Widikila Ndinga ya Yehowa na Konso Kisika Yina Nge Kele
‘Makutu na nge ta wa ndinga mosi na nima na nge ke tuba nde, “Nzila yo yai.”’—YEZ. 30:21.
1, 2. Inki mutindu Yehowa ke zabisaka bansadi na yandi mambu?
MASOLO yina kele na Biblia ke monisaka nde bantu mingi bakaka lutwadisu ya Yehowa na mitindu ya kuswaswana. Nzambi tubilaka bankaka na nzila ya bawanzio, bambona-meso to na bandosi sambu na kuzabisa bo mambu yina ta salama na bilumbu ke kwisa. Yehowa pesaka bo mpi mikumba ya nkaka ya siki-siki. (Kut. 7:89; Ezek. 1:1; Dan. 2:19) Bankaka bakaka lutwadisu na nzila ya bantu yina Yehowa tulaka sambu na kutwadisa kitini ya organizasio na yandi yina kele na ntoto. Ata lutwadisu yai pesamaka na mitindu ya kuswaswana, bantu yina landaka bantuma ya Nzambi bakaka balusakumunu.
2 Bubu yai, Yehowa ke pesaka bansadi na yandi lutwadisu na nzila ya Biblia, ya mpeve santu, mpi ya dibundu. (Bis. 9:31; 15:28; 2 Tim. 3:16, 17) Lutwadisu yina beto ke bakaka na Yehowa kele kibeni pwelele, yo kele bonso nde ‘makutu na beto ke wa ndinga mosi na nima na beto ke tuba nde: “Nzila yo yai. Landa yo.”’ (Yez. 30:21) Ya kieleka, Yezu ke zabisaka beto mpi ndinga ya Yehowa na nzila ya “mpika ya kwikama mpi ya mayele,” yina yandi ke sadilaka sambu na kutwadisa dibundu. (Mat. 24:45) Beto fwete baka lutwadisu yai na mbalu sambu beto ta baka luzingu ya mvula na mvula kaka kana beto ke lemfukila yo.—Baeb. 5:9.
3. Inki lenda vanda ti bupusi ya mbi na mutindu na beto ya kutadila lutwadisu ya Yehowa? (Tala kifwanisu yina kele na luyantiku ya disolo.)
3 Satana Diabulu ke salaka bikesa sambu na kupusa beto na kubuya lutwadisu yina Yehowa ke pesaka beto sambu beto guluka. Diaka, ‘ntima na beto yina ke kusaka beto’ lenda vanda ti bupusi ya mbi na mutindu na beto ya kutadila lutwadisu ya Yehowa. (Yer. 17:9) Yo yina, bika beto tadila mutindu beto lenda nunga mambu yina lenda kanga beto nzila na kulemfukila ndinga ya Nzambi. Beto ta tadila mpi mutindu kusolula mbote-mbote ti Yehowa lenda tanina bangwisana na beto ti yandi na mambu yonso yina beto lenda kutana ti yo.
NUNGA MAYELE YA MBI YA SATANA
4. Inki mutindu Satana ke sosaka kubebisa bangindu ya bantu?
4 Satana ke salaka bikesa sambu na kubebisa bangindu ya bantu ntangu yandi ke pesaka bo bansangu ya luvunu. (Tanga 1 Yoane 5:19.) Katula mikanda, nsi-ntoto—tanga mpi bisika na yo ya kuluta ntama—me fuluka ti bansangu yina ke pesamaka na baradio, na batelevizio, mpi na basite ya Internet. Ata bima yai ya ke mwangaka nsangu lenda zabisa mambu ya mbote, mbala mingi yo ke siamisaka mutindu ya kuzinga mpi mambu ya nkaka yina ke wakana ve ti minsiku ya Yehowa. (Yer. 2:13) Mu mbandu, bimvuka yina ke talaka bansangu mpi bansaka ya kulutisila ntangu ke siamisaka makwela ya babakala ti babakala to bankento ti bankento, yo ke salaka nde bantu mingi kuyindula nde Biblia ke lutisaka ndilu na mutindu yo ke buyisaka kuvukisa nitu babakala ti bakala to bankento ti bankento.—1 Bak. 6:9, 10.
