1. Beto ke zinga na nki ntangu?

BETO ke zinga na “bantangu ya mpasi.” Banda na 1914, mvula yina “bilumbu ya nsuka” yantikaka, mambu ya nsi-ntoto ke kuma kaka mbi kuluta. (2 Timoteo 3:1-5) Mpi beto ke ndima nde mambu ya nsi-ntoto ta landa kaka kukuma mbi, sambu mbikudulu ya Biblia ke tuba nde “bantu ya mbi mpi bantu ya luvunu ta salaka diaka mbi kuluta.”—2 Timoteo 3:13.

2. Bansaka ya nki mutindu bantu mingi ke sepelaka na yo? (Tala kifwanisu yina kele na luyantiku ya disolo.)

² Bubu yai sambu na kulutisa ntangu, bantu mingi ke talaka to ke salaka mambu ya mubulu, ya mansoni, ya mazi to ya kindoki. Mu mbandu, Internet, televizio, bafilme, mikanda, mpi bazulunalu ke monisaka mbala mingi nde mubulu mpi mansoni kele mbi ve. Mambu yina bantu vandaka ntete kumona mbi me kumaka mbote bubu yai, nkutu na bisika ya nkaka leta ke ndimaka yo. Kansi beto fwete yindula ve nde Yehowa mpi ke ndimaka mambu ya mutindu yai.—Tanga Baroma 1:28-32.

3. Inki mutindu bantu mingi ke tadilaka bantu yina ke lemfukaka na bansiku ya Nzambi?

 ³ Na mvu-nkama ya ntete, bantu vandaka kutala mpi mambu ya mubulu ti ya mansoni na bansaka ya kulutisila ntangu. Kansi, balongoki ya Yezu salaka yo ve sambu bo vandaka kulemfuka na bansiku ya Nzambi. Kikalulu yai ya balongoki ‘yitukisaka’ bantu ya nziunga na bo. Inki salamaka? Bantu vwezaka bo mpi bangikaka bo. (1 Piere 4:4) Bubu yai mpi, bantu mingi ke yindulaka nde bantu yina ke lemfukaka na bansiku ya Nzambi kele bantu ya mpamba-mpamba. Nkutu, Biblia tubaka na ntwala nde bantu yina ta landa mbandu ya Yezu Kristu “bo ta monisa bo mpi mpasi.”—2 Timoteo 3:12.

4. Sambu na nki beto fwete zola ve nsi-ntoto yai?

⁴ Kana beto ke zola kusala luzolo ya Nzambi, beto fwete zola ve “nsi-ntoto mpi bima yina kele na nsi-ntoto.” (Tanga 1 Yoane 2:15, 16.) Satana, “nzambi ya ngidika yai ya bima,” ke yala nsi-ntoto yai. Yandi ke sadila mabundu, baluyalu, bimvuka yina ke talaka mambu ya mumbongo mpi bima yina ke mwangaka bansangu sambu na kukusa bantu. (2 Bakorinto 4:4; 1 Yoane 5:19) Beto ke zolaka ve nde nsi-ntoto yai kuvanda ti bupusi na luzingu na beto, yo yina beto fwete buya banduku ya mbi. Biblia ke kebisa beto pwelele nde: “Muntu kukusa beno ve. Banduku ya mbi ke bebisaka bikalulu ya mbote.”—1 Bakorinto 15:33.

5, 6. Beto fwete sala ve kinduku ti banani, mpi sambu na nki?

⁵ Sambu na kutanina bangwisana na beto ya mbote ti Yehowa, beto fwete sala ve kinduku ti bantu yina ke salaka mambu ya mbi. Beto fwete sala ve mpi kinduku ti bantu yina ke tubaka nde bo ke sambilaka Yehowa, kansi bo ke lemfukilaka yandi ve. Kana bantu ya mutindu yai me sala disumu ya nene mpi me balula ve ntima, beto fwete fwa kinduku ti bo.—Baroma 16:17, 18.

⁶ Mbala mingi, bantu ke zolaka kusepedisa banduku na bo, mpi bo ke salaka mambu sambu banduku na bo kundima bo. Yo yina, kana beto ke sala kinduku ti bantu yina ke lemfukilaka ve Nzambi, beto lenda kuma kusala mambu yina bo ke salaka. Mu mbandu, kana beto ke sala kinduku ti bantu yina ke salaka mansoni, beto mpi ta kuma bonso bo. Mambu ya mutindu yai me kuminaka bampangi ya nkaka ya babakala mpi ya bankento. Mpi bo basisaka bayina balulaka ve ntima na dibundu. (1 Bakorinto 5:11-13) Kana bampangi ya mutindu yai me balula ve ntima, luzingu na bo lenda kuma bonso ya bantu yina Piere tubilaka.—Tanga 2 Piere 2:20-22.

