GUY HOLLIS PIERCE, vandaka Mpangi ya Nto-Kimvuka ya Bambangi ya Yehowa; luzingu na yandi na ntoto sukaka na Kizole Marsi 18, 2014. Yandi fwaka ti bamvula 79, mpi na ntangu yina kivuvu na yandi ya kukuma mpangi ya Kristu lunganaka.—Baeb. 2:10-12; 1 Pie. 3:18.

Guy Pierce butukaka na Auburn, na provense ya Californie, na États-Unis, na Novembri 6, 1934, yandi bakaka mbotika na 1955. Na 1977, yandi kwelaka Penny, nkento yina yandi vandaka kuzola mingi mpi bo butaka bana. Kuvanda tata ya dibuta sadisaka yandi na kuyedisa bikalulu ya mbote ya batata. Na 1982 Guy Pierce ti Penny kumaka bapasudi-nzila, mpi na 1986, bo yantikaka kisalu ya nziunga na États-Unis; bo salaka kisalu yina na nsungi ya bamvula 11.

Na 1997, Guy Pierce ti Penny kumaka kusala na Betele ya États-Unis. Mpangi Pierce vandaka kusala na Departema ya Ke Talaka Kisalu ya Bilanga, mpi na 1998 yandi kumaka nsadisi na Komite Sambu na Bansadi ya Nto-Kimvuka. Na lukutakanu ya konso mvula ya Watch Tower Bible and Tract Society of Pennsylvania, yina bo salaka na Oktobri 2, 1999, bo pesaka nsangu nde Mpangi Pierce me kuma Mpangi ya Nto-Kimvuka. Na bamvula ya me katuka kuluta, yandi salaka na Komite Sambu na Bansadi, Komite Sambu na Kusonika, Komite Sambu na Kubasisa Mikanda, mpi Komite ya Mitambwisi.

Kikalulu ya Mpangi Pierce ya kuseka mpi kusekisa bantu salaka nde bantu ya mitindu yonso kusepela ti yandi. Kansi, bikalulu ya ntete-ntete yina vandaka kusala nde bantu kusepela ti yandi vandaka zola, kudikulumusa, kikalulu na yandi ya kuzitisa bansiku ti minsiku ya lunungu, mpi lukwikilu na yandi ya ngolo na Yehowa. Sambu na Mpangi Guy Pierce, yo lenda salama nde ntangu kubasika ve, kansi balusilu ya Yehowa fwete lungana kaka, mpi yandi zolaka kuzabisa kieleka yai na nsi-ntoto ya mvimba.

Mpangi Pierce vandaka kulemba ve na kusadila Yehowa, yandi vandaka kutelama na suka-suka mpi mbala mingi yandi vandaka kusala tii na mpimpa. Banzietelo yina yandi salaka sambu na kusiamisa bampangi Bakristu, salaka nde yandi tambula na ntoto ya mvimba, mpi yandi vandaka kusepela kulutisa ntangu ti bampangi ya dibuta ya Betele mpi bampangi ya nkaka yina vandaka ti mfunu ya kusolula ti yandi, kubaka bandongisila na yandi, to kusosa lusadisu na yandi. Ata bamvula mingi me luta banda yandi me solulaka ti bampangi, bo ke yibukaka diaka kikalulu na yandi ya kuyamba bantu, kuzinga ti bantu mpi bandongisila ya Biblia yina yandi pesaka bo.

Mpangi mpi nduku na beto Pierce me bika nkento na yandi ti bana 6 mpi bantekolo mingi. Yandi me bika mpi bana mingi ya kimpeve. Mark Sanderson, Mpangi ya Nto-Kimvuka, salaka diskure ya lufwa na yandi na kilumbu ya mposo Marsi 22, 2014 na Betele ya Brooklyn. Na mambu yina Mpangi Sanderson tubaka, yandi tubilaka mpi kivuvu ya Mpangi Pierce ya kuzinga na zulu, mpi yandi tangaka bangogo yai ya Yezu: “Na nzo ya Tata na mono bisika ya kuvanda kele mingi. . . . Kana mono kwenda mpi kuyidikila beno kisika, mono ta kwisa diaka mpi ta yamba beno kisika mono kele, sambu kisika yina mono kele, beno mpi beno vanda. Mpi kisika yina mono ke kwenda beno me zaba nzila.”—Yoa. 14:2-4.

Ya kieleka, beto ta yindulaka Mpangi Pierce mingi kibeni. Ata mpidina, beto ke sepela na mutindu yandi ‘zabaka nzila,’ disongidila, kisika yandi ta zingaka kimakulu.