5. Inki mutindu beto lenda sala sambu mambu ya luvunu ya Satana kuvidisa beto ve nzila?
5 Inki mutindu bantu yina ke zolaka lunungu ya Nzambi lenda sala sambu mambu ya luvunu ya Satana kuvidisa bo ve nzila? Inki mutindu bo lenda sala luswaswanu na kati ya mambu ya mbote mpi ya mbi? ‘Kana bo ke lemfuka na bansiku ya Nzambi’! (Nk. 119:9) Ndinga ya kusonika ya Nzambi kele ti lutwadisu ya mfunu yina ke sadisaka beto na kusala luswaswanu na kati ya nsangu ya kieleka ti ya luvunu. (Bing. 23:23) Ntangu Yezu vutukilaka mambu yina kele na Masonuku, yandi tubaka nde: “Muntu fwete zinga . . . na mambu yonso ya ke basikaka na munoko ya Yehowa.” (Mat. 4:4) Beto fwete longuka mutindu ya kusadila minsiku ya Biblia na luzingu na beto. Mu mbandu, na ntwala nde Moize kusonika nsiku ya Yehowa ya me tala bizumba, Yozefi yina vandaka toko bakisaka nde, kuta bizumba kele disumu na meso ya Nzambi. Yandi yindulaka ve ata fioti kufwa nsiku ya Yehowa ntangu nkento ya Potifare vandaka kupusa yandi na kusala disumu. (Tanga Kuyantika 39:7-9.) Ata nkento yai landaka na kuyangisa yandi mbala na mbala, Yozefi pesaka ve nzila nde ndinga ya nkento yai kukanga yandi nzila na kulemfuka na ndinga ya Nzambi. Kuwidikila ndinga ya Yehowa mpi kukanga makutu na mambu ya luvunu ya Satana, kele mambu ya mfunu yina ta sadisa beto na kusala luswaswanu na kati ya mambu ya mbote ti mambu ya mbi.
6, 7. Inki beto fwete sala sambu na kubuya bandongisila ya mbi ya Satana?
6 Ntoto me fuluka kibeni ti malongi ya mabundu yina ke wakana ve ti ya nkaka mpi binkulu yina ke tindaka bantu na kuyindula nde kusosa dibundu ya kieleka kele mfunu ve. Kansi, Yehowa me salaka nde bantu yina ke zolaka kulanda lutwadisu na yandi kubaka yo na mutindu mosi ya pwelele. Beto fwete sola nani beto ta widikila. Sambu yo kele mpasi na kuwidikila bandinga zole na mbala mosi, beto fwete ‘zaba ndinga’ ya Yezu mpi kuwidikila yandi. Yandi muntu kele ngungudi ya mameme ya Yehowa.—Tanga Yoane 10:3-5.
7 Yezu tubaka nde: “Beno keba na mambu yina beno ke wa.” (Mar. 4:24) Ndongisila ya Yehowa kele pwelele mpi mbote, kansi beto fwete tudila yo dikebi mpi kuyidika bantima na beto sambu na kusadila yo. Kana beto keba ve, beto lenda kuma kuwidikila bandongisila ya mbi ya Satana na kisika ya kuwidikila bandongisila ya mbote ya Yehowa. Beto fwete bika ve nde miziki ya nsi-ntoto, bavideo, baemisio ya televizio, mikanda, banduku, balongi, bantu ya mayele ya nsi-ntoto yai kutwadisa luzingu na beto.—Bakol. 2:8.
8. (a) Inki mutindu ntima na beto lenda pusa beto na kubwa na mayele ya mbi ya Satana? (b) Inki lenda salama kana beto ke buya kutula dikebi na bigonsa?
