1. Inki ke vandaka mawi ya Yehowa sambu na kisalu, mpi yo ke pusaka yandi na kusala nki?

YEHOWA ke sepelaka na bisalu yina yandi ke salaka. (Nk. 135:6; Yoa. 5:17) Sambu na kupesa bawanzio mpi bantu kiese yina, Yehowa me pesaka bo kisalu mosi ya kitoko mpi ya kiese. Mu mbandu, yandi pesaka Mwana na yandi ya ntete dibaku ya kuvukana ti yandi ntangu yandi vandaka kuganga. (Tanga Bakolosai 1:15, 16.) Biblia ke zabisa beto nde, Yezu vandaka na lweka ya Nzambi “bonso kapita ya kisalu” na ntwala ya kukwisa na ntoto.—Bing. 8:30.

2. Inki ke monisa nde ntangu yonso bawanzio ke salaka kisalu ya mfunu mpi ya kiese?

² Biblia kele ti bambandu yina ke monisa nde ntangu yonso Yehowa ke pesaka bawanzio kisalu. Ntangu Nzambi kulaka Adami ti Eva na Paladisu sambu bo salaka disumu, yandi ‘tulaka na esti ya kilanga ya Edeni basherube mpi mbele ya kunwanina yina kibende na yo vandaka kupela tiya mpi kubaluka ntangu yonso sambu na kutanina nzila ya nti ya luzingu.’ (Kuy. 3:24) Diaka, Kusonga 22:6 ke tuba nde Yehowa “tindaka wanzio na yandi sambu na kusonga bampika na yandi mambu yina fwete salama ntama mingi ve.”

3. Ntangu Yezu vandaka na ntoto, inki mutindu yandi landaka mbandu ya Tata na yandi?

³ Ntangu Yezu vandaka na ntoto, yandi salaka na kiese yonso kisalu yina Yehowa pesaka yandi. Na mbandu ya Tata na yandi, Yezu mpi pesaka balongoki na yandi kisalu mosi ya mfunu. Yandi pesaka bo mpusa ya ngolo ya kisalu yina bo ta sala ntangu yandi tubaka nde: “Ya kieleka kibeni, mono ke tubila beno nde, muntu yina ke monisa lukwikilu na mono, muntu yina mpi ta sala bisalu yina mono ke sala; mpi yandi ta sala bisalu ya nene kuluta yai, sambu mono ke kwenda na Tata.” (Yoa. 14:12) Sambu na kumonisa nde kisalu yango fwete salama nswalu, Yezu tubaka nde: “Beto fwete sala bisalu ya muntu yina tindaka mono ntangu mwini kele; mpimpa ke kwisa ntangu ata muntu mosi ve lenda sala.”—Yoa. 9:4.

4-6. (a) Sambu na nki beto fwete monisa ntonda na Noa mpi na Moize na mutindu bo salaka bisalu yina Yehowa pesaka bo? (b) Inki kele lukanu ya bisalu yina Yehowa ke pesaka bantu?

⁴ Nkutu, Nzambi pesaka bantu ya nkaka bisalu na ntwala nde Yezu kukwisa na ntoto. Ata Adami ti Eva lungisaka ve kisalu yina Nzambi pesaka bo, bantu ya nkaka salaka mambu yina Nzambi lombaka bo. (Kuy. 1:28) Yehowa pesaka Noa bantuma ya siki-siki na mutindu ya kutunga maswa sambu na kuguluka na Mvula ya Ngolo. Yandi lungisaka mbote-mbote kisalu yina Yehowa pesaka yandi. Bubu yai, beto kele na luzingu sambu na bikesa yina yandi salaka!—Kuy. 6:14-16, 22; 2 Pie. 2:5.

⁵ Yehowa pesaka Moize bantuma ya siki-siki na mutindu yandi fwete tunga nzo-tenta mpi mutindu kisalu ya banganga-nzambi fwete salama, Moize salaka kaka mutindu Nzambi zabisaka yandi. (Kub. 39:32; 40:12-16) Tii bubu yai, beto ke bakaka mambote ya bulemfu yina Moize monisaka. Na nki mutindu? Ntumwa Polo tubaka nde mambu yina ya Nsiku vandaka kaka kifwani ya “mambu ya mbote yina ke kwisa.”—Baeb. 9:1-5, 9; 10:1.

