbaka nde: “Kiese na muntu kana Nzambi me lolula yandi sambu na masumu ti mbi ya yandi salaka. Kiese na muntu yina ya Mfumu Nzambi ke mona nde yandi me sala mbi ve, yandi ke kusaka mpi ve.” (Nk. 32:1, 2) Disipline tomisaka bikalulu ya Davidi mpi ntembe kele ve nde, yo kumisaka yandi ngungudi ya mbote sambu na bansadi ya Nzambi.

Mbala mingi, bampangi yina ke vutukilaka mukumba na bo ya nkuluntu ke kumaka bangungudi ya mbote kuluta mutindu bo vandaka ntete. Nkuluntu mosi yina kutanaka ti mambu yai tubaka nde: “Ntangu yai, mono me bakisaka mbote-mbote mutindu ya kutadila bampangi yina me sala kifu.” Nkuluntu ya nkaka ke tuba nde: “Ntangu yai mono ke bakaka mukumba na mono ya kusadila bampangi ya nkaka na mbalu mingi.”

“[Yehowa] ta monisa ve bifu na beto ntangu yonso.” (Nk. 103:9, NW) Yo yina, beto fwete yindula ve nde kana muntu me salaka disumu ya nene, Nzambi ta tudilaka yandi diaka ve ntima. Ricardo, yina vidisaka mukumba na nima ya kusala bamvula mingi bonso nkuluntu ke tuba nde: “Mono lembaka nitu mingi sambu na kifu yina mono salaka. Na nsungi ya bamvula mingi, mawi ya kudimona muntu ya kukonda mfunu kangaka mono nzila sambu na kuvutukila mukumba na mono ya nkuluntu. Mono vandaka ve na kivuvu nde kilumbu kele mono lendaka diaka kudimona muntu ya mfunu. Kansi, sambu mono ke sepelaka kusadila bankaka, mono vandaka kulonguka Biblia ti bantu, kupesa bampangi kikesa na Nzo ya Kimfumu, mpi kusamuna ti bo. Yo sadisaka mono na kudimona diaka muntu ya mfunu, mpi bubu yai mono me vutukilaka mukumba ya nkuluntu.”

Kubumbila mpangi makasi na ntima lenda kanga mpangi-bakala nzila na kukuma nkuluntu. Yo kele mbote na kuvanda bonso Davidi, nsadi ya Yehowa, yina vandaka kutina Ntotila Saule yina vandaka kuwila yandi kimpala! Davidi buyaka kuvutudila Saule mbi,  ata ntangu yandi zwaka mabaku ya kusala yo. (1 Sam. 24:4-7; 26:8-12) Ntangu Saule fwaka na mvita, yo salaka Davidi mpasi mingi, nkutu Davidi bingaka yandi ti mwana na yandi Yonatani ‘bantu yina bo vandaka kuzola mingi.’ (2 Sam. 1:21-23) Davidi bumbaka ve makasi na ntima.

Kana nge ke yindula nde bo bakisaka nge ve to nde bo sadilaka nge mambu kukonda lunungu, kubika ve nde bangindu na nge kutinda nge na kubumba makasi na ntima. Mu mbandu, na nima ya kusala bonso nkuluntu bamvula 30, William vidisaka mukumba na yandi ya nkuluntu na Grande-Bretagne. Yandi bumbilaka bankuluntu ya nkaka makasi na ntima. Inki sadisaka William na kuvutukila mabanza ya mbote? Yandi ke tuba nde: “Ntangu mono tangaka mukanda ya Yobi, yo pesaka mono kikesa. Kana Yehowa sadisaka Yobi na kutula ngemba ti banduku na yandi tatu, yandi ta sadisa mono mpi na kutula ngemba ti bampangi-bankuluntu!”—Yobi 42:7-9.

Kana nge yambulaka mukumba na nge ya kugungula mameme ya Nzambi, yo ta vanda mbote nde nge kudiyula sambu na nki nge yambulaka yo. Keti yo vandaka sambu nge kumaka na mambu mingi ya kusala? Keti mambu ya nkaka kumaka kubaka nge ntangu mingi? Keti nge lembaka nitu sambu na bifu ya bampangi? Yo vanda nki kikuma pusaka nge na kuyambula mukumba, yibuka nde ntangu nge vandaka nkuluntu nge vandaka ti dibaku ya kusadisa bankaka na mitindu mingi. Badiskure na nge vandaka kupesa bampangi kikesa, bo vandaka kufulula mbandu na nge ya mbote, baviziti na nge ya kingungudi vandaka kupesa bo ngolo ya kukanga ntima na bampasi. Bisalu yina nge vandaka kusala bonso nkuluntu ya kwikama vandaka kusepedisa ntima ya Yehowa mpi ntima na nge mosi.—Bing. 27:11.

Yehowa me sadisaka bampangi-babakala mingi na kuvutukila kiese mpi mpusa na bo ya kusadila bampangi na dibundu. Kana nge yambulaka to vidisaka mukumba na nge ya nkuluntu, nge lenda ‘zola diaka kukuma nkengi.’ (1 Tim. 3:1) Ntumwa Polo “yambulaka ve na kusamba” sambu Bakristu ya Kolosai kufuluka na nzayilu ya siki-siki ya luzolo ya Nzambi ‘sambu bo tambula na mutindu yina me fwana na Yehowa, sambu na kupesa yandi kiese kibeni.’ (Bakol. 1:9, 10) Kana nge me vutukila mukumba na nge ya nkuluntu, samba sambu Yehowa kupesa nge kikesa, ntima-nda mpi kiese. Na bilumbu yai ya nsuka, bansadi ya Nzambi kele na mfunu ya kikesa yina bangungudi ya zola ke pesaka. Keti nge ke sepelaka kupesa bampangi Bakristu kikesa?