8 Satana ke zabaka nde nitu na beto kele ya kukonda kukuka, yo yina yandi ke salaka bikesa sambu na kupusa beto na kusala mambu ya mbi. Ntangu yandi ke salaka mutindu yina, yo ke kumaka mpasi na kutanina kwikama na beto. (Yoa. 8:44-47) Inki mutindu beto lenda nunga mpukumuna yai? Yindula mbandu ya mpangi-bakala mosi yina kudikotisaka na biese ya ntangu yai, yina nataka yandi na kusala diambu ya mbi yina yandi yindulaka nde yandi ta salaka yo ve ata fioti. (Bar. 7:15) Inki pusaka yandi na kusala diambu yina ya mbi? Ntembe kele ve nde malembe-malembe, mpangi yai kumaka kuvidisa makuki na yandi ya kuwidikila ndinga ya Yehowa. Ziku, yandi vandaka ve kutula dikebi na mambu yina lendaka kusadisa yandi na kumona bigonsa yina vandaka kukumina ntima na yandi to yandi mosi solaka kubuya kutudila bigonsa yango dikebi. Mu mbandu, yo lenda vanda nde yandi vandaka kusamba diaka ve, kusamuna fioti, to kumaka kutina balukutakanu. Nsuka-nsuka, yandi landaka bampusa na yandi ya nitu mpi salaka diambu yina yandi zabaka nde yo vandaka ya mbi. Beto lenda buya kusala kifu ya mutindu yai kana beto ke tula dikebi na konso diambu yina ke monana kigonsa mpi kuyidika mambu na nswalu yonso. Kana beto ke widikila ndinga ya Yehowa, beto ta yedisa ve ata ngindu mosi ya mbi na ntima na beto.—Bing. 11:9.
9. Sambu na nki kuzaba na ntwala mambu yina lenda pusa beto na kusala disumu kele mfunu?
9 Kuzaba maladi na luyantiku lenda sala nde mbefu kuguluka. Mutindu mosi, beto lenda tina mambu ya mpasi kana beto me mona nswalu mambu yina lenda nata beto na kusala disumu. Kaka ntangu beto ke mona bidimbu yai, yo kele mbote na kusungika mambu kukonda kusukinina, na ntwala nde Satana ‘kukanga beto ya moyo sambu na kusala luzolo na yandi.’ (2 Tim. 2:26) Inki beto ta sala ntangu beto me bakisa nde beto me kunaka bangindu mpi bampusa yina ke wakana ve ti mambu yina Yehowa ke lombaka beto? Kukonda kusukinina mpi na kudikulumusa yonso, beto fwete vutukila Nzambi na kukangulaka makutu sambu na kuwidikila bandongisila na yandi, mpi kulemfukila yandi na ntima ya mvimba. (Yez. 44:22) Beto fwete zaba nde kubaka balukanu ya mbi lenda natila beto mpasi yina malanda na yo lenda niokula beto na ngidika yai ya bima. Kubaka lukanu nswalu sambu na kubuya kusala disumu mosi ya nene kele mbote kibeni sambu yo ta sadisa beto na kulanda nzila ya mbote!
Inki mutindu kusala mambu ya kimpeve mbala na mbala lenda tanina beto na mayele ya mbi ya Satana? (Tala baparagrafe 4-9)
NUNGA LULENDO MPI BWIMI
10, 11. (a) Inki mutindu lulendo ke monanaka? (b) Inki dilongi beto ke baka na mbandu ya mbi ya Kore, Datani, ti Abirami?
10 Beto fwete vila ve nde ntima na beto lenda nata beto na nzila ya mbi. Nitu na beto ya kukonda kukuka ke vandaka ti bupusi ya ngolo kibeni na kimuntu na beto! Beto baka mbandu ya kikalulu ya lulendo mpi ya bwimi. Beto tala mutindu bifu yai zole lenda kanga beto nzila na kuwidikila ndinga ya Yehowa mpi mutindu yo lenda nata beto na nzila ya mbi. Muntu ya lulendo ke kudimonaka muntu ya kuluta mfunu. Yandi lenda mona nde yandi kele ti nswa ya kusala mambu yonso yina yandi me zola mpi nde ata muntu mosi ve lenda zabisa yandi mambu yina yandi fwete sala. Yo yina, yandi lenda mona bonso nde lutwadisu mpi bandongisila ya bampangi Bakristu, ya bankuluntu, to ya organizasio ya Nzambi ke tadila yandi ve. Muntu ya mutindu yai ke monaka ndinga ya Yehowa kima mosi ya mpamba.
11 Ntangu bantu ya Izraele vandaka kusala nzietelo na ntoto-makanga, Kore, Datani, ti Abirami kolamaka na kiyeka ya Moize mpi ya Aroni. Sambu na lulendo na bo, bo bakaka bangidika na bo mosi sambu na kusambila Yehowa. Inki mutindu Yehowa tadilaka diambu yina? Yandi fwaka bankolami yai yonso. (Kut. 26:8-10) Disolo yai ke pesa beto dilongi ya nene kibeni! Kukolama na Yehowa ke nataka bampasi. Beto fwete zaba mpi nde, ‘lulendo ke vandaka na ntwala ya kubwa.’—Bing. 16:18; Yez. 13:11.