7. Beto fwete sala kinduku ti banani?

⁷ Ata beto ke zolaka kuzinga mbote ti bantu yonso, beto fwete kangama ve ti bantu yina ke lemfukilaka ve Nzambi. Yo kele mbi nde Mbangi ya Yehowa kukwelana ti muntu yina me bakaka ve mbotika. Kundimama na Nzambi kele mbote mingi kuluta kundimama  na bantu yina ke zolaka ve Yehowa. Beto fwete sala kinduku kaka ti bantu yina ke sadilaka Yehowa. Yezu tubaka nde: “Konso muntu yina ke salaka luzolo ya Nzambi, yandi muntu kele mpangi na mono ya bakala mpi ya nkento mpi mama na mono.”—Marko 3:35.

8. Inki mutindu banduku ya mbi bebisaka bikalulu ya mbote ya bantu ya Izraele?

⁸ Banduku ya mbi ke nataka bantu na nzila ya mbi. Beto tadila mambu yina kuminaka bantu ya Izraele. Na ntwala ya kukota na Ntoto ya Lusilu, Yehowa kebisaka bo sambu na bantu yina vandaka kuzinga dezia na insi yina. Yandi tubaka nde: “Beno lenda fukama ve na ntwala ya banzambi na bo sambu na kusambila bo; beno lenda sala ve mambu ya bantu yina ke sala; banzambi na bo, beno ta fwa-fwa bo yonso; makunzi ya matadi yina ya bo tedimisaka sambu na kusambila, beno fweti panza-panza yo. Beno fweti samba mono Mfumu Nzambi.” (Kubasika 23:24, 25) Kansi, bantu mingi ya Izraele kolamaka na bantuma yai ya Nzambi. (Nkunga 106:35-39) Inki Yehowa salaka? Nsuka-nsuka yandi yambulaka dikanda ya Izraele mpi solaka dibundu ya Bukristu na kukuma bantu na yandi.—Matayo 23:38; Bisalu 2:1-4.

9. Sambu na nki bansangu yina bo ke pesaka na bima yina ke mwangaka bansangu kele kigonsa?

⁹ Bansangu mingi yina bo ke pesaka na televizio, na Internet, mpi na bazulunalu lenda bebisa bangwisana na beto ti Yehowa. Bansangu yina bo ke pesaka ke vandaka ve sambu na kusadisa Bakristu na kukumisa ngolo lukwikilu na bo na Yehowa mpi na balusilu na yandi. Kansi, yo ke siamisaka bantu na kutula kivuvu na nsi-ntoto ya mbi ya Satana. Yo yina, beto fwete keba na kutala ve, kutanga ve mpi kuwidikila ve mambu yina lenda pusa beto na kukuma ti “banzala ya nsi-ntoto.”—Tito 2:12.

10. Inki ta kumina bima ya nsi-ntoto yina ke mwangaka bansangu?

¹⁰ Ntama mingi ve, nsi-ntoto ya Satana ti bima na yo yina ke mwangaka bansangu ya mbi ta vanda diaka ve. Biblia ke tuba nde: “Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.” (1 Yoane 2:17) Muyimbi bankunga yimbaka mpi nde: “Bantu yina ke salaka mbi Nzambi ta kula bo.” Yandi yikaka nde: “Bantu yina ke kudikulumusaka, bo ta zinga mbote na ngemba mpenza na ntoto.” Sambu na bamvula ikwa? “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna,” disongidila mvula na mvula.—Nkunga 37:9, 11, 29.

