ATA nti ya olive kele ti batangu mpi matiti mingi, yo ta monana fioti kana beto fwanisa yo ti nti ya sedre ya Libani. Kansi, nti ya olive lenda landa kuzinga ata mambu ya nkaka ya lugangu ke yangisa yo. Bantu ya nkaka ke tubaka nde yo lenda zinga tii na kiteso ya bamvula 1 000. Bansimbulu ya nti ya olive ke vandaka nda mpi yo ke sadisaka nti yai na kumena diaka ata bo me zenga yo. Kana bansimbulu na yo me bikala na ntoto, nsuka-nsuka yo ta mena diaka.

Yobi vandaka kundima nde ata yandi me fwa yandi ta zinga diaka. (Yobi 14:13-15) Yandi tubilaka nti mosi, ziku nti ya olive, sambu na kumonisa kivuvu yina yandi vandaka na yo nde Nzambi kele ti ngolo ya kufutumuna yandi. Yandi tubaka nde: “Nti kana bo me zenga yo, bo lenda tula ntima nde yo ta mena diaka.” Kana nsungi ya musipu me mana, mvula yina ke nokaka ke sadisaka nti ya olive yina vandaka ya kuyuma na ‘kubasisa diaka matiti’ yina ke yelaka diaka, nsuka-nsuka yo ke basisaka batangu yina ke yelaka bonso nti ya mpa.—Yobi 14:7-9.

Kaka mutindu musadi-bilanga ke vandaka na mpusa ya kumona nti ya olive yina bo zengaka ke yela diaka, Yehowa Nzambi ke vandaka mpi na mpusa ya kufutumuna bansadi na yandi mingi yina me fwaka. (Mat. 22:31, 32; Yoa. 5:28, 29; Bis. 24:15) Beto ta vanda na kiese ya mingi kibeni na kuyamba mpi kumona bantu yina fwaka ke zinga diaka!