12, 13. (a) Pesa mbandu mosi ya ke monisa mutindu bwimi lenda nata mpasi. (b) Tendula mutindu bwimi lenda yela nswalu kana beto me yala yo ve.
12 Beto tadila mpi kikalulu ya bwimi. Mbala mingi muntu ya bwimi ke salaka mambu na mutindu yandi me zola mpi ke lutisaka bandilu na yandi. Ntangu Namani mfumu ya basoda ya Siria belukaka na maladi ya lepre, yandi pesaka profete Elisa bakado, Elisa buyaka yo. Kansi, Gehazi, nsadi ya Elisa waka nzala ya bakado yina. Gehazi tubaka nde: “Na zina ya Mfumu Nzambi, Nzambi ya moyo, mono ke landa [Namani] ntinu, mono kubaka konso kima.” Yandi bakaka ntinu sambu na kulanda Namani mpi sadilaka luvunu sambu na kulomba “bakilo makumi tatu na tanu (35kg) ya arza ti bilele zole ya fete.” Sambu Gehazi salaka diambu yai mpi taka luvunu na profete ya Yehowa, inki kuminaka yandi? Maladi ya lepre ya Namani kangamaka na Gehazi, muntu ya bwimi!—2 Bant. 5:20-27.
13 Bwimi lenda yantika fioti, kana muntu me yala yo ve, yo lenda yela mpi kuyala muntu. Disolo ya Akani yina kele na Biblia, ke monisa ngolo ya bwimi. Tala mutindu bwimi ya Akani yelaka nswalu. Yandi tubaka nde: “Na kati ya bima ya beto bakaka mono monaka kazaka mosi ya kitoko mpenza ya Babilonia; mono monaka mpi kiteso ya bakilo zole (2kg) ya arza ti kitini mosi ya wolo kiteso ya grame nkama tanu (500gr). Mono [waka] nzala na yo mingi, yo yina mono bakaka yo.” Na kisika ya kukatula mpusa ya mbi, na lukasi yonso Akani yibaka bima yina mpi bumbaka yo na tenta na yandi. Ntangu disumu ya Akani zabanaka, Yozue zabisaka Akani nde Yehowa ta pesa yandi ndola. Kaka kilumbu yina, bo fwaka Akani ti dibuta na yandi na matadi. (Yoz. 7:11, 21, 24, 25) Bubu yai mpi, bwimi kele kigonsa yina lenda yala beto. Yo yina, bika nde beto “keba na mitindu yonso ya bwimi.” (Luka 12:15) Kana bangindu ya kusala mansoni to mambu ya nkaka ya mbi me kumina beto na ntangu mosi buna, yo ta vanda mbote nde beto sosa kuyala mabanza yango mpi kubika ve nde banzala ya mbi kuyela mpi kunata beto na kusala disumu.—Tanga Yakobo 1:14, 15.
14. Inki beto fwete sala kana beto me bakisa nde beto kele ti kikalulu ya lulendo mpi ya bwimi?
14 Lulendo mpi bwimi lenda nata mpasi. Kuyindula malanda yina lenda basika kana beto me landa nzila ya mbi ta sadisa beto na kubika ve nde mabanza ya mbi kukanga beto nzila na kuwa ndinga ya Yehowa. (Kul. 32:29) Na nzila ya Biblia, Nzambi ya kieleka ke zabisaka beto kaka ve nzila ya mbote, kansi yandi ke tendudilaka beto mpi mambote ya kutambula na nzila yango mpi malanda ya kulanda nzila ya mbi. Kana ntima na beto ke pusa beto na kusala diambu mosi na lulendo to na bwimi, yo ta vanda mbote kibeni na kuyindula malanda na yo! Beto fwete tadila malanda yina disumu ta natila beto, bantu yina ke zolaka beto, mpi mingi-mingi bangwisana na beto ti Yehowa.