⁶ Kisalu yina Nzambi ke pesaka bansadi na yandi ke sobaka na kutadila bansungi mpi na mutindu lukanu na yandi ke kwenda na kulungana. Konso ntangu, kisalu yina bansadi ya Yehowa ke salaka ke pesaka yandi lukumu mpi ke natilaka bantu yina ke kwikilaka na yandi mambote. Kisalu yina Yezu salaka na ntwala ya kukwisa na ntoto mpi na ntangu yandi vandaka na ntoto ke ndimisa kieleka yai. (Yoa. 4:34; 17:4) Mutindu mosi mpi kisalu yina Yehowa me pesaka beto ke pesaka yandi lukumu. (Mat. 5:16; tanga 1 Bakorinto 15:58.) Sambu na nki beto ke tuba mpidina?

⁷ Yo kele kiese mingi na kumona nde Yehowa me pesaka bantu ya kukonda kukuka lukumu ya kusala kumosi ti yandi bonso banduku na yandi ya kisalu. (1 Bak. 3:9) Bampangi yina ke tungaka Banzo ya Balukutakanu ya Nene, Banzo ya Kimfumu, mpi babiro ya filiale ke salaka kisalu ya kutunga mutindu Noa mpi Moize salaka. Yo vanda nge ke sala kisalu ya kuyidika Nzo ya Kimfumu to ke tunga babiro na beto na Warwick, na mbanza New York, baka na mbalu dibaku na nge ya kusala kisalu yina. (Tala kifwanisu yina kele na luyantiku ya disolo.) Yo kele kisalu ya santu. Kansi, mbala mingi, beto ke vandaka ti dibaku ya kusala kisalu mosi ya kimpeve. Lukanu na yo kele kaka ya kupesa Yehowa lukumu mpi kunatila bantu ya bulemfu mambote. (Bis. 13:47-49) Organizasio ya Nzambi ke pesaka beto lutwadisu ya pwelele na mutindu ya kusala kisalu yango. Diambu yai ke monisa nde, bantangu ya nkaka beto lenda baka mikumba ya mpa.

7, 8. (a) Tubila bisalu yina Bakristu ke vandaka ti dibaku ya kusala bubu yai. (b) Inki mutindu beto fwete tadila lutwadisu yina Yehowa ke pesaka?

⁸ Bansadi ya kwikama ya Yehowa ke vandaka ntangu yonso na mpusa ya ngolo ya kulanda lutwadisu na yandi. (Tanga Baebreo 13:7, 17.) Na luyantiku, ziku beto ke bakisaka ve bikuma yina ke salaka nde bo lomba beto na kulungisa kisalu na mutindu mosi buna. Kansi, beto ke zabaka  nde kundima bansoba yina Yehowa ke sala, ke natilaka beto mambote mingi.

⁹ Mutindu bankuluntu ke lungisaka kisalu na bo na dibundu, ke monisaka nde bo ke vandaka ti mpusa ya ngolo ya kusala luzolo ya Yehowa. (2 Bak. 1:24; 1 Bate. 5:12, 13) Bo ke vandaka ti luzolo ya kusala mingi mpi ya kuyikana ti bansoba yina ke salama. Bo ke vandaka ti mpusa ya kusadila mitindu ya mpa ya kusamuna Kimfumu yina Nzambi me tulaka. Ziku, bampangi ya nkaka vandaka ntete ti baketi-keti ya kusamuna na nzila ya telefone, na mabungu, to na bisika ya bantu mingi, kansi ntangu fioti na nima, bo bakilaka yo mambote. Mu mbandu, na Allemagne, bankuluntu bakaka ngidika nde dibundu kukwenda kusamuna na teritware ya mumbongo, yina bansamuni mingi vandaka ve kusadila. Yo yina, bapasudi-nzila iya kwendaka kusamuna kuna. Michael, mosi na kati na bo, ke tuba nde: “Beto me taka ntete ve kimbangi ya mutindu yai na nsungi ya bamvula mingi, beto vandaka kudiyangisa mingi. Yo fwete vanda nde Yehowa bakisaka baketi-keti na beto, sambu yandi sadisaka beto na kusala kisalu ya mbote kibeni na suka yina. Beto vandaka na kiese ya kumona nde beto landaka bantuma yina beto bakaka na Kisalu na Beto ya Kimfumu mpi na mutindu beto tudilaka Yehowa ntima!” Keti nge ke vandaka na mpusa ya kumeka kusadila mitindu ya mpa ya kuta kimbangi yina bansamuni ke sadilaka na teritware na beno?

