1. Sambu na nki beto fwete vanda ti bangwisana ya ngolo ti Yehowa?

KETI nge me kudipesaka na Yehowa mpi me bakaka mbotika? Kana mpidina, nge kele ti bangwisana ya mbote ti Nzambi, kima mosi ya mbalu mingi. Kansi, bupusi ya mbi ya nsi-ntoto yai ya Satana mpi nitu na beto ya kukonda kukuka ke sosaka kubebisa bangwisana na beto ti Nzambi. Bakristu yonso ke kutanaka ti bupusi ya mutindu yai. Yo yina, beto fwete sala ngolo sambu bangwisana na beto ti Yehowa kuvanda ngolo.

2. (a) Bangwisana kele nki? (Tala noti na nsi ya lutiti.) (b) Inki mutindu beto lenda kumisa bangwisana na beto ti Yehowa ngolo?

² Keti nge kele kibeni ti bangwisana ya kieleka ti Yehowa? Keti yo ke lomba nde nge kumisa bangwisana yina ngolo? Yakobo 4:8 ke zabisa nge mutindu ya kukumisa bangwisana na nge ti yandi ngolo: “Beno kwenda pene-pene na Nzambi, mpi yandi ta kwisa pene-pene na beno.” Simba nde verse yai ke zabisa beto mambu zole. * Ntangu beto ke kwendaka pene-pene na Nzambi, yandi mpi ke kwisaka pene-pene na beto. Kana beto ke sala bikesa sambu na kukwenda pene-pene na Yehowa malembe-malembe, bangwisana  na beto ti yandi ta kuma ngolo. Ebuna, bangwisana na beto ti Yehowa ta kuma ya kieleka. Beto ta kuma mpi kundima bonso Yezu yina ndimaka nde: “Muntu yina tindaka mono kele muntu ya kieleka . . . Mono me zaba yandi.” (Yoa. 7:28, 29) Kansi, inki bikesa nge lenda sala kibeni sambu na kukwenda pene-pene na Yehowa?

3. Inki mutindu beto ke solulaka ti Yehowa?

³ Kusolula mbala na mbala ti Yehowa kele diambu ya mfunu yina ta sadisa nge na kukwenda pene-pene na yandi. Inki mutindu nge lenda solula ti Nzambi? Sambu na kuzwa mvutu na ngiufula yai, beto tadila mutindu nge ke solulaka ti nduku na nge yina ke zingaka ntama. Ntembe kele ve nde, nge ke sonikilaka yandi mikanda, yandi mpi ke sonikilaka nge, to beno ke solulaka na telefone mbala na mbala. Mutindu mosi mpi, nge lenda solula mbala na mbala ti Yehowa na nzila ya kisambu. (Tanga Nkunga 142:3.) Yehowa mpi ke zabisaka nge mambu, ntangu nge ke tangaka Ndinga na yandi mpi ke yindululaka na yo. (Tanga Yezaya 30:20, 21.) Bika beto tadila mutindu banzila yai zole ke kumisaka bangwisana na beto ti Yehowa ngolo mpi ya kieleka.

4, 5. Inki mutindu Yehowa ke solulaka ti nge na nzila ya Ndinga na yandi? Pesa mbandu.

⁴ Nge ke ndimaka nde Biblia kele ti nsangu ya Nzambi sambu na bantu yonso. Kansi, keti Biblia ke monisa mpi nde nge lenda kwenda pene-pene na Yehowa? Ee! Ntangu nge ke tanga mpi ke longuka Biblia mbala na mbala, sosa kuzaba mutindu nge ke tadilaka mambu yina Biblia ke tubaka mpi tadila mutindu nge lenda sadila mambu yina na luzingu na nge. Mpidina, yo ta monisa nde nge ke solula ti Yehowa na nzila ya Ndinga na yandi. Kusala mpidina ke kumisaka bangwisana na beto ti yandi ngolo.—Baeb. 4:12; Yak. 1:23-25.