LANDA KUSOLULA MBOTE-MBOTE TI YEHOWA
15. Mbandu ya Yezu lenda longa beto nki na yina me tala kusolula ti Yehowa?
15 Yehowa ke zodilaka beto mambu ya mbote. (Nk. 1:1-3) Yandi ke pesaka beto lutwadisu na ntangu yina beto kele na yo mfunu. (Tanga Baebreo 4:16.) Ata Yezu vandaka muntu ya kukuka, yandi vandaka kusolula mbala na mbala ti Yehowa, mpi yandi vandaka kusamba ntangu yonso. Yehowa sadisaka mpi twadisa Yezu na mutindu ya mbote. Yandi tindaka bawanzio sambu na kusadila Yezu, tindilaka yandi mpeve santu sambu na kusadisa yandi, mpi twadisaka yandi na kupona bantumwa 12. Bantu waka ndinga ya Yehowa na zulu ke tuba nde yandi me ndima Yezu mpi ta sadisa yandi. (Mat. 3:17; 17:5; Mar. 1:12, 13; Luka 6:12, 13; Yoa. 12:28) Bonso Yezu, beto fwete kangudila Nzambi mpi ntima na kisambu. (Nk. 62:9, 10; Baeb. 5:7) Na nzila ya kisambu, beto lenda landa na kusolula mbote-mbote ti Yehowa mpi kuzinga luzingu yina ke pesa yandi lukumu.
16. Inki mutindu Yehowa lenda sadisa beto na kuyedisa kikalulu ya kuwidikila ndinga na yandi?
16 Yehowa ke pesaka bandongisila na luzolo yonso, kansi yandi ke pusaka beto ve na kuzitisa yo na kingolo-ngolo. Beto fwete lomba mpeve santu na yandi mpi yandi ta pesa beto yo na luzolo yonso. (Tanga Luka 11:10-13.) Kansi, yo kele mfunu nde beto ‘keba na mutindu beto ke widikilaka.’ (Luka 8:18) Mu mbandu, beto lenda lomba Yehowa na kusadisa beto na kununga bangindu ya mbi na yina me tala mansoni, kansi kana beto ke landa na kutala pornografi to bafilme ya mansoni, kisambu na beto yina kele ya luvunu. Beto fwete kwendaka na bisika yina beto me zaba nde mpeve ya Yehowa ke vandaka. Beto me zaba nde mpeve ya Nzambi ke vandaka ntangu beto ke salaka balukutakanu. Bansadi mingi ya Yehowa me kuditaninaka na bigonsa na kuwidikilaka Yehowa ntangu balukutakanu ke salamaka. Yo me sadisaka bo na kumona bangindu ya mbi yina ke zola kuyela na bantima na bo mpi kusungika yo.—Nk. 73:12-17; 143:10.
LANDA KUZINGA NA KUWAKANA TI NDINGA YA NZAMBI
17. Sambu na nki kuditudila ntima kele kigonsa?
17 Beto tadila mbandu ya Ntotila Davidi. Ntangu yandi vandaka toko, yandi nungaka Goliati, Mufilistia mosi ya ngolo. Davidi kumaka soda, ntotila, ntanini, mpi muntu yina vandaka kubaka badesizio sambu na insi ya mvimba. Kansi ntangu Davidi kuditudilaka ntima, ntima na yandi kusaka yandi mpi yandi salaka disumu ya nene ti Batsheba; nkutu yandi bakaka bangidika sambu na kufwa Uria, bakala ya Batsheba. Ntangu yandi bakaka disipline, na kudikulumusa yonso, Davidi ndimaka kifu na yandi mpi yidikaka diaka bangwisana na yandi ti Yehowa.—Nk. 51:6, 8, 12, 13.
18. Inki lenda sadisa beto na kulanda kuwidikila ndinga ya Yehowa?
18 Bika beto sadila ndongisila yina kele na 1 Bakorinto 10:12 mpi kubuya kikalulu ya kuditudila ntima. Sambu beto lenda ve ‘kutwadisa bitambi na beto,’ nsuka-nsuka beto ta widikila ndinga ya Yehowa to ya Mbeni na yandi. (Yer. 10:23) Bika nde beto samba mbala na mbala, beto landa lutwadisu ya mpeve santu, mpi ntangu yonso beto widikila mbote-mbote ndinga ya Yehowa.