10. Inki bansoba organizasio salaka na bamvula ya me katuka kuluta?

¹⁰ Bantangu ya nkaka, yo ke lombaka nde organizasio kusoba bangidika ya nkaka. Na bamvula yina me katuka kuluta, bo vukisaka bafiliale mingi. Ata bansoba yai salaka nde bampangi yina vandaka kusala na bafiliale yai kusoba mutindu na bo ya kuzinga, na nima bo bakisaka mfunu ya bansoba yai. (Lo. 7:8) Bansadi yai ya luzolo ya mbote kele na kiese kibeni ya kupesa maboko na bisalu yina bansadi ya Yehowa ke sala na bilumbu na beto!

11-13. Inki bampasi bampangi ya nkaka ke kutanaka ti yo sambu na bansoba yina organizasio ya Nzambi ke salaka?

¹¹ Beto lenda baka malongi ya mfunu na mbandu ya bampangi yina vandaka kusala na bafiliale yina bo vukisaka. Bankaka na kati na bo me salaka na Babetele ya bansi na bo bamvula mingi. Bo lombaka mpangi-bakala Rogelio ti nkento na yandi yina vandaka kusala na Betele mosi ya fioti na Amérique Centrale, na kukwenda na Betele ya Mexique yina vandaka nene mingi kuluta Betele na bo. Mpangi Rogelio ke tuba nde: “Kuyambula dibuta mpi banduku na mono vandaka mpasi kibeni.” Juan, mpangi-bakala ya nkaka yina bo tindaka na Mexique ke tuba nde: “Yo kele bonso nde nge me butuka na mbala ya zole; sambu yo ke lomba nde nge zwa banduku ya mpa mpi kuyikana ti luzingu ya mpa.”

¹² Bampangi ya nkaka yina vandaka kusala na bansi ya nkaka ya Eropa, yina bo tindaka na filiale ya Allemagne kutanaka mpi ti mambu ya mutindu mosi. Bampangi ya Suisse yina vandaka kusepela kuzinga na insi na bo yina ke vandaka ti bangumba ya kitoko, lendaka kudiyangisa na kukwenda kuzinga na bisika ya nkaka yina kele ve ti bangumba. Na luyantiku, bampangi yina katukaka na Autriche vandaka kuyindula luzingu yina bo vandaka na yo na insi na bo.

¹³ Ntangu bampangi ke kwendaka na bansi ya nkaka, yo ke lombaka nde bo yikana ti luzingu ya insi yina, kusala kumosi ti bampangi yina bo me zabaka ntete ve, mpi ziku kulonguka kusala bisalu ya mutindu ya nkaka. Yo ke lombaka mpi kuyikana ti dibundu ya mpa mpi ziku kusamuna na ndinga ya mpa. Kusala bansoba yina lenda vanda mpasi. Ata mpidina, bampangi mingi ya Betele me ndimaka bansoba yina na kiese yonso. Sambu na nki?

¹⁴ Mpangi-nkento Grethel ke tuba nde:  “Mono ndimaka kukwenda sambu na kumonisa nde mono ke zolaka Yehowa, mpi nde zola na mono sambu na yandi kele ngolo kuluta zola ya insi, ya nzo, to ya dibaku mosi buna.” Mpangi-nkento Dayska ke tuba nde: “Ntangu mono yindulaka nde Yehowa muntu tindaka mono, mono ndimaka kukwenda na kiese yonso.” André ti Gabriela ke tuba nde: “Beto monaka nde yo vandaka dibaku ya kusadila Yehowa na mutindu ya nkaka mpi kutula bampusa na beto na nima. Beto bakisaka nde, ‘Ntangu organizasio ya Yehowa ke salaka bansoba, yo kele mbote na kundima yo na kiese yonso na kisika ya kuvanda ti baketi-keti.’”

14, 15. (a) Inki mutindu bampangi mingi me monisaka nde bo ke bakaka na mbalu dibaku na bo ya kusala konso kisalu yina Yehowa ke pesa bo? (b) Na nki mambu bo ke pesaka beto mbandu ya mbote?

