Davidi sonikaka nde yandi ‘me monaka ve muntu ya mbote bo me yambula yandi to bana na yandi ke sosa madia.’ Davidi tubilaka mambu yina yandi monaka na luzingu na yandi mosi. Yandi zabaka mbote mutindu Nzambi ke taninaka beto ntangu yonso. (Nk. 37:25) Kansi, bangogo ya Davidi ke tendula ve nde ntangu yonso bansadi ya Nzambi ke vandaka ti bima yina bo kele na yo mfunu na luzingu.

Bantangu ya nkaka Davidi kutanaka ti mambu ya mpasi. Mu mbandu, ntangu yandi vandaka kutina Saule. Madia ya Davidi manaka, yo yina yandi lombaka mampa sambu na yandi mosi mpi sambu na bantu na yandi. (1 Sam. 21:1-6) Na dibaku yai, Davidi ‘sosaka madia.’ Kansi, ata na ntangu yai ya mpasi, Davidi zabaka nde Yehowa me yambula yandi ve. Sambu, Biblia ke monisa ve nde Davidi bondilaka bantu sambu bo pesa yandi madia yina yandi fwete zingila.

Na Matayo 6:33, Yezu ke ndimisa nde Nzambi ta lungisa bampusa ya bansadi ya kwikama yina ke tulaka mambote ya Kimfumu na kisika ya ntete. Yandi tubaka nde: “Yo yina, beno landa na kusosa ntete Kimfumu ti lunungu na yandi, ebuna yandi ta yika beno bima yina yonso ya nkaka [mu mbandu madia, kunwa, mpi kulwata].” Kansi, Yezu monisaka diaka nde sambu na mbangika, “bampangi” na yandi lenda kutana ti bansungi ya nzala. (Mat. 25:35, 37, 40) Diambu yango kuminaka ntumwa Polo. Bantangu ya nkaka yandi vandaka na nzala mpi na kiwini.—2 Bak. 11:27.

Yehowa ke zabisa beto nde beto ta kutana ti mbangika na mitindu ya kuswaswana. Yandi lenda pesa nzila nde beto konda madia na ntangu yai ya beto ke sala bikesa sambu na kupesa mvutu na ntembe yina Diabulu basisaka. (Yobi 2:3-5) Mu mbandu, na luyalu ya Nazi, bampangi na beto ya nkaka yina bo nataka na bakan ya bo vandaka kusadisa bantu bisalu ya ngolo, niokwamaka sambu na mbangika yina bo kutanaka ti yo. Sambu na kubebisa kwikama ya bampangi yai, Diabulu sadilaka mayele ya mbi ya kuyimina bo madia ya me fwana. Kansi, Bakristu yina vandaka ya kwikama landaka na kulemfukila Yehowa mpi yandi yambulaka bo ve. Yehowa pesaka nzila nde bo kutana ti mpasi yai, kaka mutindu yandi ke pesaka nzila nde Bakristu yonso kukutana ti bampasi ya mutindu na mutindu. Ata mpidina, yandi ke sadisaka bampangi yonso yina ke niokwama sambu na zina na yandi. (1 Bak. 10:13) Beto vila ve mambu yina kele na Bafilipi 1:29: “Bo me pesaka beno dibaku ya mbote kaka ve ya kutula lukwikilu na beno na Kristu, kansi mpi ya kumona mpasi sambu na yandi.”

Yehowa ke sila nde yandi ta tanina bansadi na yandi. Mu mbandu, Yezaya 54:17 ke tuba nde: “Batolotolo ya bo ta sala sambu na kufwa nge; yo ta sala nge kima ve.” Lusilu yai mpi balusilu ya nkaka ke ndimisa nde, na kimvuka, Yehowa ta tanina bansadi na yandi. Kansi, Mukristu mosi mosi lenda kutana ti bampasi, ata nkutu lufwa.