11. Inki mutindu Nzambi ke sadisaka beto na kubikala ya kwikama na yandi?

¹¹ Na kuswaswana ti nsi-ntoto ya Satana, organizasio ya Yehowa ke sadisaka beto na kuzinga luzingu yina ke nataka na luzingu ya mvula na mvula. Yezu sambaka Yehowa nde: “Yai ke tendula luzingu ya mvula na mvula, bo longuka na kuzaba nge, Nzambi mosi kaka ya kieleka, mpi muntu yina nge tindaka, Yezu Kristu.” (Yoane 17:3) Na nzila ya organizasio na yandi, Yehowa ke pesaka beto bima yonso yina beto kele na yo mfunu sambu na kuzaba yandi. Mu mbandu, beto ke bakaka bazulunalu, tumikanda, bavideo mpi beto kele ti site ya Internet yina ke sadisaka beto na kulanda kusadila Nzambi. Organizasio ya Yehowa ke yidikaka mpi  balukutakanu mbala na mbala na mabundu kuluta 110 000 yina kele na ntoto ya mvimba. Mambu yina beto ke longukaka na balukutakanu yai mpi na balukutakanu ya nene ke kumisaka ngolo lukwikilu na beto na Yehowa mpi na balusilu na yandi.—Baebreo 10:24, 25.

12. Tendula nsiku ya Biblia ya kukwela “kaka na Mfumu.”

¹² Bakristu yina ke zola kukwela fwete keba na bantu yina ta vanda bankwelani na bo. Ndinga ya Nzambi ke kebisa beto nde: “Beno vukana ve ti bantu yina ke kwikilaka ve. Sambu nki kuwakana kele na kati ya lunungu mpi kufwa bansiku? To nki kuwakana kele na kati ya nsemo mpi mudidi?” (2 Bakorinto 6:14) Biblia ke lombaka bansadi ya Nzambi na kukwela “kaka na Mfumu,” disongidila kukwela kaka muntu yina me kudipesaka na Yehowa, me bakaka mbotika mpi ke zitisaka bansiku ya Yehowa. (1 Bakorinto 7:39) Kana nge kwela muntu yina ke zolaka Yehowa, yandi ta sadisa nge na kubikala ya kwikama na Nzambi.

13. Inki nsiku Nzambi pesaka bantu ya Izraele na yina me tala makwela?

¹³ Yehowa ke zabaka mambu yina kele mbote sambu na beto, mpi nsiku na yandi ya kukwela “kaka na Mfumu” kele ve diambu mosi ya mpa. Mu mbandu, beto tadila mambu yina Yehowa zabisaka bantu ya Izraele sambu na bantu ya makanda yina vandaka ve kusambila yandi. Na nzila ya Moize, yandi pesaka nsiku yai: “Beno lenda kwela bo ve, beno lenda pesa mpi bana na beno nzila ve na kukwela bo, mbaimbai bo ta benda bana na beno na kuvila mono Mfumu Nzambi ti na kusamba banzambi ya nkaka. Ebuna Mfumu Nzambi ta wila beno makasi, yandi ta fwa beno na mbala mosi.”—Kulonga 7:3, 4.

14, 15. Inki kuminaka Salomo sambu yandi buyaka kuzitisa nsiku ya Yehowa?

¹⁴ Ntangu fioti na nima ya kukuma Ntotila ya Izraele, Salomo sambaka Yehowa na kupesa yandi mayele, mpi Yehowa pesaka yandi yo. Ebuna, Salomo kumaka Ntotila ya nene mpi ya mayele na insi yina tomaka mingi. Nkutu, ntotila-nkento ya Sheba yitukaka sambu na mayele ya Salomo, yandi tubaka nde: “Mayele na nge ti kimvwama na nge me luta yonso ya mono waka!” (1 Bantotila 10:7) Kansi, mbandu ya Salomo ke monisa mpi mambu yina lenda kumina muntu yina ke buya kuzitisa nsiku ya kukwela kaka muntu yina ke sadilaka Yehowa.—Longi 4:13.

¹⁵ Ata Yehowa sakumunaka Salomo, Salomo buyaka kulemfuka na nsiku ya Nzambi yina kele pwelele. Salomo ‘zolaka bankento mingi ya bansi ya nzenza’ yina vandaka ve kusadila Yehowa, mpi na nima yandi kwelaka bankento 700 mpi bakaka bankento ya makangu 300. Inki mambu kuminaka Salomo? Ntangu yandi kumaka mbuta, bankento na yandi “bendaka yandi na kusamba banzambi ya nkaka, . . . yandi salaka mbi na meso ya Mfumu Nzambi.” (1 Bantotila 11:1-6) Banduku ya mbi pusaka Salomo na kubikala diaka ve ya kwikama na Yehowa. Mambu  yina kuminaka Salomo lenda kumina beto mpi. Yo yina beto ke yindulaka ve ata fioti kukwela muntu yina ke zolaka ve Yehowa!