¹⁵ Ntangu organizasio ke vukisaka Babetele, bo ke tindaka bampangi ya nkaka na kusala bonso bapasudi-nzila. Diambu yai kuminaka bampangi mingi yina vandaka kusala na Babetele ya Danemark, Norvège, mpi Suède yina bo vukisaka ti filiale ya Scandinavie. Na kati na bo, beto lenda tanga bampangi Florian ti Anja, yina ke tuba nde: “Beto ke tadilaka mukumba na beto ya mpa bonso diambu ya kiese kibeni. Beto ke vandaka na kiese nde Yehowa kusadila beto na konso kisika yina. Beto lenda tuba na masonga yonso nde yandi me sakumunaka beto mingi kibeni!” Ata bampangi mingi me salaka ntete ve bansoba yina, keti yo ta lomba ve nde beto vanda ti luzolo ya kulanda mbandu ya bampangi yai na kulanda kutula mambote ya Kimfumu na kisika ya ntete? (Yez. 6:8) Ntangu yonso, Yehowa ke sakumunaka bampangi yina ke bakaka na mbalu dibaku na bo ya kusala kumosi ti yandi na konso kisika yina.

¹⁶ Bantu ya kukonda kukuka ke vandaka ti kikalulu ya kudifwanisa ti bantu ya nkaka. Kansi, Ndinga ya Nzambi ke longisila beto na kutula dikebi na mambu yina beto mosi kele na makuki ya kusala. (Tanga Bagalatia 6:4.) Bampangi mingi ke vandaka ve ti mikumba na organizasio. Diaka, beto yonso ve lenda vanda bapasudi-nzila, bamisionere to kusala na Betele. Ntembe kele nde, yo kele mabaku ya mbote kibeni! Kansi, beto fwete vila ve nde dibaku ya kuluta nene  yina beto yonso lenda vanda ti yo kele ya kuzabisa nsangu ya mbote. Kisalu ya kusamuna ke kumisaka beto banduku ya kisalu ya Yehowa. Yo kele dibaku ya kuluta nene yina beto fwete baka na mbalu mingi!

17. Inki mambu lenda kumina beto sambu beto ke zinga na nsi-ntoto ya Satana, kansi sambu na nki yo fwete lembisa beto ve?

¹⁷ Na nsi-ntoto yai ya Satana, yo lenda vanda mpasi na kusadila Yehowa ti makuki na beto yonso. Sambu, mambu ya nkaka lenda kumina dibuta to mavimpi na beto, yina ziku beto lenda kuka ve kumanisa. Kansi, yo kele ve bikuma yina fwete lembisa beto nitu. Kumona ve mpamba dibaku na nge ya kusala kumosi ti Nzambi, na mutindu nge ke taka kimbangi na zina na yandi mpi ke zabisaka bantu nsangu ya Kimfumu na yandi na mabaku yonso. Diambu ya kuluta mfunu kele nde nge ke sala kumosi ti yandi na kutadila makuki na nge, mpi nge ke sambaka sambu yandi kusakumuna bampangi yina kele ti makuki ya kusala mingi. Kuvila ve nde, konso muntu yina ke pesaka zina ya Yehowa lukumu kele na mbalu na meso na yandi!

¹⁸ Ata beto kele bantu ya kukonda kukuka, Yehowa ke pesaka beto dibaku ya kuvanda banduku na yandi ya kisalu. Diambu yai ke pusaka beto na kubaka na mbalu dibaku na beto ya kusala kumosi ti Nzambi na bilumbu yai ya nsuka! Yo yina, na luzolo yonso, beto fwete tula bampusa na beto mosi na nima, sambu beto ke zaba nde, na nsi-ntoto ya mpa Yehowa ta pesa beto “luzingu ya kieleka,” disongidila, luzingu ya mvula na mvula, ya kiese mpi ya ngemba.—1 Tim. 6:18, 19.

19. Inki Yehowa ta pesa beto na bilumbu ke kwisa?

¹⁹ Sambu beto me kuma pene-pene ya kukota na nsi-ntoto ya mpa, beto fwete yindula mambu yina Moize zabisaka bantu ya Izraele ntangu fioti na ntwala ya kukota na Ntoto ya Lusilu: “[Yehowa] Nzambi na beno, ta sadisaka beno na mambu yonso ya beno ta salaka.” (Kul. 30:9) Na nima ya Armagedoni, Yehowa ta pesa bantu yina salaka kumosi ti yandi nsi-ntoto yina yandi me silaka bo. Na nima, beto ta sala kisalu ya mpa yina yandi ta pesa beto, kukumisa ntoto paladisu ya kitoko!