⁵ Mu mbandu, yindula nde nge ke tanga mpi ke yindulula na bangogo yai ya Yezu: “Beno bika kufulusa sambu na beno mosi bima ya ntalu na ntoto.” Kana na luzingu na nge, nge ke mona nde nge ke tulaka dezia mambote ya Kimfumu na kisika ya ntete, nge ta bakisa nde Yehowa ke sikisa nge. Kansi, kana nge ke mona nde nge ke salaka yo ve, zaba nde Yehowa ke siamisa nge na kukumisa luzingu na nge pete sambu nge tula mambote ya Kimfumu na kisika ya ntete, kusala mpidina ta sadisa nge na kukwenda pene-pene na yandi.—Mat. 6:19, 20.

6, 7. (a) Inki bupusi kulonguka Biblia ke vandaka ti yo na bangwisana na beto ti Yehowa? (b) Inki fwete vanda lukanu na beto ntangu beto ke longuka Biblia?

⁶ Kulonguka Biblia ke sadisaka beto kaka ve na kumona mambu yina beto fwete yidika sambu na kuyela na kimpeve. Yo ke sadisa  beto mpi na kuyedisa ntonda na bikalulu ya mbote ya Yehowa, mpi na kuzola yandi diaka mingi. Ntangu zola na beto sambu na Yehowa ke yelaka, yandi ke kumaka diaka kuzola beto mingi, ebuna bangwisana na beto ti yandi ke kumaka ngolo.—Tanga 1 Bakorinto 8:3.

⁷ Kansi, sambu na kukwenda pene-pene na Yehowa, yo ke lomba nde beto longuka Ndinga na yandi mbote-mbote. Yoane 17:3 ke tuba nde: “Yai ke tendula luzingu ya mvula na mvula, bo longuka na kuzaba nge, Nzambi mosi kaka ya kieleka, mpi muntu yina nge tindaka, Yezu Kristu.” Lukanu na beto fwete vanda kaka ve ya kubaka nzayilu ya Yehowa, kansi ya kulonguka mpi na “kuzaba” kimuntu ya Yehowa mbote-mbote.—Tanga Kubasika 33:13; Nk. 25:4.

8. (a) Inki baketi-keti lenda basika ntangu beto ke tanga 2 Bantotila 15:1-5, ya ke tubila mambu yina Yehowa sadilaka Ntotila Azaria? (b) Inki mutindu kuzaba Yehowa mbote-mbote ke katulaka baketi-keti yina beto lenda vanda na yo?

⁸ Kana beto me zaba Yehowa mbote-mbote, beto ta kudiyangisa mingi ve ntangu masolo ya nkaka ya Biblia ke tubila mpenza ve bikuma yina pusaka yandi na kusala diambu mosi buna. Mu mbandu, inki mutindu nge ke tadilaka ndola yina Nzambi pesaka Azaria, Ntotila ya Yuda? (2 Bant. 15:1-5) Simba nde, ata ‘bantu vandaka kukwenda kupesa makabu ya bambisi mpi ya bima na banzambi ya biteki,’ Azaria ‘landaka kusala mambu yina pesaka Mfumu Nzambi kiese.’ Kansi, Yehowa ‘tindilaka Azaria maladi mosi ya ngolo: yandi belaka maladi ya lepre, mpi yandi belukaka ve tii na lufwa.’ Sambu na nki? Disolo yai ke monisa ve kikuma. Keti beto fwete kudiyangisa mpi kuyindula nde Yehowa pesaka Azaria ndola kukonda kikuma? Kana beto kele ti nzayilu ya siki-siki na mutindu Yehowa ke salaka mambu, beto ta kudiyangisa ve. Beto fwete yibuka nde ntangu yonso Yehowa ke pesaka ndola na kiteso ya me fwana. (Yer. 30:11) Kuzaba mpidina ta ndimisa beto nde, ata beto me bakisa ve kikuma yina pusaka Yehowa na kulosila Azaria maladi, beto fwete vanda ti kivuvu nde Yehowa salaka mambu na lunungu.