16. Inki ndongisila Biblia ke pesa mpangi yina kele ti nkwelani yina ke sambilaka ve Yehowa?

¹⁶ Inki beto lenda tuba sambu na muntu yina me kuma Mbangi ya Yehowa kansi nkwelani na yandi kele ve Mbangi ya Yehowa? Biblia ke tuba nde: “Beno bankento, beno lemfukila babakala na beno, na mpila nde, kana bankaka na kati na bo ke lemfuka ve na ndinga ya Nzambi, bo kuma kulemfuka na nzila ya bikalulu ya bankento na bo kukonda nde beno tuba ata kima mosi.” (1 Piere 3:1) Ya kieleka, ndongisila yai ke tadila mpi bakala yina nkento na yandi ke sambilaka ve Yehowa. Ndinga ya Nzambi ke tuba pwelele nde: Vanda bakala to nkento ya mbote mpi zitisa bansiku ya Nzambi ya me tala makwela. Ebuna, ntangu nkwelani na nge ta bakisa nde nge me soba mpi me tomisa bikalulu na nge, yandi lenda sepela mpi kusadila Yehowa. Bankwelani mingi me monaka kieleka na diambu yai.

17, 18. Inki sadisaka Noa na kuguluka na Mvula ya Ngolo, mpi nki sadisaka Bakristu ya mvu-nkama ya ntete na kuguluka na lufwa ya Yeruzalemi?

¹⁷ Banduku ya mbi lenda pusa nge na kukolama na Yehowa, kansi banduku ya mbote ta sadisa nge na kubikala ya  kwikama na Yehowa. Noa me bikilaka beto mbandu ya mbote. Yandi zingaka na nsungi mosi yina “bantu vandaka kusala mambu ya mbi mingi” mpi “ntangu yonso bo vandaka kaka na bangindu ya mbi mpenza na ntima na bo.” (Kuyantika 6:5) Bantu vandaka kusala mambu ya mbi kibeni, yo yina Yehowa bakaka lukanu ya kufwa nsi-ntoto yina ya mbi. Kansi Noa vandaka ve kusala mambu yina bantu vandaka kusala. Biblia ke tuba nde yandi vandaka “muntu ya mbote” yina “vandaka kuwakana na Nzambi.”—Kuyantika 6:7-9.

¹⁸ Noa salaka ve kinduku ti bantu yina vandaka ve kuzola Yehowa. Yandi ti dibuta na yandi kudipesaka na kutunga maswa, mpi yandi vandaka “nsamuni ya lunungu.” (2 Piere 2:5) Noa, nkento na yandi, bana na yandi tatu ya babakala mpi bankento na bo vandaka kuzinga na kinduku ya mbote na kati na bo. Bo kudipesaka na mambu yina vandaka kupesa Nzambi kiese, yo yina bo gulukaka na Mvula ya Ngolo. Beto yonso bubu yai kele bantekolo na bo, yo yina beto fwete monisila Noa mpi dibuta na yandi ntonda na mutindu bo lemfukilaka Yehowa mpi salaka ve kinduku ti bantu ya mbi. Bakristu ya mvu-nkama ya ntete mpi salaka ve kinduku ti bantu yina vandaka ve kuzola Yehowa. Bo lemfukilaka Yehowa yo yina bo gulukaka na lufwa ya Yeruzalemi na mvu 70 T.B.—Luka 21:20-22.

19. Inki ta sadisa beto na kubikala ya kwikama na Yehowa?

¹⁹ Na mbandu ya Noa, ya dibuta na yandi mpi ya Bakristu ya mvu-nkama ya ntete, beto ke salaka ve kinduku ti bantu yina ke zolaka ve Yehowa. Beto kele ti bampangi mingi ya babakala mpi ya bankento ya kwikama yina beto lenda sala kinduku ti bo. Bo lenda sadisa beto na ‘kutelama ngolo na lukwikilu’ na bilumbu yai ya mpasi. (1 Bakorinto 16:13; Bingana 13:20) Yindula kiese yina beto ta wa ntangu beto ta guluka kilumbu Nzambi ta fwa nsi-ntoto yai ya mbi mpi ntangu beto ta zinga na nsi-ntoto ya mpa ya Yehowa! Yo kele mfunu nde banda bubu yai, beto buya banduku ya mbi!