9. Inki ke sadisa beto na kubakisa bikuma yina pusaka Yehowa na kulosila Azaria lepre?

⁹ Kansi, disolo ya nkaka ya Biblia ke sadisa beto na kubakisa mambu ya nkaka ya me tala Ntotila Azaria. Bo vandaka mpi kubinga Ntotila Azaria na zina ya Ntotila Oziasi. (2 Bant. 15:7, 32) Disolo na yandi yina kele na 2 Bansangu 26:3-5, 16-21, ke monisa nde na nsungi mosi buna Oziasi salaka mambu ya mbote na meso ya Yehowa, kansi na nima, “Oziasi kumaka lulendo sambu na ngolo na yandi, yo yina yandi [bwaka].” Na lulendo yonso, yandi sosaka kusala bisalu yina banganga-nzambi mpamba vandaka na nswa ya kusala. Banganga-nzambi 81 telaminaka yandi mpi salaka bikesa sambu na kusungika yandi. Kansi, yandi wilaka bo ve! Nkutu, yandi monisaka kibeni nde yandi kumaka muntu ya lulendo, sambu yandi “wilaka banganga-nzambi makasi.” Yo yina, Yehowa losilaka yandi lepre!

10. Sambu na nki beto fwete sosa ve ntangu yonso bikuma yina pusaka Yehowa na kusala diambu mosi buna, mpi nki ta sadisa beto na kutula ntima nde Yehowa ke salaka mambu yonso na lunungu?

¹⁰ Inki dilongi ya mfunu beto me baka? Kana Biblia me monisa ve mambu yonso ya me tala diambu mosi buna, mutindu beto ke monaka yo na masolo ya nkaka yina Biblia ke tubilaka na bunkufi, yo me fwana ve na kutuba nde Yehowa kele Nzambi ya kukonda lunungu. Beto fwete zaba nde Biblia kele ti masolo mingi yina me fwana na kundimisa beto nde Yehowa ke salaka ntangu yonso mambu ya mbote. (Kul. 32:4) Kana beto me zaba kimuntu ya Yehowa mbote, zola na beto sambu na yandi mpi nzayilu yina beto kele na yo na mutindu na yandi ya kusala mambu, ta kanga beto nzila na kusosa kuzaba bikuma yina pusaka yandi na kusala mambu ya nkaka yina beto ke tangaka na Biblia. Kana nge ke sala bikesa ya kulonguka mpi kuyindulula na mambu yina Nzambi ke zabisa nge na  nzila ya Ndinga na yandi, vanda ti kivuvu nde nge ta kuma kutonda Yehowa mingi. (Nk. 77:12, 13) Mpidina, bangwisana na nge ti Yehowa ta kuma ngolo mpi ya kieleka.

11-13. Inki ke ndimisa nge nde Yehowa ke waka bisambu na beto? (Tala kifwanisu yina kele na luyantiku ya disolo.)

¹¹ Bisambu ke sadisaka beto na kukwenda pene-pene na Yehowa. Ntangu beto ke sambaka, beto ke pesaka yandi lukumu, ntonda mpi ke sosaka lutwadisu na yandi. (Nk. 32:8) Kansi, sambu bangwisana na nge ti Yehowa kuvanda ya kieleka, nge fwete ndima nde yandi ke waka bisambu.

¹² Bantu ya nkaka ke tubaka nde Nzambi ke waka ve bisambu, kansi kisambu kele kaka ngidika mosi yina ke sadisaka bantu na kulembika mabanza na bo. Nkutu, bo ke yindulaka nde kisambu ke sadisaka muntu na kubakisa kaka mpasi yina yandi kele na yo mpi kusosa kuyidika mambu yandi mosi. Ya kieleka kisambu lenda sadisa mpi muntu na mutindu yina bo ke yindulaka, kansi kana nge ke samba Yehowa, yandi ta widikila nge kibeni. Inki lenda ndimisa nge kibeni nde Yehowa ke waka bisambu na nge ya masonga?

¹³ Ntangu Yezu vandaka na zulu, yandi vandaka kumona mutindu Yehowa vandaka kupesa mvutu na bisambu ya bansadi na yandi awa na ntoto. Yo yina, ntangu Yezu kwisaka na ntoto, yandi vandaka kuzabisa Tata na yandi mambu yina vandaka kuyangisa yandi na kisambu. Kana Yezu zabaka nde Tata na yandi ke waka ve bisambu, keti yandi zolaka kulutisa mpimpa ya mvimba na kusamba? (Luka 6:12; 22:40-46) Kana yandi zabaka nde kisambu kele kaka ngidika mosi yina ke lembikaka mabanza ya bantu, keti yandi zolaka kuzabisa balongoki na yandi na kusamba? Ya kieleka, Yezu zabaka nde kisambu kele ngidika ya kieleka yina ke pesaka bantu dibaku ya kusolula ti Yehowa. Na dibaku mosi, yandi zabisaka Tata na yandi nde: “Tata, mono ke tonda nge na mutindu nge me wila mono.” Beto fwete tula mpi kivuvu nde Yehowa “ke ndimaka bisambu ya bantu.”—Yoa. 11:41, 42; Nk. 65:3.

14, 15. (a) Inki mambote beto lenda baka kana beto ke monisa pwelele bampusa na beto na kisambu? (b) Inki mutindu bisambu ya mpangi-nkento mosi kumisaka bangwisana na yandi ti Yehowa ngolo?

¹⁴ Kana nge ke monisa pwelele bampusa na nge na bisambu, nge ta bakisa nde Yehowa ke pesaka mvutu na bisambu na nge, ata yandi me pesa mvutu na mutindu mosi yina  ke monana ve pwelele. Ntangu nge ke bakisa nde Yehowa ke pesaka mvutu na bisambu na nge, nge ta kuma kumona yandi kibeni muntu ya kieleka. Diaka, kana nge ke zabisa Yehowa mawi yina kele kibeni na kati ya ntima na nge, yandi ta kwisa pene-pene na nge.

¹⁵ Bika beto tadila mbandu ya Kathy. * Yandi vandaka kusamuna mbala na mbala, kansi yandi vandaka ve kuzola kisalu ya kusamuna. Yandi ke tuba nde: “Mono vandaka ve kusepela na kisalu ya kusamuna. Ya kieleka, mono vandaka kuzola yo ve. Ntangu mono bakaka pansio, nkuluntu mosi siamisaka mono na kusala kisalu ya kimupasudi-nzila; nkutu yandi pesaka mono formilere. Mono bakaka lukanu ya kukuma mupasudi-nzila, mpi mono kumaka kusamba konso kilumbu sambu Yehowa kusadisa mono na kukuma kuzola kisalu ya kusamuna.” Keti Yehowa pesaka mvutu na bisambu na yandi? Kathy ke tuba nde: “Bubu yai, mono me lungisa bamvula tatu na kisalu ya kimupasudi-nzila. Na nima ya kulutisa ntangu mingi na kisalu ya kusamuna mpi kubaka eksperiansi ya bampangi-bankento ya nkaka, malembe-malembe, mono tomisaka mutindu na mono ya kusamuna. Bubu yai, mono ke sepelaka kaka ve na kisalu ya kusamuna, kansi mono ke zolaka yo mingi. Bangwisana na mono ti Yehowa me kumaka diaka ngolo.” Ya kieleka, bisambu ya Kathy me sadisaka yandi na kubakisa nde bangwisana na yandi ti Yehowa kele ya kieleka.

16, 17. (a) Inki beto fwete sala sambu na kutanina bangwisana na beto ti Yehowa mpi kukumisa yo ngolo? (b) Inki beto ta tadila na disolo ya ke landa?

¹⁶ Beto fwete landa na kukumisa bangwisana na beto ti Yehowa ngolo. Kana beto ke zola nde Nzambi kukwisa pene-pene na beto, beto fwete sala bitambi yina ta nata beto pene-pene na yandi. Yo yina, bika beto landa na kusolula mbala na mbala ti Nzambi na nzila ya lutangu ya Biblia mpi ya kisambu. Kana beto ke sala mpidina, bangwisana na beto ti Yehowa ta kuma ngolo mpi yo ta sadisa beto na kununga bampasi.

¹⁷ Kansi, bantangu ya nkaka mambu ya mpasi lenda landa na kuyangisa beto ata beto ke kwamina na kusamba sambu na yo. Kana mambu yai me kumina beto, beto lenda vidisa kivuvu yina beto ke tudilaka Yehowa. Beto lenda yantika kudiyula kana Yehowa ke waka kibeni bisambu na beto, to kana yandi ke tudilaka beto kibeni dikebi. Inki lenda ndimisa beto nde bangwisana na beto ti Yehowa kele ya kieleka? Disolo yina ke landa ta monisa yo.